Urdu Section ( 8 Jan 2022, NewAgeIslam.Com)

Only Those Who Have Been Guided By Allah Can Stand Firm against the Enemy Part-64 دشمن کے مقابلے میں وہی لوگ ڈٹے رہتے ہیں جنہیں اللہ نے رُشد و ہدایت سے نوازاہے

مولاناندیم الواجدی

31 دسمبر،2021

لشکر اسلام کی صف بندی:

غزوۂ اُحد کے موقع پر مہاجرین کاجھنڈا مصعب بن عمیرؓ کے ہاتھوں میں تھا، اوس کے انصار کاجھنڈا اُسید بن حضیرؓ سنبھالے ہوئے تھے، اور خزرج کے انصار کاجھنڈااحباب بن منذرؓ نے اٹھارکھا تھا۔( غزوۂ اُحد دراستہ دعویۃ : ص :79)

صف بندی کے بعد رسول اللہ صلی اللہ علیہ وسلم نے صفوں کے درمیان گھوم پھر کر جائزہ لیاکہ سب لوگ مناسب جگہوں پر مستعد کھڑے ہوئے ہیں یا نہیں، کسی کے قدم آگے بڑھے ہوئے تھے، یاکسی کاسینہ او ر کاندھے باہر نکلے ہوئے تھے تو آپ نے اسے پیچھے ہٹنے کا حکم دیا او راگرکسی کا سینہ یا کاندھے یا قدم اندر کی طرف تھے تو اسے آگے آنے کیلئے کہا یہاں تک کہ تمام صفیں درست ہوگئیں( کتاب المغازی للواقدی :1؍219)

رسول اللہ صلی اللہ علیہ وسلم کا خطاب

اس موقع پر آپ صلی اللہ علیہ وسلم نے نہایت بلیغ خطبہ بھی ارشاد فرمایا۔آپ صلی اللہ علیہ وسلم نے فرمایا:

’’ اے لوگو! میں تمہیں ان باتوں کی نصیحت کرناچاہتا ہوں کہ جو اللہ نے اپنی کتاب میں مجھ سے بیان فرمائی ہیں، ایک یہ کہ تم اس کی اطاعت کرو ، اور جن چیزوں کو اس نے حرام قرار دیا ہے ان سے دوررہو،تم اس وقت اجر و ثواب کے نہایت قریب کھڑے ہو مگر یہ اجر وثواب اس کے لئے ہے جو اپنے فرض سے آگاہ ہے، صبر و تلقین رکھتا ہے او رعزم و حوصلے کی دولت سے مالا مال ہے۔ دشمن سے جہاد کرنایقینا مشقت میں ڈالنے والا ہے، بہت کم لوگ ہیں جو ایسے موقعوں پر صبر و ہمت سے کام لیتے ہیں،دشمن کے مقابلے میں وہی لوگ ڈٹے رہتے ہیںجنہیں اللہ نے رشد و ہدایت سے نوازا ہے، اللہ اپنے مطبع اور فرماں برداربندوں کے ساتھ ہے اورشیطان اپنے پیروکاروں کے ساتھ ہے۔ تم لوگ صبر و عزیمت کے ذریعے جہادکا آغاز کرو، اور اللہ نے تم سے جو وعدے کئے ہیں ان کی جستجو میں لگ جاؤ ،جو حکم میں دوں اس پر عمل کرو، میں تمہاری ہدایت چاہتا ہوں ،اختلاف کمزور کرنے والا عمل ہے، یہ اللہ کو سخت ناپسند ہے، اختلاف کے ساتھ نہ نصرت ملتی ہے او رنہ کامیابی حاصل ہوتی ہے‘‘( کتاب المغازی للواقدی:1؍221)

اس جنگ میں رسول اللہ صلی اللہ علیہ وسلم کی حکمت عملی یہ رہی کہ آپ صلی اللہ علیہ وسلم نے اپنی فوج کو اونچی جگہوں پر تعینات فرما دیا، اپنارخ مدینے کی جانب کرلیا اور وادی کفار کے لئے چھوڑ دی۔ صورت حال یہ تھی کہ کفار کے سامنے مسلمان پتھر کی چٹان بن کر کھڑے ہوئے تھے اور پیچھے مدینہ تھا۔ نہ ماندن نہ پائے رفتن والامعاملہ تھا، شکست کی صورت میں ان کے لئے پیچھے کے راستے اس لئے خطرناک تھے کہ مدینے میں گھسنا پڑتا اور وہاں عو رتوں اوربچوں کے حملوں کا سامناکرنا پڑتا۔ غرض یہ کہ کفار کی فوجیں دونوں طرف سے گھری ہوئی تھی، جب صف بندی ہوگئی تو آپ صلی اللہ علیہ وسلم نے اپنی فوج پر اطمینان کی ایک نگاہ دوڑائی اورفرمایا: جب تک حکم نہ دو ںتم میں سے کوئی دشمن پر حملہ نہ کرے۔( تاریخ الطبری :’2؍507)

جبل اُحد کو پشت پر رکھ کر صف بندی میں یہ حکمت بھی تھی کہ اس طرح مسلمانوں کا رخ مغرب کی طرف تھا اور پشت مشرق کی طرف ، جب کہ کفار کا رخ اس کے برعکس تھا، ایسے میں سورج کی شعاعیں ان کی آنکھوں پڑیں گی اس سے انہیں دیکھنے میں وقت ہوگی۔ مسلمان پہاڑی کے ڈھلان پر تھے، شکست کی صورت میں مسلمان اس ڈھلان سے اوپر جاکر خود کو محفوظ کرسکتے تھے او روہاں سے تیر برسا کر یا سنگ باری کر کے دشمن کواپنے تعاقب سے روک بھی سکتے تھے،جب کہ کفار کے لئے خود کو مسلمانوں کی تیر اندازی سے بچانا ممکن نہیں تھا، گھوڑے پہاڑ پر چڑھ نہیں سکتے تھے ،او رپیدل چڑھنا اس لئے آسان نہیں تھا کہ مسلمان تیر و تفنگ لئے سامنے ڈٹے کھڑے تھے ۔کفار یہ چاہتے تھے کہ مسلمانوں کو میدان میں لاکر گھیرا جائے اور انہیں الٹے پاؤں مدینے کی طرف بھاگنے پر مجبور کردیا جائے، مگر وہ یہ جنگی حکمت عملی دیکھ کر حیران رہ گئے۔

مشرکین کی صف بندی

کفار و مشرکین پوری تیاری کے ساتھ آئے تھے۔ لڑنے والوں کی تعداد مسلمانوں کے مقابلے میں کہیں زیادہ تھی،گھڑ سوار بھی بہت تھے،ماہر تیر اندازوں کی بھی کمی نہیں تھی، سات سو افراد مکمل طور پر زرہ پوش تھے ، تین ہزار اونٹ ساتھ تھے، غلاموں اور خدمت گاروں کی بڑی تعداد تھی ، اپنے اشعار سے خون میں گرمی پیدا کرنے کے لئے پندرہ خواتین بھی ساتھ تھیں، غرض یہ کہ مشرکین اس لئے آئے تھے ، اور پوری طاقت لگا کر جنگ لڑناچاہتے تھے۔ انہوں نے پہلے ہی آکر میدان پر قبضہ کرلیا تھا ، ان کے خواب و خیال میں یہ بات نہیں تھی کہ مسلمان سامنے سے آنے کے بجائے پشت کی طرف سے آئیں گے اورجبل اُحدکی مسطح ڈھلانوں پر قبضہ کر کے کھڑے ہوجائیں گے۔

جیسا کہ پہلے بھی لکھا گیا ہے کہ کفار کے لشکر کی قیادت بہ حیثیت مجموعی ابوسفیان کے سپر د تھی، گھڑ سوار دستے کی قیادت خالد بن ولید کے ذمہ تھی۔ میدان جنگ میں خالد بن ولید کو میمنہ پر متعین کیا گیا، عکرمہ بن ابوجہل میسرہ پر تھا، پیدل فوج صفوان بن امیہ کی سرکردگی میں دی گئی ، تیر اندازوں کو عبداللہ بن أبی ربیعہ کے سپر د کیا گیا ،علم بردار بنو عبدالدار سے تعلق رکھنے والا مَقّرزَہ نامی شخص تھا۔

قریش میںعلم برداری کی ذمہ داری بنو عبدالدار کے ہی سپرد رہی ہے، اس موقع پر بھی علم اسی قبیلے کے ہاتھوں میں دیا گیا۔ جنگ سے قبل ابوسفیان نے بنو عبدالدار سے خطاب کرتے ہوئے کہا کہ بدر کے دن بھی جھنڈاتم لوگوں کے ہاتھوں میں تھا، دیکھ لو ہم پر کس قدر بڑی مصیبت نازل ہوئی ،تمہارے قبیلے کاایک اہم فرد نضر بن حارث پہلے قید ہوا پھر اسے قتل کردیا گیا۔ یاد رکھو ! قوموں پر مصیبتیں جھنڈااٹھانے والوں کی وجہ سے آتی ہیں، جب جھنڈاگرجاتا ہے تو لوگ میدان چھو ڑ کر بھاگنے لگتے ہیں، اگر تم اس جھنڈے کی حفاظت کر سکتے ہو تو اسے اٹھاؤ ،ورنہ چھوڑ دو، ہم کسی اوربہتر آدمی کے حوالے کردیں گے، ابوسفیان کے یہ طعنے سن کر بنی عبدالدار کاپارہ گرم ہوگیا، کہنے لگے کیاہم اپناجھنڈا کسی او رکے حوالے کردیں ، کل میدان میں دیکھ لینا ہم دشمن کا مقابلہ کیسے کرتے ہیں ، اور واقعی ایساہی ہوا۔ بنو عبدالدار جی جان سے لڑے او ر اس وقت تک میدان میں ڈٹے رہے جب تک ان کا ایک ایک آدمی قتل نہیں ہوگیا۔( سیرۃ ابن ہشام: 3؍23،24) سیرۃ حلبیہ کے مصنف نے لکھا ہے کہ اُحد کے دن مشرکین کا جھنڈا طلحہ بن عثمان کے ہاتھوں میں تھا ( السیرۃ الحلبیہ :2؍497)

قریش کی عورتیں لشکر کے پیچھے کھڑی کی گئیں ،تاکہ وپیٹھ پھیر کر بھاگنے والوں کو روک سکیں ، جنگ کے وقت وہ دف بجا بجاکر اس طرح کے رزمیہ اشعار گارہی تھیں:

إن تقبلوا نعانق ونفرش النمارق

أو تدبروا نفارق فراق غير وامق

’’اگر تم آگے بڑھوگے توہم تمہیں گلے لگائیں گی اورتمہارے لئے آرام دہ بستر بچھائیں گی، اور اگر تم نے پیٹھ پھیر ی تو ہم تمہیں ہمیشہ ہمیشہ کے لئے کسی ادنیٰ تعلق کے بغیر چھوڑ دیں گی‘‘( البدایہ و النہایہ:5؍355)

جنگ سے پہلے انصارمدینہ کو ورغلانے کی کوشش:

جنگ سے عین قبل ابوسفیان نے انصار مدینہ کو مخاطب کرکے کہا: اے لوگو! ہم تم سے جنگ کرنے نہیں آئے ہیں، او رنہ ہمارا ارادہ تم پرحملہ کرنے کا اور تمہیں نقصان پہنچانے کا ہے، بس تم اتناکرو کہ ہمارے چچا زاد بھائی کو ہمارے حوالے کردو،ہم یہاں سے چلے جائیں گے ۔ ابوسفیان کی مراد حضور صلی اللہ علیہ وسلم کی ذات اقدس سے تھی کہ اگر انصار مدینہ محمد ( صلی اللہ علیہ وسلم) کو ہمارے سپرد کردیں توہم اپنالشکر لے کر واپس چلے جائیں گے ،مگر انصار مدینہ نے اس کایہ مطالبہ ٹھکرا دیا، او رکہا کہ ہم جان دے دیں گے مگر رسول اللہ صلی اللہ علیہ وسلم کو تمہارے حوالے نہیں کریں گے۔( البدایہ والنہایہ : 5؍369 ، امتاع الاسماع للمقریزی :1؍120)

اس کوشش میں ناکام ہونے اور منہ کی کھانے کے بعد ابوسفیان نے ابو عامر فاسق کو آگے کیا۔ یہ شخص زمانہ جاہلیت میں راہب کہلاتا تھا، قبیلہ اوس کا سردار تھا، اسلام آیا تو وہ رسول اللہ صلی اللہ علیہ وسلم سے حسد کرنے لگا ، رسول اللہ صلی اللہ علیہ وسلم نے اس کا نام فاسق رکھ دیا تھا اور اب وہ مسلمانوں میں اسی نام سے پہچانا جاتا تھا۔ رسول اللہ صلی اللہ علیہ وسلم مدینے تشریف لائے تو اس کا تمام قبیلہ مسلمان ہوگیا، حدیہ ہے کہ اس کے بیٹے حنظلہؓ نے بھی اسلام قبو ل کرلیا ،مگر اس نے اسلام قبول کرنے کے بجائے مکے جاکر رہنازیادہ پسندکیا۔ چنانچہ وہ اپنے پچاس آدمیوں او ربعض روایات کے مطابق پندرہ افراد کے ساتھ مکے چلا گیا ۔ اس کامقصد یہ تھا کہ وہ قریش کو رسول اللہ صلی اللہ علیہ وسلم کے خلاف بھڑکائے اور انہیں جنگ کرنے پر اُکسائے ۔آج وہ قریش کی فوج کا حصہ بن کر اپنی ہی قوم سے لڑنے کے لئے آیا تھا۔ ابوسفیان کا خیال یہ تھا او رخود ابوعامر فاسق بھی اس گمان میں تھا کہ قبیلہ اوس کے لوگ میرے پرانے روابط کا اور رشتے داریوں کا خیال کریں گے، اور میراساتھ دیں گے، چنانچہ وہ آگے بڑھا اور اپنے قبیلے کے لوگوں سے کہنے لگا کہ اے لوگو! میں ابوعامر ہوں ، لوگوں نے جواب دیا ، اے ابوعامر فاسق! خدا تجھے غارت کرے اور تجھے دیکھ کر کوئی آنکھ خوش نہ ہو۔ مسلمانوں کی طرف سے کہنے لگا کہ میرے بعد میری قوم کو کسی شر نے آپکڑا ہے ۔( تاریخ الطبری :2؍64 ، کتاب الاغانی للا صفہانی:14 ؍17) (جاری)

31 دسمبر، 2021 ، بشکریہ : انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے