Sun Oct 06 2024, 07:08 AM

Urdu Section ( 12 Feb 2022, NewAgeIslam.Com)

One Jew Who Fought On Behalf Of the Muslims Became Entitled To Heaven, And The Other To Hell Part-70 مسلمانوں کی طرف سےلڑنے والا ایک یہودی جنت کا حقدار بنا تو دوسرا دوزخ کا

مولانا ندیم الواجدی

11 فروری 2022

حضرت عمرو بن الجَموحؓ کی شہادت:

ان کے پیروں میں لنگراہٹ تھی، اور لنگراہٹ بھی معمولی نہیں، چلنا پھرنا کافی دشوار تھا، ان کے چار بہادر بیٹے تھے، جو ہر جنگ میں رسول اللہ صلی اللہ علیہ وسلم کے ساتھ رہا کرتے تھے۔ حضرت عمرو بن الجموحؓ کے دل میں یہ تمنا تھی کہ وہ بھی کسی جنگ میں شریک ہوں اور دشمن سے مقابلہ کریں۔ بیٹوں سے اس کا ذکر کرتے تو وہ کہتے! ابّا! آپ معذور ہیں، آپ پر جہاد فرض نہیں ہے، گھر پر رہیں۔ غزوۂ اُحد کا وقت آیا تو پھر یہی صورت حال پیش آئی۔ باپ جانا چاہتا تھا، بیٹے معذوری کا حوالہ دے کر منع کررہے تھے۔ایک دن رسول اللہ صلی اللہ علیہ وسلم کی خدمت میں حاضر ہوئے اور عرض کیا: یا رسولؐ اللہ! میں آپ کے ساتھ جنگ میں جانا چاہتا ہوں، لیکن میرے بیٹے مجھے روک رہے ہیں، خدا کی قسم! میں یہ امید رکھتا ہوں کہ میں اپنے لنگڑے پیروں سے جنت کی زمین روندوں گا۔ آپؐ نے ان سے تو یہ فرمایا! کہ تم معذور ہو، اور اللہ تعالیٰ نے معذوروں کو جہاد سے مستثنیٰ رکھا ہے، اور ان کے بیٹوں سے فرمایا، اگر یہ جانا چاہتے ہیں تو انہیں جانے دو، ہوسکتا ہے اللہ انہیں شہادت کی موت نصیب فرمائے۔ چنانچہ وہ جنگ میں شرکت کے ارادے سے نکلے، نکلنے سے پہلے قبلہ رو ہوکر انھوں نے یہ دُعا کی! اے اللہ! مجھے شہادت نصیب فرما اور مجھے گھر والوں کی طرف واپس نہ کر۔ ایک روایت میں یہ ہے کہ حضرت عمرو بن جموحؓ رسول اللہ صلی اللہ علیہ وسلم کی خدمت میں حاضر ہوئے، اور یوں عرض گزار ہوئے: یارسولؐ اللہ! آپؐ کی کیا رائے ہے اگر میں قتال کروں اور شہید ہوجاؤں، پھر میں جنت میں گھوموں پھروں، اس حالت میں کہ میرے پاؤں کی لنگراہٹ دور ہوچکی ہو۔ آپؐ نے فرمایا! کوئی حرج نہیں۔ چنانچہ وہ جنگ اُحد میں شریک ہوئے۔ اللہ نے ان کی یہ تمنا پوری فرمادی کہ وہ شہید ہوجائیں۔ ان کے ساتھ اس جنگ میں ان کے بیٹے خلّاد، اور ان کے برادرنسبتی عبد اللہ بن عمرو بن حرامؓ بھی شہید ہوئے۔ ان کی بیوی ہندہ بنت عمرو بن حرامؓ نے یہ ارادہ کیا کہ ان تینوں کی میتیں ایک اونٹ پر رکھ کر مدینہ لے جائیں اور وہاں لے کرجاکر دفن کریں، لیکن جب وہ مدینے کی طرف اونٹ کا رخ کرتیں تو اونٹ بیٹھ جاتا اور اُحد کی طرف رخ کرتیں تو اونٹ چلنے لگتا۔ ہندہ نے رسول اللہ صلی اللہ علیہ وسلم کی خدمت میں حاضر ہوکر یہ قصہ عرض کیا۔ آپؐ نے دریافت فرمایا! کیا عمرو بن الجموحؓ نے مدینہ سے روانگی کے وقت کچھ کہا تھا، ہندہ نے عرض کیا: انھوں نے یہ دُعا کی تھی کہ اے اللہ! مجھے مدینہ واپس مت لے جانا۔ فرمایا: اسی وجہ سے اونٹ چلنے پر آمادہ نہیں ہے، اس ذات کی قسم! جس کے قبضے میں میری جان ہے، تم میں سے بعض لوگ ایسے ہیں کہ اگر وہ اللہ پر قسم کھا بیٹھیں تو اللہ ان کی قسم ضرور پوری کرتا ہے، انہی میں سے عمرو بن الجموحؓ بھی ہیں، میں نے ان کو اسی لنگراہٹ کے ساتھ جنت میں ٹہلتے ہوئے دیکھا ہے۔ (مسند احمد بن حنبل: ۵/۲۹۹، رقم الحدیث: ۲۲۵۵۳، سیرت ابن ہشام: ۳/۱۰۱، الاستیعاب فی معرفۃ الاصحاب: ۲/۵۰۴) ان تینوں حضرات کو ایک ہی قبر میں دفن کیا گیا۔

حضرت اُصَیْرَمؓ کی شہادت:

ان کا پورا نام عمرو بن ثابت بن وقش ؓہے۔ان کو اسلام کی دعوت دی گئی، مگر وہ اسلام قبول نہ کرپائے، بعد میں غزوۂ اُحد کے موقع پر اچانک دل میں اسلام کا جذبہ پیدا ہوا، اور کفار سے لڑنے پہنچ گئے۔ حضرت ابوہریرہؓ روایت کرتے ہیں کہ اُصیرم اسلام کے سخت مخالف تھے، ایک دن جب کہ رسول اللہ صلی اللہ علیہ وسلم اور آپؐ کے جاں نثار صحابہؓ اُحد کے میدان میں جمع تھے اصیرم آئے اور پوچھنے لگے! سعد بن معاذؓ کہاں ہیں، ان سے کہا گیا کہ وہ اُحد میں ہیں، انھوں نے پوچھا اور ان کے بھائی بھتیجے کہاں ہیں، انہیں بتلایا گیا کہ وہ بھی اُحد میں ہیں، اپنی قوم کے متعلق پوچھا، لوگوں نے کہا کہ یہاں کوئی نہیں سب میدان جنگ کی طرف نکلے ہوئے ہیں۔ یہی وہ وقت تھا جب اسلام نے ان کے دل کے دروازے پر دستک دی۔ اٹھے، تلوار لی اور گھوڑے پر سوار ہوکر میدان کارزار کی طرف روانہ ہوئے اور مسلمانوں کے بیچ میں گھس گئے۔ لوگوں نے انہیں دیکھا تو کہا! اے اصیرم! ہم سے الگ ہی رہنا۔ انہوں نے کہا! میں ایمان قبول کرکے یہاں آیا ہوں، نہایت بہادری سے لڑے، زخمی ہوکر گرے اور موت کی آغوش میں پہنچ گئے۔ جس وقت لاشوں کی تلاش ہوئی تو بنی عبد الاشہل میں سے کسی کی نظر ان کے مردہ جسم پر پڑ گئی، اس نے لوگوں سے کہا یہ تو اصیرمؓ ہیں۔ اس وقت تک وہ زندہ تھے۔ لوگوں نے حیرت سے پوچھا: اے اصیرمؓ! تم یہاں کیا کررہے تھے، تم تو اسلام کے منکر تھے، کیا تم قومی حمیت کی خاطر ادھر آئے ہو، یا اسلام کی محبت تمہیں یہاں لے کر آئی ہے؟ انہوں نے کہا میں تو اسلام کی محبت میں یہاں آیا ہوں، میں اللہ اوراس کے رسول پر ایمان لے آیا ہوں، اسلام لانے کے بعد ہی میں نے تلوار ہاتھ میں لے کر یہاں کا قصد کیا ہے، اگر میں مرجاؤں تو میرا سارا مال محمد صلی اللہ علیہ وسلم کا ہے، وہ جس طرح چاہیں اور جہاں چاہیں خرچ کریں۔ لوگوں نے اصیرمؓ کی موت اور وصیت کا ذکر رسول اللہ صلی اللہ علیہ وسلم سے کیا۔ آپؐ نے فرمایا:وہ اہل جنت میں سے ہیں، یہ وہ صحابی ہیں جنھوں نے ایک وقت کی نماز بھی نہیں پڑھی اور جنت کے مستحق بن گئے۔ حضرت ابوہریرہؓ لوگوں سے پوچھا کرتے تھے اس شخص کا نام بتلاؤ جس نے کوئی نماز نہیں پڑھی اور جنت میں چلا گیا۔ ناواقف لوگ خاموش رہتے تو آپ بتلاتے کہ وہ اصیرم بن عبد الاشہلؓ ہیں۔ ایک مرتبہ رسول اللہ صلی اللہ علیہ وسلم نے ارشاد فرمایا: اصیرمؓ نے عمل کم کیا اجر زیادہ پایا۔ (صحیح البخاری: ۴/۲۰، رقم الحدیث: ۲۸۰۸، السیرۃ النبویہ ابن ہشام: ۳/۱۰۱)

اعمال کا مدار نیتوں پر

حقیقت یہ ہے کہ اعمال کے حسن وقبح اور ان پر ملنے والی جزا وسزا کا مدار نیتوں کے حسن وقبح پر ہے۔ یہاں ہم دو واقعے ذکر کرتے ہیں، ایک مخیریق یہودی کا، اور دوسرا واقعہ قَزْمَان کا، دونوں نے غزوۂ احد میں مسلمانوں کی طرف سے حصہ لیا، دونوں بہادری سے لڑے، دونوں نے دشمنوں کو بھاری نقصان پہنچایا، دونوں ہی مقتول ہوئے، لیکن ایک کو جنت کی بشارت ملی، اور دوسرے کو دوزخ کی۔

مخیریق کا واقعہ یہ ہے کہ جب رسول اللہ صلی اللہ علیہ وسلم نے جنگ کے لئے نکلنے کا ارادہ کیا تو مدینے کے یہودیوں کو جمع فرمایا اور ان سے کہا کہ وہ بھی ہمارے ساتھ جنگ میں چلیں کیوں کہ از روئے معاہدہ ان پر مسلمانوں کی اعانت کرنا ضروری ہے۔ یہودیوں نے کہا ہم تو آپ کے ساتھ جانے سے معذور ہیں، آج شنبہ ہے، اور آپ جانتے ہیں کہ شنبے میں ہم لوگ صرف عبادت کرتے ہیں، وہاں مخیریق یہودی بھی موجود تھا، اس نے کہا، شنبہ ونبہ کچھ نہیں، میں آپ کے ساتھ چلوں گا۔ چناں چہ وہ جنگ میں شریک ہوا اور جاتے ہوئے یہ بھی کہہ گیا کہ اگر میں جنگ میں کام آجاؤں تو میری تمام دولت محمد رسول اللہ صلی اللہ علیہ وسلم کی ہے۔ مخیریق نے دل وجان سے جنگ میں حصہ لیا اور دشمنوں کے ہاتھوں قتل ہوئے، رسول اللہ صلی اللہ علیہ وسلم نے ان کے متعلق ارشاد فرمایا: مخیریق بہت اچھے یہود تھے۔ بعض علماء نے ان کے اسلام میں اختلاف کیا ہے، علامہ سہیلیؒ نے الروض الانف میں انہیں مسلمان لکھا ہے، ڈاکٹر عبد اللہ الشقاریؒ نے اپنی کتاب ’’الیہود في السنۃ المطھرۃ‘‘ میں یہ موقف اختیار کیا ہے کہ وہ مسلمان ہوگئے تھے، اور اسلام کی محبت ہی انہیں میدان قتال کی طرف لے کر گئی، اور اسی جذبے نے انہیں اپنا تمام مال رسول اللہ صلی اللہ علیہ وسلم کی خدمت میں پیش کرنے پر آمادہ کیا، حالاں کہ یہودی فطرتاً مال کی محبت میں مبتلا ہوتے ہیں اور حصولِ مال کے لیے کتوں کی طرح لڑتے ہیں۔(الروض الانف: ۴/۴۰۸، الیہود فی السنۃ المطہرۃ: ۱/۳۰۶)

دوسری طرف قزمان نامی شخص تھا، اس نے بھی جنگ اُحد میں مسلمانوں کی طرف سے شرکت کی۔ نہایت بے جگری سے لڑا، اس سے قبل جب بھی رسول اللہ صلی اللہ علیہ وسلم کے سامنے قزمان کا ذکر آتا، اور اس کی بہادری کی باتیں ہوتیں تو آپؐ فرماتے یہ تو دوزخ میں جائے گا، جب سب لوگ اُحد کے لئے نکلے تو یہ گھر پر تھا، اُحد والے دن عورتوں نے اسے خوب غیرت دلائی تب وہ مسلح ہوکر اُحد کی طرف بھاگا، جس وقت وہ مسلمانوں سے جاکر ملا آپؐ صف بندی فرمارہے تھے، وہ پہلی صف میں جاکر کھڑا ہوگیا۔ پہلا تیر اسی نے دشمن پرچلایا، اس کے بعد تو اس نے تیروں کی بارش کردی، پھر تلوار کے جوہر دکھلائے، تنہا قزمان نے سات یا نو دشمنوں کو ہلا ک کر ڈالا، بالآخر زخمی ہوکر گر پڑا۔ یہ دیکھ کر قتادہ بن النعمانؓ نے کہا اے ابو الخیداق تجھے شہادت مبارک ہو، دوسرے مسلمانوں نے بھی شجاعت کی داد دی اور اسے جنت کی بشارت سنائی، کہنے لگا: کیسی بشارت اور کہاں کی جنت، خدا کی قسم! میں تو قوم کی عزت و ناموس کی خاطر چلا آیا ہوں، اگر قوم کا معاملہ نہ ہوتا تو میں ہرگز یہاں نہ آتا۔ قزمان کی یہ بات رسول اللہ صلی اللہ علیہ وسل کو بتلائی گئی۔ آپؐ نے فرمایا! وہ دوزخ والوں میں سے ہے، اللہ تعالیٰ اپنے دین کی مدد کسی فاجر سے بھی کرالیتا ہے۔ (صحیح البخاری: ۴/۷۲، رقم الحدیث: ۳۰۶۲، السیرۃ النبویہ لابن ہشام: ۳/۹۹) (جاری)

Urdu Section ( 12 Feb 2022, NewAgeIslam.Com)

One Jew Who Fought On Behalf Of the Muslims Became Entitled To Heaven, And The Other To Hell Part-70 مسلمانوں کی طرف سےلڑنے والا ایک یہودی جنت کا حقدار بنا تو دوسرا دوزخ کا

Loading..

Loading..