Sun Oct 06 2024, 07:16 AM

Urdu Section ( 29 March 2022, NewAgeIslam.Com)

Wine Flowed Like Water in the Streets of Madinah, Soon After its Prohibition Was Revealed Part-76 شراب کی حرمت کا حکم نازل ہوتے ہی مدینہ کی گلیوں میں شراب پانی کی طرح بہنے لگی

مولانا ندیم الواجدی

25 مارچ،2022

شراب کی حرمت کا حکم

ہجرت کا تیسرا سال غزوۂ احد کی تلخ وشیریں یادوں کے ساتھ اختتام پزیر ہوگیا، باقی ماندہ دو تین مہینوں میں غزوے یا سریہ کا کوئی نیا واقعہ پیش نہیں آیا، آپ صلی اللہ علیہ وسلم اسلامی حکومت کی تشکیل میں مصروف رہے، حلت وحرمت کے احکام برابر نازل ہورہے تھے، اسی دوران شراب کی حرمت کا حکم بھی نازل ہوا۔

شراب کے قطعی حرام ہونے کا حکم کب نازل ہوا، اس سلسلے میں اختلاف ہے، ۳، ۴، ۸ تینوں سینین کے بارے میں روایات ملتی ہیں، علامہ قسطلانیؒ نے مواہب لدنیہ میں لکھا ہے کہ شراب کی حرمت ۳ ھ میں غزوۂ اُحد کے بعد نازل ہوئی۔

عرب میں شراب نوشی کا بڑا چلن تھا، بلکہ اگر یہ کہا جائے تو غلط نہ ہوگا کہ شراب ان کی گھٹی میں پڑی ہوئی تھی، لوگ عادتاً شراب پیتے تھے، اچھی شراب پلانا اور عمدہ شراب مہمانوں کے سامنے پیش کرنا باعث فخر سمجھا جاتا تھا۔ مدینہ منورہ میں اس کا رواج کچھ زیادہ ہی تھا، کیوں کہ یہاں شراب بنانے کے وسائل زیادہ تھے، جس طرح آج کے دور میں شراب انسانی صحت بہ طور خاص عقل کے لیے نقصان دہ ہے اسی طرح اس وقت بھی تھی، لوگ شراب پی کر شعور کھو بیٹھتے تھے اور وہ کام کر گزرتے تھے جو کوئی انسان عقل وشعور کی موجودگی میں کر ہی نہیں سکتا تھا۔ اسلام جو دین فطرت ہے اور جو عقل وشعور کی اہمیت کو واضح کرتا ہے، یہ کب گوارا کرتا کہ لوگ شراب پی کر حواس کھو بیٹھیں اور عقل وخرد سے بیگانہ ہوجائیں، اس لئے اس نے شراب کو حرام قرار دیا، مگر تدریجی طور پر اس کی حرمت کے احکام نازل ہوئے، کیوں کہ جو چیز اہل عرب کے رگ وپئے میں سرایت کر چکی تھی اس سے یک لخت روک دینا بھی مناسب نہ تھا۔

سب سے پہلے سورۂ نمل کی آیت ۶۷؍ نازل ہوئی۔ یہ سورہ مکی ہے، اس میں شراب کے ساتھ حلال چیزوں کا بھی ذکر کیا گیا ہے، مگر ساتھ ہی یہ بھی کہہ دیا گیا کہ کھجور اور انگور سے تم نشے کی اشیاء بھی تیار کرتے ہو، اور ان چیزوں کو پاکیزہ رزق کے طور پر بھی استعمال کرتے ہو، گویا شراب کے متعلق یہ ایک طرح کی ناپسندیدگی کا اظہار تھا؛ کیوں کہ اس کو پاکیزہ رزق سے مستثنیٰ رکھا گیا۔ اس کے بعد مدینے میں کچھ اور آیات نازل ہوئیں جن میں ایک آیت سورۂ بقرہ کی آیت ۲۱۹؍ ہے، اس میں شراب اور جوئے کے متعلق فرمایا گیا کہ ان دونوں کے بڑے گناہ ہیں، اگرچہ کچھ فائدے بھی ہیں، مگرا ن کے فائدے گناہ اور نقصان کے مقابلے میں کم ہیں۔

اس آیت کے نزول کے بعد صحابہ سمجھ گئے کہ اسلام نہ شراب کو پسند کرتا ہے اور نہ جوئے کو، مگر اس وقت ان دونوں کو مصلحتاًقطعیت کے ساتھ حرام نہیں کیا گیا۔ ایک مرتبہ حضرت عمرؓ نے یہ دعا مانگی: اے اللہ! شراب کے بارے میں ہمارے لئے واضح احکام نازل فرما۔ ایک روز رسول اللہ صلی اللہ علیہ وسلم نے خطبے کے دوران یہ اشارہ دیا کہ عنقریب شراب کی حرمت نازل ہونے والی ہے، لہٰذا جس کے پاس شراب ہے وہ اسے فروخت کرکے نفع اٹھالے۔ اسی زمانے میں حضرت عبدالرحمٰن بن عوفؓ نے اپنے دوستوں کی ضیافت کی، انہیں خوب شراب پلائی، نشے کی حالت میں مغرب کی نماز بھی پڑھی گئی، امام نے جو خود بھی نشے کی حالت میں تھا سورۂ کافرون میں غلطی کی، اس موقع پر سورۂ نساء کی آیت (۴۳) نازل ہوئی جس میں مسلمانوں کو حکم دیا گیا کہ وہ نشے کی حالت میں نماز نہ پڑھا کریں۔ اس آیت کے نزول کے بعد مسلمانوں نے نماز کے اوقات میں شراب نوشی ترک کردی۔ ایک رات حضرت عتبان بن مالکؓ نے اپنے چند دوستوں کی دعوت کی، خوب کھانا پینا ہوا، نشے کی حالت میں اشعار بھی کہے گئے اور سنے گئے۔ حضرت سعد بن أبی وقاصؓ نے کسی انصاری کی ہجو میں فی البدیہہ کچھ شعر پڑھے تو ان انصاری صحابیؓ کو غصہ آگیا، اور انھوں نے غصے کی حالت میں اونٹ کی ہڈی لے کر حضرت سعد کے سر پر ماردی، جس سے وہ زخمی ہوگئے۔ حضرت سعد نے یہ واقعہ رسول اللہ صلی اللہ علیہ وسلم کی خدمت میں عرض کیا۔ حضرت عمرؓ نے جو اس مجلس میں حاضر تھے پھر یہ دُعا کی کہ اے اللہ! شراب کے بارے میں واضح حکم نازل فرما، اس پرسورۂ مائدہ کی آیات ۹۰، ۹۱؍اور ۹۲؍ نازل ہوئیں، ان میں شراب کے قطعی حرام ہونے کا ذکر ہے۔

ان آیات کے بعد شراب کی حرمت کا عام اعلان ہوگیا۔ جس وقت منادی یہ اعلان کررہا تھا کہ اللہ نے شراب حرام کردی ہے حضرت ابو طلحہؓ کے مکان پر ناؤ ونوش کی محفل برپا تھی، حضرت انس بن مالکؓ بھی شریک محفل تھے، جب یہ آواز کانوں میں پڑی تو ان حضرات نے کسی تردد کے بغیر شراب کے برتن توڑ دیئے اور شراب نالی میں بہادی۔ اس روز یہ حال تھا کہ مدینے کی گلیوں میں شراب پانی کی طرح بہہ رہی تھی۔

عبد اللہ بن أبی کی ذلت اور رسوائی

اس جنگ میں عبد اللہ بن أبی کا کردار سب سے زیادہ شرمناک رہا۔ دیکھا جائے تو یہ اچھا ہی ہوا کہ اس کا اصل منافقانہ چہرہ احد کی جنگ سے پہلے ہی بے نقاب ہوگیا، اور وہ اپنے تین سو ساتھیوں سمیت راستے ہی سے واپس چلاگیا، بہت ممکن تھا کہ وہ محاذ جنگ پر جاکر عین حالت جنگ میں کوئی گھٹیا چال چلتا اور مسلمانوں کو زیادہ نقصان اٹھانا پڑتا۔ ایسا نہیں ہے کہ یہ منافق چُھپے ہوئے تھے، رسول اللہ صلی اللہ علیہ وسلم کو سب معلوم تھا، لیکن مسلمانوں کی اجتماعی مصلحتوں کی خاطر آپؐ انہیں برداشت کررہے تھے، اب جب کہ وہ کُھل کر سامنے آگئے تھے ان کو برداشت کرنا اور ان کے ساتھ رواداری کا معاملہ کرنا کسی بھی طرح مناسب نہیں تھا۔

مضحکہ خیز بات یہ تھی کہ عبد اللہ بن أبی اتنا کچھ کرنے کے بعد بھی اس غلط فہمی میں مبتلا تھا کہ اسے اب بھی مسلمان سمجھا جاتا ہے، اور اسے اب بھی وہی درجہ اور مقام ومرتبہ ملے گا جو پہلے ملا کرتا تھا۔ غزوۂ احد سے پہلے اسے مسلمانوں کے درمیان ایک خاص امتیاز حاصل تھا، کیوں کہ وہ اپنی قوم کا سردار تھا، اور ایک بڑی تعداد اس کے ساتھ تھی، رسول اللہ ﷺ نے مدینہ تشریف لانے کے بعد اس کا یہ مرتبہ ساقط نہیں فرمایا، بلکہ اسے برقرار رکھا۔ مسجد نبویؐ میں اس کے لئے ایک خاص جگہ متعین تھی، وہ اسی مخصوص جگہ پر آکر بیٹھتا تھا جب آپ صلی اللہ علیہ وسلم خطبہ دے کر منبر سے اترتے تو یہ کھڑا ہوتا اور کہتا: لوگو! یہ محمد صلی اللہ علیہ وسلم اللہ کے رسول تمہارے درمیان تشریف لائے ہیں، اللہ تمہیں ان کے ذریعے سے عزت و کرامت عطا فرمائے، تم ان کی مدد کرو، ان کے ارشادات غور سے سنو اور ان کی اطاعت کرو۔ یہ ہر ہفتے کا معمول تھا، دوسرے مواقع پر بھی وہ اسی طرح تائیدی کلمات کہا کرتا تھا۔

غزوۂ احد سے واپسی کے بعد پہلا جمعہ آیا، آپ صلی اللہ علیہ وسلم معمول کے مطابق منبر پر تشریف لائے، خطبہ ارشاد فرمایا اور نیچے تشریف لے آئے، عبد اللہ بن أبی بے شرم اور ڈھیٹ بنا اپنی جگہ بیٹھا ہوا تھا، جب آپؐ منبر پر سے اتر کر نیچے تشریف لے آئے تو وہ اپنی جگہ کھڑا ہوا اور تائید ونصرت اور سمع وطاعت کی وہی باتیں دہرانے لگا جو وہ اکثر کیا کرتا تھا۔ مسلمان اس سے خار کھائے بیٹھے تھے، جیسے ہی وہ اپنی جگہ سے اٹھا اور اس نے بولنا شروع کیا، لوگوں نے اس کے کپڑے پکڑ کر کھینچنے شروع کردیئے، چاروں طرف سے یہ آوازیں آنے لگیں: اے دشمن خدا! بیٹھ جا، چپ کر، تو اس قابل نہیں ہے کہ یہاں کھڑا ہو، تیری زبان سے یہ باتیں اچھی نہیں لگتیں، کیا تجھے معلوم نہیں کہ تو نے کس قدر غلیظ حرکت کی ہے اور کس قدر گھناؤنا کردار ادا کیا ہے۔

عبد اللہ بن أبی مسلمانوں کا یہ رویّہ دیکھ کر لوگوں کی گردنیں پھلانگتا ہوا باہر کی طرف بھاگا۔ وہ یہ کہہ رہا تھا، میں نے ایسی کون سی بری بات کہہ دی کہ تم لوگ آپے سے باہر ہوگئے، میں تو ان کی تائید کے لئے کھڑا ہوا تھا۔ باہر آیا تو ایک انصاری صحابی اس کا راستہ روک کر کھڑے ہوگئے اور پوچھنے لگے ارے او بدبخت! تجھ پر کیا مصیبت آپڑی جو تو یوں منہ اٹھائے بھاگا چلا جارہا ہے۔ کہنے لگا کہ میں تو محمد صلی اللہ علیہ وسلم کی تائید کرنے کے لئے کھڑا ہوا تھا، لوگوں نے میرے کپڑے کھینچنے شروع کردیئے اور مجھے برا بھلا کہنے لگے۔ ان صحابیؓ نے غزوۂ احد سے ساتھیوں سمیت اس کی واپسی کی طرف اشارہ کرتے ہوئے کہا کہ تو رسول اللہ صلی اللہ علیہ وسلم کی خدمت میں حاضر ہوکر معافی مانگ لے، عبد اللہ بن أبی نے نخوت سے کہا کہ مجھے معافی مانگنے کی کوئی ضرورت نہیں ہے۔ یہ کہہ کر وہ پیر پٹختاہوا نماز ادا کئے بغیر چلا گیا۔

حافظ ابن اسحاق یہ واقعہ نقل کرنے کے بعد لکھتے ہیں کہ جنگ اُحد بڑی جدو جہد، بڑی مصیبت اور ابتلا وآزمائش کی جنگ تھی، اس جنگ میں اللہ نے ان لوگوں کا امتحان بھی لے لیا اور ان کو بے نقاب بھی کردیا جو اپنے دلوں میں کفر چھپائے ہوئے تھے اور زبان سے ایمان کا اظہار کیا کرتے تھے، اور جن کو نوازنا چاہا ان کو شہادت کا درجہ دے کر نواز بھی دیا۔(سیرۃ ابن ہشام: ۳/۶۰)

غزوۂ اُحد کے بعد

اس جنگ میں مسلمانوں کو بہت زیادہ جانی اور مالی نقصان اٹھانا پڑا۔ ایک بڑا نقصان یہ ہوا کہ غزوۂ بدر سے مخالفین کے دلوں پر مسلمانوں کا جو رعب اور دبدبہ قائم ہوا تھا وہ ختم ہوگیا، منافقین، مشرکین اور یہود سب اس خام خیالی میں مبتلا ہوگئے کہ اس وقت مسلمان شکست خوردہ ہیں، اپنے بہت سے بہادروں کو کھو چکے ہیں، ان کے حوصلے پست ہیں، ان حالات میں ان پر آسانی کے ساتھ قابو پایا جاسکتا ہے۔ مکہ کے مشرکین اگرچہ واپس چلے گئے تھے، لیکن وہ پھر واپس آنے کے ارادے سے گئے تھے، دوسری طرف کچھ اور قبائل مشرکین نے بھی اپنے بلوں سے باہر آنا شروع کردیا، ان میں قبیلۂ بنی اسد پیش پیش تھا، ابو سفیان ہذلی نے بھی اپنے ہم خیال لوگوں کو مسلمانوں کے مقابلے میں اکٹھاکرنا شروع کردیا تھا، عَضَل اور قارہ کے قبائل بھی موقع کی تاک میں تھے، عامر بن طفیل بھی سازشیں کرنے میں مصروف تھا، بنی نضیر کے یہودی بھی سرکشی پر آمادہ تھے۔ رسول اللہ صلی اللہ علیہ وسلم ایک ماہر فوجی قائد اور ایک بہادر سپہ سالار کی طرح ان تمام محاذوں پر نظر رکھے ہوئے تھے، تمام دشمنوں کی سرکوبی ضروری تھی، جنگ اُحد میں جو کھویا تھا اسے پانے کے لئے آرام کرنے یا زخموں کے پوری طرح مندمل ہونے کا انتظار کرنے کی گنجائش نہیں تھی۔(جاری)

25 مارچ،2022 ، بشکریہ : انقلاب ، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے