Sun Oct 06 2024, 07:24 AM

Urdu Section ( 9 May 2022, NewAgeIslam.Com)

The First Salat Al-Khawf Was Offered In the Ghazwa of Dhat Al-Riqa Which Took Place after the Battle of Banū Naḍīr Par-82 پہلی’ صلوٰۃِ خوف ‘ غزوۂ ذات ِ الرقاع میں پڑھی گئی تھی جو غزوۂ بنی نضیر کے بعد پیش آیا تھا

مولانا ندیم الواجدی

6 مئی،2022

غزوۂ ذَاتِ الرِّقَاع:

ابھی غزوۂ بنی نضیر کو گزرے دو ماہ بھی نہیں ہوئے تھے کہ رسول اللہ صلی اللہ علیہ وسلم کو ایک اور غزوے کے لئے نکلنا پڑا۔ اس غزوے میں آپؐ کے ساتھ چار سو اور بعض روایات کے مطابق سات سو یا آٹھ سو افراد تھے۔ یہ غزوہ اسی سال جمادی الاولیٰ میں پیش آیا، حالانکہ امام بخاریؒ کی رائے یہ ہے کہ غزوۂ ذات الرقاع خیبر کے بعد ہوا۔ (صحیح البخاری باب غزوۃ الرقاع: ۵/۶۲، رقم الحدیث: ۲۶۸۲) واقدی اور ابن سعد کہتے ہیں کہ یہ غزوہ محرم ۵ھ میں ہوا۔ (المغازی للواقدی: ۱/۳۹۵، طبقات ابن سعد: ۲/۶۱) بعض مؤرخین خندق کے بعد کہتے ہیں۔ حافظ ابن اسحاق کی تحقیق یہ ہے کہ یہ واقعہ غزوہ بنی النضیر کے بعد پیش آیا، اکثر مصنفین سیر ومغازی نے یہی قول اختیار کیا ہے۔ (سیرت ابن ہشام: ۳/۱۴۳، فقہ السیرۃ النبویۃ ص:۱۹۴) حافظ ابن قیمؒ نے اس پر بڑی تفصیلی بحث کی ہے، وہ فرماتے ہیں کہ غزوۂ ذات الرقاع میں صلوٰۃ خوف پڑھی گئی ہے، اگر یہ غزوہ، خندق سے پہلے ہوا ہوتا تو آپؐ غزوۂ خندق میں بھی صلوٰۃِ خوف پڑھتے، کیوں کہ اس غزوہ میں مشرکین نے مسلمانوں کو عصر کی نماز نہیں پڑھنے دی یہاں تک کہ سورج غروب ہوگیا۔ بعض روایات میں ہے کہ مشرکین نے چار نمازیں نہیں پڑھنے دیں، ظہر، عصر، مغرب اور عشاء، بعد میں آپؐ نے یہ چاروں نمازیں ایک ساتھ ادا کیں، اگر صلوٰۃِ خوف مشروع ہوگئی ہوتی تو آپؐ غزوۂ خندق میں بھی پڑھتے، اس سے ثابت ہوتا ہے کہ غزوۂ ذات الرقاع خندق کے بعد ہوا۔ وہ کہتے ہیں کہ اس کی تائید اس بات سے بھی ہوتی ہے کہ ذات الرقاع میں حضرت ابوہریرہؓ اور حضرت ابو موسیٰ اشعریؓ نے بھی شرکت کی تھی جب کہ یہ دونوں حضرات ۷ ھ میں خیبر کے بعد رسول اللہ صلی اللہ علیہ وسلم کی خدمت میں حاضر ہوئے۔ (زاد المعاد: ۳/۲۵۱، ۲۵۲) علامہ ابن القیمؒ کی اس دلیل میں وزن ہے، لیکن ہم نے وہی قول اختیار کیا ہے جو زیادہ راجح ہے، اور اس پر عمل کرتے ہوئے غزوۂ بنی النضیر کے بعد غزوۂ ذات الرقاع کا ذکر کرنا مناسب سمجھا ہے۔

غزوے کا سبب:

ربیع الثانی کے آخری دنوں میں رسول اللہ صلی اللہ علیہ وسلم کو یہ اطلاع ملی کہ نجد کے دو قبیلے بنی مُحارِب اور بنی ثَعْلبہ مسلمانوں کے ساتھ جنگ کی تیاری میں مصروف ہیں۔ آپؐ نے بلا تاخیر فوجوں کو روانگی کا حکم دیا۔ یہ دونوں قبیلے بنی غطفان کی دو شاخیں ہیں۔ نجد کے بعض قبیلے مسلم دشمنی میں پیش پیش تھے، مکہ کے مشرکین سے ان کے رابطوں کی خبریں برابر مدینے پہنچ رہی تھیں۔ اسی دوران کسی آنے والے نے یہ اطلاع دی کہ یہ دونوں قبیلے لڑنے کے ارادے سے مدینے کی طرف آنے کا ارادہ رکھتے ہیں۔ آپ صلی اللہ علیہ وسلم نے سابقہ کاروائیوں کی طرح یہی بہتر سمجھا کہ دشمن کو اس کے گھر میں ہی جاکر گھیر لیا جائے اور اسے تیاری کرنے کا موقع بھی نہ دیا جائے، چنانچہ آپؐ چار سو اور ایک روایت کے مطابق سات سو اور ایک اور روایت کے مطابق آٹھ سو جاں بازوں کا دستہ لے کر نجد کی طرف چل پڑے۔

آپؐ نے حضرت ابوذر غفاریؓ کو مدینے کا حاکم مقرر فرمایا، جیسے ہی دشمن کو یہ اطلاع ملی کہ مسلمانوں کا لشکر ان کے علاقے میں گُھس آیا ہے ان کے ہوش اڑ گئے اور وہ سراسیمگی کے عالم میں پہاڑوں کی طرف بھاگے، اور چوٹیوں پر چڑھ کر بیٹھ گئے۔ ان کے خوف کا یہ عالم تھا کہ انہیں اپنی عورتوں، بچوں اور بوڑھوں کا بھی خیال نہ آیا۔ اسی دوران نماز کا وقت ہوگیا، دشمن اگرچہ سامنے نہیں تھا، مگر دور بھی نہیں تھا، اگر مسلمان نماز میں مصروف ہوتے تو بہت ممکن تھا کہ دشمن خاموشی سے آکر پشت سے حملہ کردیتا، اس لئے آپ ﷺ نے صلوٰۃِ خوف پڑھائی۔ (فقہ السیرۃ النبویۃ، ص: ۱۹۴، المواہب اللدنیہ: ۱/۲۷۳)

پہلی صلوٰۃِ خوف:

صلوۃِ خوف پڑھنے کا یہ پہلا موقع تھا۔ یہ نماز جنگ کے وقت پڑھی جاتی ہے، بہتر تو یہ ہے کہ مسلمان چھوٹے چھوٹے گروہوں میں منقسم ہوکر الگ الگ امام کے پیچھے نماز پڑھیں، لیکن اگر سب لوگ ایک ہی امام کے پیچھے پڑھنے پر اصرار کررہے ہوں یا وقت کم ہو تو نماز کی نوعیت بدل جائے گی۔ قرآن کریم کی سورۂ نساء میں صلوٰۃِ خوف کا طریقہ بیان کردیا گیا ہے۔ اس کا خلاصہ یہ ہے کہ مسلمانوں کا ایک گروہ امام کے ساتھ کھڑا ہوجائے اور اپنے ہتھیار اپنے ساتھ لے لے، پھر جب یہ لوگ سجدہ کرچکیں تو امام کے پیچھے چلے جائیں، اور دوسرا گروہ جس نے ابھی تک نماز نہ پڑھی ہو وہ آکر امام کے ساتھ نماز میں شریک ہوجائے، اور وہ بھی ہتھیار ساتھ لے لے، امام ان کے ساتھ ایک رکعت پڑھے اور تشہد پڑھ کر سلام پھیردے۔ جو لوگ نماز میں آکر شریک ہوئے تھے، وہ یا تو سلام پھیرے بغیر اٹھ کر پیچھے چلے جائیں، یا کھڑے ہوکر اپنی نماز پوری کرلیں۔ پھر وہ گروہ آئے جس نے ایک رکعت پڑھی تھی اور آکر اپنی نماز بغیر قرأت کے پڑھ کر سلام پھیر دے۔ یاد رہے حالت سفر میں تین نمازیں قصر پڑھی جاتی ہیں، اس کا ذکر بھی سورۂ نساء میں ہے، ’’اور جب تم زمین میں سفر کرو اور تمہیں اس بات کا خوف ہو کہ کافر لوگ تمہیں پریشان کریں گے تو تم پر اس بات میں کوئی گناہ نہیں ہے کہ تم نماز میں قصر کرلو۔‘‘ (النساء: ۱۰۱) حدیث کی تمام کتابوں میں صلوٰۃِ خوف کا ذکر ہے، اور متعدد احادیث میں اس کی صراحت بھی ہے کہ یہ نماز غزوۂ ذاتِ الرقاع میں پڑھی گئی۔

(صحیح مسلم:۱/۵۷۶، رقم الحدیث: ۸۴۳، سنن النسائی: ۳/۱۷۹، رقم الحدیث: ۱۵۵۳)

ذات الرقاع کیوں کہتے ہیں:

اس غزوے کو غزوۂ ذات الرقاع کیوں کہا جاتا ہے، اس کی مختلف وجوہات بیان کی گئی ہیں۔ حضرت ابوموسیٰ اشعریؓ روایت کرتے ہیں کہ ہم ایک غزوے میں رسول اللہ صلی اللہ علیہ وسلم کے ہمراہ تھے، ہم چھ افراد تھے اور صرف ایک اونٹ تھا، اس پر باری باری سوار ہوکر ہم رسول اللہ صلی اللہ علیہ وسلم کے پیچھے پیچھے چلے جارہے تھے، پیدل چلنے کی وجہ سے ہماری ایڑیاں پھٹ گئیں، میرے پاؤں بھی پھٹ گئے، میرے سارے ناخن گل کر گر گئے، ہم نے اپنے پاؤں پر چتھڑے لپیٹ لئے، اس غزوے کو اسی لئے غزوۂ ذات الرقاع کہا جاتا ہے کہ ہم نے اپنے پیروں پر پٹیاں باندھ رکھی تھیں۔ (صحیح البخاری: ۵/۱۱۳، رقم الحدیث: ۴۱۲۸) ایک قول یہ ہے کہ جس جگہ قیام ہوا وہاں ایک درخت تھا جسے ذات الرقاع کہا جاتا تھا، ایک پہاڑی کا نام بھی ذات الرقاع تھا۔ یہ بھی کہا گیا ہے کہ وہ زمین جہاں آپؐ نے نزول فرمایا دھاریوں والی زمین تھی، کہیں کالی پٹی اور کسی جگہ سفید، ایسا معلوم ہوتا تھا جیسے زمین کے اوپر سیاہ و سفید پٹیاں بچھا دی گئی ہوں۔ ایک قول یہ بھی ہے کہ مسلمانوں نے اس غزوے میں ایسے جھنڈے اٹھا رکھے تھے جو سیاہ وسفید کپڑوں سے بنائے گئے تھے۔ (سیرت ابن ہشام: ۳/۱۴۴، الروض الانف: ۳/۲۵۳)

آپﷺ کی شجاعت :

قبیلۂ غطفان کا ایک شخص جس کا نام غورث بن حارث تھا، اپنے قبیلے کے لوگوں سے کہنے لگا کہ کیا میں تمہارے لئے محمد کو قتل نہ کردوں؟ لوگوں نے حیرت سے پوچھا کہ تم انہیں کیسے قتل کرسکتے ہو، اس نے کہا: میں اچانک ہی ان پر حملہ کرکے انہیں قتل کردوں گا۔ وہ شخص اس ناپاک ارادے سے آیا۔ آپؐ اس وقت تنہا تھے اور دوپہر کے وقت ایک سایہ دار درخت کے نیچے آرام فرمارہے تھے۔ آپؐ کی تلوار درخت پر لٹکی ہوئی تھی۔ وہ دبے پاؤں آیا اور آپؐ کی تلوار لے کر کھڑا ہوگیا۔ اس کے ہاتھ میں تلوار تھی، آپؐ لیٹے ہوئے تھے، صحابہؓ نظروں سے اوجھل تھے اور درختوں کے نیچے آرام کررہے تھے۔ اس نے پوچھا اے محمد! کیا تم ڈر محسوس نہیں کررہے ہو، آپؐ نے فرمایا: نہیں! اس نے سوال کیا: اچھا بتلاؤ تمہیں اس تلوار سے کون بچائے گا، آپؐ نے فرمایا: میرا اللہ مجھے بچائے گا۔ یہ سن کر وہ تھرا اٹھا، اور تلوار اس کے ہاتھ سے چُھٹ کر نیچے گر گئی، آپؐ نے تلوار اٹھا کر اس سے پوچھا: اب بتا تجھے میری تلوار سے کون بچائے گا، وہ گھگھیاکر کہنے لگا: اے محمد! آپ بہترین لینے والے بنیں۔ آپ ؐنے فرمایا: کلمہ پڑھ لے۔ اس نے جواب دیا کلمہ تو میں نہیں پڑھوں گا، البتہ یہ وعدہ کرتا ہوں کہ میں کبھی آپ کے مقابلے پر نہیں آؤں گا، اور نہ ان کا ساتھ دوں گا جو آپ سے جنگ کریں گے۔ آپؐ نے اس کو معاف کردیا اور واپس جانے دیا۔ وہ لوَٹ کر اپنے قبیلے والوں کے پاس گیا اور بے خوف ہوکر اُنہیں بتایا کہ میں ایک بہترین انسان کے پاس سے آیا ہوں۔ (مسند احمد بن حنبلؒ: ۲۳/۱۹۲، رقم الحدیث: ۱۴۹۲۹)

یہ قصہ آپ صلی اللہ علیہ وسلم کی شجاعت پر دلالت کرتا ہے کہ آپؐ تنہا تھے، نہتے تھے، لیٹے یا بیٹھے ہوئے تھے، دشمن (مقابل) سامنے کھڑا تھا اور ہاتھ میں تلوار لئے ہوئے تھا، لیکن آپؐ نہ گھبرائے، نہ ڈرے، نہ صحابہ کو آواز دی بلکہ نہایت متانت اور بے خوفی سے دشمن کے سوالوں کا جواب دیا۔ آپؐ کا اطمینان دیکھ کر وہ گھبرا گیا، اور تلوار اس کے ہاتھ سے نیچے گر پڑی۔ آپ چاہتے تو دشمن پر وار کرکے اسے ہمیشہ ہمیش کے لئے سلا بھی سکتے تھے، لیکن آپؐ نے عفو ودرگزر سے کام لیا، اور اسے جانے دیا؛ کیوں کہ اللہ تعالیٰ فرماتے ہیں: ’’اور اگر تم معاف کردو تو یہ تقویٰ کے زیادہ قریب ہے‘‘ (البقرۃ: ۲۳۷) اور خود آپ ﷺ کا ارشاد گرامی ہے: ’’اللہ تعالیٰ عفو و درگزر کرنے سے بندے کی عزت میں اضافہ کرتا ہے۔‘‘دوسرے یہ واقعہ نبی صلی اللہ علیہ وسلم کے یقین کی قوت پر بھی دلالت کرتاہے کہ آپؐ کو اللہ کی ذات پر پورا بھروسہ تھا کہ وہ مجھے نقصان نہیں پہنچنے دے گا۔ امام نوویؒ نے ریاض الصالحین میں یہ حدیث یقین اور توکل کے باب میں بیان کی ہے۔(جاری)

6 مئی،2022 ، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے