Thu Oct 10 2024, 01:01 AM

Urdu Section ( 14 May 2022, NewAgeIslam.Com)

The Narrative of Hazrat Jabir Bin Abdullah's Camel: After the Prophet Pbuh Poked the Camel with His Stick, It Became Extremely Fast Part-83 نبی کریم ﷺنے لکڑی کو ہلکا سا اونٹ پر چبھویا اور اس کی رفتار بڑھ گئی

مولانا ندیم الواجدی

13 مئی،2022

حضرت جابر بن عبد اللہؓ کے اونٹ کا قصہ:

اسی غزوے (ذات ِ الرقاع) میں ایک اور واقعہ پیش آیا، جسے حضرت جابر بن عبد اللہؓ نے نہایت تفصیل سے بیان کیا ہے۔ فرماتے ہیں کہ میں ایک کمزور سے اونٹ پر بیٹھ کر غزوہ میں شرکت کے لئے روانہ ہوا، پھر جب آپؐ واپس تشریف لا رہے تھے تب بھی میرے پاس یہی اونٹ تھا۔ میرے تمام ساتھی آگے نکلتے چلے جارہے تھے اور میں پیچھے ہوتاجارہا تھا۔ اتنے میں رسول اللہ صلی اللہ علیہ وسلم میرے قریب تشریف لائے، آپؐ اپنی ناقہ پر سوار تھے۔ آپؐ نے مجھ سے فرمایا: اے جابر تمہیں کیا ہوا، میں نے عرض کیا: یارسولؐ اللہ! اس اونٹ نے مجھے پیچھے کردیا ہے۔ فرمایا: اپنے اونٹ کو بٹھاؤ، میں نے حکم کی تعمیل کی، آپؐ نے بھی اپنی اونٹنی کو نیچے بٹھایا، پھر فرمایا: یا تو یہ لکڑی جو تمہارے ہاتھ میں ہے مجھے دو، یا کسی درخت سے کوئی ٹہنی توڑ کر لاؤ۔ میں نے لکڑی پیش کردی، آپؐ نے وہ لکڑی میرے اونٹ کی کوکھ میں چند بار چبھوئی، اور فرمایا: اب اس پر بیٹھو۔ میں اس پر بیٹھ کر روانہ ہوگیا، خدا کی قسم! اب میرا اونٹ آپ صلی اللہ علیہ وسلم کی اونٹنی کے برابر چل رہا تھا۔

حضرت جابرؓ مزید فرماتے ہیں کہ میں آپ صلی اللہ علیہ وسلم سے باتیں کرتا ہوا چلا جارہا تھا، آپؐ نے فرمایا: اے جابر! کیا تم اپنے اونٹ کو میرے ہاتھ فروخت کرسکتے ہو، میں نے عرض کیا: یارسولؐ اللہ! میں فروخت نہیں کرتا بلکہ اسے آپؐ کو ہبہ کرتا ہوں۔ آپؐ نے فرمایا: نہیں، ہبہ نہیں، بلکہ مجھے بیچ دو۔ میں نے عرض کیا! یارسولؐ اللہ! پھر آپؐ اس کے دام لگائیں۔ آپؐ نے فرمایا: ایک درہم۔میں نے عرض کیا، یارسولؐ اللہ! اس طرح تو میں گھاٹے میں رہوں گا، آپؐ نے فرمایا: تب دو درہم بہت ہیں۔ میں انکار کرتا رہا، آپؐ قیمت بڑھاتے رہے، یہاں تک کہ آپؐ نے ایک اوقیہ یعنی چالیس درہم تک قیمت لگا دی۔ میں نے عرض کیا: یارسولؐ اللہ! کیا آپؐ اس قیمت پر راضی ہیں؟ آپؐ نے فرمایا: ہاں! میں نے عرض کیا تب یہ اونٹ آپؐ کا ہوا، آپ ﷺنے فرمایا: میں نے لے لیا۔

اس کے بعد آپؐ نے فرمایا: اے جابر کیا تم نے شادی کرلی ہے؟ میں نے عرض کیا، جی ہاں! یارسولؐ اللہ! میں نے شادی کرلی ہے۔ آپؐ نے دریافت فرمایا: کنواری سے یا شادی شدہ سے، میں نے عرض کیا: یارسولؐ اللہ! میں نے شادی شدہ سے نکاح کیا ہے۔ آپؐ نے وجہ دریافت فرمائی تو میں نے عرض کیا: یارسولؐ اللہ! میرے والد جنگ اُحد میں شہید ہوگئے تھے، انہوں نے سات لڑکیاں چھوڑی ہیں، جو ابھی کم عمر ہیں، میں نے ایک ایسی تجربہ کار عورت سے شادی کی ہے جو ان سب کا خیال رکھتی ہے ۔ آپؐ نے فرمایا: ان شاء اللہ! تمہارا فیصلہ بہتر ثابت ہوگا۔

حضرت جابرؓ کہتے ہیں کہ آپؐ مجھ سے گفتگو فرماتے رہے، آپؐ نے یہ بھی فرمایا: اے جابر! جب ہم اصراء پہنچیں گے تو ایک اونٹ ذبح کرنے کے لئے کہیں گے، تمہاری بیوی ہماری آمد کی خبر سنے گی تو تکئے وغیرہ جھاڑے گی، یعنی ہماری ضیافت کی تیاری کرے گی، میں نے عرض کیا: یارسول اللہ! ہمارے گھر میں تکیے نہیں ہیں، آپ نے فرمایا: ہوجائیں گے، راوی کہتے ہیں کہ ہم ایک دن اصراء پہنچ گئے، یہ جگہ مدینے سے تین میل کے فاصلے پر ہے، وہاں پہنچ کر رسول اللہ صلی اللہ علیہ وسلم نے اونٹ ذبح کرنے کے لئے فرمایا: چنانچہ اونٹ ذبح کردئے گئے، ہم وہاں ایک دن رکے، رات میں آپؐ مسجد میں تشریف لے گئے، میں اپنے گھر چلا گیا، گھر پہنچ کر میں نے اپنی بیوی کو تمام باتیں بتلائیں، میری بیوی نے کہا تمہیں رسول اللہ صلی اللہ علیہ وسلم کے سامنے سمع وطاعت کا مظاہرہ کرنا چاہئے۔ صبح ہوئی تو میں نے اونٹ کی لگام تھامی اور مسجد پہنچا، مسجد کے دروازے پر اونٹ کو بٹھا کر میں الگ جاکر بیٹھ گیا، اتنے میں آپؐ باہر تشریف لائے، آپؐ نے پوچھا یہ کیا ہے؟ لوگوں نے عرض کیا، یہ اونٹ جابر لے کر آئے ہیں، آپؐ نے فرمایا جابر کہاں ہیں، آپؐ کے حکم پر مجھے پکارا گیا، میں حاضرخدمت ہوا، آپؐ نے فرمایا: بھتیجے، اپنے اونٹ کی رسی پکڑو، یہ اونٹ تمہارا ہے، پھر حضرت بلالؓ کو حکم دیا کہ وہ مجھے ایک اوقیہ چاندی دے دیں، چنانچہ مجھے ایک اوقیہ بلکہ اس سے کچھ زائد چاندی دے دی گئی، یہ قیمتی عطیہ میرے پاس رہا، اور اس میں برکت ہوتی رہی، لیکن افسوس، حرہ والے دن (اس کی تفصیل آگے آئے گی) یہ چاندی ضائع ہوگئی۔ (صحیح البخاری: ۳/۶۲، رقم الحدیث: ۲۰۹۷، صحیح مسلم: ۲/۱۰۸۸، رقم الحدیث: ۵۷، مسند احمد بن حنبل: ۲۳/۲۷۰، رقم الحدیث: ۱۵۰۲۶)

یومِ حرہ سے مراد ایک مشہو ر تاریخی واقعے کی طرف اشارہ ہے، ۶۳ھ؁ میں یزید بن معاویہؓ کی افواج نے مدینہ منورہ پر یلغار کی، دس ہزار سے زیادہ افراد شہید ہوئے، بڑی تباہی پھیلی، حضرت جابرؓ نے اسی دن کی طرف اشارہ فرمایا کہ آپؐ کا عطا کردہ یہ قیمتی تحفہ اس دن کے ہنگامے اور فتنۂ وفساد کی نذر ہوگیا۔

ایک صحابیؓ کی عبادت کا انوکھا انداز

واپسی کے سفر میں رسول اللہ صلی اللہ علیہ وسلم کا قافلہ ایک گھاٹی کے پاس رکا، رات کے وقت آپ صلی اللہ علیہ وسلم نے فرمایا قافلے کی حفاظت کے لئے کون پہرہ دے گا۔ متعدد صحابہؓ اس کام کے لئے تیار ہوئے مگر آپؐ نے دو افراد کو یہ ذمہ داری سپرد فرمائی، ایک انصاری صحابیؓ تھے، عباد بن بشرؓ اور دوسرے مہاجر صحابی تھے عمار بن یاسرؓ، آپؐ نے ان دونوں سے فرمایا کہ تم دونوں گھاٹی کے منہ پر کھڑے ہوجاؤ، یہ دونوں صحابی وہاں پہنچ گئے اور پہرہ دینے لگے۔ دونوں میں یہ طے ہوا کہ رات کے پہلے نصف میں ایک جاگے گا اور دوسرا سو جائے گا، اور دوسرے نصف میں دوسرا جاگے گا اور پہلا آرام کرے گا۔ چنانچہ عمار بن یاسرؓ تو سو گئے، اور عباد بن بشرؓ نماز کے لئے کھڑے ہوگئے، دشمنوں میں سے ایک عورت کا شوہر جو واقعے کے وقت موجود نہ تھا گھر آیا تو اس کی بیوی نے قسم کھا کر کہا کہ میں تمہیں اس وقت تک گھر میں داخل نہ ہونے دوں گی جب تک تم محمد کے ساتھیوں میں سے کسی کا خون نہ بہالو۔ وہ شخص گھاٹی کے پاس آیا، اس نے دیکھا کہ ایک شخص سویا ہوا ہے اور دوسرا کھڑا ہوا ہے، اس نے کھڑے ہوئے شخص پر تیر چلایا جو نشانے پر لگا، مگر عباد اسی طرح نماز میں مشغول رہے، اس نے دوسرا تیر مارا وہ بھی ان کے جسم پر لگا، انھوں نے دونوں تیر نکال کر پھینک دیئے، دشمن نے تیسرا تیر چلایا وہ بھی ان کے بدن میں پیوست ہوگیا، انھوں نے اسے بھی نکال کر پھینک دیا، بدن سے خون بہہ رہا تھا، مگر انھوں نے نماز نہیں توڑی، تاہم انہیں یہ احساس ہوا کہ اگر وہ اسی طرح نماز پڑھتے رہے تو کہیں ایسا نہ ہو کہ دشمن ہمیں غافل سمجھ کر یہاں تک آجائے، یہ سوچتے ہی جلدی جلدی نماز مکمل کی، ساتھی کو جگایا، حضرت عمارؓ نے اپنے ساتھی کا یہ حال دیکھا تو کہنے لگے: اللہ کے بندے، تم نے مجھے پہلے کیوں نہیں جگایا، تم پر تیروں کی بارش ہوتی رہی اور تم نماز پڑھتے رہے۔ کہنے لگے، میں ایک سورہ پڑھ رہا تھا، اس میں اتنی حلاوت اور لذت تھی کہ مجھے اچھا نہیں لگا کہ میں اسے ادھوری چھوڑ کر نماز ختم کردوں، میں نے سورہ ختم کی، اور نماز مکمل کرکے تمہیں جگایا، خدا کی قسم اگر مجھے رسول اللہ صلی اللہ علیہ وسلم کے حکم کا خیال نہ ہوتا تو میں نماز کو اور طول دیتا، یہاں تک کہ میرا جسم تیروں سے چھلنی ہوجاتا اور میری جان چلی جاتی۔ (سنن ابی داؤد: ۱/۵۰، رقم الحدیث: ۱۹۸، صحیح ابن خزیمہ: ۱/۲۴، رقم الحدیث: ۳۶، صحیح ابن حبان: ۳/۳۷۵،رقم الحدیث:۱۰۹۶، السنن الکبری للبیہقی: ۱/۲۱۹، رقم الحدیث: ۶۶۳)

دوسرا غزوۂ بدر

اُحد سے واپس جاتے ہوئے ابوسفیان نے للکار کر کہا تھا کہ اب ہماری اگلی ملاقات ایک سال بعد بدر کے میدان میں ہوگی، حضرت عمر بن الخطابؓ نے رسول اللہ صلی اللہ علیہ وسلم کی اجازت و حکم سے یہ جواب دیا تھا کہ ضرور ان شاء اللہ۔ غزوۂ ذات الرقاع سے واپس ہوئے ابھی تین ماہ ہی گزرے تھے کہ شعبان کا مہینہ شروع ہوگیا، اسی مہینے میں ابوسفیان نے جنگ کا اعلان کیا تھا، اس نے اعلان تو کردیا مگر اہل مکہ کے اقتصادی حالات دگرگوں ہوگئے، کچھ تو جنگوں کی وجہ سے اور کچھ قحط سالی کی وجہ سے، مکہ میں کساد بازاری پھیلی ہوئی تھی۔ ابوسفیان نہیں چاہتا تھا کہ جنگ ہو، مگر کیوں کہ اعلان کرچکا تھا، اس کی پاسداری بھی ضروری تھی، ورنہ پورے جزیرۂ عرب میں قریش کی بزدلی اور جنگ سے گریز کی خبر عام ہوجاتی۔ عرب سب کچھ برداشت کرسکتے تھے، لیکن بزدلی کا طعنہ ان کے لئے ناقابل برداشت تھا، آدمی تیز تھا، جنگ سے بچنا بھی چاہتا تھا اور مسلمانوں کو خوف کی نفسیات میں بھی مبتلا کرنا چاہتا تھا، اس نے ایک آدمی کو پیسے دے کر اس بات کے لئے آمادہ کیا کہ وہ مدینہ جاکر یہ افواہ پھیلا دے کہ قریش اس مرتبہ ایک ایسی فوج لے کر آنے والے ہیں ماضی میں جس کی نظیر نہیں ملتی۔ وہ تعداد میں بہت ہیں، اور ان کے پاس گھوڑے، اونٹ اور اسلحہ بھی پہلے سے کہیں زیادہ ہے، چنانچہ وہ زر خرید شخص مدینے آیا، چند روز وہاں رہا، اور قریش سے متعلق جو کچھ اسے سکھایا پڑھایا گیا تھا اس کو بڑھا چڑھا کر پیش کرتا رہا۔ چند ہی روز میں یہ افواہ پورے مدینے میں پھیل گئی، بعض کمزور دل مسلمان اس افواہ سے مایوسی اور خوف میں مبتلا ہوگئے، یہ انسانی فطرت کا تقاضہ تھا کہ دشمن کی بھاری جمعیت کے تصور سے کچھ لوگوں کے حوصلے پست ہونے لگیں، لیکن ان میں ابوبکر ؓوعمر ؓجیسے بہادر اور نڈر بھی تھے، اور ایسے لوگوں کی تعداد کچھ کم نہ تھی، یہ دونوں حضرات اور ان کے ہمراہ کچھ دوسرے صحابہ بھی رسول اللہ صلی اللہ علیہ وسلم کی خدمت میں حاضر ہوئے اور عرض کیا: یارسولؐ اللہ! قریش کی کثرت اور ان کی طاقت وقوت ہمارے لئے کوئی معنی نہیں رکھتی، ہمیں اللہ پر بھروسہ ہے، اور ہمیں اس بات کا بھی یقین ہے کہ اللہ اپنے دین کو غالب کرکے رہے گا، اسلئے ہمیں اپنے وعدے کے مطابق قریش سے دو دو ہاتھ کرنے کیلئے بدر ضرور جانا چاہئے۔ (جاری)

Urdu Section ( 14 May 2022, NewAgeIslam.Com)

The Narrative of Hazrat Jabir Bin Abdullah's Camel: After the Prophet Pbuh Poked the Camel with His Stick, It Became Extremely Fast Part-83 نبی کریم ﷺنے لکڑی کو ہلکا سا اونٹ پر چبھویا اور اس کی رفتار بڑھ گئی

Loading..

Loading..