Urdu Section ( 28 Jun 2022, NewAgeIslam.Com)

The Holy Prophet Said: 'O Aisha! Rejoice, 'Allah Has Declared Your Innocence from the Ifk-Slander Part-89 آپ ؐ نے فرمایا: اے عائشہؓ! خوش ہوجاؤ، اللہ نے تمہاری برأت ظاہر کردی ہے

مولانا ندیم الواجدی

24 جون 2022

حضرت عائشہؓ کی روایت

بخاری کے ایک راوی ابن شہاب زہریؒ کہتے ہیں کہ عروہ بن زبیرؓ، سعید بن المسیبؓ، علقمہ بن وقاصؓ، اور عبید اللہ بن عبد اللہ بن عتبہ بن مسعود ؓ(ان چاروں حضرات) نے یہ واقعہ (افک) حضرت عائشہؓ سے سن کر روایت کیا ہے، عروہؓ کہتے ہیں کہ حضرت عائشہؓ فرماتی ہیں کہ رسول اللہ صلی اللہ علیہ وسلم کا طریقہ یہ تھا کہ جب آپ سفر میں تشریف لے جاتے تو اپنی بیویوں کے درمیان قرعہ ڈالتے، جس کا نام قرعے میں نکل آتا اس کو سفر میں ساتھ لے جایا کرتے تھے، ایک غزوے کے موقع پر قرعے میں میرا نام نکل آیا، اور میں ساتھ گئی، اس سے کچھ پہلے حجاب کا حکم نازل ہوچکا تھا، چناں چہ (پردے کی وجہ سے) مجھے ایک مَحْمِلْ (ہودہ) میں سوار کرایاگیا، میں اسی میں رہتی اور اسی سے نیچے اترتی، ہمارا سفر اسی طرح جاری رہا، واپسی کے سفر میں ایک رات ہم مدینے کے قریب پہنچ کر ٹھہر گئے، قافلے کی روانگی کا اعلان ہوا تو میں رفع حاجت کے لئے نکل پڑی اور کچھ دور چلی گئی، جب میں فارغ ہوکر واپس آرہی تھی تو مجھے احساس ہوا کہ (شہر) اظفار کا بنا ہوا موتیوں کا جو ہار میں نے پہن رکھا تھا وہ ٹوٹ کر کہیں گر گیا ہے، میں ہار کی تلاش میں واپس گئی، تلاش کرنے میں کچھ وقت لگ گیا، اتنے میں وہ لوگ جو میرا محمل اٹھانے پر مامور تھے آئے اور اسے اٹھا کر اونٹ پر رکھ دیا، وہ یہ سمجھے کہ میں محمل کے اندر موجود ہوں اور چل پڑے۔

قیام گاہ کی طرف واپسی

حضرت عائشہؓ فرماتی ہیں کہ جب میں ہار لے کر قافلے کی طرف واپس آئی تو وہاں کوئی نہ تھا، نہ پکارنے والا، اور نہ جواب دینے والا، میں نے دل میں سوچا کہ جب میں قافلے میں نہیں ملوں گی تو لامحالہ مجھے تلاش کیا جائے گا اور تلاش کرنے والے یہیں پر آئیں گے، اس لئے میں وہیں ایک چادر لپیٹ کر لیٹ گئی، اسی میں نیندبھی آگئی، صفوان بن معطل سُلّمی ذکوانی نامی ایک شخص قافلے کے پیچھے پیچھے چلنے پر مامور تھے تاکہ قافلہ گزرنے کے بعد کسی کی کوئی چیز وہاں پڑی رہ جائے تو وہ اسے اٹھالیں، صبح کو وہ وہاں آگئے جہاں میں لیٹی ہوئی تھی، انھوں نے دور سے دیکھا کہ کوئی انسان سویا ہوا ہے، قریب آئے تو وہ مجھے پہچان گئے، کیوں کہ پردے کا حکم نازل ہونے سے پہلے انھوں نے متعدد مرتبہ مجھے دیکھا تھا، مجھے دیکھ کر انھوں نے (بآواز بلند) إنا للہ پڑھی، ان کی آواز سن کر میری آنکھ کھل گئی، میں نے اپنی چادر چہرے پر ڈال لی، خدا کی قسم انھوں نے مجھ سے کوئی بات نہیں کی، اور نہ کلمۂ استرجاع (انا للہ) کے سوا کوئی بات میں نے ان کی زبان سے سنی۔

حضرت صفوانؓ کا حسنِ ادب

صفوان نے اپنی اونٹنی کو نیچے بٹھایا اور اس کا پاؤں اپنے پاؤں سے دباکر کھڑے ہوگئے، یہاں تک کہ میں اونٹنی پر سوار ہوگئی، وہ پیدل اونٹنی کی نکیل پکڑکر آگے آگے چلتے رہے، ہم دوپہر کے قریب لشکر سے جاملے، (ہمیں ایک ساتھ دیکھ کر) کچھ لوگوں نے جن کی قسمت میں ہلاکت لکھی ہوئی تھی، چہ میگوئیاں شروع کردیں، ان میں سرفہرست عبداللہ ابن ابی ابن سلول تھا، (غرض یہ کہ) ہم لوگ مدینے پہنچ گئے وہاں پہنچ کر میں بیمار پڑ گئی اور ایک مہینے تک بیمار رہی، لوگ اس واقعے کو لے کر برابر تبصرے کررہے تھے، اور افترا پردازی کا طوفان برپا تھا، مگر مجھے کچھ پتہ نہ تھا، میں حالات سے بالکل بے خبر تھی، تاہم اتنی بات مجھے شک میں ڈال رہی تھی کہ میرے تئیں رسول اللہ صلی اللہ علیہ وسلم کا وہ التفات باقی نہ تھا جو بیماری کے زمانے میں مجھے حاصل رہتا تھا، آپ صلی اللہ علیہ وسلم میرے پاس تشریف لاتے، اور میری طبیعت کا حال پوچھ کر واپس تشریف لے جاتے، (نہ میرے پاس تشریف رکھتے اور نہ خیریت معلوم کرنے کے علاوہ مجھ سے کوئی بات کرتے، اس بے توجہی اور عدم التفات سے میری بیماری کچھ اور بڑھ گئی تھی) مجھے کچھ شک تو تھا کہ کوئی نہ کوئی بات ضرور ہے، مگر شہر میں کوئی طوفان برپا ہے، میں اس سے بالکل انجان تھی۔

حضرت عائشہؓ کو پتہ چل گیا

فرماتی ہیں کہ ایک دن طبیعت کچھ ٹھیک تھی، اگرچہ بیماری کی وجہ سے میں بہت کمزور ہوگئی تھی، اسی حالت میں (رات کے وقت) مناصع (ایک جگہ کا نام) کی طرف جانا ہوا، مسطح کی ماں میرے ساتھ تھی، وہاں ہم لوگ رفع حاجت کے لیے جایا کرتے تھے، اور اس کے لیے صرف رات کا وقت مخصوص تھا، یہ ان دنوں کی بات ہے جب گھروں میں یا گھروں سے قریب بیت الخلاء نہیں بنائے جاتے تھے، عربوں کا قدیم دستور یہی تھا۔ ان کا بیٹا مسطح تھا۔میں اور ام مسطح رفع حاجت سے فارغ ہوکر گھر کی طرف لوٹ رہے تھے کہ ام مسطح کا پاؤں ان کی چادر میں الجھ گیا، اور وہ گرتے گرتے بچیں، اس حالت میں ان کی زبان سے نکلا، مسطح مرجائے۔ میں نے کہا: یہ تم کیا کہہ رہی ہو، کیا تم ایسے شخص کو ہلاکت کی بد دُعا دے رہی ہو جس نے جنگ بدر میں حصہ لیا ہے؟ انہوں نے جواب میں کہا: اے بھولی بھالی بچی! کیا تم نے وہ باتیں نہیں سنیں جو مسطح کہتا پھر رہا ہے، میں نے کہا: نہیں! میں نے نہیں سنا ۔ تب انھوں نے مجھے اس تہمت کے بارے میں بتلایا جو مجھ پر لگائی جارہی تھی۔

مرض کی شدت میں اضافہ

یہ خبر سن کر میرا مرض بڑھ گیا، اور (میں گرتے پڑتے) اپنے حجرے میں آگئی، ایک روایت میں یہ الفاظ بھی ہیں کہ یہ باتیں سن کر مجھ پر کپکپی طاری ہوگئی، ایک اور روایت میں ہے کہ جب میں نے یہ واقعہ سنا تو میں اس قدر رنجیدہ ہوئی کہ بے اختیار دل میں خیال آیا کہ میں خود کو کسی کنوئیں میں گراکر ہلاک کرڈالوں (صبح کو) حسب معمول رسول اللہ صلی اللہ علیہ وسلم میرے حجرے میں تشریف لائے۔ میرا حال دریافت فرمایا، میں نے عرض کیا، یارسولؐ اللہ! میں اپنے والدین کے گھر جانا چاہتی ہوں، آپؐ نے مجھے گھر جانے کی اجازت دے دی، میں وہاں چلی گئی۔

میں نے اپنی امی سے پوچھا کہ میں یہ کس طرح کی باتیں سن رہی ہوں، لوگ میرے متعلق کیا کیا کہتے پھر رہے ہیں، انھوں نے مجھے تسلّی دیتے ہوئے کہا: بیٹی! تو پریشان نہ ہو، خدا کی قسم! جو عورت حسین ہوتی ہے اور اپنے شوہر کی محبوب بھی ہوتی ہے تو عموماً اس کی سوکنیں اس طرح کی باتوں کو ہوا دیا کرتی ہیں، میں نے کہا: امی جان! لوگوں میں اس طرح کا چرچا ہے اور آپ نے مجھے بتلایا تک نہیں، یہ کہہ کر میں رونے لگی۔ پوری رات روتی رہی، نہ میرے آنسو تھمے اور نہ میری آنکھ جھپکی، میں نے روتے روتے صبح کردی۔

رسولؐ اللہ حضرت عائشہؓ کے پاس تشریف لائے:

حضرت عائشہؓ فرماتی ہیں کہ میں اگلے تمام دن بھی روتی رہی ۔نہ میرے آنسو تھمتے تھے، نہ پلک جھپکتی تھی۔ میرے ماں باپ میرے پاس بیٹھے رہے۔ میں دو رات اور ایک دن روتی رہی، میری یہ کیفیت دیکھ کر میرے والدین کو یہ اندیشہ ہوا کہ کہیں میرا کلیجہ نہ پھٹ جائے۔ میری یہی کیفیت تھی اور میرے ماں باپ میرے قریب بیٹھے ہوئے مجھے تسلی دے رہے تھے۔ میں مسلسل رو رہی تھی کہ ایک انصاری عورت آئی، اور اس نے میرے پاس آنے کی اجازت مانگی۔ میں نے اسے اپنے پاس بلا لیا، مجھے روتا دیکھ کر وہ بھی رونے لگی، اتنے میں رسول اللہ صلی اللہ علیہ وسلم گھر میں داخل ہوئے۔ آپؐ نے سلام کیا اور بیٹھ گئے، جب سے یہ طوفان بدتمیزی برپا ہوا تھا آپؐ میرے پاس نہیں بیٹھے تھے، اس عرصے میں کوئی وحی بھی نازل نہیں ہوئی تھی۔ آپ صلی اللہ علیہ وسلم نے میرے پاس بیٹھ کر تشہد پڑھا اور فرمایا:

’’اے عائشہؓ! مجھے تمہارے متعلق اس طرح کی خبر ملی ہے، اگر تم بے قصور ہو تو عن قریب اللہ تمہاری برأت ظاہر کردے گا، اور اگر تم نے کوئی گناہ کرلیا ہے تو اللہ سے مغفرت کی دعا مانگ لو، اور توبہ کرلو، اس لئے کہ جب بندہ اپنے گناہ کا اعتراف کرتے ہوئے توبہ کرتا ہے تو اللہ اس کی توبہ قبول کرلیتا ہے۔‘‘ آپ صلی اللہ علیہ وسلم نے اپنی بات پوری کرلی، اس وقت میرے آنسو بالکل خشک ہوچکے تھے۔میں نے اپنے والد سے کہا کہ آپ اس کا جواب دیں۔ انہوں نے کہا: بیٹی! خدا کی قسم! مجھے نہیں معلوم کہ میں رسول اللہ صلی اللہ علیہ وسلم سے کیا کہوں،پھر میں نے اپنی والدہ سے کہا کہ امی جان! آپ ہی کچھ فرمائیں، انہوں نے بھی معذرت کردی۔ پھر میں نے (ہمت جمع کرکے) کہا کہ خدا کی قسم! میں یہ بات اچھی طرح جانتی ہوں کہ جو کچھ آپؐ نے سنا ہے آپ کے دل میں وہ بات راسخ ہوچکی ہے اور آپؐ اس کا یقین کرچکے ہیں، اب اگر میں یہ کہتی ہوں کہ میں بے قصور ہوں اور اللہ جانتا ہے کہ میں واقعی بے قصور ہوں تب بھی آپؐ یقین نہیں کریں گے، اور اگر میں یہ کہتی ہوں کہ میں گنہ گار ہوں حالاں کہ اللہ خوب جانتا ہے کہ میں بے گناہ ہوں تب آپ یقین کرلیں گے، اس لئے میں ایسی کسی چیز سے توبہ نہیں کروں گی جو یہ لوگ میری طرف منسوب کررہے ہیں۔ خدا کی قسم! میرے نزدیک آپ کی اور میری مثال ایسی ہے جیسی قرآن میں یوسف علیہ السلام اور ان کے باپ کی بیان کی گئی ہے، ان کے والد نے کہا تھا:’’اب تو میرے لیے صبر ہی بہتر ہے، اور جو باتیں تم بنا رہے ہو، اُن پر اللہ ہی کی مدد درکار ہے۔‘‘(یوسف:۱۸)

بس اس وقت میں بھی یہی کہتی ہوں۔ بعض روایات میں ہے کہ اس وقت حضرت عائشہؓ اس قدر افسردہ اور مغموم تھیں کہ حضرت یوسف علیہ السلام کے والد حضرت یعقوب علیہ السلام کا نام بھی بھول گئیں، حضرت عائشہؓ کہتی ہیں کہ اتنا کہہ کر میں بستر پر کروٹ لے کر لیٹ گئی، مجھے اپنی بے گناہی کا یقین تھا اور یہ بھی یقین تھا کہ اللہ تعالیٰ میری برأت ضرور کریں گے، لیکن خدا کی قسم! مجھے اس کا گمان تک نہ تھا کہ میرے بارے میں وحی نازل ہوگی اور (قیامت تک) اس کی تلاوت کی جائے گی، حقیقت یہ ہے کہ میں وحی کے حوالے سے خود کو نہایت کم تر سمجھتی تھی، بس یہ امید تھی کہ رسول اللہ صلی اللہ علیہ وسلم خواب میں کوئی ایسی بات دیکھ لیں گے جس سے اللہ تعالیٰ میری برأت فرمادے گا۔

وحی کا نزول

حضرت عائشہؓ کہتی ہیں ابھی سب اسی جگہ بیٹھے تھے، کوئی بھی اپنی جگہ سے اٹھ کر نہیں گیا تھا کہ رسول اللہ صلی اللہ علیہ وسلم پر وحی نازل ہونے لگی، اور جیسا کہ نزول وحی کے وقت آپؐ کی کیفیت ہوا کرتی ہے وہ کیفیت ظاہر ہونے لگی۔ حسب معمول آپ پر ثقل (بوجھ) ہونے لگا، اور آپؐ کے بدن مبارک سے موتیوں کی طرح پسینہ ٹپکنے لگا، حالاں کہ وہ سردی کے دن تھے۔ میں اس وقت نہ گھبرائی، نہ پریشان ہوئی، کیوں کہ میں اپنی جگہ بالکل مطمئن تھی، البتہ خوف کی وجہ سے میرے والدین کا برا حال تھا۔ ان کو دیکھ کر مجھے یہ اندیشہ ہوا کہ وہ خوف کی وجہ سے مر نہ جائیں، ان کو یہ ڈر تھا کہ کہیں وحی لوگوں کے کہنے کے مطابق نازل نہ ہوجائے، میرے والد کبھی رسول اللہ صلی اللہ علیہ وسلم کی طرف دیکھتے، اس وقت ان کو یہ اندیشہ ہوتا کہ نہ معلوم آسمان سے کیا حکم نازل ہوگا، اور کبھی میری طرف دیکھتے، میرا سکون اور اطمینان دیکھ کر ان کو کچھ امید ہوجاتی، مگر پھر وہی ڈر انہیں ستانے لگتا۔ میرے علاوہ پورا گھر بیم ورجاء کی کیفیت سے دوچار تھا، اللہ اللہ کرکے آپ صلی اللہ علیہ وسلم نزول وحی کے وقت کی کیفیت سے باہر آئے۔ اس وقت آپؐ کا چہرۂ مبارک فرطِ مسرت سے کھل رہا تھا اور آپؐ کے لبوں پر مسکراہٹ رقص کررہی تھی، وحی کے بعد پہلا جملہ جو آپ صلی اللہ علیہ وسلم نے ارشاد فرمایا وہ یہ تھا کہ’’ اے عائشہ! خوش ہوجاؤ، اللہ نے تمہاری برأت ظاہر کردی ہے‘‘ میری والدہ نے یہ سن کر کہا کہ اے عائشہ! اٹھو اور رسول اللہ صلی اللہ علیہ وسلم کا شکریہ ادا کرو، میں نے کہا، خدا کی قسم! میں اس ذات کے علاوہ کسی کا شکریہ ادا نہ کروں گی جس نے میری برأت کی ہے۔

آیات برأت

حضرت عائشہؓ کہتی ہیں کہ اس کے بعد رسولؐ اللہ نے وہ دس آیات (سورہ النور:۱۱؍تا۲۰) پڑھ کر سنائیں جو میری برأت میں نازل ہوئیں:

’’ان لوگوں میں سے ہر ایک کے حصے میں اپنے کئے کا گناہ آیا ہے، اور ان میں سے جس شخص نے اس (بہتان) کا بڑا حصہ اپنے سر لیا ہے، اس کے لیے تو زبردست عذاب ہے۔ جس وقت تم لوگوں نے یہ بات سنی تھی، تو ایسا کیوں نہ ہوا کہ مؤمن مرد بھی اور مؤمن عورتیں بھی اپنے بارے میں نیک گمان رکھتے اور کہہ دیتے کہ یہ کھلم کھلا جھوٹ ہے۔ وہ (بہتان لگانے والے) اس بات پر چار گواہ کیوں نہیں لے آئے؟ اب جب کہ وہ گواہ نہیں لائے تو اللہ کے نزدیک وہی جھوٹے ہیں۔ اور اگر تم پر دنیا اور آخرت میں اللہ کا فضل اور اس کی رحمت نہ ہوتی تو جن باتوں میں تم پڑ گئے تھے، ان کی وجہ سے تم پر اُس وقت سخت عذاب آپڑتا، جب تم اپنی زبانوں سے اس بات کو ایک دوسرے سے نقل کررہے تھے۔ اور اپنے منہ سے وہ بات کہہ رہے تھے جس کا تمہیں کوئی علم نہیں تھا، اور تم اس بات کو معمولی سمجھ رہے تھے، حالاں کہ اللہ کے نزدیک وہ بڑی سنگین بات تھی۔ اور جس وقت تم نے یہ بات سنی تھی، اُسی وقت تم نے یہ کیوں نہیں کہا کہ: ’’ہمیں کوئی حق نہیں پہنچتا کہ ہم یہ بات منہ سے نکالیں، یا اللہ! آپ کی ذات ہر عیب سے پاک ہے، یہ تو بڑا زبردست بہتا ن ہے‘‘۔ اللہ تمہیں نصیحت کرتا ہے کہ پھر کبھی ایسا نہ کرنا، اگر واقعی تم مؤمن ہو۔ اور اللہ تمہارے سامنے ہدایت کی باتیں صاف صاف بیان کررہا ہے۔ اور اللہ علم کا بھی مالک ہے، حکمت کا بھی مالک۔ یاد رکھو کہ جو لوگ یہ چاہتے ہیں کہ ایمان والوں میں بے حیائی پھیلے، اُن کے لیے دُنیا اور آخرت میں درد ناک عذاب ہے۔ اور اللہ جانتا ہے اور تم نہیں جانتے۔ اور اگر یہ بات نہ ہوتی کہ اللہ کا فضل اور اُس کی رحمت تمہارے شاملِ حال ہے، اور اللہ بڑا شفیق، بڑا مہربان ہے (تو تم بھی نہ بچتے) ۔‘‘ (جاری)

24 جون 2022، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے