Urdu Section ( 22 March 2022, NewAgeIslam.Com)

The Prophet (Peace Be Upon Him) Said, 'A Believer Is Not Bitten From the Same Hole Twice' Part-75 آپﷺ نے فرمایا: مومن ایک سوراخ سے دو مرتبہ نہیں ڈسا جاتا

مولانا ندیم الواجدی

18 مارچ،2022

غزوۂ حمراء الاسد

اس سے قبل قبیلۂ اسلم کے تین جوان بہ طور مقدمۃ الجیش کفار کے تعاقب میں روانہ کئے گئے تھے، یہ لوگ اس وقت وہاں پہنچے جب ابوسفیان اور اس کے ساتھی حمراء الاسد میں تھے، سوئے اتفاق سے یہ تینوں حضرات گرفتار کرلئے گئے، ابوسفیان نے ان کو قتل کرا دیا، رسول اللہ صلی اللہ علیہ وسلم وہاں تشریف لائے تو ان کی لاشیں بے گور وکفن پڑی ہوئیں تھیں، آپ نے ان تینوں حضرات کو ایک ہی قبر میں دفن فرمایا۔

مسلمانوں کا یوں اچانک نکلنا بے حد ضروری تھا، ایک تو اس لئے کہ مسلمانوں کو جو احساس شکست تھا اور ساتھ ہی اپنی غلطیوں پر جو احساس ندامت تھا اس کے ازالے کی یہی ایک تدبیر تھی کہ انہیں دشمن سے مقابلہ کرنے کا ایک فوری موقع اور دیا جائے، دوسرے اس لئے کہ شکست کھا کر گھر پہنچنے سے مدینے میں رہنے والے دشمنوں کو استہزاء کا جو موقع مل رہا تھا اس اقدام سے ان کی زبانوں پر بھی لگام لگتی، تیسرے یہ کہ مشرکین مکہ کا یہ غرور بھی خاک میں مل جاتا کہ وہ مسلمانوں کو ان کے قلعے میں شکست دے کر آئے ہیں، وہ سوچ بھی نہیں سکتے تھے کہ شکست خوردہ مسلمانوں میں اتنی جرأت اور اس قدر حوصلہ ہوگا کہ وہ اپنے زخموں کی پروا کئے بغیر ان کے تعاقب کے لئے نکل کھڑے ہوں گے۔

آپؐ کا یہ حکم کہ صرف احد میں شرکت کرنے والے ہی اس سفر میں ساتھ ہوں گے، شرکاء اُحد کے مقام وعظمت کا اظہار تھا، اور یہ بھی اعلان تھا کہ اللہ تعالیٰ نے ان کی غلطیوں کو معاف کردیاہے اور اپنے دین کا کام لینے کے لئے پھر انہی کو منتخب کیا ہے۔ بعض علماء نے یہ مصلحت بھی لکھی ہے کہ اس سے منافقین کے گروہ کو شامل ہونے سے روکنا مقصود تھا۔ اُحد کی جنگ میں شرکت کے لئے یہ لوگ بھی ساتھ نکلے تھے لیکن عبد اللہ بن ابی ابن سلول کے بھڑکانے سے راستے ہی سے واپس آگئے تھے۔ اب اللہ کے رسولؐ نہیں چاہتے تھے کہ منافقین ساتھ آئیں، اب تک تو ان کو مصلحتاً برداشت کیا جارہا تھا، لیکن احد سے واپسی کے بعد ان کا مکروہ چہرا اور ان کے ناپاک عزائم کھل کر سامنے آگئے تھے اس لئے منافقین کو ساتھ رکھنا اور ان سے کسی طرح کی مدد لینا خلاف مصلحت بھی تھا اور غیرت وحمیت کے منافی بھی ، اس لئے یہ اعلان کردیا گیا کہ صرف وہ لوگ ہی اس سفر میں رسول ا للہ صلی اللہ علیہ وسلم کے ساتھ ہوں گے جنہوں نے غزوۂ احد میں شرکت کی ہے۔

قرآن کریم کی یہ آیت ان لوگوں کے بارے میں نازل ہوئی ہے جنہوں نے اپنے زخموں کی پروا کئے بغیر رسول اللہ صلی اللہ علیہ وسلم کی آواز پر لبیک کہا اور غزوۂ احد کے بعد ایک اور جنگ کے لئے نکل کھڑے ہوئے، اللہ تعالیٰ کا ارشاد ہے: ’’جن لوگوں نے زخموں کے بعد بھی اللہ اور رسول کی پکار کا فرماں برداری سے جواب دیا ایسے نیک اور متقی لوگوں کے لئے زبردست اجر ہے۔‘‘ (آل عمران: ۱۷۲) یاد رہے حضور صلی اللہ علیہ وسلم بھی اس وقت مجروح تھے اور زبردست تکلیف میں تھے، آپؐ کے چہرۂ مبارک پر زخم آئے تھے، کیوں کہ خود کی کڑیاں ٹوٹ کر آپؐ کے چہرۂ مبارک میں پیوست ہوگئی تھیں، سامنے کے چار دانت بھی شہید ہوگئے تھے، آپؐ کا دایاں شانہ بھی ابن قمیہ بدبخت کی تلوار کی ضرب سے مجروح ہوا تھا، آپؐ کے دونوں گھٹنے بھی گرجانے کی وجہ سے چھل گئے تھے، اس کے باوجود آپؐ نے دشمنوں کے تعاقب کا فیصلہ فرمایا، خود بھی تشریف لے گئے اور تمام ساتھیوں میں بھی منادی کرائی۔ بنو عبد الاشہل کے دو بھائی بھی اُحد کی جنگ میں شریک تھے، اتفاق سے دونوںبھائی شدید زخمی حالت میں واپس آئے، صبح کو جب یہ اعلان ہوا کہ مشرکین کا پیچھا کرنا ہے تو یہ دونوں بھی نکل پڑے، دونوں زخمی تھے، ان کے پاس کوئی سواری بھی نہیں تھی، دونوں آہستہ آہستہ چلتے رہے، یہاں تک کہ مجاہدین سے جاملے۔ ایک بھائی کچھ کم زخمی تھے، وہ اپنے دوسرے بھائی کو جن کو شدید زخم آئے تھے گود میں اٹھا کر چلتے، کبھی انہیں اتار دیتے، اس قدر مشقت کے ساتھ وہ حمراء الاسد تک پہنچنے میں کامیاب ہوئے۔انہیں یہ گوارا نہیں تھا کہ وہ نبی کریم صلی اللہ علیہ وسلم کی پکار پر لبیک نہ کہیں اور اس غزوے میں شرکت سے محروم رہ جائیں۔

حضرت ام عمارہؓ کا ذکر پہلے بھی آچکا ہے۔ وہ جنگ میں بری طرح زخمی ہوگئی تھیں۔ ان کے جسم پر بارہ زخم تھے، مونڈھے کا زخم تو بہت ہی بڑا اور گہرا تھا، بستر پر پڑی تھیں، پوری رات زخم کی وجہ سے بے چین رہیں لیکن صبح جیسے ہی انھوں نے حضرت بلالؓ کی یہ آواز سنی إلی حمراء الاسد، حمراء الاسد کی طرف چلو، تو وہ بے قرار ہوکر بستر سے اٹھنے لگیں مگر کمزوری کے باعث اٹھا نہیں گیا، حرکت کرنے کی وجہ سے زخموں سے اور خون بہنے لگا، ان کے علاوہ سب ہی لوگ چلے گئے، مدینہ واپس تشریف لانے کے بعد رسول اللہ صلی اللہ علیہ وسلم نے ان کی خیریت دریافت کرنے کے لئے آدمی کو بھیجا، اس نے آکر خبر دی کہ اب پہلے کے مقابلے میں کچھ آرام ہے۔ ان کے کاندھے کا زخم ایک سال میں جاکر بھرا۔ (طبقات بن سعد: ۸؍۴۱۳، البدایہ والنہایہ: ۴؍۵۰)

مدینہ سے روانگی کے بعد اس قافلے کا پہلا باقاعدہ پڑاؤ حمراء الاسد کے مقام پر ہوا، یہ جگہ مدینہ منورہ سے جانب ِ مکہ بیس کلو میٹر کے فاصلے پر ہے، آپؐ نے وہاں تین دن قیام فرمایا۔ قبیلۂ بنو خزاعہ کا سردار معبد بن أبی معبد اُحد کی جنگ میں شہید ہونے والے صحابہ کرامؓ کی تعزیت کے لئے حاضر ہوا، اس وقت تک یہ قبیلہ مسلمان نہیں ہوا تھا، البتہ اس کی ہمدردی مسلمانوں کے ساتھ تھی، معبد نے اس جنگ میں ہونے والے نقصان پر اظہار افسوس کیا اور مکہ کی طرف روانہ ہوگیا۔

ابوسفیان اپنے لوگوں کے ساتھ روحا میں ٹھہرا ہوا تھا۔ یہ جگہ مدینہ منورہ سے اسی کلو میٹر کے فاصلے پر ہے، ابوسفیان کو یہاں پہنچ کر احساس ہوا یا وہ راستے بھر یہ سوچتا رہا کہ ہمیں واپس آنے کے بجائے محمد صلی اللہ علیہ وسلم کے زخمی لوگوں پر دوبارہ حملہ کردینا چاہئے تھا تاکہ یہ قصہ ہی ہمیشہ ہمیشہ کے لئے ختم ہوجاتا، اس نے اپنے ساتھیوں سے کہا کہ تم لوگوں نے نہ محمد کو قتل کیا اور نہ ان کی نوجوان عورتوں کو اپنے اونٹوں پر پیچھے بٹھلایا، تم لوگوں نے بہت برا کیا، اب بھی وقت ہے ہمیں مدینے کی طرف کوچ کرنا چاہئے، اس وقت ان کی طاقت کمزور پڑ چکی ہے، وہ تھکے ہوئے ہیں، زخمی ہیں، سب سے بڑھ کر یہ کہ وہ مایوس اور غم زدہ ہیں، خدا کی قسم اگر ہم وہاں جاکر ان پر حملہ کرتے ہیں تو وہ یہ حملہ برداشت نہیں کرپائیں گے اور جس مقصد کے لیے ہم گھر سے نکلے ہیں وہ پورا ہوجائے گا۔ (مجمع الزوائد للہیثمی: ۶؍۱۲۱)

ابھی مدینے کی طرف واپسی کا مشورہ چل ہی رہا تھا کہ معبد بن أبی معبد وہاں پہنچ گیا، ابوسفیان نے اس سے پوچھا مدینے میں کیا صورت حال ہے؟ اس نے کہا کہ شاید تم محمدؐ اور اصحابِ محمدؐ کے بارے میں جاننا چاہتے ہو، تمہارے خلاف غصے کی آگ ان کے سینوں میں بھڑک رہی ہے، وہ اتنی بڑی تعداد میں مدینہ سے نکل کر تمہارے پیچھے آرہے ہیں جس کا تم تصور بھی نہیں کرسکتے۔ جو لوگ احد میں شرکت سے محروم رہ گئے تھے وہ بھی نادم ہوکر ساتھ آگئے ہیں۔ صحیح بات تو یہ ہے کہ میں نے ان لوگوں کو اتنے جوش میں اور اس قدر غصے میں کبھی نہیں دیکھا۔ یہ سن کر ابوسفیان نے پوچھا: اب تم مشورہ دو، ہمیں کیا کرنا چاہئے۔ معبد نے کہا خدا کی قسم ان کا ہر اول دستہ تمہارے کوچ کرنے سے قبل ہی یہاں پہنچ جائے گا، وہ تیزی سے آگے بڑھ رہے ہیں۔ ابوسفیان نے کہا :واللہ ہم نے تو ان کو جڑ سے اکھاڑ پھینکنے کا ارادہ کرلیا تھا۔ معبد نے کہا: میں تمہیں یہاں رکنے کی اور ان سے بھڑنے کی رائے نہیں دوں گا۔ ابوسفیان نے فیصلہ کیا کہ ہمیں یہاں رکنے کے بجائے مکہ کی طرف بڑھ جانا چاہئے، چنانچہ اس نے اسی وقت قافلے کو آگے بڑھنے کا حکم دے دیا۔ (البدایہ والنہایہ: ۴؍۵۱)

سفیان اپنے لوگوں کو لے کر واپس تو چلا گیا، لیکن جاتے جاتے ایک نفسیاتی حربہ بھی استعمال کرگیا، بنو عبد القیس کے کچھ لوگ مدینہ منورہ کی طرف جارہے تھے۔ ابوسفیان نے ان سے کہا کہ اگر تم میرا ایک پیغام محمد صلی اللہ علیہ وسلم تک پہنچا دو تو میں تمہیں کشمش دے کر خوش کردوں گا، تم عکاظ کے بازار میں آکر مجھ سے ملنا۔ ان لوگوں نے حمراء الاسد میں پہنچ کر رسول اللہ صلی اللہ علیہ وسلم سے ملاقات کی اور آپ کی خدمت میں ابوسفیان کا یہ پیغام پہنچایا کہ ابوسفیان اور اس کی فوج مدینے کی طرف واپس آرہی ہے، ان کا ارادہ مسلمانوں کے وجود کو ختم کرنے کا ہے۔ آپ صلی اللہ علیہ وسلم نے اور آپؐ کی خدمت میں موجود تمام مسلمانوں نے یہ پیغام سن کر کہا: حسبنا اللہ ونعم الوکیل۔ ’’ہمارے لئے اللہ کافی ہے اور وہ بہترین کارساز ہے۔‘‘ ابوسفیان اپنے لوگوں کو لے کر مکہ چلا گیا، ان لوگوں نے مسلمانوں کا مقابلہ کرنے کے بجائے سلامتی کے ساتھ نکل جانے کو ترجیح دی، مسلمانوں نے حمراء الاسد میں تین دن تک قیام کیا، اگرچہ لڑائی نہیں ہوئی، مگر کفار کے تعاقب کے اس فیصلے نے نہ صرف یہ کہ مسلمانوں کے دلوں سے ہزیمت کی شرمندگی کے احساس کا ازالہ کردیا، بلکہ یہود، منافقین اور مشرکین کو یہ سوچنے پر بھی مجبور کردیا کہ مسلمان فی الحقیقت ناقابل شکست ہیں، احد کے میدان میں جو کچھ پیش آیا وہ ایک اتفاقی واقعہ تھا، اس سے ان کی بہادری، طاقت، اتحاد، اور مقصد کے لئے مر مٹنے کا جذبہ فنا نہیں ہوا، بلکہ اس شکست نے ان کا حوصلہ بڑھا دیا ، اُحد کی شکست سے مسلمانوں نے جو کچھ سیکھا اور سمجھا اس سے وہ مستقبل میں ناقابل شکست بن گئے۔ (تاریخ الاسلام للذھبیؒ،ص:۲۲۶)

جاسوس کا انجام

ابھی مدینے میں داخل نہیں ہوئے تھے کہ ایک کافر شاعر ابو عزہ الجمحی پکڑا گیا جو جاسوسی کے ارادے سے پھر رہا تھا۔ گرفتاری کے بعد آپؐ نے اسے قتل کرنے کا حکم دیا، اس نے درخواست کی کہ یا رسولؐ اللہ! مجھے اس بار بھی معاف کردیجئے، یہ بدبخت جنگ بدر کے قیدیوں میں بھی شامل تھا اور اسے آپؐ نے معاف فرمادیا تھا، اس وقت آپؐ نے اس سے فرمایا تھا کہ تجھے اس شرط پر رہا کیا جارہا ہے کہ آئندہ کسی جنگ میں تو مسلمانوں کے مقابلے میں نہیں آئے گا۔ مگر اس نے وعدہ خلافی کی اور احد میں بھی آگیا، معافی کی درخواست پر آپؐ نے فرمایا: اب مکہ میں تو اپنے رخساروں سے مٹی نہیں جھاڑ پائے گا، تونے محمد کو دو مرتبہ دھوکا دیا ہے۔ اس کے بعد آپؐ نے یہ جملہ ارشاد فرمایا جو ہمیشہ ہمیش کیلئے ایک مثال بن گیا، آپؐ نے فرمایا: لا یلدغ المؤمن من جحر واحد مرتین۔ ’’مومن ایک سوراخ سے دو مرتبہ نہیں ڈسا جاتا‘‘ یعنی ایک مرتبہ دھوکا کھانے کے بعد کسی مؤمن کیلئے یہ بات مناسب نہیں کہ وہ دوبارہ پھر اسی شخص سے دھوکا کھائے جس سے پہلے کھا چکا ہے۔ (البدایہ والنہایہ: ۴؍۵۳، صحیح البخاری: ۸؍۳۱، رقم الحدیث: ۶۱۳۳) (جاری)

18 مارچ،2022 ، بشکریہ : انقلاب ، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے