Urdu Section ( 18 Apr 2022, NewAgeIslam.Com)

The Shocking Incident of Bir Mauna but the Holy Prophet Continued To Recite the Qunoot-E-Naazla for a Month Part-79 بئر معونہ کے واقعے سے آپ ؐ کو شدید صدمہ پہنچا اور آپؐ ایک ماہ تک قنوت نازلہ پڑھتے رہے

مولانا ندیم الواجدی

15 اپریل، 2022

بئر معونہ کا واقعہ

ان حضرات کا کارواں مدینے سے نکلا، اور اپنی منزل کی طرف رواں دواں ہوا۔ کئی شب وروز کی مسافت طے کرکے یہ حضرات بئر معونہ پر پہنچے، یہ ایک کنواں ہے، جو بنو سلیم کی ملکیت تھا۔ یہ علاقہ بنو عامر اور حرہ بنو سلیم کے درمیان واقع ہے۔ یہاں پہنچ کر ان حضرات نے کچھ وقت قیام کا ارادہ کیا۔ بنو عامر کی آبادی یہاں سے قریب تھی اور ان کے پاس اس قبیلے کے سردار عامر بن طفیل کے نام آپ صلی اللہ علیہ وسلم کا مکتوب گرامی بھی تھا، اس لئے ان حضرات نے حضرت حرام بن ملحانؓ کو یہ مکتوب دے کر اس کے پاس بھیج دیا اور مطمئن ہوگئے۔ حضرت حرامؓ وہاں پہنچے اور آپ صلی اللہ علیہ وسلم کا خط اس کو دیا، اس بدبخت دشمن خدا نے خط پڑھے بغیر ہی ایک طرف ڈال دیا اور اپنے لوگوں کو اشارہ کیا کہ وہ خط لانے والے کو قتل کردیں، ایسا ہی ہوا، جس وقت حضرت حرامؓ شہید ہوئے ان کی زبان پر یہ الفاظ تھے: فزت ورب الکعبۃ۔ (ربّ کعبہ کی قسم میں کامیاب ہوگیا) اس کے بعد اس شخص نے شور مچاکر بنی عامر کو اکٹھا کیا اور انہیں بتلایا کہ محمد کے آدمی ہمارے قریب آچکے ہیں، ہمیں ان کا کام تمام کرنا ہے، لیکن لوگوں نے یہ کہہ کر اس کی بات ماننے سے انکار کردیا کہ ہم ابو براء کا دیا ہوا عہد توڑنا نہیں چاہتے۔ (صحیح البخاری: ۵/۱۰۶، رقم الحدیث: ۴۰۹۲)

عامر بن طفیل ایک متکبر، جاہ پسند، اور انتہائی مغرور انسان تھا، وہ دیکھ رہا تھا کہ جزیرۃ العرب پر محمد صلی اللہ علیہ وسلم غالب آتے جارہے ہیں، اس سے اس شخص کو یہ خطرہ ہوا کہ اس طرح تو اس کی سرداری بھی چھن جائے گی، اس خیال سے پریشان ہوکر وہ مدینے پہنچا، اس نے رسول اللہ صلی اللہ علیہ وسلم کی خدمت میں یہ تین مطالبات رکھے (۱) بالائی علاقے پر مجھے حکومت کرنے دیں اور میدانی علاقوں پر آپؐ حاکم بن جائیں (۲) یا آپؐ پورے علاقے کے بادشاہ بن جائیں اور مجھے اپنا نائب بنادیں (۳) یا پھر میدان جنگ میں مقابلے کے لئے تیار ہوجائیں۔ رسول اللہ صلی اللہ علیہ وسلم نے اس کا ایک بھی مطالبہ تسلیم نہیں کیااور اسے ناکام واپس جانا پڑا۔ (صحیح البخاری: ۵/۱۰۵، رقم الحدیث: ۴۰۹۱) اس واقعے سے وہ بہت ناراض تھا، اور کسی موقع کی تلاش میں تھا تاکہ مسلمانوں سے انتقام لے کر اپنے دل کی بھڑاس نکال لے، اس نے اپنی قوم کو بھڑکایا، مگر چوں کہ ابوبراء پہلے ہی رسول اللہ صلی اللہ علیہ وسلم کو یہ اطمینان دلا چکے تھے کہ آپؐ کے صحابہؓ کے ساتھ برا سلوک نہیں ہوگا، میں اس کی ضمانت دیتا ہوں، اس لئے اس کی قوم مسلمانوں کے خلاف کھڑی نہیں ہوئی۔ اپنی قوم سے مایوس ہوکر اس نے بنوسلیم سے مدد چاہی، قبائل عُصِیۃ اور رعل وذکوان اس پر آمادہ ہوگئے کہ وہ مسلمانوں پر حملہ کردیں۔ یہ صحابہؓ مطمئن تھے اور اپنے قاصد کی واپسی کا انتظار کررہے تھے کہ اچانک ان قبیلوں کے جوانوں نے چاروں طرف سے انہیں گھیر لیا، مسلمانوں نے بھی تلواریں نکال لیں، جنگ ہوئی، مسلمانوں نے حملے بھی کئے، مگر دشمن تعداد میں بہت زیادہ تھے اور تیاری سے آئے تھے، اس لئے مقابلہ نہ کرسکے، تین کے علاوہ تمام مسلمان شہید ہوگئے، ان میں سے ایک حضرت کعب بن زید انصاریؓ تھے، حملہ تو ان پر بھی ہوا، حملہ آور ان کو مردہ سمجھ کر چھوڑ گئے، حالاں کہ وہ زندہ تھے اور بعد تک زندہ رہے، انھوں نے غزوۂ خندق میں شہادت پائی، دو صحابیؓ عمرو بن اُمیۃ الضمریؓ اور منذر بن محمد بن عقبہؓ اس لئے بچ گئے کہ یہ دونوں حضرات جنگل میں مویشی چرانے گئے ہوئے تھے۔ (الکامل فی التاریخ: ۲/۱۷۱، ۱۷۲)

حضرت منذرؓ کی شہادت اور عمرو بن امیہؓ کی گرفتاری

جنگل میں بیٹھے بیٹھے ان دونوں کی نظر آسمان کی طرف اٹھی، جس جگہ ان کا قافلہ پڑاؤ ڈالے ہوئے تھا اس سمت انہیں آسمان پر پرندے اڑتے ہوئے نظر آئے۔ یہ دونوں حضرات سمجھ گئے کہ ان کے ساتھیوں پر کوئی اُفتاد آپڑی ہے، واپس پہنچے تو دیکھا کہ تمام ساتھی خون میں لت پت پڑے ہوئے ہیں اور ان کے اونٹ خاموش کھڑے ہیں۔ حضرت منذرؓ نے کہا کہ ہمیں واپس مدینے چلنا چاہئے اور رسول اللہ صلی اللہ علیہ وسلم کو اس واقعے کی خبر دینی چاہئے، عمرو بن امیہؓ نے جواب دیا کہ اطلاع تو ہو ہی جائے گی، ہم کیوں شہادت کا موقع اپنے ہاتھ سے جانے دیں۔ اس کے بعد دونوں آگے بڑھے، دشمن کو للکارا، حضرت منذرؓ تو وہیں لڑتے لڑتے شہید ہوگئے، اور حضرت عمرو بن امیہؓ کو گرفتار کرلیا گیا۔ جب عامر بن طفیل کو یہ معلوم ہوا کہ عمرو بن اُمیہؓ مضر قبیلے سے تعلق رکھتے ہیں تو اس نے ان کے سر کے بال کاٹ کر یہ کہتے ہوئے آزاد کردیا کہ میری ماں نے ایک غلام آزاد کرنے کی نذر مانی تھی۔ (سیرۃ ابن ہشام: ۳/۱۲۷، ۱۳۰)

آزاد ہونے کے بعد حضرت عمرو بن امیہؓ مدینے روانہ ہوئے، راستے میں ایک جگہ پڑتی ہے، فَرْفَرہ، یہ صحابی وہاں ٹھہرے ہوئے تھے، اتنے میں دو اجنبی شخص وہاں آئے، آپس میں تعارف ہوا، معلوم ہوا کہ دونوں کا تعلق بنی عامر کی شاخ بنی کلاب سے ہے، جب یہ دونوں سو گئے تو حضرت عمرو بن امیہؓ نے موقع پاکر ان دونوں کو قتل کردیا، اور یہ سوچ کر خوش ہونے لگے کہ انہوں نے اپنے شہیدوں کا بدلہ لے لیا ہے، کیوں کہ بنی عامر کا سردار عامر بن طفیل ہی اس پورے سانحے کا ذمہ دار تھا، جب حضرت عمروؓ نے مدینے پہنچ کر رسول اللہ صلی اللہ علیہ وسلم کو اپنے احوال سنائے اور اپنا یہ کارنامہ بھی بتلایا تو آپ صلی اللہ علیہ وسلم نے ناراضگی کا اظہار کیا ،پھر فرمایا اے عمرو! تم نے دو ایسے آدمیوں کو قتل کردیا ہے جن کی دیت مجھے دینی پڑے گی، در اصل رسول اللہ صلی اللہ علیہ وسلم اور بنی عامر کے مابین ایک دوسرے کے تحفظ کا معاہدہ تھا، ہوسکتا ہے حضرت عمرو بن امیہؓ اس معاہدے سے ناواقف رہے ہوں، اور یہ بھی ممکن ہے وہ واقف ہوں مگر قبیلے کے سردار کی اس حرکت سے انھوں نے یہ سمجھا ہو کہ اب معاہدہ باقی نہیں رہا۔ (المعجم الکبیر للطبرانی: ۲۰/۳۵۶)

عامر بن فہیرہؓ کی شہادت

حضرت عامر بن فُہَیْرہؓ سے تاریخ اسلام اور سیرت نبوی سے دلچسپی رکھنے والا ہر شخص واقف ہے، وہ ان لوگوں میں شامل ہیں جنہوں نے سب سے پہلے ایمان قبول کیا، ہجرت کے موقع پر جب آپ صلی اللہ علیہ وسلم اپنے دیرینہ رفیق حضرت ابوبکر صدیقؓ کے ساتھ مکے سے نکلے تو عامر بن فہیرہؓ واحد شخص ہیں جن کو ان دونوں حضرات نے اپنے ساتھ رکھنے کے لئے منتخب کیا۔ یہ ایک بہادر، جفا کش، ایمان دار اور وفاکیش انسان تھے، رات کے اندھیرے میں جب یہ دونوں حضرات غارِ ثور کی طرف بڑھے تو حضرت عامرؓ ان کے ساتھ تھے، بعد میں جب یہ دونوں غارِ ثور میں روپوش رہے تو تازہ دودھ فراہم کرنے کے لئے حضرت عامرؓ بکریوں کو لے کر آتے اور واپس چلے جاتے، حضرت اسماء بنت ابی بکرؓ کے نشانات قدم مٹانے کے لئے بھی حضرت عامر بکریوں کو لے کر اسی راستے پر چلتے۔ حضرت ابوبکرؓ کی یہ صاحب زادی جو اس وقت بہت چھوٹی تھیں رات کے اندھیرے میں کھانا لے کر آیا کرتی تھیں، جب ہجرت کرنے والوں کا یہ کارواں غارِ ثور سے یثرب کی طرف بڑھا تو حضرت عامر بن فہیرہؓ راستے کی رہ نمائی کے لئے اور ان دونوں حضرات کی مدد کے لئے اس قافلے کے تیسرے فرد تھے، اس طرح انہیں سب سے پہلے ہجرت کرنے والوں میں شامل ہونے کا شرف بھی حاصل ہے۔

بئر معونہ والے دن زندہ بچ جانے والوں میں صرف حضرت عمرو بن امیہ الضمریؓ تھے، عامر بن طفیل نے ان سے پوچھا کہ کیا تم اپنے ساتھیوں سے واقف ہو، اگر واقف ہو تو بتلاؤ کہ یہ لوگ جواب لاشوں میں تبدیل ہوگئے ہیں، کون ہیں، کس قبیلے سے تعلق رکھتے ہیں، اور ان کا حسب نسب کیا ہے، حضرت عمروؓ ایک ایک صحابی کو دیکھتے اور بتلاتے کہ یہ فلاں ہیں، اور فلاں قبیلے سے ان کا تعلق ہے، عامر بن طفیل نے پوچھاکیا تمہارے تمام ساتھی یہاں موجود ہیں، یا کوئی کم بھی ہے، حضرت عمروؓ نے بتلایا کہ میرا ایک ساتھی ان میں موجود نہیں ہے، وہ حضرت ابوبکر الصدیقؓ کے آزادہ کردہ غلام تھے، عامر بن طفیل نے سوال کیا، تم لوگوں میں وہ کس حیثیت کے حامل تھے، انھوں نے جواب دیا وہ ہم سب میں افضل تھے، عامر بن طفیل نے بتلایا کہ اس کی لاش تو اوپر آسمان کی طرف پرواز کر گئی ہے۔

بخاری شریف میں یہ واقعہ اس طرح ہے کہ بئر معونہ میں جب تمام صحابہ شہید کردئے گئے تو تنہا زندہ رہ جانے والے صحابی حضرت عمرو بن امیہؓ سے عامر بن طفیل نے پوچھا کہ یہ کون ہے؟ اس نے ایک لاش کی طرف اشارہ کرتے ہوئے یہ سوال کیا، حضرت عمرو بن امیہؓ نے جواب دیا یہ تو عامر بن فہیرہ ہیں، عامر بن طفیل نے کہا قتل ہونے کے بعد میں نے دیکھا کہ اس کی لاش آسمان کی طرف اٹھالی گئی ہے، میں نے خود اسے آسمان اور زمین کے درمیان دیکھا، پھر اسے لاکر نیچے رکھ دیا گیا۔ (صحیح البخاری: ۵/۱۰۶، رقم الحدیث: ۴۰۹۳) ایک روایت یہ بھی ہے کہ حضرت عامر بن فہیرہؓ کی لاش آسمان پر اٹھا لی گئی، جبار بن سلمی نے یہ منظر دیکھا اور اسلام قبول کرلیا۔ رسول اللہ صلی اللہ علیہ وسلم نے یہ واقعہ سن کر ارشاد فرمایا کہ فرشتوں نے ان کے جثے کو چھپالیا اور اسے علیین میں لے جاکر رکھ دیا۔ (الخصائص الکبری: ۱/۲۲۳)

شہادت کے ان واقعات سے معلوم ہوتا ہے کہ صحابہؓ کے دلوں میں شہادت کی بڑی تمنا تھی، بئر معونہ میں جو لوگ شہید ہونے سے رہ گئے تھے وہ زندہ سلامت واپس بھی جاسکتے تھے، مگر انھوں نے زندہ رہنے پر شہید ہونے کو ترجیح دی۔ حقیقت یہ ہے کہ اللہ اور اس کے رسولؐ نے شہادت کے اس قدر فضائل بیان کئے ہیں کہ ہر صحابیؓ شہید ہوکر مرنا چاہتا تھا، شہید کو آخرت کی زندگی میں جو اجر وثواب ملنے والا ہے اور اللہ کے نزدیک اس کی جو قدر ومنزلت ہونے والی ہے ہم زندہ لوگ اس کا تصور بھی نہیں کرسکتے۔

رسول اللہ ﷺکو صدمہ

بخاری شریف کی روایت سے معلوم ہوتا ہے کہ جس وقت یہ لوگ شہید ہوئے ان کی زبانوں پر یہ الفاظ تھے: اے اللہ! ہمارے اس حال کی خبر ہمارے بھائیوں تک پہنچا دے کہ ہم تجھ سے راضی ہیں اور تو ہم سے راضی ہے، چناں چہ بذریعہ وحی رسول اللہ صلی اللہ علیہ وسلم کو اس کی اطلاع دے دی گئی۔ آپ صلی اللہ علیہ وسلم نے صحابہؓ سے فرمایا کہ تمہارے ساتھیوں کے ساتھ یہ حادثہ پیش آیا ہے۔ (صحیح البخاری:۵/۱۰۶، رقم الحدیث: ۴۰۹۳) اس کے بعد آپ صلی اللہ علیہ وسلم نے یہ بھی ارشاد فرمایا: یہ ابوبراء کا مشورہ تھا، میں اس کو ناپسند کررہا تھا اور اس سے خائف بھی تھا۔ (سیرت ابن ہشام: ۳/۱۲۹)

روایات میں ہے کہ بئر معونہ کے واقعے سے آپ صلی اللہ علیہ وسلم کو شدید ترین صدمہ پہنچا، آپؐ ایک ماہ تک مسلسل فجر کی نماز کے آخری رکوع میں قنوت نازلہ پڑھتے رہے، اور قبائل رعل وذکوان کے ظالموں کے خلاف بد دعا کرتے رہے، جنھوں نے بے گناہ اور بے قصور مسلمانوں کو انتہائی بے دردی کے ساتھ شہید کردیا تھا۔ بئر معونہ کے واقعے سے یہ سنت مسلمانوں کو ملی کہ وہ فجر کی نماز کے آخری رکوع میں سجدے کے اندر جانے سے پہلے ہاتھ چھوڑ کر کھڑے ہوں اور قنوت نازلہ پڑھ کر ظالموں اور دشمنوں کے خلاف بد دعا کریں۔ (اعلاء السنن نقلا عن البخاری ومسلم: ۶/۹۵، ۹۶)

اللہ تعالیٰ نے اپنے رسول ﷺکی یہ دُعا قبول فرمائی، عامر بن طفیل طاعون کے مرض میں مبتلا ہوکر اپنے آخری انجام کو پہنچا، اور ایک بدکار عورت کے گھر میں جسے بستی والوں نے شہر بدر کردیا تھا ، مردہ پایا گیا۔ (صحیح البخاری: ۵/۱۰۵، رقم الحدیث: ۴۰۹۱ ) (جاری)

15 اپریل، 2022 ، بشکریہ : انقلاب ، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے