Sun Oct 06 2024, 01:54 PM

Urdu Section ( 15 Nov 2021, NewAgeIslam.Com)

When The Prjophet Said, 'Who can teach Ka'b bin Ashraf a lesson'? Part-58 جب آپؐ نے فرمایا: کون ہے جو کعب بن اشرف کو اس کی اوقات یاد دِلائے

مولانا ندیم الواجدی

12 نومبر 2021

کَعْب بن اشرف کا قصہ:

سیرت کی تمام کتابوں میں یہ قصہ نہایت اہمیت کے ساتھ ذکر کیا گیا ہے اور تفصیل کے ساتھ بھی، اس قصے سے صحابہ کرامؓ کی جاں نثاری، بہادری اور بیدار مغزی کے کئی پہلو نمایاں ہوتے ہیں۔ کعب بن اشرف قبیلۂ طی کی شاخ بنو نبہان سے تعلق رکھتا تھا۔ ایام جاہلیت میں اس کا باپ کسی قتل کا مرتکب ہوگیا تھا۔ قصاص یا دایت سے بچنے کے لئے اس نے مدینے کا رخ کیا اور یہاں آکر بنونضیر کا حلیف بن گیا۔ اس نے عقیلہ بنت حقیق نامی ایک عورت سے شادی کی جس کا نسبی تعلق بنو نظیر سے تھا۔ کعب بن اشرف اسی عورت کے بطن سے ہے، بہترین شاعر تھا، اپنی خداداد صلاحیتوں کی بنا پر وہ تجارت میں بھی کامیاب رہا اور یہود کی سیادت وقیادت بھی اس کے حصے میں آئی۔ رسول اللہ صلی اللہ علیہ وسلم کی مدینہ تشریف آوری کے بعد جو حالات وواقعات رونما ہوئے اور جس طرح جوق در جوق لوگ اسلام کے دامن رحمت میں پناہ لینے لگے اس وقت اس نے بھی کلمہ پڑھ کر اسلام قبول کرلیاتھا، مگر اس کا یہ اسلام کسی خاص مصلحت کی بنا پر تھا، دل سے وہ اب بھی پکّا یہودی تھا، اوراسلام دشمنی اس کے رگ وریشے میں بسی ہوئی تھی، بس وہ حالات کی وجہ سے اس کا اظہار نہیں کرپاتا تھا۔

غزوۂ بدر کے وقوع سے پہلے اس کا خیال یہ تھا کہ اس جنگ میں مسلمان ختم ہوجائیں گے اور اہل مکہ کو فتح ملے گی۔ لیکن نتیجہ اس کے برعکس نکلا، مسلمان کامیابی سے ہمکنار ہوئے اور مشرکین مکہ کو ذلت آمیز شکست سے دو چار ہونا پڑا۔ بہت سے بڑے بڑے سرداران قریش اس جنگ میں مارے گئے۔ کعب بن اشرف کو مسلمانوں کی فتح اور مشرکین مکہ کی شکست سے بڑا صدمہ پہنچا۔ بدر میں فتح ونصرت کی خبریں مدینے پہنچیں تو وہ یہ کہتا پھرتا تھا کہ کیا محمد (صلی اللہ علیہ وسلم) ان بہادروں کو قتل کرسکتے ہیں جن کا نام مقتولین کی حیثیت سے لیا جارہا ہے، اور اگر یہ سچ ہے تو پھر زمین کا باطن اس کے ظاہر سے بہتر ہے، یعنی مر کر زمین میں سما جانا زندہ رہنے کے مقابلے میں زیادہ اچھا ہے۔ جس وقت مسلمان بدر کے اموال غنیمت اور قیدیوں کے ساتھ مدینے میں داخل ہورہے تھے وہ مکہ مکرمہ جانے کے لئے تیار بیٹھا تھا۔ بہ ظاہر تو اس کا مقصد مقتولین بدر کے متعلقین اور بچے کھچے سرداران قریش سے مل کر اظہار تعزیت کرنا تھا، لیکن درحقیقت وہ انہیں یہ سمجھانے آیا تھا کہ وہ اس شکست سے دل برداشتہ نہ ہوں بلکہ حوصلہ رکھیں اور ایک نئی جنگ کے لئے تیار رہیں۔ اس نے اہل مکہ کو اپنے مرثیوں سے جو اس نے مقتولین بدر کے غم میں کہے تھے خوب رُلایا اور خود بھی دھاڑیں مار مار کر رویا۔ وہ ایک ایک قبیلے میں جاتا، اور اس قبیلے کے مقتول جوانوں کے مرثیے پڑھتا، اس طرح اس نے چند دن مکے میں گزارے اور اہل مکہ کو یہ یقین دلاکر واپس لوٹا کہ اگر وہ لوگ مدینے پر حملہ آور ہوئے تو مدینے کے یہود اندر سے بغاوت کردیں گے اور اس جنگ میں ان کی بھرپور مدد کریں گے۔

مدینہ واپس آکر اس نے کھلم کھلا اسلام اور مسلمانوں کو برا بھلا کہنا شروع کردیا۔ وہ رسالت مآب صلی اللہ علیہ وسلم کی شانِ اقدس میں گستاخیاں کرتا رہتا تھا، ہجو پر مشتمل اشعار کہہ کر انہیں پورے مدینے میں پھیلاتا، مسلم خواتین کے متعلق بھی اس کے تبصرے انتہائی شرم ناک ہوتے۔ ابتداء ً شاعر اسلام حضرت حسان بن ثابتؓ اس کے ہجو کا جواب دیتے، اور مدح رسول صلی اللہ علیہ وسلم پر مشتمل قصیدے کہتے، جن میں کعب کی ہفوات کا جواب بھی ہوتا، لیکن کعب نے جو جنگ چھیڑی تھی یہ اس کا پائیدار حل نہیں تھا، اس کو ایسے جواب کی ضرورت تھی جو اسے ہمیشہ ہمیشہ کے لئے خاموش کردیتی اور وہ قیامت تک کے لئے اللہ و رسولؐ کے ساتھ گستاخی کرنے والوں کے لئے نشان عبرت بن جاتا۔

ایک دن رسول اللہ صلی اللہ علیہ وسلم نے صحابۂ کرامؓ سے مخاطب ہوکر فرمایا: کون ہے جو کعب بن اشرف کو اس کی اوقات یاد دلائے اور اس کا کام تمام کردے، یہ سن کر ایک صحابی محمد بن مسلمہؓ کھڑے ہوئے۔ بخاری شریف میں یہ واقعہ ایک مستقل باب کے تحت ذکر کیا گیا ہے۔ حضرت جابر بن عبد اللہؓ کہتے ہیں کہ محمد بن مسلمہؓ نے کھڑے ہوکر عرض کیا: یا رسولؐ اللہ! کیا آپ چاہتے ہیں کہ میں اس بدبخت کو قتل کردوں؟ آپؐ نے فرمایا: ہاں! محمد بن مسلمہؓ نے عرض کیا: یارسول اللہ! میں یہ کام انجام دوں گا، آپؐ مجھے اتنی اجازت دیجئے کہ اگر میں مصلحت کے تحت آپؐ کی شانِ اقدس میں کوئی ایسی ویسی بات کہہ دوں تو اس پر اللہ کے یہاں کوئی مواخذہ نہ ہو اور نہ آپؐ ناراض ہوں۔ آپؐ نے فرمایا: تم کہہ سکتے ہو۔ (صحیح البخاری: ۵/۹۰، رقم الحدیث: ۴۰۳۷، صحیح مسلم:۳/۱۴۲۵، رقم الحدیث: ۱۸۰۱)

ہم پہلے بھی عرض کرچکے ہیں کہ کعب بن اشرف مدینے کا اہم ترین شخص تھا، مال داری میں بھی قبیلہ بنی نضیر میں اس کا کوئی ہم پلّہ نہیں تھا، اس نے اس علاقے میں جہاں یہ قبیلہ آباد تھا ایک نہایت مضبوط قلعہ تعمیر کرایا تھا، چودہ سو سال گزر جانے کے باوجود اس قلعے کے کھنڈرات آج بھی موجود ہیں، مدینہ منورہ کے جنوب مشرق میں بطحان ڈیم کے راستے میں دائیں طرف یہ قلعہ واقع ہے، گرینائٹ پتھروں سے بنا ہوا ہے، تینتیس فٹ لمبا اور تینتیس فٹ چوڑا یہ قلعہ بیس بڑے کمروں اور آٹھ برجیوں پر مشتمل تھا، اب بھی اس قلعے کی چار میٹر اونچی دیواریں موجود ہیں۔ سعودی حکومت نے لوہے کے مضبوط جنگلوں سے اس کو گھیر دیا ہے، آثار قدیمہ اور تاریخی واقعات سے دلچسپی رکھنے والے اس قلعے کو دیکھنے کیلئے جاتے ہیں، اس میں ایک کنواں بھی اپنی اصلی حالت میں موجود ہے، اگرچہ اس کا پانی خشک ہوچکا ہے، کعب بن اشرف کی رہائش اسی قلعے میں تھی۔

اجازت ملنے کے بعد محمد بن مسلمہ ؓتن تنہا اس کے قلعے میں پہنچے، اس سے ملاقات کی، اور اپنی کچھ اقتصادی پریشانیوں کا ذکر کیا، انھوں نے کعب بن اشرف سے کہا کہ میں تمہارے پاس کچھ قرض لینے کے لئے آیا ہوں، محمد (صلی اللہ علیہ وسلم) نے صدقہ مانگ مانگ کر ہمیں کنگال کردیا ہے، ہم اس شخص سے پریشان ہوچکے ہیں، یہ سن کر کعب بن اشرف کی بانچھیں کھل گئیں۔ وہ چاہتا ہی یہ تھا کہ محمد کے ساتھیوں میں سے کچھ لوگ ان کے خلاف کھڑے ہوں۔ محمد بن مسلمہؓ کی زبان سے یہ باتیں سن کر اس کی دلی مراد بر آئی۔ وہ پُرجوش ہوگیا اور کہنے لگا، واقعی! محمد ہیں ہی ایسے، مجھے یقین ہے تم ان سے عاجز آچکے ہوں گے، اگر ابھی تک نہیں آئے تو بہت جلد تم ان سے عاجز آجاؤگے۔ محمد بن مسلمہؓ نے کہا: عاجز تو ہیں مگر کیا کریں، حالات غیر یقینی سے ہیں، ہم انہیں چھوڑ بھی نہیں سکتے، کیوں کہ ایسا کرنا مصلحت کے خلاف ہوگا، فی الحال تو میں سخت پریشان ہوں، میرے جیسے کچھ لوگ اور بھی ہیں، ہم ضرورت لے کر تمہارے پاس آئے ہیں، اگر کچھ غلّہ وغیرہ بہ طور قرض دے دو تو تمہارا بڑا احسان ہوگا۔

کعب بن اشرف نے کہا: قرض تو میں تم لوگوں کو ضرور دوں گا، لیکن تم کو میرے پاس کچھ نہ کچھ رہن رکھنا ہوگا، محمد بن مسلمہؓ نے پوچھا کیا چیز رہن رکھی جائے، اس بد باطن نے کہا ایسا کرو کہ تم اپنی عورتوں کو میرے پاس چھوڑ دو، جب میرا قرض واپس کرو تب اپنی عورتوں کو واپس لے جانا، محمد بن مسلمہؓ نے جواب دیا: بھلا ہم اپنی عورتوں کو تمہارے پاس کیسے چھوڑ سکتے ہیں، تم مدینے کے حسین ترین لوگوں میں سے ہو۔ اس نے کہا اگر عورتوں کو رہن نہیں رکھ سکتے تو اپنے بیٹوں کو رہن رکھ دو۔ محمد بن مسلمہؓ نے کہا: یہ بھی ہمیں منظور نہیں، ہم اپنے بیٹوں کو کیسے رہن رکھ سکتے ہیں، یہ ہمارے لئے باعث ننگ وعار ہوگا، ہمارے مرنے کے بعد بھی لوگ ہمارے بچوں کو راستوں میں روک روک کر یہ کہا کریں گے کہ تم وہی ہو جو چند کلو غلّے کے بدلے میں رہن رکھے گئے تھے۔ اگر تم مناسب سمجھو تو ہمارے ہتھیار اپنے پاس رکھ لو، میں اور میرے ساتھی اپنے ہتھیار لاکر تمہارے پاس جمع کرادیں گے۔ ہم تمہارا قرض لوٹاکر یہ ہتھیار واپس لے جائیں گے۔ اس قصے کے راوی کہتے ہیں کہ محمد بن مسلمہؓ نے یہ تجویز جان بوجھ کر رکھی تھی، اس کے قلعے میں ہتھیار لے کر جانے کی یہی ایک صورت تھی۔

کعب بن اشرف نے یہ تجویز منظور کرلی، ایک دو دن کے بعد محمد بن مسلمہؓ اپنے تین ساتھیوں کے ساتھ کعب بن اشرف کے قلعے میں پہنچے، یہ ایک چاندنی رات تھی۔ کعب محو استراحت تھا کہ اس کے کانوں میں ابو نائلہؓ کی آواز پڑی، ان کا اصل نام سلکان بن سلامہؓ ہے، کعب بن اشرف کے رضاعی بھائی ہیں، ان کی آواز سنتے ہیں کعب اپنے بستر سے اٹھا۔ اور باہر کی طرف جانے لگا، اس کی بیوی نے کہا کہ میں اس آواز میں خون کی بو محسوس کررہی ہوں۔ تم اس طرح رات کے وقت تنہا باہر مت جاؤ، تمہارے ہزاروں دشمن ہیں۔ کعب نے کہا کہ میں کیسے نہ جاؤں، مجھے ابو نائلہؓ نے آواز دی ہے، جو میرا رضاعی بھائی ہے، ویسے بھی مردوں کو جب آواز دی جاتی ہے تو ان کی مردانگی کا تقاضا یہ ہے کہ وہ اس آواز پر لبیک کہیں۔ کعب باہر گیا، ابونائلہؓ کے ساتھ محمد بن مسلمہؓ، عباد بن بشرؓ، حارث بن اوسؓ اور ابو عمیس بن جبر ؓبھی تھے، یہ سب اپنے اپنے ہتھیار لے کر آئے تھے تاکہ کعب کے پاس گروی رکھواکر کچھ غلّہ وغیرہ حاصل کرسکیں، کعب نے ان کو خوش آمدید کہا اور انہیں لے کر قلعے میں آیا۔

کعب اس وقت چادر اوڑھے ہوئے تھا، اس کے بدن سے خوشبو آرہی تھی، محمد بن مسلمہؓ نے کہا کہ تمہارے جسم سے جس طرح کی خوشبو آرہی ہے میں نے ایسی خوشبو آج تک نہیں سونگھی۔ اگر تم اجازت دو تو میں تمہارا سر سونگھ لوں، یہ دل فریب خوشبو تمہارے سر کے بالوں میں بسی ہوئی ہے، اس نے اجازت دے دی، محمد بن مسلمہ نے اس کا سر پکڑ کر اپنی طرف کیا اور اسے اچھی طرح سونگھا، کچھ دیر تک یہ سب لوگ محل کے باغیچے میں ٹہلتے رہے اور چاندنی رات سے لطف اندوز ہوتے رہے۔ ابھی یہ لوگ ٹہل ہی رہے تھے اور کعب بن اشرف سے اس کی شاعری سن رہے تھے کہ محمد بن مسلمہؓ نے اس سے پھر کہا کہ اگر آپ کی اجازت ہو تو میں ایک مرتبہ اور آپ کا سر سونگھ لوں، یہ کچھ عجیب طرح کی خوشبو ہے جو مجھے بے خود کئے دے رہی ہے، کعب نے فخر ومسرت سے ان کی طرف دیکھا اور اپنا سر پھر نیچے کی طرف جھکا دیا، تیسری مرتبہ بھی محمد بن مسلمہؓ نے یہی خواہش کی، اس مرتبہ بھی کعب نے ان کی خواہش پوری کرنے میں بخل سے کام نہیں لیا، اس بار سب نے اس کا سر سونگھا، جب محمد بن مسلمہؓ کا نمبر آیا تو انھوں نے اس کے سر کو اچھی طرح جکڑ لیا اور اپنے ساتھیوں کو اشارہ کیا کہ وہ اس کا کام تمام کردیں، چناں چہ انھوں نے اس پر خنجروں سے حملہ کرکے موت کے گھاٹ اتار دیا، واقدی کی روایت ہے کہ ان حضرات نے اس کا سر تن سے جدا کیا اور اسے لے کر رسول اللہ صلی اللہ علیہ وسلم کی خدمت میں حاضر ہوئے۔ (صحیح البخاری: ۵/۹۰ رقم الحدیث: ۴۰۳۷، الواقدی کتاب المغازی: ۱/۱۹۵)

حافظ ابن اسحاقؒ نے اس قصے میں یہ بھی لکھا ہے کہ جس رات محمد بن مسلمہؓ اور ان کے رفقاء نے کعب بن اشرف کے قلعے کی طرف جانے کا منصوبہ بنایا تھا اس رات رسول اللہ صلی اللہ علیہ وسلم ان کو رخصت کرنے کے لئے اس مقام تک تشریف لائے جہاں آج جنت البقیع واقع ہے، آپ نے ان حضرات کو رخصت کرتے ہوئے فرمایا: اللہ کے نام پر قدم اٹھاؤ، پھر یہ دعا فرمائی، اے اللہ! ان کی مدد فرما، اس کے بعد آپ اپنے گھر تشریف لے گئے، اس رات چاند پوری طرح روشن تھا، اور ہر طرف چاندنی بکھری ہوئی تھی، یہ لوگ کعب کے قلعے تک پہنچے، ابونائلہ نے اسے آواز دی، اس کے بعد وہی قصہ ہے جو ابھی مذکور ہوا۔ (جاری)

12 نومبر 2021، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے