Thu Apr 24 2025, 03:31 PM

Urdu Section ( 5 Jul 2022, NewAgeIslam.Com)

Surah An-Noor Contains the Most Serious Type of Threat Found Anywhere in the Holy Qur'an Part-90 قرآن کریم میں کہیں بھی تہدید کا وہ سخت انداز نہیں ملےگا جو سورہ نور میں اختیار کیا گیا ہے

مولانا ندیم الواجدی

1 جولائی 2022

ابوبکر ؓ کا عہد اور ترک عہد

قرآن کریم کی یہ آیات (سورہ النور: ۱۱؍ تا۲۰) سن کر حضرت ابوبکرؓ کہنے لگے، اب میں مسطح کو کبھی کچھ نہ دوں گا۔ حضرت ابوبکرؓ اپنی قرابت داری اور مسطح بن اثاثہ کی تنگ دستی کی وجہ سے اس کی مستقل طور پر مالی امداد کرتے تھے، اس پر اللہ تعالیٰ نے بہ طور تنبیہ یہ آیت نازل فرمائی:

’’اور جو تم میں سے اہل خیر ہیں اور مالی وسعت رکھتے ہیں وہ ایسی قسم نہ کھائیں کہ وہ رشتہ داروں، مسکینوں اور اللہ کے راستے میں ہجرت کرنے والوں کو کچھ نہیں دیں گے، انہیں چاہئے کہ وہ معافی اور درگزر سے کام لیں، کیا تمہیں یہ پسند نہیں کہ اللہ تعالیٰ تمہاری مغفرت کردے اور اللہ بڑا مہربان اور بڑا بخشنے والا ہے۔‘‘ (سورہ النور:۲۲)

حضرت ابوبکرؓ نے کہا خدا کی قسم! مجھے یہ پسند ہے کہ اللہ میری مغفرت فرمادے، میں مسطح کے ساتھ حسب سابق حسن سلوک روا رکھوں گا، اور جو کچھ میں اس کو دیتا ہوں وہ دیتا رہوں گا، بلکہ اس سے زیادہ دوں گا۔

زینب بنت جحشؓ کا اعتراف

حضرت عائشہؓ کہتی ہیں کہ آزمائش کے ان دنوں میں رسول اللہ صلی اللہ علیہ وسلم حضرت زینب بنت جحشؓ سے یہ پوچھا کرتے تھے کہ تم نے عائشہؓ میں کیا دیکھا ہے، اس کو تم کیسا سمجھتی ہو، وہ کہتی تھیں، یارسولؐ اللہ! میں اپنے کانوں اور آنکھوں کے معاملے میں خوب احتیاط رکھتی ہوں، میں نے تو عائشہؓ کو نیک اور پاک دامن ہی پایا ہے۔ ازواج مطہراتؓ میں سے صرف زینب بنت جحشؓ ہی میرے برابر کی تھیں اور وہ ہر حال میں مجھ سے بہتر رہنا چاہتی تھیں، خدا نے ان کو ان کے تقویٰ کی وجہ سے محفوظ کردیا، جب کہ ان کی بہن حمنہ اپنی بہن کی برتری کے لئے جھگڑا کرنے لگی، جس طرح اور بہتان باندھنے والے ہلاک ہوئے یہ بھی ہلاک ہوئی۔ (صحیح البخاری: ۳/۱۷۳، رقم الحدیث: ۲۶۶۱، صحیح مسلم: ۴/۲۱۲۹، رقم الحدیث: ۲۷۷۰، سنن أبی داؤد: ۱/۲۰۸، رقم الحدیث: ۷۸۵، مسند احمد بن حنبل: ۴۲/۴۰۴، رقم الحدیث: ۲۵۶۲۳، مسند أبی یعلی: ۸/۳۲۲، رقم الحدیث: ۴۹۲۷، المعجم الطبرانی:۲۳/۶۹)

قرآن کریم کا سخت ترین تہدیدی اسلوب

علامہ جار اللہ زمخشریؒ اپنی تفسیر میں لکھتے ہیں کہ قرآن کریم میں کہیں بھی تہدید (تنبیہ ، سرزنش) کا یہ سخت انداز نہیں ملے گا جو (سورہ النور کی) ان آیات کریمہ میں اختیار کیا گیا ہے۔ ان میں تہمت لگانے والوں کو سختی سے متنبہ کیا گیا ہے، ان کو شدید ترین عذاب کا مستحق قرار دیا گیا ہے، اور ان کے اس جرم کو بدترین جرم قرار دے کر اس کے مرتکبین کے گلے میں دنیا وآخرت کی لعنت کا طوق ڈالا گیا ہے۔ واقعۂ افک کے اصل کرداروں کو قرآن کریم نے ان دس آیات میں مختلف طریقوں سے نمایاں کیا ہے اور ان کے گناہ عظیم کی شدت بیان کرنے کے لئے کئی اسلوب اختیار کئے ہیں، یہاں تک کہہ دیا گیا ہے کہ قیامت کے دن ان کی زبانیں ہاتھ اور پاؤں ان کے اس جرم کے خلاف گواہی دیں گے، اور اس وقت انہیں وہ سزا دی جائے گی جس کے وہ اہل ہیں۔ (تفسیر الکشاف: ۳/۲۲۳)

امّ المومنین حضرت عائشہ ؓ کی امتیازی شان

علامہ قرطبیؒ لکھتے ہیں کہ جب حضرت یوسف علیہ السلام پر تہمت لگائی گئی تو اللہ تعالیٰ نے ایک چھوٹے بچے کو گویائی دی، اس نے آکر پیغمبر کی برأت ظاہر کردی، حضرت مریم علیہا السلام کو مورد الزام ٹھہرایا گیا تو خود ان کے نومولود بیٹے حضرت عیسیٰ علیہ السلام نے اپنی ماں کی برأت کردی، مگر حضرت عائشہ الصدیقہؓ کے دامن عفت پر داغ لگانے کی کوشش کی گئی تو خود اللہ رب العزت نے قرآنی آیات نازل کرکے ان کی برأت کا اعلان کیا۔ جو لوگ اس کوشش میں تھے کہ خانۂ نبوت کے اس گوہر آبدار کو ٹھیس پہنچائیں وہ خود دنیا و آخرت میں ملعون قرار پائے اور ام المؤمنین حضرت عائشہؓ کی عزت وعظمت اور شانِ رفعت کو چار چاند لگ گئے۔ (تفسیر القرطبی: ۱۲/۲۱۲)

تہمت پر عام مسلمانوں کا ردّ عمل

رسول اکرم صلی اللہ علیہ وسلم کی ذات اقدس کے حوالے سے خاندان نبوت کو جو تقدس مسلمانوں کے درمیان حاصل تھا اس کا تقاضا تو یہی تھا کہ لوگ اس افواہ پر کان نہ دھرتے بلکہ اس کی تردید کرتے، عام مسلمانوں کا رویّہ یہی تھا، جس نے بھی سنا اس نے کانوں پر ہاتھ دھر لئے اور اسے حضرت عائشہؓ کی شان میں گستاخی قرار دیا، اس طرح کی باتوں سے انھوں نے اپنے کان بند کرلئے، زبانیں روک لیں، اگر ان کی زبان سے کوئی لفظ نکلا تو وہ حضرت عائشہؓ کے حق میں کلمۂ خیر تھا۔ حضرت ابو ایوب انصاریؓ سے ان کی اہلیہ محترمہ حضرت ام ایوب انصاریؓ نے پوچھا کہ عائشہؓ کے بارے میں جو افواہیں اڑ رہی ہیں، ان کے متعلق آپ کا کیا خیال ہے، ابوایوبؓ نے پلٹ کر سوال کیا اچھا تم یہ بتلاؤ کہ جو تہمت عائشہؓ پر لگائی جارہی ہے کیا تم ایسا کرسکتی ہو، انھوں نے کہا نہیں، ہرگز نہیں، کہنے لگے، پھر عائشہؓ کیسے کرسکتی ہیں، وہ تم سے ہزار گنا افضل ہیں، ام ایوبؓ نے صرف اپنے شوہر کی رائے جاننے کی کوشش کی تھی کہ وہ اس واقعے کے بارے میں کیا سوچتے ہیں، خدانخواستہ وہ اس تہمت کو سچ نہیں سمجھ رہی تھیں، مگر ابوایوب انصاریؓ نے جو جواب دیا وہ ام ایوبؓ جیسی پاک باز گھریلو خواتین کو سمجھانے کے لئے کافی تھا، اور اس سے بہتر اندازمیں ان کو سمجھایا بھی نہیں جاسکتا تھا۔ (تاریخ الطبری: ۲/۱۲۴)

منافقین بڑی تعداد میں موجود تھے اور وہ ہی تہمت لگانے میں پیش پیش تھے، اور وہ ہی ایک ایک کا ہاتھ پکڑ کر یہ خبر پھیلا رہے تھے۔ بدقسمتی سے کچھ سادہ لوح مسلمان بھی ان کے بہکائے میں آگئے، ان میں ایک مسطح بن اثاثہؓ تھے، ان کا ذکر پہلے بھی ہوچکا ہے، حضرت ابوبکرؓ کے قریبی رشتے دار تھے، حضرت ابوبکرؓ ان کی مالی مدد بھی کرتے رہتے تھے، مگر جب بیٹی پر الزام لگا اور ان کا نام آیا تو انھوں نے قسم کھائی کہ میں اب ان کی مدد نہیں کروں گا، ایک دکھی باپ اتنا ہی کربھی سکتا تھا، مگر اللہ رب العزت کو یہ بھی گوارا نہیں ہوا، کیوں کہ حضرت ابوبکرؓ کا مقام صدیقیت اس طرح کی باتوں کے منافی تھا، اس لئے فوراً ہی تنبیہ کردی گئی، حضرت ابوبکرؓ نے قسم توڑدی، اور پھر سے مسطحؓ کا وظیفہ جاری کردیا، ایک خاتون تھیں جن کا نام حمنہ بنت جحشؓ تھا، وہ اپنی بہن زینب بنت جحشؓ کو خاندان نبوت میں وہ مقام دلانے کیلئے کوشاں تھیں جو حضرت عائشہؓ کو حاصل تھا، حالانکہ خود ان کی بہن امّ المومنین حضرت زینبؓ حضرت عائشہؓ کو ان الزامات سے بری قرار دے رہی تھیں اور ان کی تعریف کررہی تھیں۔ ایسے اور بھی لوگ تھے۔

حد قذف کا حکم

واقعۂ افک سے پیدا شدہ حالات کا تقاضا یہ تھا کہ اس طرح کے جرائم کا ارتکاب کرنے والوں کےلئے سزائیں متعین ہوں تاکہ یہ معاشرہ جو اسلام کے طے کردہ خطوط کی روشنی میں استوار ہونے جارہا تھا ان جرائم سے محفوظ رہے، اور اگر کوئی اس طرح کا جرم کر بیٹھے تو اس کو قرار واقعی سزا دی جائے تاکہ دوسرے اس طرح کے جرائم میں ملوث نہ ہوں۔ آیات برأت کے بعد یا اسی موقع پر سورۂ نور کی وہ آیت نازل ہوئی جس میں زنا کرنے والوں پر حدود نافذ کرنے کے احکام نازل ہوئے، اس کے ساتھ ہی زنا کی تہمت لگانے والوں کے متعلق بھی یہ حکم نازل ہوا کہ وہ اپنے دعوے کو سچا ثابت کرنے کے لئے چار گواہ پیش کریں، اور اگر وہ اتنے گواہ پیش نہ کرسکیں تو ان کے اسّی کوڑے لگائے جائیں۔ (النور: ۴)

واقعۂ افک سے مستنبط احکام

اس واقعے کے متعلق نازل شدہ آیات سے فقہاء نے بہت سے احکام شرعیہ مستنبط کئے ہیں، جن میں سب سے اہم حکم شرعی یہ ہے اور اس پر تمام فقہاء امت کا اتفاق ہے کہ اس برأت کے بعد حضرت عائشہؓ کو برا کہنے والا دائرۂ اسلام سے خارج ہے، کیوں کہ قرآن نے ان کی پاک دامنی کا اعلان کیا ہے، اس اعلان کے بعد ان کے بارے میں نازیبا کلمات کہنے، یا ان کی طرف کسی طرح کی کوئی برائی منسوب کرنے کا مطلب قرآنی نصوص کا انکار کرنا ہے، جس کی شریعت میں کوئی گنجائش نہیں ہے۔ (شرح صحیح مسلم للنووی: ۵/۶۴۶)

آیتِ تیمم کا نزول

حضرت عائشہ صدیقہؓ کی برکت سے آیت تیمم بھی نازل ہوئی، صحابۂ کرامؓ تیمم کی سہولت پاکر خوشی سے نہال ہوگئے، بعض مؤرخین اور اصحاب سیر مثلاً ابن سعدؒ، ابن حبانؒ اور حافظ ابن عبد البرؒوغیرہ حضرات نے لکھا ہے کہ جس سفر میں واقعۂ افک پیش آیا اسی میں آیت تیمم بھی نازل ہوئی۔ پورا واقعہ حضرت عائشہؓ نے بیان کیا ہے، بخاری نے اس حدیث کو کتاب التیمم میں نقل کیا ہے، فرماتی ہیں:

ایک بار ہم رسول اللہ صلی اللہ علیہ وسلم کے ساتھ کسی سفر میں تھے، یہاں تک کہ ہم مقام بیداء یا ذات الجیش میں پہنچ گئے، وہاں میرا ہار گم ہوگیا، رسولؐ اللہ اور تمام لوگ اس کی تلاش میں ٹھہر گئے، وہاں پانی نہ تھا۔ لوگ حضرت ابوبکر الصدیقؓ کے پاس آئے اور کہنے لگے، دیکھئے! عائشہؓ کیا کر بیٹھی ہیں، رسول اللہ ﷺ اور تمام لوگ ایسی جگہ ٹھہرے ہوئے ہیں جہاں پانی نہیں ہے اور لوگوں کے پاس بھی پانی نہیں ہے، حضرت ابوبکرؓ (اس جگہ) تشریف لائے (جہاں ہمارا قیام تھا) اس وقت آپؐ آرام فرما رہے تھے۔ انھوں نے (مجھ سے) کہا: اے عائشہؓ! تو نے رسولؐ اللہ کو اور لوگوں کو ایسی جگہ روک لیا ہے جہاں پانی نہیں ہے، اور لوگوں کے پاس بھی اب پانی نہیں بچا ہے، انھوں نے مجھ پر غصہ کیا اور جو کچھ اللہ کو منظور تھا وہ مجھے کہا۔صبح کے وقت آپ بیدار ہوئے، اس مقام پر پانی نہیں تھا، اس وقت اللہ تعالیٰ نے آیت تیمم نازل فرمائی، لوگوں نے تیمم کیا (اور نماز پڑھی) حضرت اسید ابن حضیرؓ کہنے لگے :اے آل ابوبکرؓ یہ پہلی برکت نہیں ہے جو تمہاری وجہ سے ہمیں حاصل ہوئی (یعنی اس سے پہلے بھی تم لوگ بہت سی برکات کے حصول کا سبب بن چکے ہو) اس کے بعد ہم نے اس اونٹ کو اٹھایا جس پر میں سوار تھی، دیکھا تو وہ ہار اس کے نیچے موجود تھا۔ (صحیح البخاری: ۱/۷۴، رقم الحدیث: ۳۳۴)

امام بخاریؒ نے یہ روایت کتاب المغازی کے باب غزوہ بنی المصطلق میں بھی نقل کی ہے، جس کا مطلب یہ ہے کہ وہ تیمم کی مشروعیت کو اس غزوے سے منسلک کرتے ہیں، شارح بخاری علامہ حافظ ابن حجر عسقلانیؒ نے بھی یہی خیال ظاہر کیا ہے کہ دونوں واقعے ایک ہی غزوے میں پیش آئے۔ (فتح الباری:۱/۴۳۴) (جاری)

1 جولائی 2022 ، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے