Sun Oct 06 2024, 07:50 AM

Urdu Section ( 15 March 2022, NewAgeIslam.Com)

The Attitude in Madinah Had Shifted, As the Holy Prophet (Pbuh) Had Noted With His Far-Sighted Eyes Part-74 حضور صلی اللہ علیہ وسلم کی دوربیں نگاہوں نے محسوس کرلیا تھا کہ مدینہ کی فضا بدل گئی ہے

مولانا ندیم الواجدی

11 مارچ،2022

رسولؐ اللہ کی خبر وفات

میدان میں رسول اللہ صلی اللہ علیہ وسلم کی وفات کی افواہ پھیلی تو صحابۂ کرامؓ کی ہمتیں ٹوٹ گئیں، ان میں افراتفری پھیل گئی اور وہ تتر بتر ہوکر رہ گئے، اس صورت حال میں منافقین کی بن آئی، انھوں نے کہنا شروع کردیا کہ اس وقت تو عبد اللہ بن أبی ہی ہماری مدد کرسکتا ہے، خود عبد اللہ أبی کو بھی یہ کہنے کا موقع مل گیا کہ میں پہلے ہی سے یہ کہتا آرہا ہوں کہ محمد اللہ کے نبی نہیں ہیں، میری بات نہیں مانی گئی، اب میرے ساتھ آؤ، اور میری مانو میں ابوسفیان سے کہہ کر تمہیں امن دلا دیتا ہوں۔ بعض کی زبان پر یہ تک آگیا کہ محمد اگر اللہ کے رسول ہوتے تو کیسے قتل ہوجاتے، لہٰذا اپنے آبائی دین کی طرف پلٹ جانا چاہئے۔ قرآن کریم نے اس سوچ پر سخت گرفت کی ہے کہ اگر تم اس دین کو محمد صلی اللہ علیہ وسلم کی ذات سے وابستہ سمجھتے ہو اور ان کے جاتے ہی دین کو ختم سمجھتے ہو تو اسلام کو ایسے لوگوں کی ضرورت نہیں ہے، دین اور اس کے تمام احکام اللہ کے ہیں، اور اللہ کے لئے ہیں، اگر وفات کی خبر صحیح بھی ہوتی تب بھی تمہارے وہم وخیال میں یہ بات نہیں آنی چاہئے تھی، وفات تو ایک دن ہونی ہی ہے، کیا تم ان کے بعد دین چھوڑ دوگے۔

مفسرین نے لکھا ہے کہ اس واقعے میں یہ حکمت رہی کہ رسول اللہ صلی اللہ علیہ وسلم کے دنیا سے پردہ فرمانے پر صحابہؓ کی جو کیفیت ہونے والی تھی اس پر پہلے ہی تنبیہ فرمادی گئی، اور رسول اللہ صلی اللہ علیہ وسلم کے سامنے ہی فرمادی گئی، تاکہ اس کا صحیح نمونہ سامنے آجائے، اور جہاں ضرورت ہو وہاں رسول اللہ صلی اللہ علیہ وسلم کی زبان مبارک سے اس کی اصلاح بھی ہوجائے، تاکہ جب یہ حادثہ حقیقی طور پر رونما ہو تو صحابہؓ میں افرا تفری نہ پھیلے، بے قابو ہوکر جان نہ گنوا بیٹھیں، یا دیوانے اور پاگل نہ ہوجائیں۔ ان تمام تنبیہات کے بعد بھی بعض بڑے صحابہؓ آپ کی وفات کے بعد ہوش و خرد سے بے گانہ ہوگئے، وہ یہ ماننے کے لئے تیار ہی نہیں تھے کہ محمد صلی اللہ علیہ وسلم وفات پا سکتے ہیں، حضرت ابوبکر صدیقؓ نے بڑے حوصلے، ہمت اور تدبیر سے ان سب کو سنبھالا اور یہی آیات ان کے سامنے تلاوت کیں جو غزوۂ اُحد کے موقع پر نازل ہوئیں تھیں۔

احد میں شکست کی حکمتیں

قرآن کریم نے ان آیات میں مسلمانوں کو یہ بھی سمجھایا ہے کہ بدر میں کفار کے ستر آدمی مارے گئے تھے اور تم غالب آئے تھے، آج تمہارے ستر آدمی شہید ہوئے ہیں اور وہ غالب آئے ہیں، کفار تو حوصلہ نہیں ہارے اور وہ ایک جُٹ ہوکر لڑنے کے لئے نکل پڑے، تم کیوں حوصلہ ہار بیٹھے ہو، اس دنیا میں اللہ کا نظام ہی یہ ہے کہ وہ سختی نرمی، دکھ سکھ، راحت وتکلیف میں لوگوں کے حالات بدلتا سدلتا رہتا ہے، لہٰذا اہل حق کی اس عارضی شکست اور باطل پرستوں کی وقتی فتح وکامرانی سے بد دل نہیں ہونا چاہئے اور یہ سمجھ کر نہیں بیٹھ رہنا چاہئے کہ اب ہمیشہ ہمیں ہار اور دُشمن کی جیت ہوا کرے گی بلکہ شکست کے اسباب کی کھوج لگا کر ان کا دفعیہ کرو۔

منجملہ حکمتوں کے ایک مصلحت یہ ہے کہ اس واقعہ میں کھرے کھوٹے کی آزمائش ہوگئی اور منافق اور کچے دل کے کچھ آدمی جو اسلامی کیمپ میں گھس آئے تھے اُن کے چہرے بے نقاب ہوگئے۔

اس کے علاوہ ان لوگوں کو جنگ کے نازک اور فیصلہ کن معاملات کا ذاتی تجربہ ہوگیا اس لئے اب ان کے قدم زیادہ محتاط ہوجائیں گے اور سب سے بڑھ کر یہ کہ مسلمانوں کے دلوں میں جو خدشات اور کمزوریاں پیدا ہوگئی تھیں وہ اس ٹھوکر لگنے سے دور ہوگئیں اور مسلمانوں کا ایمان زیادہ مضبوط اور گہرا ہوگیا، وہ سمجھ گئے کہ صرف اقرار کرلینے سے ایمان کی برکتیں اور کامرانیاں حاصل نہیں ہوں گی، جب تک آزمائشِ عمل میں ثابت قدم نہ ہوں گے اس وقت تک ایمان کے حقیقی ثمرات بھی میسر نہ آئیں گے۔(تفسیر انوار القرآن: ۲/۱۷۱)

حضرت مولانا محمد ادریس کاندھلویؒ نے غزوۂ اُحد میں فتح کے بعد ہزیمت پیش آجانے کی حکمت اور مصلحت پر تفصیلی کلام کیا ہے، لکھتے ہیں: اللہ کے وعدے کے مطابق دن کے آغاز میں مسلمان کافروں پر غالب رہے، مگر جب اس مرکز سے ہٹ گئے جس پر اللہ کے رسول صلی اللہ علیہ وسلم نے کھڑے رہنے کا حکم دیا تھا اور مال غنیمت جمع کرنے کے لیے پہاڑ سے نیچے اتر آئے تو جنگ کا پانسہ پلٹ گیا، اور فتح شکست سے بدل گئی، بارگاہ خداوندی میں محبین مخلصین اور عاشقین صادقین کی ادنیٰ ادنیٰ بات پر گرفت ہوتی ہے، اللہ رب العزت کو یہ ناپسند ہوا کہ اس کے محبین مخلصین صحابۂ کرامؓ اللہ کے رسول کے حکم سے ذرہ برابر بھی رو گردانی کریں، اگرچہ وہ روگردانی یا حکم کی خلاف ورزی کسی غلط فہمی کی وجہ سے یا بھول چوک کی بنا پر ہی کیوں نہ ہوئی ہو، نیز عاشق صادق کو یہ بات زیب نہیں دیتی کہ وہ دنیا کا مال ومتاع جمع کرنے میں لگ جائے اور اس کے حکم سے غافل ہوجائے، اگرچہ صحابۂ کرامؓ جس مال غنیمت کو جمع کرنے کے لیے پہاڑ سے اتر کر آئے تھے وہ حلال وطیب مال تھا کیوں کہ اللہ فرماتا ہے : ’’لہٰذا تم نے جو مال غنیمت میں سے حاصل کیا ہے اسے پاکیزہ حلال مال کے طور پر کھاؤ۔‘‘(الانفال: ۶۹)

مگر صحابہؓ جیسے عشاق کے لئے یہ مناسب نہ تھا کہ وہ خداوند ذوالجلال کی اجازت کے بغیر اس حلال وطیب مال کی طرف ہاتھ بڑھاتے۔ اللہ نے اپنے محبین مخلصین کی تنبیہ کے لئے وقتی طور پر فتح کو شکست سے بدل دیا تاکہ اس بات پر متنبہ ہوجائیں کہ غیر اللہ پر نظر جائز نہیں، اور علم ازلی میں یہ مقدر فرمادیا کہ وقتی طور پر اگرچہ شکستہ خاطر ہوں گے، مگر عن قریب فتح سے اس کی تلافی کردی جائے گی، اور آئندہ برسوں میں قیصر وکسریٰ کے خزانے ان کے ہاتھوں میں دے دیئے جائیں گے۔

اگرچہ مسلمانوں پر عتاب ہوا، مگر یہ وقتی عتاب تھا اور اس میں بھی محبت کی آمیزش تھی، بار بار مسلمانوں کو تسلی دی گئی کہ وہ ناامید نہ ہوں اور شکستہ خاطر نہ ہوں، ہم نے ان کی اس لغزش کو بالکل معاف کردیا ہے، چنانچہ ایک دفعہ یہ اعلان فرمایا: ’’البتہ اب وہ تمہیں معاف کرچکا ہے اور اللہ مؤمنوں پر بڑا فضل کرنے والا ہے۔‘‘ (آل عمران: ۱۵۲)پھر اسی رکوع میں دوبارہ عفو ودرگزر کا اعادہ کیا گیا:’’اور یقین رکھو اللہ نے انہیں معاف کردیا ہے یقیناً اللہ بہت معاف کرنے والا بڑا برد بار ہے۔‘‘ (آل عمران: ۱۵۵)

اللہ تعالیٰ نے صحابۂ کرام کے اس عمل کو لغزش قرار دیا اور اس کےلئے : اِنَّمَا اسْتَزَلَّہُمُ الشَّیْطَانُ ’’شیطان نے ان کو لغزش میں مبتلا کردیا تھا‘‘ (آل عمران: ۱۵۵) کی تعبیر اختیار فرمائی، اس سے یہ واضح ہوتاہے کہ مسلمانوں کا ارادہ اور نیت تو کچھ اور تھی مگر غلطی اور بھول چوک سے بلاارادہ قدم پھسل گیا، انھوں نے جان بوجھ کر کچھ نہیں کیا، اس لئے ہم نے اپنی رحمت اور حلم سے وہ غلطی معاف کردی، اور اس معافی کا اعلان ساری دنیا کو سنا دیا کہ ہماری عنایات رسول اللہ کے اصحابؓ پر جاری ہیں، اور یہ اعلان اس لئے کردیا تاکہ قیامت تک کسی کو صحابہؓ کی شان میں لب کشائی کی جرأت نہ ہو۔ خلاصہ یہ ہے کہ غزوۂ بدر میں فدیہ لینے پر جو عتاب ہوا تھا اس کی وجہ یہ تھی کہ اللہ کے دشمنوں کو قتل کرنے کے بجائے ان کا فدیہ مال کی صورت میں قبول کرلیا، اسی طرح غزوۂ احد میں دنیوی مال ومتاع کی طرف میلان کی وجہ سے عتاب ہوا، مگر بعد میں معاف کردیا گیا۔ (سیرۃ المصطفیٰ: ۲/۲۵۰، ۲۵۴)

غزوۂ حمراء الاسد

رسول اللہ صلی اللہ علیہ وسلم اپنے رفقاء واصحاب کے ساتھ مدینے واپس تشریف لے آئے، آپ صلی اللہ علیہ وسلم کی دور بیں اور دور اندیش نگاہوں نے یہ بات محسوس کرلی کہ مدینے کی فضا اب ویسی نہیں ہے جیسی چھوڑ کر گئے تھے، اس وقت مخالفت تھی مگر مخالفین کو مسلمانوں کی طاقت اور قوت کا احساس بھی تھا، بدر کے میدان میں جو واقعات پیش آئے، اور فتح ونصرت کے جو مناظر بہت سی آنکھوں نے دیکھے اور بہت سے کانوں نے سنے وہ سب مخالفین کے سامنے تھے اس لئے ان کی آوازیں دبی دبی رہتی تھیں، مگر اُحد کی شکست نے ان کی آوازوں میں جان پیدا کردی، یہودی اب سرگوشیوں میں نہیں بلکہ کھلم کھلا مسلمانوں کا مذاق اڑانے لگے، منافقین اب چھپ کر نہیں بلکہ کھل کر اسلام اور مسلمانوں کی مخالفت کرنے لگے، ان حالات میں آپ صلی اللہ علیہ وسلم نے ایک ایسا فیصلہ کیا جس کی کسی کو توقع بھی نہیں تھی، ابھی تھکے ماندہ مجاہدین ٹھیک سے آرام بھی نہیں کرپائے تھے، اور ابھی ان کے زخموں کی ٹھیک سے مرہم پٹی بھی نہیں ہوئی تھی کہ آپؐ نے صحابہ کرام ؓ کو حکم دیا کہ وہ جلد سے جلد تیار ہوجائیں، دشمن کا تعاقب کرنا ہے۔

اُحد کا دوسرا دن تھا، شوال کی ۱۶ تاریخ تھی، صبح فجر کی نماز کے بعد یہ اعلان ہوا، تمام صحابہؓ اپنی تلوا ریں اور تیرو کمان لے کر گھروں سے باہر نکل آئے، ان میں بہت سے زخمی بھی تھے، کئی تو گھسٹتے ہوئے چل رہے تھے، مگر ایک جذبہ تھا ایک جنون تھا جو انہیں اپنے رسولؐ اپنے قائد کی آواز پر لبیک کہنے پر مجبور کررہا تھا، یہ کل چھ سو افراد تھے، اور تمام کے تمام احد سے واپس آئے تھے، صرف حضرت جابر بن عبد اللہؓ تنہا ایسے مجاہد تھے جو غزوۂ احد میں شریک نہیں ہوئے مگر ان کو ساتھ چلنے کی اجازت مرحمت فرمائی گئی، اصل میں حضرت جابرؓ اور ان کے والد عبد اللہؓ بن حرام دونوں غزوۂ احد میں شریک ہونا چاہتے تھے، مگر ان کے سات بیٹیاں تھیں جن کی دیکھ بھال کے لئے گھر پر کسی مرد کا ہونا ضروری تھا، باپ نے بیٹے سے کہا کہ میں تمہیں اپنے آپ پر ترجیح نہیں دے سکتا، اس لئے میں احد جاتا ہوں، تم گھر میں رہ کر بہنوں کی دیکھ بھال کرو، حضرت جابر بن عبد اللہؓ نے جب یہ واقعہ رسول اللہ صلی اللہ علیہ وسلم کی خدمت میں عرض کیا تو آپؐ نے انہیں ساتھ چلنے کی اجازت دے دی،پہلے ستر مجاہدین تعاقب میں روانہ ہوئے، باقی مجاہدین کچھ دیر بعد نکلے اور دوسرے دن ان ستر مجاہدین سے جاملے، بعض محدثین نے ان کی تعداد چھ سو تیس لکھی ہے۔ (فتح الباری: ۷؍۳۷۳) (جاری)

11 مارچ،2022 ، بشکریہ : انقلاب ، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے