Mon Mar 17 2025, 08:17 AM

Urdu Section ( 7 Jun 2022, NewAgeIslam.Com)

The Message That Muslims Are Not Inattentive Even For a Moment Spread around the World Thanks To Daumat-Ul-Jandal Part-86 دومۃ الجندل سے ہر طرف پیغام پہنچ گیا کہ مسلمان ایک لمحے کے لئے بھی غافل نہیں ہیں

مولانا ندیم الواجدی

3 جون،2022

(گزشتہ سے پیوستہ)

اس سے پہلے حضرت عمر بن الخطابؓ بھی رسول اکرم صلی اللہ علیہ وسلم کی خدمت میں یہ عرض کرچکے تھے کہ یا رسول اللہ صلی اللہ علیہ وسلم! آپ صلی اللہ علیہ وسلم کے پاس نیک و بدہر طرح کے لوگ آتے ہیں،اگر آپ صلی اللہ علیہ وسلم ازواج مطہرات کو پردہ کرنے کا حکم دے دیں تو بہتر رہے گا، اس پر یہ آیت نازل ہوئی۔ حضرت عمرؓ فرماتے ہیں کہ اپنے رب کے ساتھ میں نے تین باتوں میں موافقت کی ہے، ایک تویہ ہے کہ میں نے عرض کیا: یارسول اللہ صلی اللہ علیہ وسلم! آپ مقام ابراہیم علیہ السلام کو مصلّی (امام کے کھڑے ہونے کی جگہ) بنالیں، اس پر اللہ تعالیٰ نے یہ آیت نازل فرمائی: ”اور تم لوگ مقام ابراہیم کو مصلّی بنالو“۔(البقرہ: 125)

دوسری بات یہ کہ ایک مرتبہ میں نے یہ عرض کیا یا رسول اللہ صلی اللہ علیہ وسلم آپ کی ازواج مطہرات کے سامنے نیک و بد ہر طرح کے لوگ آیا کرتے ہیں، بہتر ہو اگر آپ صلی اللہ علیہ وسلم ان کو پردہ کرائیں، اس پر آیت حجاب نازل ہوئی ہے۔

اور تیسری یہ ہے کہ ایک مرتبہ میں نے ازواج مطہرات سے، جب ان میں سوتنوں والی غیرت بڑھنے لگی یہ کہا کہ اگر اللہ کے رسول تمہیں طلاق دے دیں تو بعید نہیں کہ وہ اپنے نبی کو تم سے بہتر بیویاں دے دے، چنانچہ ٹھیک انہی الفاظ میں قرآن کی یہ آیت نازل ہوئی:”اگر وہ تمہیں طلاق دے دیں تو عجیب نہیں کہ ان کا رب انہیں تم سے بہتر ازواج بدلہ میں عطا فرما دے۔“(التحریم:5)(صحیح البخاری: 1/89، رقم الحدیث:402، صحیح مسلم:4/1865، رقم الحدیث: 2399)

ہوسکتاہے کہ یہ دونوں واقعات آیت حجاب کے نزول کا سبب بنے ہوں، بہر حال اسی وقت سے پردہ ضروری ہوگیا۔

پردے کا حکم عام ہے:

آیت حجاب میں اگر چہ خاص ازواج مطہراتؓ کاذکر ہے مگر یہ حکم پوری امت کے لئے عام ہے،جیسا کہ قرآن کریم کی دوسری آیت سے معلوم ہوتاہے، اسی سورہ مکی آیت(59) میں ازواج مطہرات کے ساتھ امت کی تمام خواتین کو پردے کا مکلف بنایا گیا ہے، فرمایا: ”اے نبی! اپنی بیویوں او راپنی صاحبزادیوں او رمسلمانوں کی عورتوں سے فرمادیں کہ (باہر نکلتے وقت) اپنی چادریں اپنے اوپر اوڑھ لیا کریں، یہ اس بات کے قریب تر ہے کہ وہ پہچان لی جائیں (کہ یہ پاک دامن عورتیں ہیں) پھر انہیں ایذاء نہ دی جائے۔“(الاحزاب:59)

اس آیت سے معلوم ہوا ہے کہ پردے کا حکم صرف ازواج مطہرات کے ساتھ مخصوص نہیں ہے، بلکہ تمام مسلمان عورتوں کے لئے ہے کہ جب وہ کسی ضرورت کے لئے گھر سے باہر نکلیں تو اپنی چادروں کو اپنے چہروں پر ڈال کر انہیں چھپا لیا کریں تاکہ پہچانی نہ جاسکیں۔ اس آیت میں جلابیب لفظ آیا ہے جو جلباب کی جمع ہے، یہ ایک طرح کی چادر ہے۔ حضرت عبداللہ ابن مسعودؓ فرماتے ہیں کہ یہ ایک چادر ہے جو دوپٹے کے اوپر اوڑھی جاتی ہے۔(تفسیر ابن کثیر:6/481) حضرت عبداللہ ابن عباسؓ آیت کریمہ کی وضاحت کرتے ہوئے فرماتے ہیں کہ جب وہ اپنے گھروں سے کسی ضرورت کے لئے باہر نکلیں تو اپنے سروں کے اوپر سے چادر لٹکاکر چہروں کو چھپالیں، او ردیکھنے کے لئے صرف ایک آنکھ کھلی رہنے دیں۔(تفسیر الطبری: 20/324)

پردہ اور شریعت:

شریعت کے دوبڑے ماخذ ہیں، قرآن اور حدیث: پردے سے متعلق قرآن میں سات آیتیں نازل ہوئی ہیں، چار سورہ احزاب میں اور تین سورہ نور میں، اسی طرح ستر سے زیادہ روایات حدیث کی کتابوں میں موجود ہیں جن میں پردے کے متعلق احکام بیان کئے گئے ہیں، ان آیات اور روایات کی موجودگی میں یہ کہنا کہ پردہ شریعت سے ثابت نہیں ہے ایسا ہی ہے جیسے یہ کہہ دیا جائے کہ نماز، روزہ، شریعت سے ثابت نہیں ہیں۔ یہی وجہ ہے کہ چودہ سو سال سے امت کے تمام علماء خواتین اسلام کے لئے پردے کو ضروری قرار دیتے ہیں، البتہ اگر اختلاف ہے تو حجاب شرعی کے درجات اور ان کے احکام کی تفصیل میں ہے۔

غزوہ دومۃالجندل:

ہجرت کا پانچواں سال بھی اسلام او رکفر کے درمیان معرکہ آرائیوں کا سال ہے۔ غزوہ احد میں مسلمان وقتی طور پر پرپسپا کیا ہوئے تمام قبائل مشرکین کو یہ حوصلہ ہوگیا کہ وہ مدینے پر لشکر کشی کامنصوبہ بنانے لگیں، ایسے متعدد قبیلوں کے جنون کو خاک میں ملانے کے لئے آپ صلی اللہ علیہ وسلم بہ نفس نفیس ان مقامات پر تشریف لے گئے جہاں یہ قبیلے اقامت پزیر تھے۔ربیع الاول 5 ھ میں یہ اطلاع ملی کہدو مۃ الجندل کے لوگ مدینے پرحملہ آو رہونا چاہتے ہیں او راس کے لئے وہاں جنگی پیمانے پر تیاریاں چل رہی ہیں۔ اطلاع ملنے کے بعد آپ صلی اللہ علیہ وسلم نے سباع بن عز فطہ غفاریؓ کو مدینے میں اپنا جاں نشین مقرر فرمایا اور خود ایک ہزار صحابہ کرامؓ کا لشکر لے کر دومۃ الجندل کی طرف روانہ ہوئے،آپ صلی اللہ علیہ وسلم نے صحابہ کرامؓ کو حکم دیاکہ وہ راتوں کو سفر کریں او ردن میں چھپ کررہیں، تاکہ مشرکین کو ان کی آمد کا پتہ نہ چلے، لیکن مشرکین کو مسلمانوں کے لشکر کی خبر مل ہی گئی، جیسے ہی ان کو مسلمانوں کے آنے کی خبر لگی ان کے ہوش ٹھکانے لگ گئے، جو لوگ قلعے میں جمع تھے وہ سب اپنے مویشی او ران کی دیکھ بھال کرنے والے چرواہوں کو چھوڑ کر بھاگ گئے۔آپ صلی اللہ علیہ وسلم نے وہاں تین دن قیام فرمایا، کوئی جنگ نہیں ہوئی، اس دوران آپ نے صحابہؓ کے چھوٹے چھوٹے لشکر مختلف مقامات پرروانہ فرمائے،آپ صلی اللہ علیہ وسلم 5/ ربیع الاول کو مدینے سے روانہ ہوئے اور پچیس دن بعد 20 /ربیع الثانی کو خیر و عافیت کے ساتھ واپس تشریف لے آئے۔(زرقانی:2/95)

دومۃ الجندل اس وقت حکومت روم کی حدود میں صوبہ شام کا ایک سرحدی شہر تھا۔ ان دنوں سعودی عرب کے شمال مغرب میں صوبہ الجوف میں واقع ہے۔ نہایت گرم اور خشک صحرائی علاقہ ہے، مدینہ منورہ سے اس کا فاصلہ 856 کلو میٹر ہے۔ دومہ حضرت اسماعیل علیہ السلام کے بارہ بیٹوں میں سے ایک بیٹے کا نام ہے، غالباً یہ شہرا نہی کا بسایا ہوا ہے، اس علاقے کا دوسرا نام جوف السرحان بھی ہے، دومہ عربی میں پتھر کو کہتے ہیں، یہ سارا علاقہ پتھر یلا ہے۔(معجم البلدان:2/ 252، لسان العرب:11/128)

تاریخ اسلام میں اس غزوے کی بڑی اہمیت ہے، اگر چہ جنگ نہیں ہوئی، لیکن مسلمانوں کے اقدام سے دور دراز تک یہ پیغام پہنچ گیا کہ مسلمان ایک لمحے کے لئے بھی غافل نہیں ہیں، اگر مسلمان دومۃ الجندل میں مشرکین کے جماوڑے کو نظر انداز کردیتے تو اس سے مسلمانوں کے کمزور ہونے کا پیغام جاتا اور ان کی ہیبت ختم ہوجاتی۔ دومۃ الجندل کا محل و قوع شام کی حدود میں وہاں سے قریب تھا، شام سے تجارتی قافلوں کی آمد و رفت کا سلسلہ جاری تھا، او رآئندہ بھی اس کو باقی رکھنے کی ضرورت تھی، دومۃ الجندل کے مشرکین کی مضبوطی سے ان قافلوں کی آمد و رفت متاثر ہوسکتی تھی۔

غزوہ بنی المصطلق:

بنی المصطلق قبیلہ خزاعہ کی ایک شاخ ہے، جس کا نسب جذیمہ بن سعد بن عمر و بن ربیعہ تک پہنچتا ہے۔ کہتے ہیں کہ اس کی آواز بہت بلند اور خوب صورت تھی اس لئے اس کو مصطلق بھی کہا جاتا تھا، یہ لوگ قدید کے علاقے میں مریسیع نامی چشمے کے قریب آباد ہوگئے تھے۔ مکہ مکرمہ سے اس کا فاصلہ لگ بھگ 120 کلو میٹر تھا، دوسری طرف بنی خزاعہ مرّالظہیر ان او رابوا کے درمیان رہتے تھے۔اوّل الذکر کا فاصلہ مکہ مکرمہ سے 30 کلو میٹر ہے۔

بنی خزاعہ اگرچہ مشرک تھے، مگر وہ لوگ مسلمانوں کے لئے اپنے دلوں میں نرم گوشہ رکھتے تھے، بہ ظاہر اس کی وجہ انصار کے اوس و خزرج کے ساتھ ان کی قریبی رشتہ داریاں تھیں۔رسول اللہ صلی اللہ علیہ وسلم نے بھی ان رشتہ داریوں کا خیال فرمایا بلکہ خزاعہ کی وجہ سے بنی المصطلق سے بھی نرمی کا سلوک کیا، لیکن انہوں نے مشرکین مکہ کے ساتھ مل کر مسلمانوں کو نقصان پہنچانے کی کوشش کی۔ اس قبیلے کے بعض افراد عزوہ احد کے موقع پر مشرکین کی صفوں میں دیکھے گئے۔ اس جنگ میں مسلمانوں کو جو ہزیمت اٹھانی پڑی اس سے بہت سے قبیلوں کو کھل کرکھیلنے کاموقع ملا، حالانکہ اس سے پہلے وہ یا تو خاموش رہتے تھے، یا مسلمانوں کے خلاف پس پردہ رہ کر سازشوں میں مصروف رہتے تھے۔

بنی مصطلق بھی انہی قبیلوں میں سے ایک ہے،جس نے غزوہ احد کی شکست کے بعد مسلمانوں کے خلاف سازشوں کا سلسلہ شروع کیا۔(معجم البلدان: 5/118، کتاب المغاری للواقدی:1/404)

غزوے کا سبب اور تاریخ:

ہجرت کے پانچویں سال رجب کے مہینے میں رسول اللہ صلی اللہ علیہ وسلم کو یہ خبر ملی کہ بنی مصطلق کے سردار حارث بن أبی ضرار نے کچھ فوجیں جمع کی ہیں اور اس کا ارادہ مسلمانوں پر حملہ کرنے کا ہے، آپ صلی اللہ علیہ وسلم نے بُریدہ بن حصیب اسلمی کو صورت حال کا جائزہ لینے کے لئے بنی مصطلق کی طرف روانہ فرمایا۔ انہو ں نے وہاں جاکر قبیلے کے سردار حارث بن ضرار سے ملاقات کی۔ حارث کی گفتگو سے بُریدہ کو یقین ہوگیا کہ ان لوگوں کے عزائم خطرناک ہیں اور وہ بہت جلد مدینے کی طرف رخ کرنے والے ہیں۔ چنانچہ، بریدہ وقت ضائع کئے بغیر تیزی کے ساتھ مدینے پہنچے اور رسول اللہ صلی اللہ علیہ وسلم کو اس کی خبر دی، آپ صلی اللہ علیہ وسلم نے صحابہؓ! کو حکم دیا کہ وہ ایک غزوے کے لئے تیار ہوجائیں۔(السیرۃ النبویہ ابن ہشام:3/215)

اس غزوے کے سن و قوع میں اختلاف ہے، حافظ ابن اسحاقؓ کہتے ہیں کہ یہ غزوہ 6ھ میں واقع ہوا، (سیرۃ ابن ہشام:2/215)بعض حضرات کہتے ہیں کہ 4ھ میں ہوا، لیکن اکثر محدثین و مورخین کاقول یہ ہے کہ غزوہ بنی مصطلق 5ھ میں ہوا۔

ان میں موسی بن عقبہ ابن سعد، ابن قتیبہ، بلاذری، ذہبی، ابن القیم، ابن حجر عسقلانی او رابن کثیر جیسے مورخین و سیرت نگار شامل ہیں، اس قول کے صحیح ہونے کی دلیل یہ ہے کہ حضرت سعد بن معاذ ؓ اس غزوے میں شریک ہوئے، بخاری وغیرہ کی روایات سے ثابت ہوتا ہے کہ سعد بن معاذ غزوہ بنی المصطلق سے فارغ ہوکر غزوہ خندق میں بھی شریک ہوئے،انہوں نے غزوہ بنی قریظہ میں وفات پائی، اورغزوہ بنیف قریظہ 5 ھ میں ہوا۔(زادالمعاد: 3/188، فتح الباری: 7/234) (جاری)

3 جون، 2022، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے