Tue Apr 29 2025, 03:12 AM

Urdu Section ( 24 Sept 2022, NewAgeIslam.Com)

The Muslim Who Recalls Death The Most Is the Most Wise and Understanding Muslim Part-101 وہ مسلمان سب سے زیادہ ہوشیار اور سمجھ والا ہے جو موت کو سب سے زیادہ یاد کرتا ہو

مولانا ندیم الواجدی

16 ستمبر،2022

سریہ دومۃ الجندل

اس سرایّے کی روانگی کے سلسلے میں حضرت عبداللہ بن عمرؓ کی ایک طویل روایت ہے، فرماتے ہیں:ہم دس لوگ رسول اللہ صلی اللہ علیہ وسلم کی مجلس میں حاضر تھے، ابوبکر،عمر، عثمان ، علی ، عبدالرحمن بن عوف، عبداللہ بن مسعود ، معاذ بن جبل ، حذیفہ الیمان ، ابوسعید الخدی اور دسواں میں (رضی اللہ تعالیٰ عنہم اجمعین) اتنے میں ایک انصاری نوجوان حاضر خدمت ہوا اور سلام کرکے بیٹھ گیا ، (پھر) اس نے عرض کیا:

یا رسول اللہ صلی اللہ علیہ وسلم ! سب سے اچھا مسلمان کون سا ہے ؟ آپ صلی اللہ علیہ وسلم نے فرمایا وہ مسلمان سب سے بہتر ہے جس کے اخلاق سب سے اچھے ہوں ۔ اس نے پھر پوچھا: یا رسول اللہ صلی اللہ علیہ وسلم ! سب سے زیادہ ہوشیار اور سمجھدار مسلمان کون سا ہے؟ آپ صلی اللہ علیہ وسلم نے فرمایا : وہ مسلمان سب سے زیادہ سمجھ والا ہے جو موت کو سب سے زیادہ یاد کرتا ہو، اور موت آنے سے پہلے موت کی سب سے زیادہ تیاری کرنے والا ہو، ایسے ہی لوگ سمجھ دار اور ہوشیار ہوتے ہیں۔ سنن ماجہ میں یہ روایت اتنی ہی ہے البتہ دوسری کتابوں میں اضافہ بھی ہے، روایٔ حدیث حضرت عبداللہ بن عمرؓ مزید فرماتے ہیں کہ نوجوان تو یہ دو سوال پوچھ کر خاموش ہوگیا ، اس کے بعد آپ صلی اللہ علیہ وسلم ہم لوگوں کی طرف متوجہ ہوئے اور فرمایا: اے گروہ مہاجرین ! پانچ عادتیں ایسی ہیں کہ اگر وہ تم میں پیدا ہوجائیں یا تم ان میں مبتلا ہو جاؤ ، خدا نہ کرے ایسا ہو تو وہ بہت خطرناک ثابت ہوتی ہیں:

(1)جس قوم میں بے حیائی عام ہوجاتی ہے اس میں طاعون کی بیماری پھیل جاتی ہے اور وہ ایسی بیماریوں میں مبتلا ہوجاتی ہے جو پہلی نسلوں میں نہ دیکھی گئیں اور نہ سنی گئیں۔

(2)جو لوگ کم تولتے ہیں ، یا کم ناپتے ہیں ان کو قحط سالی میں مبتلا کردیا جاتا ہے ، یا وہ شدید ترین مصائب میں گرفتار کر لئے جاتے ہیں یا ان پر ظالم حکمراں مسلط کردیئے جاتے ہیں ۔

(3)جو قوم اپنے مال کی زکوٰۃ نہیں نکالتی اس سے بارش روک لی جاتی ہے ، اگر جانور نہ ہوتے تو کسی کو ایک قطرہ بھی بارش کا میسر نہ آتا۔

(4) جو لوگ اللہ اور اس کے رسول صلی اللہ علیہ وسلم کے ساتھ نقض عہد کرتے ہیں ان پر اللہ تعالیٰ دشمنوں کو مسلط کردیتے ہیں جو ان پر حملہ کرتے ہیں او ران کا مال چھین لیتے ہیں۔

(5) جب فیصلے کتاب اللہ کے خلاف کئے جانے لگیں تو اللہ تعالیٰ ان میں پھوٹ ڈال دیتا ہے ۔اس کے بعد آپ صلی اللہ علیہ وسلم نے عبدالرحمن بن عوفؓ سے فرمایا کہ وہ ایک سریّے پر جانے کے لیے تیار ہیں۔

صبح سویرے آپ صلی اللہ علیہ وسلم نے انہیں طلب فرمایا اور ان کے سر پر سیاہ عمامہ باندھا او رچا ر انگل شملہ پیچھے کی طرف چھوڑ دیا ، پھر فرمایا :اے ابن عوف! عمامہ اس طرح باندھا کرو ، یہ اچھا بھی لگتاہے ، اس کے بعد آپ صلی اللہ علیہ وسلم نے بلالؓ کو جھنڈا لانے کے لئے فرمایا ، وہ لے کر آئے، آپ صلی اللہ علیہ وسلم نے یہ جھنڈا عبدالرحمن بن عوفؓ کے نیزے پر لگا دیا ، پھر آپ صلی اللہ علیہ وسلم نے اللہ کی حمد وثنا ء بیان فرمائی خود پر صلاۃ و سلام بھیجا اور فرمایا: اے ابن عوف ! اللہ کے راستے میں جاکر جہاد کرو، جو کفر کریں ان سے قتال کرو، مگر بد عہدی نہ کرو، او رنہ کسی کامثلہ کرویہ اللہ کا عہد ہے او راس کے نبی کی سنت ہے ۔(سنن ابن ماجہ: 311/12 ، رقم الحدیث :4249، المعجم الاوسط للطبرانی:384/10، رقم الحدیث 4827)

حضرت عبدالرحمن بن عوفؓ کو سات سو آدمیوں کے لشکر کے ساتھ دَومۃ الجَندَل کی جانب روانہ فرمایا اور یہ ارشاد فرمایا کہ اگر وہ اسلام کی دعوت قبول کرلیں تو ان کے سردار کی بیٹی سے نکاح کرنے میں پس وپیش نہ کرنا، چنانچہ حضرت عبدالرحمنؓ نے وہا ں پہنچ کر انہیں دین کی دعوت دی، تمام لوگ مسلمان ہوگئے ، قبیلے کے سردار صبع بن عمر والکلبی نے اپنی بیٹی تَمَاضَر کا نکاح حضرت عبدالرحمن سے کردیا ، آپ اس کو اپنے ساتھ مدینے لے کر آئے، مشہور تابعی حضرت سلمہ بن عبدالرحمن بن عوف، انہی تماضرؓ کے بیٹے ہیں ۔(طبقات ابن سعد :89/2)

سریہ فدک

اسی سال شعبان میں سو آدمیوں کا ایک فوجی لشکر حضرت علیؓ بن ابی طالب کی قیادت میں فَدَک روانہ کیا گیا ۔ خبر ملی تھی کہ اس علاقے کے باشندے بنو سعد بن بکر یہودیوں کی مدد کرنا چاہتے ہیں ۔ اس سلسلے میں انہوں نے ایک شخص کو بات چیت کی غرض سے خیبر بھی بھیجا تھا ، جو لشکر والوں کے ہاتھ آگیا ، پوچھ گچھ ہوئی تو پتہ چلا کہ بنو سعد یہودیوں سے خیبر کی نصف پیداوار پر معاہدہ کرنا چاہتے ہیں ۔حضرت علیؓ دن میں چھپتے اور رات میں سفر کرتے ۔ ایک دن اچانک پہنچ کر ان پر حملہ کردیا ، وہ سب لوگ جنگلوں کی طرف بھاگ گئے، پانچ سو اونٹ اور دو ہزار بکریاں ہاتھ آئیں جن کو مدینہ لایا گیا ۔(طبقات ابن سعد :90/2 ، زاد المعاد: 206/3) فدک ایک تاریخی مقام ہے ، مدینہ منورہ سے اس کا فاصلہ تقریباً دو سو پچاس کلومیٹر شمال میں ہے،اس کا محل وقوع وادی القری اور خیبر کے درمیان ہے، فی الحال یہ سعودی عرب کے صوبہ حائل میں شامل ہے۔

سریّہ اْمّ قِرفَہ

ایک مرتبہ حضرت زید بن حارثہؓ تجارت کی غرض سے شام گئے، واپسی میں وادی القُری سے گزرہے جو قبیلہ بنی فَزارہ کا ٹھکانہ تھا۔ فاطمہ بنت ربیعہ جس کی کنیت ام قِرفَہ ہے اس قبیلے کی سربراہ تھی ، قبیلے کے کچھ جوانوں نے حضرت زید اور ان کے ساتھیوں کو مارا پیٹا او ران کا تمام سامان چھین لیا ، مدینے پہنچ کر ان لوگوں نے رسول اللہ صلی اللہ علیہ وسلم کی خدمت میں یہ واقعہ عرض کیا، آپ صلی اللہ علیہ وسلم نے ایک لشکر تشکیل دیا اور حضرت زیدؓ ہی کی قیادت میں اس لشکر کو وادی قری روانہ کیا، انہوںنے کچھ لوگوں کو تہ تیغ کیا ، کچھ بھاگ گئے، اور کچھ عورتیں گرفتار کرکے مدینہ لائی گئیں، یہ واقعہ رمضان المبارک سن چھ ہجری کا ہے۔

بعض مؤرخین نے ام قرفہ کے متعلق لکھا ہے کہ اس نے مالک بن حذیفہ بن بدر سے شادی کی تھی جس کے نتیجے میں اس کے تیرہ اور بعض روایات کے مطابق تیس بیٹے پیدا ہوئے بڑے کا نام قَرفہ تھا ، یہ عورت اپنے اسی بیٹے کی کنیت سے مشہور ہوئی۔ شاعرہ بھی تھی ، قوم میں اس کا بڑا دبدبہ تھا ، کہتے ہیں کہ اگر کبھی اس کا قبیلہ پڑوسی قبیلے بنی غطفان سے باہم دست گریباں ہوتاتو وہ ایک نیزے پر اپنا دو پٹہ ٹانگ کر بھیج دیتی، دونوں قبیلے فوراً مصالحت کر لیتے ۔

ام فرقہ نے کسی وقت میں اسلام قبول کرلیا تھا، لیکن وہ غزوۂ احد کے موقع پر مرتد ہوگئی تھی ، ارتداد کے بعد ام قرفہ نے چالیس سو اروں کا ایک دستہ تشکیل دیا جس میں اس کے بیٹے او رپوتے شامل تھے ، اس دستے کو اس نے رسول اللہ صلی اللہ علیہ وسلم پر حملہ کرنے کی ذمہ داری تفویض کی، آپ صلی اللہ علیہ وسلم کو اس کے ارادے کی اطلاح ملی تو آپ نے حضرت زید بن حارثہؓ کو کچھ صحابہؓ کے ساتھ اس کی سرکوبی کے لئے بھیجا ، ان لوگوں نے اسے ٹھکانے لگادیا او را سکے زرہ اتار کر لے آئے، بعض روایات میں یہ بھی ہے کہ اس کی لاش لے کر آئے ۔ (طبقات ابن سعد :87/2،فتح الباری: 230/7)

سریّہ عبداللہ بن رواحہ

ابورافع یہودی کا قصہ گزر چکا ہے کہ اسے حضرت عبداللہ بن عتیکؓ نے اپنے ساتھیوں کے ساتھ مل کر قتل کردیا تھا، یہ لوگ رات کے وقت اس کے قلعے نما گھر میں داخل ہوگئے تھے اور دشمن خدا ابورافع یہودی کو کیفر کردار تک پہنچا کر خیریت کے ساتھ واپس آگئے تھے۔

ہم نے یہ واقع سب تین ہجری کے واقعات کے ضمن میں بیان کیا ہے، بعض سیرت نگاروں نے پانچ ہجری میں اور بعض نے چھ ہجری رمضان المبارک میں اس کا ذکر کیا ہے۔ ابورافع کے قتل کے بعد خیبر کے یہودیوں نے اسیر بن رزام کو اپنا سردار بنا لیا تھا، رسول اللہ صلی اللہ علیہ وسلم کو اطلاح ملی کہ اسیر قبائل غطفان سے مدد مانگنے کے لئے گیا ہے، آپ صلی اللہ علیہ وسلم نے پہلے حضرت عبداللہ بن رواحہؓ سمیت تین افراد کو تحقیق حال کے لئے روانہ کیا۔

انہوں نے آکر بتلایا کہ اسیر : قبائل غطفان کے ساتھ مل کر جنگ کرنا چاہتا ہے۔ آپ صلی اللہ علیہ وسلم نے شوال چھ ہجری میں عبداللہ بن رواحہؓ کی قیادت میں تیس صحابہ ؓ کا ایک دستہ روانہ کیا، اور انہیں ہدایت کی کہ وہ اسیر اور اس کے ساتھیوں کو لے کر آئیں تاکہ ان سے گفت وشنید کی جاسکے۔ اسیر اپنے تیس ساتھیوں کے ساتھ اس طرح روانہ ہوا کہ ایک اونٹ پر دو آدمی تھے ، ایک مسلمان اور ایک یہودی ، راستے میں یہودیوں کا ارادہ بدل گیا انہوں نے تلواریں نکال لیں اور مسلمانوں پر حملہ کرنے کا ارادہ کیا ، مسلمان بھی خم ٹھونک کر میدان میں آگئے ، ذرا سی دیر میں سارے اپنے انجام کو پہنچ گئے، الحمداللہ مسلمانوں کو کوئی نقصان نہیں ہوا۔( المواہب اللدنیہ: 345/1 ، طبقات ابن سعد: 90/2)

سریہ کرزبین جابر الفھری

شوال سن چھ ہجری عُکُل اور عُرَینہ قبیلوں کے چند افراد رسول اکرم صلی اللہ علیہ وسلم کی خدمت میں حاضر ہوئے ۔ حافظ ابن حجر عنقلانیؒ نے لکھا ہے کہ ان میں سے چار آدمیوں کا تعلق قبیلہ عرینہ سے تھا، تین قبیلہ عْکُل کے تھے او رایک کسی اور قبیلے کا، ان لوگوں نے اسلام قبول کرنے کی خواہش ظاہر کی اور مسلمان ہوگئے، چند دن بعد انہوں نے عر ض کیا : یا رسول اللہ صلی اللہ علیہ وسلم ! ہم مویشی پالنے والے لوگ ہیں کھیتی باڑی کرنے والے نہیں ، ان کا مطلب یہ تھا کہ ہمیں شہروں کی آب و ہوا موافق نہیں آتی ، جنگلوں کی آب و ہوا ہمارے مزاج کے مطابق ہے ، یہاں مدینے میں تو ہم بیمار پڑگئے ہیں روایات میں ہے کہ ان لوگوں کو استسقا ء کی بیماری ہوگئی تھی ، رسول اللہ صلی اللہ علیہ وسلم نے ان لوگوں کو کچھ اونٹ دیئے اور فرمایا کہ انہیں لے جاؤ اور شہر سے باہر نکل کر رہو ، ان اونٹوں کا دودھ پیو ، رسول اللہ صلی اللہ علیہ وسلم نے ایک چرواہے کو بھی جس کا نام یسار تھا ساتھ کردیا۔

یہ تمام لوگ حَرّہ میں جاکر رہے اور کچھ ہی دنوں میں اونٹنی کے دودھ کے استعمال سے بالکل تندرست ہوگئے۔اس کے بعد وہ اپنے دین پر واپس لوٹ گئے ، رسول اللہ صلی اللہ علیہ وسلم کے چرواہے کو قتل کردیا اور اونٹ لے کر فرار ہوگئے۔ جیسے ہی اس کی خبر مدینے پہنچی آپ صلی اللہ علیہ وسلم نے حضرت کرز بن جابر فہری کو بیس افراد کے ساتھ ان کی تلاش میں روانہ فرمایا ، حضرت کرز بن جابر اور ان کے ساتھیوں نے ان کو پکڑ لیا او رمدینے لے کر آگئے، جہاں ان کے ساتھ سخت سلوک کیا گیا، بعد ازاں حَرّہ کے ایک گوشے میں ڈلوا دیا ، جہاں وہ لوگ تڑپ تڑپ کر فو ت ہوگئے۔ ( صحیح البخاری: 130/2، رقم الحدیث: 1501،فتح الباری: 233/7، طبقات ابن سعد : 930/2، کتاب لمغاری للواقذی : 568/2 ) (جاری)

16 ستمبر،2022، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے