Tue Oct 08 2024, 08:26 AM

Urdu Section ( 30 May 2022, NewAgeIslam.Com)

The Prophet (PBUH) Received the Veil Verse on the Day of the Marriage Banquet Part-85 آپ صلی اللہ علیہ وسلم پر آیت پردہ حضرت زینبؓ سے نکاح کے بعد عین ولیمہ والے دن نازل ہوئی

مولانا ندیم الواجدی

27 مئی،2022

حضرت ام سلمہؓ سے نکاح:

حضرت ابو سلمہؓ غزوہ بدر میں شریک ہوئے ، اس کے بعد انہوں نے غزوہ احد میں حصہ لیا جنگ کرتے ہوئے ان کے بدن پر ایک زخم لگا ،جو کچھ روز بعد ٹھیک بھی ہوگیا ، اسی دوران ان کو ایک فوجی دستے کاامیر بنا کر کسی جگہ بھیجا گیا ،واپس آئے تو وہ زخم جو مندمل ہوگیا تھا دوبارہ ہر ا ہوگیا، اسی کے اثر سے جمادی الاول 4 ھ میں وفات پائی۔ حضرت ام سلمہؓ کو اپنے شوہر سے بڑی محبت تھی، ایک مرتبہ حضرت ام سلمہؓ نے اپنے شوہر سے کہا کہ میں نے سنا ہے کہ اگر مرد اور عورت دونوں جنتی ہوں اور عورت شوہر کی وفات کے بعد کسی سے نکاح نہ کرے تو وہ عورت جنت میں اسی مرد کو ملے گی،اسی طرح اگر مرد دوسری شادی نہ کرے تو جنت میں وہ مرد اسی عورت کو ملے گا، اس لئے ہم دونوں کو یہ عہد کرلینا چاہئے کہ اگر ہم میں سے کوئی وفات پا جائے تو دوسرا شخص نکاح نہیں کرے گا۔

حضرت ابو سلمہؓ نے کہا کہ میرا کہنا تو یہ ہے کہ اگر میں پہلے مرجاؤں تو تم دوسرا نکاح کرلینا، اس کے بعد انہوں نے یہ دعا کی کہ اے اللہ ! میرے بعد ام سلمہؓ کو مجھ سے بہتر شوہر عطا فرمانا ، ایسا شوہر جو اسے کوئی دکھ نہ دے۔ اللہ تعالیٰ نے حضرت ابوسلمہؓ کی یہ دعا قبول فرمائی، او راللہ تعالیٰ نے حضرت ام سلمہؓ کو رسول اللہ صلی اللہ علیہ وسلم جیسا شوہر عطا فرمایا، جنہو ں نے نہ کبھی اپنی کسی بیوی کو تکلیف پہنچائی او رنہ کسی کی حق تلفی کی اور ان کے بچوں کی بھی بہتر انداز میں پرورش کی۔ حضرت ام سلمہؓ خود فرماتی ہیں کہ ایک مرتبہ میں نے رسول اللہ صلی اللہ علیہ وسلم کو یہ فرماتے ہوئے سنا تھا کہ اگر کسی مسلمان کو کوئی مصیبت پہنچے اوروہ یہ الفاظ کہہ لے : انا اللہ و انا الیہ راجعون اللھم اجرنی فی مصیبتی واخلف لی خیرا منھا۔ ’’ ہم اللہ ہی کے لئے ہیں اور ہمیں اللہ ہی کی طرف لوٹ کرجانا ہے، اے اللہ میری مصیبت میں مجھے ثواب عطا کرو ، اور اس کا بدلہ اس سے بہتر عنایت کر‘‘ تو اللہ تعالیٰ اس کو اس چیز سے بہتر چیز عطا فرماتے ہیں جو اس سے ضائع ہوگئی ہو۔حضرت ام سلمہؓ فرماتی ہیں کہ ابو سلمہؓ کی وفات کے بعد میں نے یہ سوچا کہ میں یہ دعا کیا پڑھوں ، مجھے ان سے بہتر شوہر تو ملنے والا ہے نہیں، مجھے خیال آیا کہ چلو یہ دعا پڑھ ہی لیتی ہوں، پھر میں نے یہ دعا پڑھ لی ، اس کا نتیجہ یہ نکلا کہ مجھے رسول اللہ صلی اللہ علیہ وسلم جیسے شوہر مل گئے۔ ( صحیح مسلم: 2؍ 632 ، رقم الحدیث :918)

حضرت ام سلمہؓ عدت کے دن گزار چکیں تو رسول اللہ صلی اللہ علیہ وسلم نے ان کو نکاح کا پیغام بھجوایا ۔ابتداء میں انہوں نے یہ عذر کیا کہ میرے بچے بھی ہیں ، مجھے ان کی پرورش کرنی ہے، پھر میری عمر بھی زیادہ ہوگئی ، او رمیرے اندر غیرت بھی بہت ہے، شاید میں آپ کی دوسری بیویوں کے ساتھ مل کر نہ رہ پاؤں ۔ رسول اللہ صلی اللہ علیہ وسلم نے انہیں اطمینان دلایا ، اور وہ راضی ہوگئیں، اس طرح شوال4 ھ میں وہ آپ صلی اللہ علیہ وسلم کے حبالہ عقد میں آگئیں ۔(الاصابہ: 4؍4440)

حضرت ام سلمہؓ بڑی سنجیدہ ، مدبر اور ذی شعور خاتون تھیں، حافظ ابن حجرؒ نے الاصابہ میں لکھا ہے کہ وہ بے حد حسین وجمیل تھیں، اس کے ساتھ ہی وہ نہایت بالغ نظر اور اصابت رائے رکھنے والی عورتوں میں بھی شمار کی جاتی تھیں۔ (الاصابہ :4؍440)

ان کی فہم و تدبر اور دانائی کا صحیح اندازہ صلح حدیبیہ کے موقع پر ہوا۔ آپ صلی اللہ علیہ وسلم نے حضرت ام سلمہؓ کی رائے پر عمل کرتے ہوئے اپنا جانور ذبح کردیا، او رحلق کرا کے احرام کھول دیا، تمام صحابہؓ نے جو مشرکین کے ساتھ صلح ہوجانے اور عمرے کے لئے نہ جانے پر غم زدہ تھے او رکسی بھی طرح قربانی کرنے اور حلق کرانے پر تیار نہ تھے، رسول اللہ صلی اللہ علیہ وسلم کو قربانی کرتے ہوئے او رحلق کراتے ہوئے دیکھ کر خود بہ خود تیار ہوگئے ، اور سب نے اپنا اپنا جانور ذبح کردیا اور اپنے سر منڈا لئے۔ یہ ایک تفصیل طلب واقعہ ہے، صلح حدیبیہ کے موقع پر آپ یہ واقعہ پڑھیں گے انشاء اللہ ۔( صحیح البخاری :3؍193، رقم الحدیث:2731)

حضرت ام سلمہؓ نے 61 ہجری میں وفات پائی،اس وقت آپ کی عمر چھیاسی برس تھی ، حضرت ابوہریرہؓ نے نماز جنازہ پڑھائی ۔ (سیراعلام التسبلا ء: 3؍310)

حضرت زینب بنت حجشؓؓ حریم نبوت میں :

ذی قعدہ 5 ھ میں حضرت زینب بنت حجشؓحضور اکرم صلی اللہ علیہ وسلم کے نکاح میں آئیں، ان کی والدہ کا نام امیمہ تھا، جو آپ صلی اللہ علیہ وسلم کی حقیقی پھوپھی تھیں۔ حضرت زینبؓ کاپہلا نکاح رسول اللہ صلی اللہ علیہ وسلم کے آزاد کردہ غلام او رمنہ بولے بیٹے حضرت زید بن حارثہؓ سے ہوا تھا ، لیکن دونوں میں نباہ نہ ہوسکا ، ایک سال ہی میںطلاق کی نوبت آگئی۔عدت گزرنے کے بعد آپ صلی اللہ علیہ وسلم نے حضرت زید ہی کو پیغام دے کر ان کے پاس بھیجا ، وہ اس وقت آٹا گووند رہی تھیں، پیغام سن کر انہوں نے فرمایا میں اللہ سے مشورہ لئے بغیر کوئی کام نہیں کرتی ۔ یہ کہہ کر وہ استخارہ کرنے کیلئے نماز پڑھنے کھڑی ہوگئی ، اسی لمحے رسول اللہ صلی اللہ علیہ وسلم پر وحی نازل ہوئی ۔

فلمّا قضٰی زید منھا و طرا زوّ جنٰکھا( الا حزاب :37 )’’ پھر جب زیدنے اپنی بیوی سے تعلق ختم کرلیا تو ہم نے اس سے تمہارا نکاح کردیا۔‘‘ اس وحی کی رو سے حضرت زینب رسول اللہ صلی اللہ علیہ وسلم کی بیوی ہوگئیں، حضرت زینب ؓ زندگی بھر اس بات پر فخر کرتی رہیں کہ رسول اللہ صلی اللہ علیہ وسلم کی تمام بیویوں کا نکاح ان کے والد یا ان کے سر پرستوں نے کیا اور میرا نکاح عرش والے نے خود کیا ہے۔

حضرت زینبؓ کا حریم نبوت میں آنا ایک مصلحت کے تحت ضروری تھا، دراصل حضرت زیدؓ رسول اللہ صلی اللہ علیہ وسلم کے منہ بولے بیٹے کی حیثیت سے پہچانے جاتے تھے ، یہاں تک کہ انہیں ان کی حقیقی باپ حارثہ کی طرف منسوب کرنے کے بجائے لوگ زید بن محمد کہا کرتے تھے۔ قرآن کریم میں اس کی تردید کی گئی کہ محمد کسی مرد کے باپ نہیں ہیں ۔ عربوں میں منہ بولے بیٹوں کی بیوہ یا مطلقہ سے نکاح کرناحد درجہ معیوب سمجھا جاتا تھا ، رسول اللہ صلی اللہ علیہ وسلم نے خدا کے حکم سے اپنے منہ بولے بیٹے کی مطلقہ خاتون سے نکاح کر کے عملی طور پر ثابت کیا کہ کسی کو بیٹا کہنے سے وہ حقیقت میں بیٹا نہیں ہوجاتا، ا سی لیے شریعت نے وراثت میں بھی ان کو کوئی حصہ نہیں دیا ہے۔ حضرت زینب ؓ کا ولیمہ بھی بڑا شان دار تھا، آپ صلی اللہ علیہ وسلم نے ایک بکری ذبح فرما کر ولیمہ کیا، حضرت انسؓ کی والدہ حضرت ام سلیمؓ نے بھی حریرہ بنا کر ایک برتن میں بھیجا، تقریباً تین سو افراد نے پیٹ بھر کر کھاناکھایا۔ حضرت انسؓ فرماتے ہیں کہ حضرت زینبؓ کا جو ولیمہ آپ صلی اللہ علیہ وسلم نے کیا اس سے بہتر آپ صلی اللہ علیہ وسلم نے کسی بیوی سے شادی کرنے پر نہیں کیا، رسول اللہ صلی اللہ علیہ وسلم کو آپ سے بڑی محبت تھی اور آپ صلی اللہ علیہ وسلم ہر روز آپ کے مکان پر تشریف لے جایا کرتے تھے۔ نہایت عبادت گزار او ربہت زیادہ صدقہ و خیرات کرنے والی خاتون تھیں، حضرت عائشہؓ نے ان کے حسن اخلاق، صلہ رحمی او ر عبادت و ریاضت کی بڑی تعریف کی۔(صحیح البخاری:7؍24، رقم الحدیث :5168 ، صحیح مسلم: 2؍1049 ، رقم الحدیث :1428 ، البدایہ والنہایہ: 4؍147)

حجاب کا حکم:

حضرت زینبؓ کے نکاح کے بعد بلکہ عین ولیمے کے دن آیت حجاب نازل ہوئی، فرمایا:

’’ اے ایمان والوں ! نبی (مکرّم صلی اللہ علیہ وسلم ) کے گھروں میں داخل نہ ہوا کروسوائے اس کے کہ تمہیں کھانے کے لئے اجازت دی جائے( پھر وقت سے پہلے پہنچ کر) کھانا پکنے کا انتظار کرنے والے نہ بنا کرو، ہاں جب تم بلائے جاؤ تو (اس وقت) اندر آیا کرو پھر جب کھانا کھا چکو تو (وہاں سے اٹھ کر) فوراً منتشر ہوجایا کرو او روہاں باتوں میں دل لگا کر بیٹھے رہنے والے نہ بنو ۔یقینا تمہارا ایسے (دیر تک بیٹھے) رہنا نبی (اکرم) کوتکلیف دیتا ہے اوروہ تم سے (اٹھ جانے کا کہتے ہوئے) شرماتے ہیں اور اللہ حق ( بات کہنے ) سے نہیں شرماتا، اور جب تم ان (ازواج مطہرات) سے کوئی سامان مانگو ان سے پس پردہ پوچھا کرو، یہ (ادب) تمہارے دلوں کے لئے او ران کے دلوں کے لئے بڑی طہارت کا سبب ہے، اور تمہارے لئے (ہر گز جائز) نہیں کہ تم رسول اللہ ( صلی اللہ علیہ وسلم ) کو تکلیف پہنچاؤاورنہ یہ (جائز) ہے کہ تم ان کے بعد ابد تک ان کی ازواج (مطہرات )سے نکاح کرو، بیشک یہ اللہ کے نزدیک بہت بڑا (گناہ) ہے۔‘‘( الاحزاب :53)

پردے کے سلسلے میں یہ پہلا حکم ہے جس میں تمام اہل ایمان کو مخاطب بنایا گیا ہے۔حضرت انسؓ روایت کرتے ہیں کہ آیت حجاب کی حقیقت سے میں سب سے زیادہ واقف ہوں کیونکہ میں اس واقعے کے وقت موجود تھا، اور وہ واقعہ یہ ہے کہ حضرت زینب بنت حجشؓ نکاح کے بعد جب رخصت ہوکر حرم نبوی میں داخل ہوئیں، اور آپ صلی اللہ علیہ وسلم کے گھر میں آپ صلی اللہ علیہ وسلم کے ساتھ موجود تھیں ، آپ صلی اللہ علیہ وسلم نے ولیمے کے لئے کچھ کھانا پکوایا اور لوگوں کو دعوت دی۔ کچھ لوگ کھانا تیار ہونے سے پہلے ہی رسول اللہ صلی اللہ علیہ وسلم کے گھر میں آکر بیٹھ گئے اور کھانا تیارہونے کا انتظار کرنے لگے، پھر جب کھانا ہوچکا تو بعض لوگ وہیں بیٹھے رہے او رباتیں کرتے رہے، رسول اللہ صلی اللہ علیہ وسلم بھی وہیں تشریف فرما تھے، او رام المومنین حضرت زینبؓ بھی اس جگہ موجو د تھیں ، جو شرم کی وجہ سے اپنا رخ دیوار کی طرف کئے بیٹھی تھیں، ان لوگوں کے وقت سے پہلے آنے اور کھانے سے فارغ ہونے کے باوجود دیر تک بیٹھے رہنے سے آپ کو تکلیف ہوئی، لیکن مارے مروّت کے آپ کسی سے کچھ نہ کہہ سکے۔ آپ صلی اللہ علیہ وسلم گھر سے باہر تشریف لائے، او ردوسری ازواج مطہرات کے گھرو ں میں ملاقات کیلئے گئے ، اس کے بعد واپس تشریف لائے تو دیکھا کہ وہ لوگ ابھی بھی وہیں جمے ہوئے ہیں، آپ صلی اللہ علیہ وسلم اندر تشریف لے گئے، کچھ ہی دیر میں پھر باہر تشریف لائے اس وقت آپ صلی اللہ علیہ وسلم پر یہ آیت نازل ہوئی۔ حضرت انسؓ کہتے ہیں کہ میں وہاں موجود تھا ، آپ صلی اللہ علیہ وسلم نے یہ آیت حجاب جو اسی وقت نازل ہوئی تھی پڑھ کرسنائی ۔ میں ان آیات کے نزول میں سب سے زیادہ قریب ہوں، کیونکہ یہ آیات میرے سامنے ہی نازل ہوئی ہیں ۔( صحیح البخاری: 8؍61، رقم الحدیث:6271 ،صحیح مسلم:2؍1046 ، رقم الحدیث:1428 ، سنن ترمذی:5؍357 ، رقم الحدیث:3218)(جاری)

27 مئی،2022 ، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے