Sat Mar 22 2025, 02:03 AM

Urdu Section ( 8 Nov 2021, NewAgeIslam.Com)

Abdullah Ibn Ubay: His Sympathy With the Jews Until the Last Moment of Their Expulsion From Madina Part-57 عبد اللہ بن أبی، یہود کے مدینہ سے اخراج کے آخری لمحے تک ان کا ہمدرد بنا رہا

مولانا ندیم الواجدی

5 نومبر 2021

مدینہ سے بنی قینقاع کا اخراج:

بنو قینقاع کے یہود کا یہ متکبرانہ لب ولہجہ نظر انداز نہیں کیا جاسکتا تھا، ان کی سرزنش ضروری تھی، اور سرزنش بھی ایسی جس سے یہودیوں کے دوسرے قبیلوں کو سبق ملتا، چنانچہ رسول اللہ صلی اللہ علیہ وسلم نے حضرت ابولبابہ ابن عبد المنذر انصاریؓ کو مدینہ منورہ کی ذمہ داریاں تفویض کرکے بنوقینقاع کے علاقے کی طرف کوچ فرمایا۔ مسلمانوں کو دیکھ کر یہ بد باطن اور عہد شکن یہودی قلعے کے اندر چلے گئے اور اس کا دروازہ بند کرکے بیٹھ گئے۔ یہ ۱۵؍ شوال کا واقعہ ہے، رسول اللہ صلی اللہ علیہ وسلم نے افواج اسلام کو حکم دیا کہ وہ اس وقت تک قلعے کا محاصرہ جاری رکھیں جب تک یہودی قلعے سے باہر نہ نکلیں،حالات سے مجبور اور پریشان ہوکر سولہویں دن ذی القعدہ کی پہلی تاریخ کو یہودی دروازہ کھول کر باہر آگئے جس کے بعد رسول اللہ صلی اللہ علیہ وسلم نے ان کے ہاتھ پیر باندھنے کا حکم دیا۔

عبد اللہ بن أبی بن سلول کی درخواست

جس وقت یہودیوں کی مشکیں کسی جارہی تھیں، رئیس المنافقین عبد اللہ بن أبی بن سلول نے یہ درخواست کی کہ ان کے (یہودیوں کے) ساتھ رحم وکرم کا معاملہ کیا جائے، کیوں کہ یہ میرے حلیف ہیں۔ رسول اللہ صلی اللہ علیہ وسلم نے اس کی درخواست پر توجہ نہیں دی، اس نے پھر درخواست کی، آپؐ نے پھر اعراض فرمایا، عبد اللہ بن أبی طیش میں آگیا، اور انتہائی گستاخانہ انداز میں اس نے اپنا ہاتھ آپؐ کے گریبان پر ڈال دیا۔ اس کی اس حرکت سے آپؐ غضب ناک ہوگئے، یہاں تک کہ غصّے سے آپؐ کا چہرۂ مبارک سُرخ ہوگیا۔ آپؐ نے فرمایا: اے عبد اللہ! تیرا ناس ہو، میرا گریبان چھوڑ دے۔ اس نے ہٹ دھرمی دکھلائی اور کہا : میں آپؐ کا گریبان اس وقت تک نہیں چھوڑوں گا جب تک آپؐ مجھ سے ان کو رہا کرنے کا وعدہ نہیں کریں گے۔ خدا کی قسم اس قوم کے چار سو ننگے سر والوں اور تین سو زرہ پوشوں نے میرا دفاع کیا ہے، آپؐ ایک دن میں انہیں ہلاک کردینا چاہتے ہیں۔ ابن أبی منافق کے حد درجہ اصرار کے بعد آپؐ نے بربنائے مصلحت ان کی مشکیں کھلوا دیں مگر اس کے ساتھ ہی یہ حکم بھی دیا کہ اب سرکشوں اور باغیوں کو مدینے میں رہنے کی اجازت نہیں دی جائے گی، انہیں یہاں سے جانا ہوگا، عبد اللہ بن أبی نے یہ بات مان لی۔ اس طرح تمام یہودی اپنے اہل وعیال کے ساتھ مدینے سے چلے گئے۔ (تاریخ الطبری: ۲/۴۹، الطبقات الکبری: ۲/۲۹، عیون الاثر: ۲/۴۴۴)

بنو قینقاع کے یہودیوں سے جان بخشی کی یہ شرط لگائی گئی تھی کہ وہ اپنا مال واسباب چھوڑ کر یہاں سے جائیں، ان کے جانے کے بعد مسلمانوں نے ان کے غنائم اکٹھے کئے، رسول اللہ صلی اللہ علیہ وسلم نے محمد بن مسلمہؓ کو غنائم کا نگراں مقرر کیا اور واپس مدینے تشریف لے گئے۔

عبد اللہ بن أبی جلا وطنی اور اخراج کے آخری لمحے تک ان کا ہمنوا اور ہمدرد بنا رہا، اس کی کوشش تھی کہ یہودیوں کو جلا وطنی کی جو سزا دی گئی ہے وہ معاف کردی جائے، اور اگر انہیں جلا وطن ہی کرنا ضروری ہے تو کم از کم انہیں اپنا مال ومتاع ساتھ لے کر جانے کی اجازت دی جائے، یہ درخواست لے کر وہ آپؐ کے در دولت پر حاضر ہوا، ایک انصاری صحابی عویم بن مساعدہؓ وہاں موجود تھے، انھوں نے اسے روک دیا، اور کہا جب تک رسول اللہ صلی اللہ علیہ وسلم اجازت نہیں دیں گے میں اس وقت تک تمہیں اندر جانے نہیں دوں گا، یہ سن کر ابن أبی نے حضرت عویمؓ کو دھکا دیا۔ انہوں نے بھی اس پر سختی کی، اور اس قدر زور سے اس کو دھکا دیا کہ اس کا چہرہ دیوار سے ٹکراکر زخمی ہوگیا، منافقوں کے سردار کی یہ درگت دیکھ کر اس کے حلیف یہود کہنے لگے: اے ابو الحباب بس کرو، رہنے دو، ہم ایسے گھر میں رہنا نہیں چاہتے، جس میں آپ کا یہ حال کردیا گیا ہو۔ اس واقعے کے بعد یہودیوں نے مدینے میں رہنے کی امید چھوڑ دی اور شام کی طرف روانہ ہوگئے۔ (الطبقات الکبری: ۲/۲۸)

دوسری طرف حضرت عبادہ بن الصامتؓ بھی بنو قینقاع کے حلیف تھے، لیکن انھوں نے یہودیوں سے علی الاعلان برأت اور بے زاری کا اظہار کیا، حالاں کہ عبد اللہ بن أبی نے انہیں یاد بھی دلایا کہ تم یہود کے حلیف ہو، تمہیں ان کا ساتھ دینا چاہئے، مگر انھوں نے کسی بھی طرح کی مدد کرنے سے صاف انکار کردیا۔ اس کے بعد وہ رسول اللہ صلی اللہ علیہ وسلم کی خدمت میں حاضر ہوئے اور عرض کیا: یا رسولؐ اللہ! میں آپؐ کے دشمنوں سے بری اور بے زار ہوں، اور اللہ اور اس کے رسولؐ اور اہل ایمان کی طرف آتا ہوں اور انہی کو اپنا حلیف بناتا ہوں، اور کفار کی دوستی سے مکمل طور پر اپنی برأت کا اظہا ر کرتا ہوں۔ (البدایہ والنہایہ: ۴/۵)

غزوۂ سَوِیْق

یکم ذوالحجہ کو یہ واقعہ پیش آیا، اور ۵؍ذی الحجہ کو آپؐ ایک اور غزوے کے لئے روانہ ہوگئے۔ اس غزوے کی تفصیل یہ ہے کہ بدر میں زندہ بچ جانے والے مشرکین جب مکّہ پہنچے اور وہاں پہنچ کر انھوں نے بدر کے واقعات سنا کر رونا پیٹنا شروع کیا تو ابوسفیان نے قسم کھائی کہ جب تک وہ مدینے پر حملہ نہیں کرے گا اس وقت تک غسلِ جنابت نہیں کرے گا، چنانچہ اس نے دو سو ساتھیوں کو لے کر مدینے کے لئے روانہ ہوا۔ مدینے پہنچ کر وہ اور اس کے تمام رفقاء بنی النضیر میں پہنچے، سلَّام بن مشکم نے ان کا استقبال کیا، اور رات میں ان کی ضیافت کی، صبح کو یہ لوگ اپنی منزل کے لئے روانہ ہوئے، مدینہ منورہ سے باہر عُرَیْض نامی علاقے میں ایک انصاری صحابی اپنے نوکر کے ساتھ باغ میں پانی دے رہے تھے، ابوسفیان اور اس کے ساتھیوں نے ان دونوں کو قتل کردیا، رسول اللہ صلی اللہ علیہ وسلم کو اس واقعے کی اطلاع ہوئی، آپ نے اپنے جاں نثار صحابہؓ کے ساتھ ان کو پکڑنے کی کوشش کی، مگر وہ لوگ یہ بزدلانہ حرکت کرکے وہاں سے جا چکے تھے، اس لئے ہاتھ نہ آسکے، اپنا بوجھ کم کرنے کے لئے ان لوگوں نے ستو کے کٹّے اور تھیلے اسی باغ میں چھوڑ دئے، رسول اللہ صلی اللہ علیہ وسلم نے حکم فرمایا کہ ستو کے یہ تھیلے جو بڑی تعداد میں تھے، اٹھا لئے جائیں گو یا یہ مال غنیمت تھا جو اس غزوے میں ہاتھ آیا، پانچ روز کے بعد آپؐ مدینہ واپس تشریف لائے، اس غزوہ کو غزوۃ السویق اس لئے کہا جاتا ہے کہ عربی میں ستّو کو سویق کہتے ہیں۔ (تاریخ الطبری: ۲/۵۰، الکامل فی التاریخ: ۲/۳۹،۴۰)

غزوۂ ذی أمْر

غزوہ سویق سے واپسی کے بعد آپ صلی اللہ علیہ وسلم نے ذی الحجہ کا پورا مہینہ مدینے ہی میں گزارا، اس کے اختتام پر یا محرم کے آغاز میں آپ کو یہ اطلاع ملی کہ بنو غطفان کے دو قبیلے بنو ثعلبہ اور بنو محارب نجد میں جمع ہورہے ہیں، ان کا ارادہ مدینہ منورہ پر حملہ کرنے کا ہے، اس اطلاع کے بعد آپ صلی اللہ علیہ وسلم نے تیاری کا حکم دیا اور حضرت عثمان بن عفانؓ کو اپنا قائم مقام مقرر فرماکر نجد کی طرف کوچ فرمایا۔ اس سفر میں چار سو پچاس صحابہ آپؐ کے ہمراہ تھے۔ کچھ پیدل اور کچھ سوار۔ مسلمانوں کے لشکر کی خبر پاکر دشمن بھاگ کھڑے ہوئے، صرف ایک شخص ہاتھ آیا، اس کا نام جبار تھا اور وہ بنو ثعلبہ سے تعلق رکھتا تھا۔ لوگوں نے اسے آپ صلی اللہ علیہ وسلم کی خدمت میں پیش کردیا، رسول اللہ صلی اللہ علیہ وسلم نے اس سے کچھ دیر تنہائی میں گفتگو کی، اور اس پر اسلام پیش کیا، جسے اس نے قبول کرلیا۔ آپؐ نے اسے حضرت بلالؓ کے سپرد کیا کہ وہ اس کو دین کی تعلیم دیں۔ رسول اللہ صلی اللہ علیہ وسلم نے بنو غطفان کے علاقے میں مہینہ بھر تک قیام فرمایا، اس طویل عرصے میں کوئی ایک شخص بھی مقابلے کے لئے نکل کر نہیں آیا، طویل انتظار کے بعد آپؐ واپس مدینہ تشریف لے آئے۔ غزوۂ ذی امر کو غزوۂ غَطْفَان بھی کہا جاتا ہے، اور بعض مؤرخین نے اسے غزوۂ اَنْمَار بھی لکھا ہے، ذُوْ اَمْر مدینے سے کچھ فاصلے پر ایک وادی ہے جو نخیل نامی بستی کے قریب واقع ہے۔ (تاریخ الطبری: ۲/۵۲، الطبقات الکبری: ۲/۳۴)

آپؐ پر قاتلانہ حملےکا مذموم ارادہ

اس سفر میں ایک واقعہ یہ پیش آیا کہ ایک دن بارش ہوگئی، آپ صلی اللہ علیہ وسلم کے اور صحابۂ کرامؓ کے کپڑے بھیگ گئے، آپؐ نے اپنے کپڑے دھوپ میں پھیلا دیئے اور صحابہ سے ذرا دور ہٹ کر ایک درخت کے نیچے آرام کرنے کے لئے لیٹ گئے۔ گاؤں والے یہ منظر دیکھ رہے تھے۔ وہ یہ بھی دیکھ رہے تھے کہ آپؐ درخت کے نیچے تنہا لیٹے ہوئے ہیں اور سو رہے ہیں، جب کہ آپؐ کے رفقاء دور ہیں اور بکھرے ہوئے ہیں۔ انھوں نے اپنے سردار دعثور سے کہا کہ محمد (صلی اللہ علیہ وسلم) کو نقصان پہنچانے کا یہ بہترین موقع ہے، تم جاؤ اور ان کو قتل کردو۔ دعثور کی بہادری کا دور دور تک شہرہ تھا، لیکن اس کا یہ اقدام انتہائی بزدلی کا غماز تھا۔ کیا کسی تنہا شخص پر حملہ کرنا جب کہ وہ غیر مسلّح ہو اور سویا ہوا بھی ہو، بہادری اور شجاعت کی دلیل ہے؟

قوم کے اکسانے پر دعثور بن حارث ایک تیز دھار والی تلوار لے کر اس جگہ جا پہنچا جہاں رسول اللہ صلی اللہ علیہ وسلم محو استراحت تھے، آپؐ کی تلوار درخت پر لٹکی ہوئی تھی، آپؐ آنکھیں بند کئے ہوئے لیٹے تھے، آپؐ کو احساس ہوا کہ کوئی شخص دبے پاؤں قریب آکر کھڑا ہوگیا ہے۔ آپؐ نے آنکھیں کھول کر دیکھا کہ ایک شخص ہاتھ میں تلوار لئے کھڑا ہے، اس نے للکارتے ہوئے کہا کہ اے محمد! بتاؤ، تمہیں اب کون بچائے گا۔ آپؐ نے لیٹے لیٹے فرمایا: مجھے میرا اللہ بچائے گا، یہ سن کر دعثور کے ہاتھ کانپنے لگے، تلوار اس کے ہاتھ سے چھو‘ٹ کر نیچے گر گئی جو رسول اللہ صلی اللہ علیہ وسلم نے اٹھا کر اسے پکڑا دی۔ اس واقعے کا اس پر اس قدر اثر ہوا کہ وہ اسی وقت کلمہ پڑھ کر مسلمان ہوگیا۔ قبیلے میں واپس پہنچے تو لوگوں نے پوچھا: کیا ہوا، تم ناکام کیسے رہ گئے، تم تو محمد کو (نعوذ باللہ) قتل کرنے کے ارادے سے گئے تھے، کہنے لگا: میں نے ایک طویل القامت شخص کو دیکھا، میرا خیال ہے وہ فرشتہ تھا، اس نے میرے سینے پر اس زور سے مکا مارا کہ میں پیٹھ کے بَل نیچے گر پڑا، لوگو! میں مسلمان ہوچکا ہوں اور یہ گواہی دیتا ہوں کہ محمد صلی اللہ علیہ وسلم اللہ کے رسول ہیں، تم لوگ بھی ایمان لے آؤ۔ قرآن کریم کی سورۂ المائدہ آیت گیارہ میں اسی واقعے کی طرف اشارہ کیا گیا ہے (اسد الغابہ: ۲/۲۰۰، البدایہ والنہایہ: ۴/۲)

بخاری اور مسلم میں بھی اسی طرح کا ایک واقعہ مذکور ہے، مگر یہ واقعہ کسی دوسرے غزوہ میں پیش آیاتھا، حضرت جابر بن عبد اللہ اس کے راوی ہیں، فرماتے ہیں کہ ہم لوگ غزوۂ ذات الرقاع میں رسول اللہ صلی اللہ علیہ وسلم کے ساتھ تھے، ایک روز رسول اللہ صلی اللہ علیہ وسلم آرام کی نیت سے درخت کے سائے میں لیٹ گئے، ہم ذرا دور تھے، آپؐ کی تلوار مبارک بھی درخت سے لٹکی ہوئی تھی، اتنے میں ایک مشرک وہاں آیا، اور آپؐ کی تلوار ہاتھ میں لے کر کہنے لگا کیا آپؐ کو مجھ سے ڈر لگ رہا ہے، آپ نے فرمایا: نہیں، کہنے لگا: آپؐ کو مجھ سے کون بچائے گا، آپؐ نے فرمایا: اللہ میری حفاظت کرنے والا ہے۔ (صحیح البخاری:۵/۱۱۵، رقم الحدیث: ۴۱۳۶، صحیح مسلم: ۱/۵۷۶، رقم الحدیث: ۸۴۳) حافظ ابن حجر ؒ فرماتے ہیں کہ یہ دو قصے الگ الگ ہیں، پہلے قصے میں دعثور مسلمان ہوگئے تھے، یہ شخص مسلمان نہیں ہوا۔ (فتح الباری: ۷/۴۲۷) (جاری)

5 نومبر 2021، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے