Sun Oct 06 2024, 06:37 AM

Urdu Section ( 5 March 2022, NewAgeIslam.Com)

The Muslims Were Defeated In Uhud Due to Disobedience to the Prophet's Instructions and Rumours of His Martyrdom Part 73 آپ ؐ کی حکم عدولی اور آپؐ کی شہادت کی افواہ اُحد میں مسلمانوں کی شکست کا سبب بنی

مولانا ندیم الواجدی

4 مارچ 2022

جنگ اُحد میں خواتین کا کردار

اسلامی تعلیمات کی رو سے خواتین پر جہاد فرض نہیں ہے، کیوں کہ خواتین طبعی طور پر کمزور ہوتی ہیں، نہ صرف یہ کہ وہ جسمانی اعتبار سے کمزور ہوتی ہیں بلکہ ان کا دل بھی کمزور ہوتا ہے، اس لیے انہیں جہاد سے دور ہی رکھا گیا۔ ایک صحابیؓ نے رسول اللہ صلی اللہ علیہ وسلم کی خدمت میں عرض کیا: یا رسول اللہ! کیا عورتیں بھی جہاد میں حصہ لے سکتی ہیں، فرمایا: ایسے جہاد میں حصہ لے سکتی ہیں جس میں قتال نہیں ہے، یعنی حج اور عمرہ۔ (سنن ابن ماجہ: ۲/۹۶۸، رقم الحدیث:۲۹۰۱)گویا عورتوں کے لئے حج اور عمرہ جہاد کے قائم مقام ہے۔ حضرت عائشہؓ سے بھی اسی طرح کی روایت ہے، فرماتی ہیں: ہم نے عرض کیا: یارسولؐ اللہ! ہم جہاد کو سب سے افضل اور بہتر عمل سمجھتے ہیں، کیا ہم عورتیں جہاد میں شریک نہ ہوا کریں، آپ صلی اللہ علیہ وسلم نے ارشاد فرمایا: نہیں!تمہارا جہاد حج مبرور ہے۔ (صحیح البخاری: ۲/۱۳۳، رقم الحدیث: ۱۵۲۰)

البتہ اگر حالات کا تقاضا ہو، اور خواتین کی شرکت سے کسی فتنے کا اندیشہ نہ ہو تو عورتیں مجاہدین اسلام کی مدد اور ان کی طبعی وغذائی ضرورتوں کی دیکھ بھال کے مقصد سے شریک ہوسکتی ہیں۔ غزوۂ اُحد میں بعض خواتین اسلام کی شرکت سے اس کی گنجائش معلوم ہوتی ہے۔ حضرت انسؓ روایت کرتے ہیں کہ احد کے دن میں نے حضرت عائشہؓ اور اپنی والدہ ام سلیمؓ کو دیکھا کہ وہ پائنچے چڑھائے ہوئے ہیں اور پانی کے مشکیزے بھر بھر کر لا رہی ہیں، میں نے انہیں مجاہدین کو پانی پلاتے ہوئے دیکھا، جب ان کا مشکیزہ خالی ہوجاتا تو اسے پھر بھر کر لے آتیں۔ (صحیح البخاری:۴/۳۳، رقم الحدیث: ۲۸۸۰) حضرت عمر بن الخطابؓ سے مروی ہے کہ احد کے دن ابوسعید الخدریؓ کی والدہ ام سُلَیْطؓہمارے لئے مشکیزے میں پانی بھر بھر کر لاتی رہیں۔ (صحیح البخاری:۵/۱۰۰، رقم الحدیث: ۴۰۷۱) حضرت ربیع بنت معوذؓ کہتی ہیں کہ ہم غزوات میں رسول اللہ ﷺکے ساتھ جایا کرتے تھے تاکہ لوگوں کو پانی پلائیں، زخمیوں کی مرہم پٹی کریں اور مقتولین کو اٹھا کر لائیں۔ (صحیح البخاری: ۷/۱۲۲، رقم الحدیث: ۵۶۷۹)

تنہا نُسیبۃ بنت کعب مازنیہ جو ام عمارہؓ کے نام سے مشہور تھیں ایسی خاتون ہیں جنھوں نے غزوۂ احد میں باقاعدہ جنگ لڑی۔ یہ خاتون درحقیقت زخمیوں کی دیکھ بھال، اور مجاہدین کو پانی پلانے کی غرض سے آئی تھیں، اور اس کام میں حصہ بھی لے رہی تھیں کہ اچانک انھوں نے سنا کہ محمد صلی اللہ علیہ وسلم کو قتل کردیا گیا ہے، انھوں نے دیکھا کہ لوگ بدحواس ہوکر بھاگ رہے ہیں، اتنے میں کسی نے کہا کہ لوگو! بہادری سے لڑو، محمد صلی اللہ علیہ وسلم کے بعد زندہ رہ کر کیا کرنا ہے، اس لئے بے خوف ہوکر لڑو اور موت سے نہ ڈرو۔ ام عمارہؓ نے یہ دونوں باتیں سنیں، کسی مجاہد سے تلوار لی، اور تلاش کرتے کرتے رسول اللہ صلی اللہ علیہ وسلم تک پہنچ گئیں، آپؐ حیات تھے، مگر کفار برابر آپ پر حملہ کررہے تھے۔ اس وقت کا حال بیان کرتے ہوئے ام عمارہؓ کہتی ہیں کہ چند صحابہؓ جن میں میرے دو بیٹے اور میرے شوہر بھی تھے آپؐ کی طرف آنے والے تیروں کو روک رہے تھے، میں بھی حضورؐ کا دفاع کرنے والوں میں شامل ہوگئی، میرے پاس ڈھال نہیں تھی، آپ صلی اللہ علیہ وسلم نے کسی صحابی سے ڈھال مجھے دلوائی، اتنے میں ابن قمیہ وہاں آگیا، اس کا ارادہ رسول اللہ علیہ وسلم کو (نعوذ باللہ) قتل کرنے کا تھا، میں اس کا ارادہ بھانپ گئی، اور میں نے اس پر حملے شروع کردئے، اس نے بھی مجھ پر حملے کئے، میرا مونڈھا بری طرح زخمی ہوگیا اور میرے جسم پر تیرہ زخم آئے۔ (سیرت ابن ہشام: ۳/۳۶) حضرت ام عمارہؓ کے واقعے سے فقہاء نے یہ نتیجہ اخذ کیا ہے کہ اگر دشمن افراد ہجوم کرکے آئیں اور عورتوں کی شرکت ضروری ہوجائے تو وہ جنگ میں حصہ لے سکتی ہیں۔ (سیرت المصطفی: ۲/۲۳۸)

غزوۂ احد میں ستر صحابہ شہید ہوئے، اتنی بڑی تعداد میں مسلمانوں کی شہادت سے جو مسائل پیدا ہوئے ان کا براہ راست تعلق خواتین سے تھا، جتنے صحابہؓ شہید ہوئے تقریباً اتنی ہی خواتین بیوہ ہوگئیں، بہت سے بچے یتیم ہوگئے، اور ان کی ذمہ داری بھی ماؤں پر آ پڑی، مگر نثار جائیں ان خواتین پر کہ انھوں نے کوئی واویلا نہیں مچایا، بلکہ صبر کا ایسا مظاہرہ کیاجس کی نظیر نہیں ملتی۔ اگرچہ یہ مسائل جلدی ہی حل بھی ہوگئے، رسول اکرم ﷺنے بیواؤں کی دست گیری اور یتیموں کی کفالت پر اس قدر زور دیا کہ معاشرے میں بیواؤں کو عزت کی زندگی اور یتیموں کو پدرانہ شفقتیں میسر آگئیں۔

عفو ودرگزر اور لطف وکرم:

غزوۂ احد کی ابتدا ہی میں عجیب وغریب حالات رونما ہوئے۔ رسول اللہ صلی اللہ علیہ وسلم مدینے میں رہ کر جنگ کرنا چاہتے تھے، مگر بعض نوجوان صحابہؓ نے جذبۂ جہاد اور شوق شہادت سے مجبور ہوکر باہر نکلنے پر اصرار کیا، آپؐ اپنی مرضی کے برخلاف مسلّح ہوکر باہر تشریف لائے اور مسلمانوں کو اُحد کی طرف کوچ کرنے کا حکم دیا۔ وہاں پہنچ کر آپؐ نے پچاس صحابہؓ کو پہاڑی پر متعین فرمادیا اور انہیں حکم دیا کہ وہ کسی بھی حال میں وہاں سے نہ ہٹیں، خواہ فتح کی خبر ملے یا شکست کی اطلاع آئے، اپنی جگہ جمے رہیں، مگر اکثر صحابہؓ یہ دیکھ کر کہ دشمن شکست کھا کر بھاگ نکلا ہے، پہاڑی سے اتر کر میدان میں آگئے۔ ان حضرات کے اس فیصلے سے شمنانِ اسلام کو دوبارہ جمع ہونے اور مسلمانوں پر حملہ کرنے کا موقع مل گیا، اس کے نتیجے میں بہت سی شہادتیں ہوئیں، اور رسول اللہ صلی اللہ علیہ وسلم کو جسمانی تکلیف پہنچی۔ پھر بعض صحابہؓ شکست کھا کر مدینے کی طرف نکل پڑے تھے، ان تمام واقعات کی وجہ سے ممکن تھا کہ آپ صلی اللہ علیہ وسلم کے قلب مبارک میں کچھ تکدر پیدا ہوجاتا جو صحابۂ کرامؓ کے لئے دینی اور دنیوی ہر اعتبار سے نقصان دہ ہوتا لیکن رسول اللہ ﷺ نے اپنے قلب مبارک میں کسی تکدر کو جگہ نہیں دی، بلکہ تمام صحابہؓ کے ساتھ خوش خلقی اور لطف ومہربانی سے پیش آئے اور ہر ایک کے ساتھ عفو ودرگزر کا معاملہ فرمایا۔ قرآن کریم نے آپؐ کے اس مشفقانہ برتاؤ کی ان الفاظ میں تحسین فرمائی ہے:

’’(اے حبیبِ والا صفات!) پس اللہ کی کیسی رحمت ہے کہ آپ ان کے لئے نرم طبع ہیں، اور اگر آپ تُندخُو (اور) سخت دل ہوتے تو لوگ آپ کے گرد سے چھٹ جاتے، سو آپ ان سے درگزر فرمایا کریں اور ان کے لئے بخشش مانگا کریں اور (اہم) کاموں میں ان سے مشورہ کیا کریں، پھر جب آپ پختہ ارادہ کر لیں تو اللہ پر بھروسہ کیا کریں، بیشک اللہ توکّل والوں سے محبت کرتا ہے۔‘‘ (آل عمران:۱۵۹)

قرآن کریم میں غزوۂ احد کا ذکر

سورۂ آل عمران کی تقریباً ساٹھ آیات میں غزوۂ احد کا ذکر کیا گیا ہے، یہ واضح رہنا چاہئے کہ قرآن کریم تاریخ کی کتاب نہیں ہے بلکہ الٰہی تعلیمات کا مجموعہ ہے اور یہ تعلیمات بھی پیغمبر پر دفعۃً نازل نہیں ہوئیں بلکہ ضرورت کے مطابق تدریجی طور پر نازل ہوئیں، اسلئے احد کے ذکر میں واقعاتی ترتیب کی جستجو بے سود ہے، ان آیات میں ان غلطیوں پر توجہ دلائی گئی ہے جو غزوۂ احد کے موقع پر مسلمانوں سے سرزد ہوئیں، اسی کے ضمن میں آئندہ کے لئے کچھ ہدایات اور احکام بھی ہیں۔

غزوۂ احد سے متعلق قرآن کریم کی ان آیات کا خلاصہ یہ ہے کہ جو افراد اور جماعتیں اپنے امیر کا حکم بجا لاتی ہیں وہ کامیاب ہوجاتی ہیں، اور جو اس سے رو گردانی کرتی ہیں ان کو نقصان اٹھانا پڑتا ہے۔ احد کے میدان میں تمہیں جو ٹھوکر لگی ہے اس سے سبق لو، اور آئندہ کے لئے عہد کرو کہ جو حکم تمہیں دیا جائے گا اس سے سرِمو انحراف نہیں کرو گے۔ تمہارا اس حادثے سے متاثر ہونا فطری ہے، مگر اتنا بھی متاثر نہیں ہونا چاہئے کہ بالکل ہی ہمت ہار دو، قوموں کی زندگی میں یہ مرحلے پیش آتے رہتے ہیں، کبھی فتح ملتی ہے، کبھی شکست نصیب ہوتی ہے، یہ جنگ ہے، اس میں کبھی ایک فریق غالب آتا ہے اور کبھی دوسرا، بدر کی جنگ میں تم غالب رہے، آج کی جنگ میں تمہیں نقصان اٹھانا پڑا، اس سے دل برداشتہ ہونے کی ضرورت نہیں ہے، ہار جیت کی کوئی اہمیت نہیں ہوتی، اصل چیز ایمان کی قوت ہے، یہ دیکھو کہ تمہارے اندر ایمانی قوت ہے یا نہیں، جذبۂ جہاد موجود ہے یا نہیں، اگر ایمان اور جذبۂ جہاد سلامت ہے تو پھر دنیا کی کوئی طاقت تمہیں مغلوب نہیں کرسکتی۔

احد میں جو عارضی شکست ہوئی، اس کے تین بڑے اسباب تھے، ایک تو یہ کہ رسول اللہ صلی اللہ علیہ وسلم کی سخت تاکید اور ہدایات کے باوجود مسلمانوں نے وہ جگہ چھوڑ دی جہاں انہیں متعین کیا گیا تھا۔ اس سے جنگ کا پانسہ پلٹ گیا اور جیتی ہوئی جنگ شکست میں تبدیل ہوگئی، دوسرا سبب یہ ہواکہ مسلمانوں میں رسول اللہ صلی اللہ علیہ وسلم کی شہادت کی خبر پھیل گئی، اس خبر سے مسلمان بد دل اور مایوس ہوگئے، کچھ لوگ میدان چھوڑ کر بھی چلے گئے، کچھ ہتھیار پھینک کر بیٹھ گئے، وہ تو ایک صحابی نے آپ صلی اللہ علیہ وسلم کو پہچان لیا اور انھوں نے رسولؐ اللہ کی موجودگی کا اعلان کیا تب جاکر مسلمانوں میں ہمت واپس لوٹی اور وہ دوبارہ لڑنے کے لئے میدان میں آئے۔ اصل اور بڑا سبب، بعض صحابہ کی یہ رائے تھی کہ مدینے سے نکل کر لڑنا چاہئے، حالانکہ رسول اللہ ﷺکفار ومشرکین کو مدینے میں گھیرنا چاہتے تھے، مگر کچھ صحابہؓ ضد پر اڑے رہے، بالآخر حضورؐ بھی ان کی رائے سے متفق ہوگئے، اور مسلمانوں کو مدینے سے باہر نکل کر جنگ کرنا پڑی۔ یہ تین اسباب تھے جن کی وجہ سے اس جنگ میں ہزیمت اٹھانی پڑی۔مسلمان میدان سے واپس تو آگئے، مگر انہیں سخت صدمہ تھا، ایک تو اس شکست کا ،جو انہیں جنگ میں ہوئی، دوسرے حکم عدولیوں کا، مگر کیوں کہ یہ شرمندگی دل کی گہرائیوں سے تھی اس لئے اللہ تعالیٰ نے ان آیات میں انہیںتنبیہ تو کی مگر آئندہ کے لئے یہ کہہ کر حوصلہ بھی دیا:’’اور تم ہمت نہ ہارو اور نہ غم کرو اور تم ہی غالب آؤ گے اگر تم (کامل) ایمان رکھتے ہو۔‘‘ (آل عمران:۱۳۹)(جاری)

4 مارچ 2022، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے