Thu Mar 20 2025, 04:02 AM

Urdu Section ( 9 Aug 2022, NewAgeIslam.Com)

The Angel Gabriel Said To the Prophet, 'You Should Immediately Proceed To Bani Qurayzah, For the Angels Have Not Yet Laid Down Their Weapons or Returned' Part-95 ابھی فرشتوں نے ہتھیار نہیں رکھے نہ واپس ہوئے ہیں، آپؐ فوراً بنی قریظہ کی طرف تشریف لے چلیں

مولانا ندیم الواجدی

5 اگست 2022

حضرت حذیفہ بن یمانؓ کا واقعہ

حضرت حذیفہ بن یمانؓ کہتے ہیں کہ رسول اللہ صلی اللہ علیہ وسلم نے مجھے حکم دیا کہ میں مشرکین کی طرف جاؤں اور وہاں کی خبر لے کر آؤں، میں نے عرض کیا یارسول اللہ! کہیں میں گرفتار نہ کرلیا جاؤں۔ آپؐ نے فرمایا: انک لن تؤسر تم کسی بھی قیمت پر پکڑے نہیں جاؤگے، اس کے بعد رسول اللہ ﷺ نے میرے لئے یہ دُعا فرمائی:

’’اے اللہ اس کی حفاظت فرما، سامنے سے، پیچھے سے، دائیں سے، بائیں سے، اوپر سے اور نیچے سے۔‘‘ آپؐ کی دُعا سے میرا خوف جاتا رہا، اور میں پورے اطمینان کے ساتھ ان کے درمیان جا پہنچا۔ جب میں ان کے لشکر میں پہنچا تو ہوا اس قدر تیز تھی کہ کوئی چیز اپنی جگہ نہیں ٹھہر رہی تھی، اندھیرا اس قدر تھا کہ ہاتھ کو ہاتھ سجھائی نہیں دے رہا تھا، میں نے ابوسفیان کو یہ کہتے ہوئے سنا کہ یہاں سے نکلو، ہمارے سارے جانور ہلاک ہوگئے ہیں، بنو قریظہ نے ہمارا ساتھ چھوڑ دیا ہے۔ یہ کہہ کر ابوسفیان اونٹ پر بیٹھ کر چل دیا، میرے دل میں آیا کہ لاؤ اسے مار ڈالوں، مگر مجھے رسولؐ اللہ صلی اللہ علیہ وسلم کی یہ ہدایت یاد آئی کہ وہاں جاکر کوئی نئی بات نہ کرنا۔ (مستخرج ابی عوانہ: ۴/۳۲۰، رقم الحدیث: ۶۸۴۲)

حضورؐ کی مدینے واپسی

صبح ہوئی تو آپ ﷺ یہ پڑھتے ہوئے مدینے واپس تشریف لے آئے: لَا اِلٰہَ إِلاَّ اللّٰہُ وَحْدَہُ لَا شَرِیْکَ لَہُ، لَہُ الْمُلْکُ وَلَہُ الْحَمْدُ، وَہُوَ عَلٰی کُلِّ شَیْئٍ قَدِیْرٌ، آئِبُوْنَ تَائِبُوْنَ، عَابِدُوْنَ، سَاجِدُوْنَ، لِرَبِّنَا حَامِدُوْنَ، صَدَقَ اللّٰہُ وَعْدَہُ وَنَصَرَ عَبَْدَہُ وَہَزَمَ الْاَحْزَابَ وَحْدَہُ۔

یہ بدھ کا دن تھا اور ذی قعدہ کی ۲۳؍ تاریخ تھی۔ (الطبقات الکبری: ۲/۷۰) اس غزوے میں چھ مسلمانوں نے جام شہادت نوش کیا، ان کے اسمائے گرامی یہ ہیں: حضرت سعد بن معاذؓ، حضرت عبد اللہ بن سہلؓ، حضرت انس بن اویسؓ، حضرت طفیل بن نعمانؓ، حضرت کعب بن زیدؓ اور حضرت ثعلبہ بن عتمہؓ، کفار کے تین آدمی مارے گئے، عمرو بن عبدود، نوفل بن عبد اللہ، عثمان بن منبہ، اس غزوے میں مسلمانوں کا شعار تھا ، حٰم لا ینصرون۔ (الکامل فی التاریخ: ۲/۱۲۴، زاد المعاد: ۳/۳۷۳، سیرۃ ابن ہشام: ۳/۲۳۹)

غزوۂ بنی قُریظہ

یہودیوں کا قبیلہ بنی قریظہ مدینہ منورہ کے قریب ہی رہتا تھا۔ رسول اللہ صلی اللہ علیہ وسلم جب یہاںہجرت کرکے تشریف لائے تو دوسرے قبیلوں کی طرح آپؐ نے اس قبیلے کے ساتھ بھی امن کامعاہدہ کیا۔اس معاہدہ کی پہلی شق ہی یہ تھی کہ مسلمان اوریہودِ بنو قریظہ دونوں ایک دوسرے کے دشمنوں کی مدد نہیں کریں گے، لیکن جب بنی نضیر کی شہ پر ابوسفیان کی قیادت میں مشرکینِ مکہ اور غطفان وغیرہ قبائل کے دس ہزار لوگ مدینے پر حملہ کرنے کے ارادے سے جبل اُحد کے دامن میں خیمہ زن ہوئے تو بنی قریظہ کے یہود معمولی پس و پیش کے بعد دشمنوں سے جا ملے۔ رسول اللہ صلی اللہ علیہ وسلم کو اس کا شدید قلق ہوا، گو آپؐ نے اس کا اظہار نہیں فرمایا۔ خدا کا کرنا ایسا ہوا کہ دشمن کی فوج شدید برفیلی ہوائوں کے تھپیڑوں کا مقابلہ نہ کرسکی اور میدان سے بھاگتی نظر آئی۔ یہ ۲۳؍ذی القعدہ سن۵ھ کا واقعہ ہے، کفار واپس چلے گئے اور رسول اللہ صلی اللہ علیہ وسلم تمام صحابہؓ کو لے کر مدینہ تشریف لے آئے، صحابۂ کرامؓ نے اپنے ہتھیار اتار کر رکھ دئیے۔ رسول اللہ صلی اللہ علیہ وسلم نے بھی اپنے ہتھیار کھول دئیے۔ ظہر کے قریب حضرت جبریل ؑ آئے اور عرض کیا: یارسولؐ اللہ! کیا آپؐ نے ہتھیار اتار دئیے ہیں؟ آپؐ نے فرمایا: ہاں۔ انہوں نے کہا : مگر ابھی فرشتوں نے ہتھیار نہیں رکھے ہیں اور نہ وہ ابھی واپس ہوئے ہیں۔ آپؐ فوراً بنی قریظہ کی طرف تشریف لے چلیں۔ (صحیح البخاری۹؍۳۸۹، رقم ۲۶۰۲)

منادی کرادی گئی

اسی وقت مدینے کی گلیوں میں رسول اللہ صلی اللہ علیہ وسلم کی جانب سے یہ منادی کرادی گئی کہ جو سمع و طاعت کے خوگر ہیں وہ عصر کی نماز بنی قریظہ میں جا کر پڑھیں۔ مقصد یہ تھا کہ صحابہؓ جلدی کریں اور رات ہونے سے پہلے وہاں پہنچ کر ان کے قلعے کا محاصرہ کرلیں، اگرچہ اس جملے کا مطلب سمجھنے میں صحابہؓ کے درمیان اختلاف ہوا، کسی نے راستے میں نماز ادا کرلی، کیوںکہ بنو قریظہ تک پہنچنے میںنماز کا وقت نکل سکتا تھا، انہوںنے اس حکم کو عجلت پر محمول کیا۔ کسی نے بنی قریظہ پہنچ کر عشاء کے وقت عصر کی نماز پڑھی، کیوںکہ انہوں نے اس حکم کو حقیقت پر محمول کیا، بعد میں رسول اللہ صلی اللہ علیہ وسلم کے سامنے اس اختلاف کا ذکر کیا گیا تو آپ ﷺ نے کسی پر بھی نکیر نہیں فرمائی ۔

(صحیح البخاری،۱۳؍۲۴، رقم الحدیث ۳۸۱۰، المستدرک للحاکم، ۳؍۲۴،۳۵)

حضورؐ سے پہلے جبریلؑ کی روانگی

یہ کہہ کر کہ ابھی فرشتوںنے ہتھیار نہیں کھولے ہیں اور نہ وہ ابھی واپس گئے ہیں، حضرت جبریلؑ بنی قریظہ کی طرف چلے گئے۔ حضرت انسؓ فرماتے ہیں کہ میں نے بنی غنم کی گلیوںمیں وہ غبار اپنی آنکھوں سے دیکھا جو جبریلؑ امین کی سواری کے جانے سے اُڑا تھا۔ (صحیح البخاری۱۳؍۲۳ رقم الحدیث۳۸۰۹)

رسول اللہ صلی اللہ علیہ وسلم کا قافلہ مدینے کے قریب ایک بستی سے گزرا جس کا نام صَوْرَیْن تھا۔ آپؐ نے وہاںموجود لوگوں سے پوچھا:کیا ہم سے پہلے بھی کوئی یہاں سے گزرا ہے؟ لوگوں نے عرض کیا: یارسولؐ اللہ! دحیہ الکلبی گزر کر گئے ہیں، وہ ایک سفید خچر پر سوار تھے جس کی پیٹھ پر زین کسی ہوئی تھی اور زین پر ایک چادر پڑی ہوئی تھی۔ آپؐ نے فرمایا: وہ جبریلؑ تھے، جنہیں بنی قریظہ کے دلوں میں رعب پیدا کرنے کے لئے اور ان کے قلعوں کو متزلزل کرنے کے لئے بھیجا گیا ہے۔

(تفسیر الطبری ۲۱؍۹۵، ۹۶، البدایہ والنہایہ ۴؍۱۱۷، ۱۱۸)

پڑاؤ اور محاصرہ

بنی قریظہ پہنچ کر آپ صلی اللہ علیہ وسلم نے ان کے ایک کنویں کے قریب پڑائو ڈالا، اس سے قبل حضرت علیؑ بن ابی طالب لشکر اسلام کا جھنڈا لے کر بنی قریظہ پہنچ چکے تھے، جیسے ہی حضرت علیؓ اپنے ساتھیوں کے ساتھ قلعوں کے قریب پہنچے ویسے ہی یہودیوں نے قلعے کی فصیلوں پر کھڑے ہو کر رسول اللہ صلی اللہ علیہ وسلم کی شان اقدس میں نہایت گستاخانہ کلمات کہے ۔ حضرت علیؓ نے عرض کیا: یارسولؐ اللہ! آپؐ قلعے کے قریب تشریف نہ لے جائیں، یہود بدزبانی پر اتر آئے ہیں۔ آپؐ نے فرمایا: اگر وہ مجھے دیکھ لیتے تو انہیں بولنے کی جرأت نہ ہوتی، یہ کہہ پر آپؐ قلعے کی طرف بڑھے اور یہود سے مخاطب ہو کر فرمایا: اے بندروں کے بھائیو، کیا تمہیں اللہ نے ذلیل و خوار نہیں کیا اور کیا تم پر اپنا عذاب نازل نہیں فرمایا؟ یہ سن کر یہود نے جواب دیا : ابوالقاسم آپؐ ہمارے حال سے ناواقف نہیں ہیں۔ مسلمانوں کا یہ لشکر بھی تین ہزار نفوس پر مشتمل تھا اور اس میںچھتیس گھوڑے شامل تھے۔ رسول اللہ صلی اللہ علیہ وسلم نے بنو قریظہ کے قلعے کا پچیس دن تک محاصرہ کیا، یہاں تک کہ وہ تنگ آگئے اور ان پر خوف طاری ہوگیا، ان کی سمجھ میں نہیں آرہا تھا کہ اس صورت حال میں وہ کیا کریں اور کس طرح اس محاصرے کو ختم کرائیں۔ (سیرت ابن ہشام ۳؍۱۶۷، ۱۶۸، الکامل لابن اثیر ۲؍۱۲۷)

کعب ابن سعد کی تقریر

ایک دن بنو قریظہ کے سردار کعب بن سعد نے تمام محصورین کو جمع کیا اور اس مصیبت سے گلوخلاصی کے لئے ان کے سامنے تین تجویزیں رکھیں اور ان سے کہا کہ اگر تم محمد (صلی اللہ علیہ وسلم) سے خود کو بچانا چاہتے ہو تو تمہیںمیری ان تین تجویزوں میں سے ایک پر عمل کرنا ہوگا:

۱- پہلی تجویز تو یہ ہے کہ ہمیں محمدصلی اللہ علیہ وسلم پر ایمان لے آنا چاہئے، خدا کی قسم! یہ بات ہم سب پر روز روشن کی طرح عیاں ہوچکی ہے کہ بلاشبہ محمد، اللہ کے نبی اور اس کے رسول ہیں، درحقیقت یہ وہی نبی ہیں جن کا ذکر ہماری کتاب توریت میں موجود ہے۔ اگر ہم ان پر ایمان لے آئے تو ہماری جان، مال اور بیوی بچے سب بچ جائیں گے۔

اس تجویز کو مسترد کرتے ہوئے بنی قریظہ نے کہا کہ بھلا ہم اپنا دین کیسے چھوڑ سکتے ہیں، کچھ بھی ہوجائے ہم اپنے آباء و اجداد کے دین پر ہی قائم رہیں گے۔

۲-کعب بن سعد نے دوسری تجویز یہ رکھی کہ اگر تم اپنا دین ترک نہیں کرنا چاہتے تو ہم سب کو ایک فیصلہ کن جنگ کے لئے تیار ہوجانا چاہئے، مگر اس کے لئے پہلے تمہیں خود اپنے ہاتھوں سے اپنے بیوی بچوں کا قتل کرنا ہوگا، پھر بے خوف ہو کر مسلمانوں سے ٹکرانا ہوگا، بچ گئے تو بیوی بچے اور مل جائیں گے، نہ بچے تو ہمارے بعد ہماری نسلیں غلامی کا طوق پہن کر تو زندہ نہیں رہیں گی۔ بنی قریظہ نے اپنے سردار کی یہ تجویز بھی ٹھکرا دی، کہنے لگے جب بیوی بچے ہی نہ ہوں گے تو پھر زندگی میں کیا خاک لطف رہے گا، ان کے بعد لڑیں گے کس کی خاطر اور جی کر کیا کریں گے؟

۳- کعب نے کہا کہ اگر تمہیں یہ بھی منظور نہیں تو ایسا کرلو کہ آج دشمن پر شب خون مارنے کے لئے تیار ہوجائو۔ آج یوم السبت (سنیچر کا دن ) ہے، مسلمان یہ بات اچھی طرح جانتے ہیں کہ ہم آج کے دن لڑائی جھگڑوں سے دور رہتے ہیں کیوں کہ یہ دن ہمارے لئے انتہائی مقدس ہے، ہمیں مسلمانوں کی اس غفلت سے فائدہ اٹھا کر حملہ کردینا چاہئے۔ یہود نے کعب کی یہ تجویز بھی ٹھکرادی، کہنے لگے، واقعی یہ دن مقدس ہے، ہم کسی بھی قیمت پر اس کی حرمت پامال کرنے کا جرم نہیں کر سکتے، ہمارے اسلاف اس دن کی بے حرمتی کرکے سور اور بندر بن چکے ہیں، ہم ہرگز ایسا کوئی کام نہیں کریں گے جس کی وجہ سے ہم کسی آسمانی عذاب میں گرفتار ہوجائیں۔ (سیرت ابن ہشام ۳۱؍۱۶۹، البدایہ والنہایہ ۴؍۱۲۰)

ابولبابہؓ کو بلایا گیا

بنی قریظہ نے تینوں تجویزیں مسترد کردیں، کعب ابن سعد نے ان کو ان کے حال پر چھوڑ دیا، معاملہ پھر جوں کا توں تھا، محاصرے پر چند روز اور گزر گئے، تنگ آکر بنی قریظہ نے ابولبابہ بن عبدالمنذرؓ کو بلانے کی حکمت عملی اختیار کی، ان کے ساتھ بنو قریظہ کے حلیفانہ تعلقات تھے، انہیں اُمید تھی کہ وہ کوئی ایسا راستہ نکالنے میں ضرور کامیاب ہوجائیں گے جس سے یہ محاصرہ ختم ہو جائے گا اور ہماری جان بچ جائے گی۔

بدر کے واقعات میں ابولبابہؓ کا ذکر آچکا ہے، آپؐ نے ان کو راستے سے واپس کرکے مدینے کا حاکم مقرر فرمایا تھا اور واپس آنے کے بعد ان کو مال غنیمت میں سے حصہ دیا تھا۔ بنو قریظہ کی یہ درخواست رسول اللہ صلی اللہ علیہ وسلم کی خدمت میں پہنچی۔ آپؐ نے ابولبابہؓ کو ان کے پاس بھیج دیا، بنی قریظہ کے پیرو جواں انہیں دیکھ کر رونے لگے، ابولبابہ کا دل بھر آیا، ان لوگوں کے پاس ان کی آمد و رفت رہتی تھی، جس کی بنا پر وہ ایک دوسرے سے اچھی طرح واقف اور مانوس تھے۔ ذمہ دار حضرات نے ان سے پوچھا: کیا ہم قلعے سے نکل کر محمدؐ کے پاس چلے جائیں؟ حضرت ابولبابہؓ نے جواب تو اثبات میں دیا، لیکن ساتھ ہی گلے پر ہاتھ پھیر کر یہ بھی بتلا دیا کہ تم لوگ قلعے سے اترے اور ذبح کئے گئے۔ (سیرت ابن ہشام ۳؍۱۶۹)۔ (جاری)

5 اگست 2022، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے