Sun Oct 06 2024, 05:37 AM

Urdu Section ( 6 Apr 2022, NewAgeIslam.Com)

The Holy Prophet Kept an Eye on the Movements of All the Tribes from Madinah to Makkah Part-77 مدینہ سے مکہ تک تمام قبائل کی نقل وحرکت پرآپ ﷺ نظر رکھے ہوئے تھے

مولانا ندیم الواجدی

1 اپریل، 2022

بنی اسد کی طرف صحابہؓ کی روانگی:

محرم ۴ھ کی پہلی تاریخ کو مخبروں کے ذریعے آپ صلی اللہ علیہ وسلم کو یہ اطلاع ملی کہ طُلیحہ بن اخلد اور سلمہ بن اخلد نامی دو بھائی مدینے پر حملہ کرنا چاہتے ہیں، اس مقصد کے لئے تیاری میں مصروف ہیں اور لوگوں کو ایک خاص مقام پر جمع کررہے ہیں، وہاں سے چل کر وہ مدینے پر حملہ آور ہوں گے اور مدینے میں گھس کر لوٹ مار کریں گے، یہ سن کر آپ صلی اللہ علیہ وسلم نے ابو سلمہ بن عبد اللہ الاسد المخزومیؓ کو طلب فرمایا، ان کو ڈیڑھ سو انصار و مہاجر صحابہؓ کی قیادت سپرد فرمائی، اور ان کے ہاتھوں میں اسلامی جھنڈا دیتے ہوئے ارشاد فرمایا: تم اس فوجی دستے کو لے کر نکلو، اور چلتے رہو، یہاں تک کہ بنو اسد تک جا پہنچو، اس سے پہلے کہ وہ اپنے ٹھکانے سے نکل کر باہر آئیں تم ان پر حملہ کردو۔ اس دستے میں حضرت ابوعبیدہ بن الجراحؓاور حضرت سعد بن بن ابی وقاصؓ جیسے صحابی رضی اللہ عنہم بھی شامل تھے۔

بنو اسد کو جیسے ہی یہ خبر ملی کہ مسلمانوں کا فوجی دستہ ان سے مقابلہ کرنے کے لئے روانہ ہوچکا ہے بلکہ وہ بہت قریب آچکا ہے، ان میں سراسیمگی پھیل گئی، اس سے پہلے کہ مسلمان وہاں پہنچتے دشمن کے لوگ اپنی بھیڑ، بکریاں اور اونٹ وغیرہ چھوڑ کر فرار ہوچکے تھے۔ ابو سلمہؓ کامیابی اور فتح مندی کا علم لہراتے ہوئے مدینے میں داخل ہوئے، رسول اللہ صلی اللہ علیہ وسلم نے مال غنیمت میں سے خمس نکال کر تمام مال صحابہؓ میں تقسیم فرمادیا، ہر شخص کو سات اونٹ اور سات بکریاں ملیں۔

اس سفر سے ابو سلمہؓ بے حد تھک گئے تھے اور ان کا وہ زخم بھی ہرا ہوگیا تھا جو اُحد کی جنگ میں ان کو لگا تھا، ابھی چند ہی روز واپسی پر گزرے تھے کہ زخموں کی تاب نہ لاکر وفات پاگئے۔

حضرت ابوسلمہؓ ان لوگوں میں شامل ہیں جنہوں نے سب سے پہلے اسلام قبول کیا۔ اسلام قبول کرنے والوں میں ان کا نمبر دسواں ہے، ہجرت کرنے والوں میں بھی وہ سر فہرست ہیں، رشتے میں وہ آپؐ کے رضاعی چچا تھے۔ پہلے انہوں نے حبشہ ہجرت کی، پھر مدینہ تشریف لائے۔ غزوۂ بدر میں بھی شریک ہوئے، ان کی وفات کے بعد حضرت ام سلمہؓ حرم نبوی میں شامل ہوئیں۔ حضرت سلمہ کی پرورشؓ رسول اللہ صلی اللہ علیہ وسلم کے گھر میں ہوئی۔ (زاد المعاد: ۳/۳۴۳، الاصابہ فی تمییز الصحابہ: ۴/۵۸۶)

خالد بن سفیان الہذلی کے خلاف کارروائی:

اسی اثناء میں رسول اللہ صلی اللہ علیہ وسلم کو یہ خبرملی کہ قبیلۂ ہذیل کا سردار خالد بن سفیان لوگوں کو عرفات کے میدان میں جمع کررہا ہے، اس کا ارادہ مسلمانوں سے جنگ کرنے کا ہے، وہ قریش کے ساتھ اظہار یگانگت کے لئے مدینہ پر حملہ کرنا چاہتا ہے۔ یہ خبر سننے کے بعد آپ صلی اللہ علیہ وسلم نے ایک صحابی حضرت عبد اللہ بن اُنیس جہنیؓ کو طلب فرمایا اور انہیں خالد بن سفیان ہذلی کے خلاف کارروائی کرنے کی ذمہ داری سپرد فرمائی، پورا واقعہ خود انہی صحابیؓ کی زبانی سنئے، فرماتے ہیں، رسول اللہ صلی اللہ علیہ وسلم نے مجھے بلایا اور فرمایا اے عبد اللہ! مجھے پتہ چلا ہے کہ خالد بن سفیان بن نبیح لوگوں کو جمع کررہا ہے اس کا مقصد میرے خلاف جنگ کرنا ہے، وہ اس وقت وادی عرنہ میں ہے، تم وہاں جاؤ اور اس سے نمٹو، میں نے عرض کیا: یا رسولؐ اللہ! مجھے اس کی کوئی نشانی بتلا دیجئے تاکہ میں اسے پہچان لوں۔ آپؐ نے ارشاد فرمایا جب تم اسے دیکھو گے تو اپنے جسم میں کپکپاہٹ محسوس کروگے۔

صحابیؓ کہتے ہیں کہ حکم ملتے ہی میں وادیِ عرنہ کی طرف روانہ ہوگیا۔ عرنہ مکہ کی وادیوں میں سے ایک مشہور وادی ہے، عرفات کے مغرب میں مسجد نمرہ کے قریب واقع ہے، یہ عرفات میں شامل نہیں ہے، اس لئے حجاج کے لئے عرفہ کے دن یہاں قیام کرنا ممنوع ہے۔بہر حال صحابی ٔ رسول حضرت عبد اللہ بن انیسؓ نے اپنی تلوار سنبھالی اور عرنہ کی طرف روانہ ہوگئے۔ صحابیؓ کہتے ہیں کہ میں عصر کے وقت اس کے پاس پہنچ گیا، اس وقت وہ اپنی بیویوں کے ساتھ اپنے گھر میں تھا، جب میں نے اسے دیکھا تو جیسا کہ رسول اللہ صلی اللہ علیہ وسلم نے ارشاد فرمایا تھا میرے جسم پر کپکپاہٹ طاری ہوگئی، میں اس کی طرف بڑھنے لگا اس کے ساتھ ہی مجھے یہ خیال بھی آرہا تھا کہ کہیں میری عصر کی نماز قضا نہ ہوجائے۔ اس کا حل میں نے یہ نکالا کہ میں اس کی طرف بڑھتا بھی رہا اور نماز بھی پڑھتا رہا، میں اشاروں سے رکوع وسجود کررہا تھا، یہاں تک کہ میں اس کے قریب پہنچ گیا۔ مجھے دیکھ کر وہ کہنے لگا: تو کون ہے، میں نے کہا کہ میں عربی النسل انسان ہوں، تمہارے متعلق یہ سن کر یہاں آیا ہوں کہ تم محمد (صلی اللہ علیہ وسلم) سے لڑنے کا ارادہ رکھتے ہو، اس نے کہا! تم نے صحیح سنا ہے، میں باتیں کرتا ہوا اس کے ساتھ ساتھ چلتا رہا، یہاں تک کہ میں نے اس پر تلوار نکال لی اور اس کا سر قلم کردیا۔

بعض روایات میں ہے کہ حضرت عبد اللہ بن انیسؓ اس کا سر لے کر دوڑے، اور ایک غار میں جا چھپے، لوگوں کو قاتل کی تلاش ہوئی، ڈھونڈتے ڈھونڈتے وہ اس غار کے پاس بھی پہنچے، لیکن وہاں مکڑی نے جالا تان دیا تھا، تلاش میں آئے ہوئے لوگ مکڑی کے جالے دیکھ کر واپس چلے گئے، عبداللہ بن انیسؓ رات میں چلتے اور دن میں کہیں چھپ جاتے، اس طرح وہ کئی شب وروز بعد مدینہ منورہ پہنچے۔ حضرت عبد اللہؓ کہتے ہیں کہ مدینے پہنچ کر میں رسول اللہ صلی اللہ علیہ وسلم کی خدمت میں حاضر ہوا، آپؐ نے مجھے دیکھ کر فرمایا: یہ کامیاب آدمی کا چہرہ ہے، میں نے عرض کیا: یارسول اللہ! میں نے آپ کے حکم کی تعمیل کردی ہے، یہ اس کا سر ہے۔ اتنا کہنا تھا کہ آپؐ مجھے گھر کے اندر لے کر گئے اور مجھے ایک عصا دیا اور فرمایا: اے عبد اللہ! اسے اپنے پاس سنبھال کر رکھنا، میں یہ عصا لے کر باہر نکلا، لوگ مجھ سے پوچھنے لگے، یہ کیسا عصا ہے اور رسول اللہ صلی اللہ علیہ وسلم نے یہ عصا تمہیں کیوں دیا ہے ؟میں نے کہا: مجھے یہ عصا اللہ کے رسولﷺ نے دیا ہے اور فرمایا ہے کہ میں اسے سنبھال کر رکھوں۔ لوگوں نے کہا: تم جاکر اللہ کے رسولؐ سے یہ تو معلوم کرو کہ اس میں کیا خاص بات ہے اور یہ تمہیں کیوں دیا گیا ہے۔ چناں چہ میں دوبارہ حاضر خدمت ہوا اور عرض کیا یا رسول اللہ! آپؐ نے مجھے یہ عصا کیوں عطا فرما یا ہے، آپ نے ارشاد فرمایا: یہ عصا قیامت کے دن میرے اور تمہارے درمیان ایک نشانی ہوگا، بلاشبہ اس دن اپنے اعمال پر تکیہ کرنے والے بہت کم لوگ ہوں گے۔ روایات میں ہے کہ حضرت عبد اللہ بن انیسؓ نے وہ عصا اپنی تلوار کے ساتھ رکھ دیا، اور جب تک زندہ رہے اس کی حفاظت کرتے رہے، موت کے وقت انھوں نے وصیت کی کہ یہ عصا ان کے ساتھ کفن میں رکھ کر دفن کردیا جائے، لوگوں نے ایسا ہی کیا۔ (البدایہ والنہایہ:۴/۱۶۰، مسند احمد بن حنبل: ۲۵/ ۴۴۰، رقم الحدیث: ۱۶۰۴۷، سنن الکبری للبیہقی: ۳/۳۶۴، رقم الحدیث: ۶۰۲۴)

اس واقعے سے صاف ظاہر ہے کہ اللہ کے رسول صلی اللہ علیہ وسلم مدینہ سے مکہ تک تمام قبائل کی نقل وحرکت پر نظر رکھے ہوئے تھے، ایک سمجھ دار اور بابصیرت حکمراں کی طرح انھوں نے مملکت اسلامیہ کی حفاظت کے لئے تمام تدبیریں اختیار کی ہوئی تھیں، ان میں سے ایک تدبیر یہ بھی تھی کہ آپؐ کے بہت سے مخبر چاروں طرف پھیلے ہوئے تھے، اور جزیرہ نمائے عرب میں کہیں بھی کوئی ہلچل نظر آتی اس کی خبر آپؐ تک پہنچایا کرتے تھے، جب بھی آپؐ کو یہ اطلاع ملتی کہ فلاں قبیلے میں مملکت اسلامیہ کے خلاف کوئی سازش ہورہی ہے، یا کسی جگہ کچھ لوگ مدینے پر حملہ آور ہونے کی سازش کررہے ہیں آپؐ ایک بیدار مغز فوجی کمانڈر کی طرح اس کے خلاف فوراً ایکشن لیتے، اور جہاں جیسی ضرورت ہوتی وہاں اتنے ہی آدمی بھیج کر اس سازش کو ناکام بناتے۔ آپؐ کو اپنے جوانوں کی صلاحیتوں کا بھی علم تھا، چناں چہ خالد بن سفیان ہذلی کے واقعے میں صرف عبد اللہ بن انیسؓ کو روانہ فرمایا، کیوں کہ آپؐ کو اچھی طرح معلوم تھا کہ عبد اللہ راستوں سے اچھی طرح واقف ہیں، جری اور بہادر ہیں، وہ یہ کام اچھی طرح کرسکتے ہیں، عبد اللہ بن انیسؓ بھی آپ کی توقعات پر پورے اترے اور کامیاب ہوکر واپس آئے۔

رسول اللہ صلی اللہ علیہ وسلم کا معمول تھا کہ وہ اپنے ساتھیوں کی ہمت بڑھاتے رہتے تھے، کبھی دعاؤں سے نوازتے، کبھی کوئی انعام عطا فرما دیتے، حالاں کہ صحابہؓ نے دنیوی اغراض کے لئے بھی کسی جنگ میں حصہ نہیں لیا لیکن آپ صلی اللہ علیہ وسلم دنیاوی مال ومتاع میں بھی ان کو شریک فرماتے تھے، مال غنیمت میں سے ان تمام لوگوں کو حصہ دیا جاتا تھا جو جنگ لڑنے کے لئے جایا کرتے تھے، شہیدوں کے وارثوں تک بھی حصہ پہنچایا جاتا تھا۔ رسول اللہ صلی اللہ علیہ وسلم کی ذات اقدس سے صحابہؓ کی عقیدت ومحبت کا حال یہ تھا کہ اگر آپؐ کسی کو کوئی معمولی چیز بھی عطا فرمادیتے وہ خوش ہوکر اس کو قبول کرتا، فخر ومسرت سے پھولے نہ سماتا اور زندگی بھر اس کی حفاظت کرتا، حضرت عبداللہ بن انیسؓ کو آپ نےعصا انعام میں دیا، بہ ظاہر یہ لکڑی تھی جس کی کوئی اہمیت اور قیمت نہیں تھی، مگر اسے آپؓ نے قیمتی اور یادگار تحفہ قرار دیا اور جب تک زندہ رہے اس کی حفاظت کی اور مرنے کے بعد بھی قبر میں اپنے ساتھ لے کرگئے۔

عَضَل اور قَارہ کی بد عہدی اور رجیع کا دردناک واقعہ:

جنگ اُحد کے بعد صفر کے مہینے میں قبیلۂ عَضَلْ اور قبیلۂ قارہ کے کچھ لوگ رسول اللہ صلی اللہ علیہ وسلم کی خدمت میں حاضر ہوئے اور عرض کیا کہ ہمارے قبیلے اسلام قبول کر چکے ہیں، آپؐ اپنے کچھ لوگوں کو ہمارے ساتھ بھیج دیجئے تاکہ وہ ہم لوگوں کو نماز، روزہ سکھا دیں، دین کی باتیں بتلادیں، اور ہمیں قرآن کی تعلیم دیں، رسول اللہ صلی اللہ علیہ وسلم نے ان کی درخواست پر ایک وفد تشکیل دیا جس میں سات صحابہ شامل تھے، ان حضرات صحابہؓ کے اسمائے گرامی یہ ہیں:

۱- مُرثد بن أبی مُرثَد الغَنَویؓ۔ ۲- خالد بن البُکَیْر اللیثیؓ۔ ۳- عاصم بن ثابت بن أبی الافلحؓ۔ ۴- خُبَیب بن عدیؓ۔ ۵- زید بن الدثنہ بن المعاویہؓ۔ ۶- عبد اللہ بن طارقؓ۔ ۷- معتب بن عبیدؓ۔

حضرت عاصم بن ثابتؓ اس وفد کے امیر بنائے گئے، ابن اسحاق کہتے ہیں کہ مرثد بن أبی مرثد الغنویؓ کو امیر مقرر کیا گیا۔ (جاری)

1 اپریل، 2022 ، بشکریہ : انقلاب ، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا