Urdu Section ( 10 Jan 2022, NewAgeIslam.Com)

The Martyrdom Of Hazrat Hamza, The Holy Prophet's Uncle, Is The Most Terrible Episode Of The Battle Of Uhud Part-65 جنگ اُحد کا سب سے المناک واقعہ حضور صلی اللہ علیہ وسلم کے چچا حضرت حمزہؓ کی شہادت ہے

مولاناندیم الواجدی

7 جنوری،2022

انفرادی مقابلے

حسب دستور انفرادی مقابلے ہوئے، سب سے پہلے طلحہ بن عثمان مشرکین کی صفوں سے نکل کر باہر آیا، اس کے ہاتھوں میں قوم کا جھنڈا تھا،اس نے مسلمانوں کی طرف دیکھا اور للکارتے ہوئے کہا کوئی ہے جو میرے مقابلے پر آئے اور مجھ سے جنگ کرے، اس نے یہ بات کئی مرتبہ کہی، مگر مسلمانوں کی طرف سے کوئی نکل کر نہیں آیا، کہنے لگا اسے اصحاب محمد! تم تو یہ کہا کرتے ہو کہ اللہ تعالیٰ تمہاری تلواروں کے ذریعے ہمیں جہنم میں پہنچا دیتاہے او رہماری تلواروں سے قتل ہوکر تم جنت میں پہنچ جاتے ہو، تم میں کیا ایسا ہے جو مجھے قتل کرکے جہنم میں پہنچادے یا خود قتل ہوکر جنت میں چلا جائے۔ اس کی یہ بات سن کر حضرت علی بن أبی طالب کرم اللہ وجہہ صفوں سے آگے نکل کر آئے او رکہنے لگے اس ذات کی قسم جس کے قبضے میں میری جان ہے میں ا س وقت تک تجھے نہیں چھوڑوں گا جب تک میری تلوار سے تو جہنم رسید نہ ہوجائے یا میں خود تیری تلوار کا زخم کھا کر جنت میں نہ چلا جاؤں۔ یہ کہہ کر حضرت علیؓ نے اس کی پنڈلی پروار کیا۔ وہ گھوڑے پر سوار تھا، حضرت علیؓ کی تلوار کے وار سے اس کی پنڈلی پر کاری ضرب لگی اور وہ خود بھی پرچم سمیت زمین پر آپڑا، جس سے اس کے جسم کا زیریں حصہ کھل گیا، کہنے لگا: اے چچا زاد بھائی! میں تجھ سے رحم کی بھیک مانگتا ہوں، حضرت علیؓ نے دور ہٹ گئے۔ رسول اللہ صلی اللہ علیہ وسلم نے نعرہ تکبیر بلندکیا، بعض صحابہ نے حضرت علیؓ سے کہا بھی کہ اسے کیوں چھوڑ دیا، فرمایا: میرے عم زاد نے مجھے اللہ کا واسطہ دے کر رحم کرنے کی درخواست کی تھی، اس کے کپڑے ہٹ گئے تھے، مجھے اس حال میں اس پر حملہ کرنے میں شرم محسوس ہوئی۔(تفسیر الطبری:7/217، السیرۃ الحلبیہ:2/497)

مشرکین کا نامور پہلوان طلحہ بن أبی طلحہ بھی اونٹ پر سوار ہوکر سامنے آیا، مسلمانوں کی طرف سے زبیر بن عوامؓ پیدل چلتے ہوئے آئے اور اُچھل کر اس کے اونٹ پر سوار ہوگئے، اسی حالت میں اس پر تلوار سے حملہ کیا او روہ زمین پر ڈھیر ہوگیا۔ مقتول کا بھائی ابو سعد آیا اور حضرت سعد بن ابی وقاصؓ کے ہاتھوں مارا گیا، پھر اس کے دو بھتیجے مُسافع او رجُلاس آئے اور عاصم بن ثابتؓ کے تیروں کانشانہ بن کر ڈھیر ہوگئے۔ (البدایہ و النہایہ: 51/369)مؤرخین و محدثین نے سترہ افراد کے نام لکھے ہیں جو یکے بعد دیگر ے آتے رہے اور مسلمانوں کے ہاتھوں واصل جہنم ہوتے رہے، بعض مصنفین نے بائیس کے نام دئیے ہیں جو یکے بعد دیگرے انفرادی مقابلوں میں مارے گئے۔ (سیرۃ المصطفیٰ:2/199)

گھمسان کی جنگ:

مشرکین کے کئی جاں باز پے در پے قتل ہوگئے، یہ دیکھ کر ان میں جوش بھر گیا اور وہ پوری شدت سے حملے کرنے لگے، مسلمان بھی اس لمحے کا انتظار کررہے تھے، وہ بھی کفار پر پل پڑے، گھمسان کی جنگ شروع ہوگئی۔ رسول اللہ صلی اللہ علیہ وسلم صحابہؓ کی ہمت بڑھارتے رہے او رانہیں صبر کرنے اور حوصلے سے کام لینے کی تلقین فرماتے رہے۔ اس روز ابودجانہؓ الانصاری طلحہ بن عبید اللہؓ، حمزہ بن عبدالمطلبؓ، علی بن أبی عبد طالبؓ، انس بن النضرؓ اور سعد بن الربیعؓ وغیرہ حضرات صحابہؓ نے بڑھ بڑھ کر کفار پر حملے کئے۔(زادالمعاد:3/150)

یہ ابودجانہؓ وہی صحابی ہیں جن کو رسول اللہ صلی اللہ علیہ وسلم نے اس شرط کے ساتھ اپنی تلوار عطا فرمائی تھی کہ وہ اس کا حق ادا کریں گے، حضرت زبیر بن عوامؓ نے یہ تلوار لینے کے لئے اپنے ہاتھ بڑھائے تھے، اور درخواست کی تھی مگر آپ نے انہیں نہیں دی۔ وہ کہتے ہیں کہ رسول اللہ صلی اللہ علیہ وسلم نے ابودجانہؓ سماک بن خرشہ کو تلوار دیتے ہوئے فرمایا کہ تم اس سے کسی مسلمان کو قتل مت کرنا اور کسی کافر کو مت چھوڑ نا۔ حصرت زبیرؓ کہتے ہیں کہ میں ان کے پیچھے لگا رہا کہ دیکھوں وہ کیا کرتے ہیں، خدا کی قسم جدھر گزرجاتے کسی دشمن کو نہ چھوڑ تے، لڑتے لڑتے وہ میدان کے آخری کنارے پر چلے گئے، وہاں کچھ عورتیں دف بجارہی تھیں، او راپنے اشعار سے کفار کو حملہ کرنے پر اکسارہی تھیں، ابودجانہ نے ایک عورت پر تلوار اٹھائی، مگر پھر رک گئے او راسے چھوڑ کر چلے گئے۔ جنگ کے بعد میں انے ان سے پوچھا: ابودجانہؓ! تم اس عورت کو قتل کرتے کرتے کیوں رک گئے؟ انہوں نے جواب دیا کہ اللہ کے رسول صلی اللہ علیہ وسلم کی تلوار کی حرمت کا تقاضا یہ تھا کہ وہ کسی عورت پر نہ چلائی جائے۔ روایات میں ہے کہ وہ عورت ابوسفیان کی بیوی ہندہ تھی۔(الجمع للہیثمی: 6/109) حضرت انس بن مالکؓ بھی اپنا چشم دید مشاہدہ بیان کرتے ہیں کہ ابودجانہؓ جنگ کے روز اس تلوار کے ذریعے مشرکین کا سرقلم کررہے تھے۔ (صحیح مسلم:4/1917،رقم الحدیث:2470)

حضرت حمزہؓ کی شہادت:

جنگ اُحد کا سب سے زیادہ المناک واقعہ حضور صلی اللہ علیہ وسلم کے چچا حضرت حمزہ بن عبدالمطلبؓ کی شہادت کا واقعہ ہے۔ وہ ان صحابہؓ میں سے تھے جونہایت بے جگری سے لڑرہے تھے۔پہلے انہوں نے أرطاۃ بن عبد شرحبیل کو قتل کیا، یہ ان لوگوں میں سے ایک تھا جن کو جھنڈا اٹھانے کی ذمہ داری سپرد کی گئی تھی، اس کے بعد حضرت حمزہؓ کی نظر سباع بن عبدالعزی پر پڑی۔ آپؓ نے اسے یہ کہتے ہوئے آواز دی کہ اے ختنہ کرنے والی عورت کے بیٹے ذرا ادھر آنا، وہ قریب آیا تو ایک ہی وار میں اس گھس گھس کر حملے کررہے تھے، او رکشتوں کے پشتے لگارہے تھے، مگر خود ایک شخص کے ہاتھوں شہید ہوگئے، جو صرف ان کو قتل کرنے کے لئے او راس کام کے عوض اپنی آزادی کا پروانہ حاصل کرنے کے لئے دشمنوں کے ساتھ آیا تھا او ران کی تاک میں چھپا بیٹھا تھا۔آگے کا حال خود اس شخص سے سنتے ہیں۔

حضرت حمزہؓ کے قتل کرنے والے شخص کا نام وحشی ہے، وہ جبیر بن مطعم کے غلام تھے، اس کا بھائی طعیم بن عدی بن خیار، جنگ بدر میں حضرت حمزہؓ کے ہاتھوں مارا گیا تھا، اس وقت سے جبیر بن مطعم کے دل میں حضرت حمزہؓ کے خلاف انتقام کا جذبہ پرورش پا رہا تھا، جب اسے معلوم ہوا کہ قریش کے لوگ مدینے جارہے ہیں، اور ان کا ارادہ مسلمانوں پر حملہ کرنے کا ہے تو اسے خیال آیا کہ حمزہؓ سے انتقام لینے کا اس سے بہتر موقع دوسرا نہیں ہوسکتا، وحشی ایک ماہر تیر انداز تھے، جبیر نے وحشی سے کہا کہ تجھے ہمارے ساتھ چلنا ہے اگر تونے حمزہ کو قتل کردیاتو یہ سمجھ لینا کہ تو آزاد ہوچکا ہے، وحشی کو بھی یہ پیش کش پسند آئی او روہ قریش کے لشکر میں شامل ہوکر مدینے پہنچ گئے۔

بخاری شریف میں حضرت حمزہؓ کے قتل کا واقعہ تفصیل کے ساتھ مذکور ہے۔یہ واقعہ حضرت جعفر بن عمر وبن امیہ ضمریؓ نے خود حضرت وحشی سے سنا ہے۔ اس وقت وہ اسلام قبول کر چکے تھے او رشام کے شہر حمص میں مقیم تھے۔ راوی کہتے ہیں کہ میں عبیداللہ بن عدی بن الخیار کے ساتھ ان سے ملنے گیا او ران سے پوچھا کہ انہوں نے حضرت حمزہؓ جیسے بہاد آدمی کو کیسے قتل کردیاتھا، او راس کے بعد کیا واقعات پیش آئے تھے، ذرا تفصیل سے بتلائیں، وحشیؓ نے کہا:جب دونوں طرف کی فوجوں نے صف بندی کرلی تو سباع ناکی ایک شخص میدان میں نکلا اور اس نے مقابلے کی دعوت دی، یہ سنتے ہی حمزہ بن عبدالمطلبؓ اس کے مقابلے کے لئے نکلے اور کہنے لگے: اے سباع! اے ام انمار کے بیٹے، کیا تو اللہ اوراس رسول سے مقابلہ کرتا ہے؟ یہ کہہ کر حضرت حمزہؓ نے اس پر حملہ کیا اور جیسے گزرہے ہوئے کل یا گزشتہ کا وجود نہیں رہتا سباع نابود ہوگیا، وحشی کہتے ہیں کہ میں حضرت حمزہؓ کو مارنے کے لئے ایک پتھر کی آڑ میں چھپا بیٹھا تھا، جب وہ میرے قریب آئے تو میں نے اپناحربہ (دھار دار چکر) ان پر پھینک مارا ان کے ناف کے نچلے حصے پر لگا او رجسم کے پار ہوگیا، حضرت حمزہؓ اسی وقت شہید ہوگئے۔

وحشی کہتے ہیں کہ حمزہؓ کی شہادت کے بعد میں نے جنگ میں حصہ نہیں لیا، میرا مقصد پورا ہوچکا تھا،میں جنگ ختم ہونے کے انتظار میں ایک طرف بیٹھ گیا، جب لوگ جنگ سے واپس ہوئے، میں بھی واپس ہوگیا، میں مکہ ہی میں مقیم رہا، یہاں تک کہ وہاں اسلام پوری طرح پھیل گیا، میں طائف چلا گیا، جب طائف والوں نے اسلام قبول کرنے کے لئے ایک وفد بناکر رسول اللہ صلی اللہ علیہ وسلم کی خدمت میں روانہ کیا تو میں بھی اس وفد میں شامل تھا،میں آپ صلی اللہ علیہ وسلم کی خدمت میں حاضر ہوا، جب آپ صلی اللہ علیہ وسلم نے مجھے دیکھا تو فرمایا: کیا تو وحشی ہے؟ میں نے عرض کیا جی ہاں! فرمایا: کیا تو نے حمزہ کو قتل کیا تھا، میں نے عرض کیا: آپ کو جو خبر جس طرح پہنچی ہے وہ صحیح ہے، آپ نے فرمایا: کیا تم ایسا کرسکتے ہو کہ میرے سامنے نہ آؤ او راپنی صورت مجھ سے چھپائے رکھو۔ حضرت حمزہؓ کی شہادت کاآپ صلی اللہ علیہ وسلم کے دل پر بڑا گہرا اثر تھا، اور وہ حضرت وحشیؓ کو دیکھ کر اپنے اس غم کو تازہ نہیں کرناچاہتے تھے، ویسے بھی اس میں حضرت وحشیؓ کے لئے شفقت کا پہلو تھا، کیونکہ وہ مسلمان ہوچکے تھے، اگر وہ حضور اکرم صلی اللہ علیہ وسلم کے سامنے جاتے تو آپ کو چچا کے قتل کا واقعہ یادآجاتا او راس کی وجہ سے آپ کے دل میں بہ تقاضا ئے بشریت ان کی طرف سے انقباض پیدا ہوجانا اس کے لئے دنیا و آخرت میں یقینی طور پر نقصان کا سبب ہے، اس لیے حضور صلی اللہ علیہ وسلم نے حضرت وحشیؓ سے فرمایا کہ وہ میرے سامنے نہ آئیں کہ اسی میں ان کی سلامتی تھی۔(جاری)

7 جنوری،2022، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے