Sun Oct 06 2024, 07:48 AM

Urdu Section ( 23 Feb 2022, NewAgeIslam.Com)

The Prophet Decreed That the Individual Who Memorised the Qur'an Be Buried First, Above All Other Martyrs Part-71 شہداء کی تدفین کیلئے آپؐ نے فرمایا: اس شخص کو پہلے قبر میں لٹاؤ جو حافظ قرآن تھا

مولانا ندیم الواجدی

18 فروری 2022

مشرکین کی واپسی

اس دھمکی کے بعد کہ وہ لوگ بہت جلد دوبارہ جنگ کے ارادے سے ملیں گے، ابوسفیان اپنے لوگوں کو لے کر واپس چلا گیا، لیکن اس خیال سے کہ دشمن پر بھروسہ نہیں کیا جاسکتا آپ صلی اللہ علیہ وسلم نے حضرت علیؓ بن أبی طالب کو حکم دیا کہ وہ کچھ اور نوجوانوں کو اپنے ساتھ لے کر مشرکین کا پیچھا کریں اور دیکھیں کہ وہ کیا کررہے ہیں، اور کدھر جانا چاہتے ہیں۔ اگر وہ گھوڑوں پر سوار ہیں، اور اونٹ ویسے ہی ہنکائے جارہے ہیں تو ان کا ارادہ مدینے کی طرف جانے کا ہے اور اگر وہ اونٹوں پر سوار ہیں تو اُن کا رخ مکے کی طرف ہے۔ اس ذات کی قسم جس کے قبضے میں میری جان ہے اگر انہوں نے مدینے کا رخ کیا تو میں ان کا پیچھا کروں گا اور ان کا مقابلہ کروں گا۔ حکم پاتے ہی حضرت علیؓ مشرکین کے پیچھے پیچھے روانہ ہوئے اور یہ خبر لائے کہ وہ اونٹوں پر سوار چلے جارہے ہیں۔ آپؐ نے فرمایا کہ ان کا ارادہ مکہ مکرمہ واپس جانے کا ہے۔ (البدایہ والنہایہ: ۴/۴۱)

شہداء کی تلاش اور تدفین

جب مشرکین واپس چلے گئے اور میدان میں صرف مسلمان رہ گئے تب آپؐ نے شہداء کی لاشیں تلاش کیں، جو میدان احد میں ادھر ادھر بکھری ہوئی تھیں۔ آپؐ کے ساتھ صحابہؓ بھی تھے جو ان لاشوں کو ڈھونڈ ڈھونڈ کر ایک جگہ رکھ رہے تھے۔ ان میں حضرات حمزہ بن عبد المطلبؓ، مصعب بن عمیرؓ، حنظلہ بن أبی عامرؓ، سعد بن الربیعؓ، اصیرمؓ اور دوسرے صحابہ کی لاشیں تھیں، جب تمام لاشیں آپؐ کے سامنے لاکر رکھ دی گئیں تب آپؐ ان کی طرف متوجہ ہوئے اور فرمایا: میں ان سب پر گواہ ہوں، ان میں سے جس کو بھی کوئی زخم پہنچا ہے خدا کی قسم وہ قیامت کے روز اس حال میں اٹھے گا کہ اس کے زخموں سے خون بہتا ہوا ہوگا، خون کا رنگ ایسا ہوگا جیسا ہوتا ہے اور خوشبو مشک کی ہوگی، تم لوگ یہ دیکھو کہ ان میں سے کس کس کو قرآن زیادہ یاد تھا، ایسے شخص کو پہلے قبر میں رکھو، پھر اس کے برابر میں اس شخص کو قبر میں لٹاؤ جو حافظ قرآن نہیں تھا یا اسے قرآن میں سے کم یاد تھا۔ (سیرۃ ابن ہشام: ۳/۱۰۹)

حضرت جابر بن عبد اللہؓ کہتے ہیں کہ رسول اللہ صلی اللہ علیہ وسلم ایک ایک کپڑے میں دو دو صحابہ کو کفناتے پھر ارشاد فرماتے ان میں سے کون قرآن کا زیادہ جامع اور حافظ ہے، جب اس کی طرف اشارہ کیا جاتا تب آپؐ اسے قبر میں پہلے رکھتے، اور فرماتے: ’’میں قیامت کے دن ان سب پر گواہی دوں گا‘‘ پھر آپؐ ان کو ان کے ٹپکتے ہوئے خون کے ساتھ دفن کرنے کا حکم دیتے۔ آپؐ نے شہداء احد پر نہ جنازے کی نماز پڑھی اور نہ انہیں غسل دیا۔ (صحیح البخاری: ۵/۱۰۲، رقم الحدیث: ۴۰۷۹)

بعض مسلمانوں نے اپنے شہداء کو مدینے لے جاکر دفن کرنے کا ارادہ کیا۔ آپؐ نے انہیں روک دیا اور فرمایا جہاں یہ لوگ شہید ہوئے ہیں ان کو وہیں دفن کرو۔ (سنن ابی داؤد: ۳/۲۰۲، رقم الحدیث:۳۱۶۵، سنن الترمذی: ۴/۲۱۵، رقم الحدیث:۱۷۱۷، سنن النسائی: ۴/۷۹، ۲۰۰۴)

شہداء کی نماز جنازہ اور غسل

شہید کی دو قسمیں ہیں، حقیقی اور حکمی۔ حقیقی شہید وہ کہلاتا ہے جس پر شہید کے احکامات نافذ ہوتے ہیں، یعنی اس کو غسل اور کفن نہیں دیا جائے گا اور نماز جنازہ پڑھ کر انہی کپڑوں میں دفن کردیا جائے گا جن کپڑوں میں وہ شہید ہوا ہے۔ حقیقی شہید وہ ہے جو اللہ کی راہ میں دشمنوں سے لڑتے ہوئے شہید ہوا ہو، یا کسی کے ہاتھوں ناحق قتل ہوا ہو، بشرطیکہ وہ بغیر علاج معالجے اور وصیت وغیرہ کے وہیں موقع پر انتقال کر گیا ہو۔ حکمی شہید وہ ہے جس کے متعلق رسول اللہ صلی اللہ علیہ وسلم نے شہادت کی بشارت دی ہو۔ احادیث میں چالیس طرح کے شہیدوں کا ذکر ہے، مثلاً ڈوب کرمرنے والا، ہیضے یا طاعون سے ہلاک ہونے والا، حالت سفر میں انتقال کرنے والا۔ علامہ شامیؒ نے حاشیہ رد المحتار میں ان تمام طرح کے شہیدوں کا ذکر کردیا ہے، ڈاکٹر عبد الحئ نے احکام میت میں ان کو جمع کیا ہے، ایسے تمام طرح کے لوگوں کو غسل بھی دیا جائے گا، کفن بھی پہنایا جائے گا، اور ان کی نماز جنازہ وغیرہ بھی پڑھی جائے گی۔

حضرت جابر بن عبد اللہ کی روایت سے معلوم ہوتا ہے کہ رسول اللہ صلی اللہ علیہ وسلم نے شہداء احد کی نماز جنازہ نہیں پڑھی اور ان کو بلانماز پڑھے دفن کردیا، اس کے برعکس متعدد روایات سے پتہ چلتا ہے کہ آپؐ نے تمام شہداء کی نماز جنازہ پڑھی۔

حضرت عقبۃُ بن عامرؓ فرماتے ہیں کہ رسول اللہ صلی اللہ علیہ وسلم ایک دن نکلے تو آپؐ نے اہل اُحد پر نماز پڑھی جس طرح مُردوں پر پڑھی جاتی ہے، پھر آپؐ منبر کی طرف تشریف لائے اور فرمایا میں (تم سے) آگے جانے والا ہوں اور میں تم پر گواہ ہوں۔ (صحیح البخاری: ۲/۹۱، رقم الحدیث: ۱۳۴۴، صحیح مسلم: ۴/۱۷۹۵، رقم الحدیث: ۲۲۹۶) حضرت عبد اللہ بن الزبیرؓ سے روایت ہے کہ رسول اللہ صلی اللہ علیہ وسلم نے احد کے دن حضرت حمزہؓ کے متعلق حکم دیا تو انہیں ایک چادر میں چھپا دیا گیا، آپؐ نے نو تکبیروں کے ساتھ ان کی نماز جنازہ ادا فرمائی، پھر دوسرے مقتولین کو صف بہ صف لایا گیا، آپؐ ان کی نماز ادا فرماتے رہے اور ساتھ ہی حضرت حمزہؓ کی بھی۔ (شرح معانی الآثار: ۱/۲۹۰، رقم الحدیث: ۲۶۵۷)

اسی طرح حضرت ابومالکؓ سے مروی ہے کہ رسول اللہ صلی اللہ علیہ وسلم نے احد کے دن حضرت حمزہ بن عبد المطلبؓ کے متعلق حکم دیا، چنانچہ ان کا جنازہ اور نو دوسروں کا جنازہ لایا گیا، آپؐ نے ان سب کی نماز جنازہ پڑھی، نماز کے بعد تمام نو شہداء کی میتیں اٹھالی گئیں، حضرت حمزہؓ کی میت وہیں رہنے دی گئی، پھر مزید نو شہیدوں کو لایا گیا اور سامنے رکھا گیا، یوں رسول اللہ صلی اللہ علیہ وسلم نے ستر شہداء کی نماز جنازہ سات بار پڑھی (یعنی ایک مرتبہ میں دس دس شہداء کی نماز جنازہ پڑھی گئی) حضرت حمزہؓ کی میت پر بار بار نماز پڑھی گئی۔ (سنن الکبری للبیہقی: ۴/۱۹، رقم الحدیث:۶۸۰۵) حضرت عبد اللہ ابن عباسؓ کی روایت بھی ہے کہ غزوۂ احد کے دن شہداء کرام کو رسول اللہ ﷺ کے پاس لایا گیا، آپؐ نے دس دس شہداء پر نماز جنازہ پڑھی، حضرت حمزہؓ کی میت اسی طرح رکھی رہی، باقی تمام شہداء کی میتیں اٹھالی جاتیں لیکن حضرت حمزہؓ کو نہ اٹھایا جاتا۔ (سنن ابن ماجہ: ۱/۴۸۵، رقم الحدیث: ۱۵۱۳)

اس طرح کی اور بھی روایات ہیں جن سے ثابت ہوتا ہے کہ احد کے دن شہداء کی نماز جنازہ پڑھی گئی، صرف حضرت جابر بن عبد اللہ کی روایت سے نماز جنازہ کی نفی ہوتی ہے، اس سلسلے میں شارحین حدیث لکھتے ہیں کہ حضرت جابرؓ کی روایت سے نماز جنازہ کی نفی ہوتی ہے اور بہت سی روایات سے اس کا اثبات ہوتا ہے، نفی واثبات جمع ہوجائیں تو اثبات والی روایات کو ترجیح دی جائے گی، یوں بھی نفی کی روایت تنہا حضرت جابرؓکی ہے اور اثبات کی روایات بہت سے صحابہؓ سے مروی ہیں، نیز اثبات والی روایات کو لینا اس لئے بھی بہتر ہے کہ نماز جنازہ میت کے اعزاز واکرام کے لئے ہوتی ہے۔ (تبیین الحقائق: ۱/۲۴۸)

جہاں تک حضرت جابرؓ کی روایت کا تعلق ہے علماء نے اس کی یہ توجیہ کی ہے کہ جس طرح عام میتوں کی نماز پڑھی جاتی ہے اس طرح ان کی نماز نہیں پڑھی گئی بلکہ دس دس کی نماز ایک ساتھ پڑھی گئی، (اعلاء السنن: ۸/۳۶۸) حضرت مولانا خلیل احمد انبہٹویؒ شارح ابوداؤد لکھتے ہیں کہ اس دن حضرت جابرؓ کچھ زیادہ مشغول تھے کیوں کہ غزوۂ احد میں ان کے والد، بھائی اور خالو شہید ہوگئے تھے، وہ مدینے تشریف لے گئے تھے تاکہ وہاں جاکر میتوں کی تدفین وغیرہ کا انتظام کریں، اس دوران رسول اللہ صلی اللہ علیہ وسلم نے شہداء کی نماز پڑھادی حضرت جابرؓ نے چونکہ نماز پڑھاتے ہوئے نہیں دیکھا اس لئے یہ نقل کردیا کہ شہداء کی نماز نہیں پڑھی گئی۔ (بذل المجہود فی حل أبی داؤد: ۴/۱۹۰)

حضرت حمزہؓ کی نماز جنازہ جداگانہ ہوئی اور آپ صلی اللہ علیہ وسلم نے ان کی نماز نو تکبیروں کے ساتھ پڑھائی، جب کہ نماز جنازہ میں چار تکبیریں ہوتی ہے، محدثین کے مطابق یہ حضرت حمزہؓ کی خصوصیت تھی کہ ان کی نمازنو تکبیروں کے ساتھ پڑھی گئی، اس طرح یہ بھی ان کی خصوصیت تھی کہ ان کی نماز جنازہ بار بار پڑھی گئی، نماز جنازہ کے بعد تدفین عمل میں آئی، اور ایک ایک قبر میں دو، دو، تین تین صحابہ کو دفن کیا گیا، حضرت حمزہؓ کے ساتھ حضرت عبد اللہ بن جحشؓ کو دفن کیا گیا، حضرت عمرو بن الجموحؓ اور حضرت عبد اللہ بن عمرو بن حرامؓ کو ایک قبر میں دفن کیا گیا، رسول اللہ صلی اللہ علیہ وسلم نے ان دونوں حضرات کے متعلق ارشاد فرمایا کہ ان دونوں کو دیکھو، وہ دنیا میں ایک دوسرے کے ساتھ مخلص تھے، اس لئے ان کو ایک ہی قبر میں دفن کردو۔ (سیرت ابن ہشام: ۳/۵۲، الطبقات الکبری: ۲/۵۶۲)(جاری)

18 فروری 2022، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے