Mon Oct 14 2024, 04:08 AM

Urdu Section ( 17 Jan 2022, NewAgeIslam.Com)

At The Funeral of Hazrat Hamza, the Prophet's (PBUH) Eyes Were Filled With Grief Part-66 حضرت حمزہؓ کی تجہیز تکفین کے وقت شدت غم سے آپ صلی اللہ علیہ وسلم کی چشم مبارک چھلک اٹھی تھی

مولانا ندیم الواجدی

14 جنوری،2022

گزشتہ سے پیوستہ

حضرت حمزہ کی شہادت

وحشیؓ کہتے ہیں کہ میں وہاں سے چلا گیا، جب حضور صلی اللہ علیہ وسلم وصال فرما گئے تو مسلیمہ کذاب کے فتنے نے سر ابھارا۔ میں نے اپنے دل میں سوچا کہ مجھے مسیلمہ کامقابلہ کرنے کے لئے جاناچاہئے، شاید میں اسے قتل کرسکوں او راس طرح حضرت حمزہؓ کے قتل کے گناہ کا تدارک کرسکوں، چنانچہ میں لوگوں کے ساتھ مسلیمہ سے جنگ کرنے کیلئے نکلا، میں نے دیکھا کہ ایک آدمی دیوار کی درز میں کھڑا ہوا ہے،یہ مسلیمہ کذاب تھا، میں نے اس کے سینے کانشانہ لے کر اس کی طرف اپنانیزہ پھینکا، وہ نیزہ اس کے دونوں شانوں کے پار ہوگیا، اتنے میں ایک انصاری صحابی اس کی طرف لپک کر گئے اور تلوار اس کی کھوپڑی پر مار کر اس کا کام تمام کردیا۔ (صحیح البخاری:5/100، رقم الحدیث:4072، مسند احمد بن حنبل:3/501، فتح الباری:7/429)

حضرت حمزہؓ کے قتل پر کفار کے عورتوں نے خوشی کے گیت گائے اور ابوسفیان کی بیوی ہندہ بن عتبہ نے حضرت حمزہؓ کے اعضا ء کی بے حرمتی کی۔تجہیز و تکفین کے وقت رسول اللہ صلی اللہ علیہ وسلم نے اپنے چچا کا یہ حال دیکھا تو شدت غم سے رونے لگے، اور لاش سے مخاطب ہوکر فرمایا: اگر مجھے اپنی پھوپھی صفیہ کا خیال نہ ہوتا تو میں آپ کو اس طرح چھوڑ دیتا تاکہ پرندے آپ کو کھا جاتے اور قیامت کے دن آپ کے پیٹوں سے اٹھائے جاتے، خدا کی قسم مجھ پر آپ کا انتقام واجب ہے، میں آپ کے بدلے میں ستر کافروں کا مثلہ کروں گا۔ مگر وحی کے ذریعے مثلہ کرنے کی مخالفت کا حکم نازل ہوگیا، آپ صلی اللہ علیہ وسلم نے اپنی قسم پوری نہیں فرمائی بلکہ کفارہئ قسم ادا کرکے صبر کا راستہ اختیار فرمایا۔(ابوداؤد:3/195، رقم الحدیث:3136)

شہادت کے بعد حضرت صفیہؓ بھی اپنے بھائی کو دیکھنے کے لئے آئیں، لیکن آپ صلی اللہ علیہ وسلم نے ان کو دیکھنے نہیں دیا بلکہ تسلی دے کر واپس کردیا، آپ صلی اللہ علیہ وسلم پر اپنے چچا حضرت حمزہؓ کی شہادت کا بے حد اثر تھا، مدینہ تشریف لانے کے بعد آپ صلی اللہ علیہ وسلم نے سنا کہ بنو عبدالاشہل کی عورتیں اپنے شہداء پر بین کررہی ہیں تو آپ صلی اللہ علیہ وسلم نے فرمایا افسوس! حمزہ پر تو کوئی رونے والا بھی نہیں۔ انصار نے یہ سنا تو انہوں نے نے اپنی عورتوں کو آستانہ نبوت پر بھیج دیاتاکہ وہ وہاں جاکر روئیں آپ صلی اللہ علیہ وسلم کا غم ہلکا ہو۔ کچھ ہی دیر بعد آپ صلی اللہ علیہ وسلم نے انہیں حکم دیا کہ وہ واپس جائیں اور آج کے بعد پھر کسی مرنے والے پر اس طرح بین نہ کریں۔ کہا جاتاہے کہ مدتوں مدینے میں یہ دستور رہا کہ جب وہاں کی عورتیں کسی پر روتیں تو دوچار آنسو حضرت حمزہؓ پر بھی بہا لیتی تھیں۔ (سیرۃ بن ہشام:3/50)

حضرت حنظلہؓ غسیل الملائکہ

گزشتہ صفحات پر ابوعامر فاسق کاذکر آیا ہے، جو رسول اللہ صلی اللہ علیہ وسلم کی تشریف آوری کے بعد مدینے سے چلا گیا تھا او راس نے مکّے میں رہائش اختیار کرلی تھی، یہ شخص دشمنوں کی فوج میں شامل ہوکر آیا، مسلمانوں کو مقابلے کا چیلنج کی، حضرت علیؓ نکل کر آئے اور اس کی ٹانگ دی، پورا قصہ آپ پڑھ چکے ہیں، حضرت حنظلہؓ اسی کے بیٹے ہیں، باپ کی موجودگی میں ہی مسلمان ہوگئے تھے، مدینہ سے جانے کا ایک سبب بیٹے کااسلام قبول کر نابھی تھا جب ابوعامر فاسق نے دشمنوں کی صفوں سے نکل کر مسلمانوں کو للکار ا تو حنظلہؓ آگے بڑھ کر باپ کومزہ چکھاناچاہتے تھے، لیکن رسول اللہ صلی اللہ علیہ وسلم نے ان کو اس کی اجازت نہیں دی، جب جنگ شروع ہوئی تو یہ بھی نہایت بے جگری سے لڑے،ایک موقع پر ان کا سامنا ابوسفیان سے ہوگیا، انہوں نے اس پر حملہ کرناچاہا کہ پیچھے سے شداد بن اسود نے حملہ کردیا، جس سے حضرت حنظلہؓ شہید ہوگئے، جب ان کا لاش اٹھائی گئی تو ان کے سر کے بالوں سے پانی ٹپک رہا تھا، رسول اللہ صلی اللہ علیہ وسلم نے فرمایا میں نے دیکھا کہ فرشتے حنظلہؓ کو اٹھا کر لے گئے او رانہوں نے چاندی کے برتنوں میں ان کوغسل دیا،اسی لئے انہیں غسیل الملائکہ کا لقب دیا گیا جس دن ان کی شہادت کا واقعہ پیش آیا اس سے پہلے والی رات میں ان کی اہلیہ نے خواب میں دیکھا کہ آسمان کا دروازہ کھلا، حنظلہ اس میں داخل ہوگئے اور دروازہ بند ہوگیا، اہلیہ سمجھ گئیں کہ اب حنظلہ شہید ہوکر دنیا سے رخصت ہونے والے ہیں۔ (الخصائص الکبری:1/358، الروض الانف:5/320)

مسلمانوں کی فتح

انفرادی مقابلوں میں مشرکین کے بہت سے بہادر مارے گئے،اس کے بعد دونو ں لشکروں میں مقابلہ شروع ہوا، اس میں بھی مسلمانوں کا پلڑا بھاری رہا، حضرت ابودجانہؓ، حضرت حمزہؓ، حضرت علیؓبن ابی طالب، حضرت مصعب بن عمیرؓ، حضرت طلحہ الانصاریؓ اور حضرت سعدبن وقاصؓ وغیرہ جیسے مجاہد ین کفار کی صفوں میں گھس گئے اور بعض وہاں تک پہنچ گئے جہاں عورتیں رزمیہ گیت گا گا کر اپنے لشکرکی ہمت بڑھا رہی تھیں۔ ایک واقت ایسا آیا کہ ان کا جھنڈا بردار بھی زمین پر گرگیا، مشرکین میں ابتری پھیل گئی، ان کے قدم اکھڑ گئے، مرد اور عورتیں سب میدان چھوڑکر بھاگنے پر مجبور ہوگئے، مسلمان مال غنیمت سمیٹنے لگے۔ (الکامل فی التاریخ:2/44،45)

فتح کے بعد شکست

وہ پچاس تیر انداز صحابہؓ جن کو رسول اللہ صلی اللہ علیہ وسلم نے جبل اُحدکے پیچھے والی پہاڑی پر اس حکم کے ساتھ متعین فرمایا تھا کہ فتح ہو یا شکست کسی بھی صورت میں یہاں سے مت ہلنا: کافروں کے لشکر نے افرا تفری دیکھ کر سمجھے کہ جنگ ختم ہوچکی ہے، دشمن میدان چھوڑ کر بھاگ گیا ہے او رہم فتح یاب ہوگئے ہیں، اس لئے اب یہاں رہنا بے سود ہے۔ انہوں نے اپنے امیر حضرت عبداللہ بن جبیرؓ سے کہا کہ چلئے مال غنیمت سمیٹتے ہیں، ہم غالب آچکے ہیں، اب ہمیں کس بات کا انتظار ہے۔

عبداللہ بن جبیرؓ نے فرمایا: ساتھیو! کیا تم رسول اللہ صلی اللہ علیہ وسلم کا حکم بھول گئے؟ کہنے لگے! خدا کی قسم ہم تومیدان کا رزار میں جاکر مال غنیمت اکٹھا کریں گے۔(صحیح البخاری:4/65، رقم الحدیث:3039)

نتیجہ یہ ہوا کہ عبداللہ بن جبیرؓ کے ساتھ دس آدمی رہ گئے او رباقی چالیس افراد پہاڑی سے اتر کر وہاں چلے گئے جہاں جنگ ہورہی تھی، حضرت عبداللہ بن عباسؓ نے اس وقت کی صورت حال کی منظر کشی ان الفاظ میں کی ہے، فرماتے ہیں:

جب کفار کا لشکر بکھر گیا تو رسول اللہ صلی اللہ علیہ وسلم نے مال غنیمت جمع کرنے کی اجازت عطا فرمادی۔ یہ دیکھ کر تیر انداز صحابہؓ نے اپنی جگہ چھوڑ دی او رمسلمانوں کی صفوں میں آکر اس طرح شامل ہوگئے جس طرح ایک ہاتھ کی انگلیاں دوسرے ہاتھ کی انگلیوں میں مل جاتی ہیں، جب دشمن نے یہ دیکھا کہ وہ جگہ خالی ہوچکی ہے جہاں تیر انداز مورچہ بنائے کھڑے ہوئے تھے اس نے اُدھر سے مسلمانوں پر دھاوابول دیا، تب اس اچانک حملے سے صحابہؓ بوکھلا گئے،کیونکہ مجاہدین،تیر انداز صحابہؓ اور دشمن کے افراد سب ایک دوسرے میں خلط ملط ہوگئے تھے اس لئے یہ تمیز بھی باقی نہیں رہی کہ کون ہمارادشمن ہے او رکون اپنا ہے لوگوں نے اپنے لوگوں پر بھی حملہ کردیا، اس طرح بھی بہت سے مسلمان اپنوں کے ذریعہ قتل کردیے گئے۔(مسند احمد بن حنبل:4/368 رقم الحدیث: 2609، سیرت ابن ہشام:3/42)

خالد بن ولید نے ٹیلہ خالی دیکھا تو وہ اپنے گھڑ سواروں کے ساتھ جبل اُحد کاچکر کاٹ کر وہا ں پہنچ گئے،عبداللہ بن جیبرؓ او ران کے چند ساتھی ٹیلے پر موجود تھے، ان حضرات نے خالد بن ولید کو روکنے کی بے حد کوشش کی مگر وہ روکنے کا میاب نہ ہوسکے اور لڑتے ہوئے سب کے سب شہید ہوگئے، مؤرخین نے ان کی تعداد دس یا گیارہ لکھی ہے، انہیں شہید کرکے خالد بن ولید اوران کے ساتھی پشت سے مسلمانوں پر حملہ آور ہوگئے۔

یہ حملہ اتنا اچانک تھا کہ مسلمان گھبرا گئے انہیں اس کا وہم و گمان بھی نہ تھا کہ پشت سے قدر زبردست حملہ ہوسکتا ہے۔خالد بن ولید کو مسلمانوں سے لڑتے دیکھ کر جو مشرکین میدان چھوڑ کر بھاگ کھڑے ہوئے تھے وہ بھی پلٹ کر آگئے، مسلمان دونوں طرف سے گھر گئے، پیچھے سے بھی اور سامنے سے بھی، مسلمان بھی مقابلہ کرتے رہے، ایک وقت ایسابھی آیا کہ دشمن اور دوست کی تمیز ختم ہوگئی، نہ کوئی نظام تھا نہ اتحاد تھا، جس کے جو سمجھ میں آرہا تھا وہ کررہا تھا، ایسا بھی ہوا کہ مسلمانوں نے دشمن سمجھ کر مسلمان ہی کو قتل کردیا،چنانچہ حضرت حذیفہؓ کے والد حضرت یمانؓ مسلمانوں کے ہاتھوں شہید ہوگئے، اپنے والد کو مسلمانوں کے نرغے میں پھنساہوا دیکھ کر انہوں نے بڑا شور مچایا کہ وہ میرے والد ہیں،میرے باپ ہیں، ان کو مت مارو، انہیں چھوڑ دو، مگر اس ہنگامہ رست خیز میں کون کس کی سن رہا تھا، اس طرح مسلمان دشمنوں کے ہاتھوں تو شہید ہوئے ہی اپنوں کا نشانہ بھی بنے، بعد میں مسلمان اس واقعے پربڑے نادم ہوئے،مگر جو ہوناتھا وہ ہوچکا تھا، حضرت حذیفہؓ نے فرمایا: اللہ تمہیں معاف کرے وہ بڑامعاف کرنے والا ہے، جنگ کے بعد رسول اللہ صلی اللہ علیہ وسلم نے حضرت یمانؓ کے قتل کی ویت دینی چاہی مگر حضرت حذیفہؓ نے قبول کرنے سے انکار کردیا۔(طبقات بن سعد:2/43، الکامل فی التاریخ:2/45)(جاری)

14 جنوری،2022،بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے