Thu Apr 24 2025, 04:39 PM

Urdu Section ( 25 Jul 2022, NewAgeIslam.Com)

When The Delegation Arrived and Informed the Prophet That It Was Only Repeating the Conduct of Adal and Qaarra Part- 93 جب وفد نے آکر آپؐ کو بتایا کہ اس نے وہی کیا جو عَضَل اور قَارَّہ نے کیا تھا

مولانا ندیم الواجدی

22 جولائی 2022

لشکر کفار کی آمد

مسلمان خندق تیار کرکے فارغ ہی ہوئے تھے کہ دس ہزار افراد پر مشتمل کفار کا لشکر مدینے کے قریب پہنچ گیا، انھوں نے جبل اُحد کے دامن میں پڑاؤ ڈالا، وہ اپنے سامنے ایک لمبی چوڑی خندق دیکھ کر حیران رہ گئے۔ اس طرح کی خندقوں سے نہ انہیں کبھی واسطہ پڑا تھا اور نہ انہوں نے ان کے متعلق کبھی کچھ سنا تھا۔ کہنے لگے کہ واللہ یہ عربوں کا کام نہیں ہے۔ اب صورت حال یہ تھی کہ مسلمانوں اور دشمنوں کے درمیان یہ خندق حائل تھی جسے عبور کرنا جان جوکھم میں ڈالنا تھا۔ خندق کے پیچھے مسلمان ٹھہرے ہوئے تھے۔ ان کے پیچھے جبل سلع تھا، سرکار دو عالم صلی اللہ علیہ وسلم کا خیمہ اسی پہاڑ پر ایستادہ کیا گیاتھا۔ یہاں سے آپ پورے میدان پر نظر رکھتے تھے، اور یہیں سے آپؐ دعائیں مانگتے تھے، اسی پہاڑ میں ایک غار بھی ہے جس میں آپؐ نے رات میں قیام بھی فرمایا۔مسجد نبویؐ سے جبل سلع کا فاصلہ چھ سو نوے میٹر ہے، اس کی اونچائی سو میٹر، لمبائی ایک سو پانچ میٹر اور چوڑائی تین سو پندرہ میٹر سے نو سو بیس میٹر تک ہے۔

کفار کی آمد سے قبل ہی رسول اللہ صلی اللہ علیہ وسلم نے اپنا دفاعی اور حفاظتی نظام مضبوط کرلیا تھا۔ عورتوں اور بچوں کو نسبتاً بلند اور محفوظ مکانوں میں منتقل کردیاتھا، اور حضرت عبد اللہ ابن ام مکتومؓ کو اپنا نائب مقرر فرمادیاتھا۔

دو بہ دو جنگ کی بہ ظاہر کوئی صورت نہیں تھی، اس لئے ایک دوسرے کی طرف تیر پھینکے جاتے رہے، جن مین سے اکثر ضائع ہوگئے، کچھ نشانے پر لگے، کچھ لوگوں کو زخم بھی آئے، اسی تیر اندازی میں حضرت سعد بن معاذؓ زخمی ہوئے، بعد میں اسی زخم کی وجہ سے انتقال فرماگئے۔

کافروں کا اتنا زبردست لشکر دیکھ کر مسلمانوں کے دلوں میں خوف پیدا ہوگیا۔ منافقین اور کمزور ایمان رکھنے والے لوگوں نے اپنے خوف کا برملا اظہار کرنا بھی شروع کردیا، معتب بن عمیر کہنے لگا کہ محمد تو تمہیں قیصر وکسریٰ کی کنجیاں دلوانے کا وعدہ کررہے تھے اور ہمارا حال یہ ہے کہ ہم قضائے حاجت کے لئے بھی نہیں جاسکتے۔ (سیرت ابن ہشام: ۳/۱۵۹)بعض منافقین کہنے لگے : یا رسولؐ اللہ! ہمارے مکانات غیرمحفوظ ہیں، ہمیں مدینہ جانے کی اجازت دیجئے۔ یہ لوگ مکانات کی حفاظت کے بہانے سے راہ فرار اختیار کرنا چاہتے تھے، آپ صلی اللہ علیہ وسلم نے حضرت زید بن حارثہؓ کی سرکردگی میں تین سو صحابہؓ کو مدینہ بھیج دیا کہ وہ وہاں جاکر مکانات کی حفاظت کریں۔

قرآن کریم کی منظر کشی

قرآن کریم نے اس وقت کے حالات کی منظر کشی کی ہے، جسے پڑھ کر اب بھی دل کانپ جاتا ہے، سورۂ احزاب میں فرمایا:

’’یاد کرو جب وہ (کافر) تمہارے اوپر (وادی کی بالائی مشرقی جانب) سے اور تمہارے نیچے (وادی کی زیریں مغربی جانب) سے چڑھ آئے تھے اور جب (ہیبت سے تمہاری) آنکھیں پھر گئی تھیں اور (دہشت سے تمہارے) دل حلقوم تک آپہنچے تھے اور تم (خوف و امید کی کیفیت میں) اللہ کی نسبت مختلف گمان کرنے لگے تھے، اُس مقام پر مومنوں کی آزمائش کی گئی اور انہیں نہایت سخت جھٹکے دئیے گئے، اور جب منافق لوگ اور وہ لوگ جن کے دلوں میں (کمزورئ عقیدہ اور شک و شبہ کی) بیماری تھی، یہ کہنے لگے کہ ہم سے اللہ اور اس کے رسول نے صرف دھوکہ اور فریب کے لئے (فتح کا) وعدہ کیا تھا۔ ‘‘ (الاحزاب:۱۰؍تا۱۲)

صورت حال یہ تھی کہ :

’’اور جبکہ اُن میں سے ایک گروہ کہنے لگا: اے اہلِ یثرب! تمہارے (بحفاظت) ٹھہرنے کی کوئی جگہ نہیں رہی، تم واپس (گھروں کو) چلے جاؤ، اور ان میں سے ایک گروہ نبی (اکرم صلی اللہ علیہ وآلہ وسلم) سے یہ کہتے ہوئے (واپس جانے کی) اجازت مانگنے لگا کہ ہمارے گھر کھلے پڑے ہیں، حالانکہ وہ کھلے نہ تھے، وہ (اس بہانے سے) صرف فرار چاہتے تھے۔‘‘ (الاحزاب:۱۳)

ایسے مشکل حالات میں وہی لوگ ثابت قدم رہے جن کے دلوں کو اللہ تعالیٰ نے یقین وایمان کی دولت سے مالا مال کیا تھا۔ وہ کافروں کی فوجیں دیکھ کر گھبرائے نہیں بلکہ انھوں نے کہا: ’’یہ وہی ہے جس کا اللہ اور اس کے رسول نے ہم سے وعدہ کیا تھا، اللہ اور اس کے رسول نے سچ کہا تھا، اور اس واقعے نے ان کے دلوں میں ایمان اور تابع داری کے جذبے میں اضافہ کردیا تھا۔ (الاحزاب: ۲۲)

صحابہؓ کا صلح سے انکار

مشرکین بڑی تعداد میں آئے، اور لاؤلشکر بھی ساتھ لائے۔ ان کے مقابلے میں مسلمانوں کی تعداد محض تین ہزار تھی۔ بعض حضرات نے اس سے کم لکھی ہے۔ ان میں بھی اچھی خاصی تعداد منافقین کی تھی۔ کمزور ایمان رکھنے والے بھی کچھ کم نہ تھے۔ بہت سے چہروں پر گھبراہٹ اور خوف کے آثار نظر آرہے تھے۔ ان حالات میں رسول اللہ صلی اللہ علیہ وسلم کے قلب مبارک میں یہ خیال آیا کہ مسلمان انسان ہونے کے فطری تقاضے کی بنا پر کہیں گھبرا نہ جائیں، اس لئے بہتر ہوگا کہ قبائل غطفان سے جن کی تعداد بھی چھ ہزار سے زیادہ تھی صلح کرلی جائے۔ ان قبیلوں کے سردار عیینہ بن حصن اور حارث بن عوف سامنے موجود ہیں، ان کو بات چیت کے لئے بلا لیا جائے اور مدینے کی ایک تہائی پیداوار پر ان سے مصالحت کرلی جائے، آپ صلی اللہ علیہ وسلم نے اپنے اس خیال کا اظہار حضرت سعد بن معاذؓ اور حضرت سعد بن عبادہؓ سے کیا۔ یہ دونوں اوس وخزرج کے سردار تھے۔ان دونوں نے عرض کیا: یارسولؐ اللہ! اگر آپؐ ایسا چاہتے ہیں تو کرسکتے ہیں اور اگر اللہ کی مرضی یہی ہے تب بھی ہم اس پرعمل کرنے پر مجبور ہیں، اور اگر محض ہمارے خیال سے ایسا کرنا چاہتے ہیں تو فرمائیں۔ آپ صلی اللہ علیہ وسلم نے ارشاد فرمایا: اللہ کا کوئی حکم نہیں ہے، بلکہ میں نے تمہارے خیال سے اس کا فیصلہ کیا ہے، میں دیکھ رہا ہوں کہ عرب نے متحد ہوکر ایک کمان سے تم پر تیر برسانے شروع کردیئے ہیں، بس میں اس مصالحت کے ذریعے ان کا اتحاد توڑنا چاہتا ہوں۔

شہاب زہریؒ جن سے یہ روایت منقول ہے کہتے ہیں کہ رسول اللہ صلی اللہ علیہ وسلم نے عیینہ بن حصن بن حذیفہ بن بدر اور حارث بن عوف بن أبی الحارثہؓ کو جو قبائل غطفان کے قائد تھے، بلاکر یہ بات کہہ دی تھی کہ ہم تمہیں مدینے کے نخلستانوں کی تہائی کھجوریں دے دیں گے، اس شرط پر کہ تم واپس چلے جاؤ۔ بات چیت ہوگئی تھی۔ دستاویز لکھی جاچکی تھی، صرف فریقین کے اور گواہوں کے دستخط باقی رہ گئے تھے۔ حضرت سعد بن معاذؓ نے عرض کیا: یارسولؐ اللہ! جب ہم مشرک تھے، اور بتوں کی پوجا کرتے تھے اس وقت نہ ہم اللہ کو جانتے تھے اور نہ اس کی عبادت کرتے تھے، تب ہمارا حال یہ تھا کہ یہ لوگ جن کو تہائی کھجوریں دینے کی بات ہورہی ہے وہ لوگ ہم سے ایک کھجور بھی نہیں لے سکتے تھے، الاّ یہ کہ وہ ہم سے خریدیں یا مہمان بن کر کھالیں، اور آج جب ہمیں اللہ نے ایمان کی دولت عطا کردی ہے اور اسلام کے ذریعے ہمیں عزت بخشی ہے ہم ان کو اپنا مال دے دیں، ہم انہیں ایک گٹھلی بھی دینے کے روا دار نہیں ہیں، خدا کی قسم! ان کا اور ہمارا فیصلہ تلوار کے ذریعے ہوگا۔ آپ صلی اللہ علیہ وسلم نے فرمایا: جیسا تم بہتر سمجھو، سعد بن معاذؓ نے وہ معاہدہ نامہ لیا اور اس پر جو تحریر لکھی گئی تھی وہ اپنے ہاتھ سے مٹا دی۔ (تاریخ ابن کثیر: ۴/۱۰۵)

بنو قریظہ کا نقض عہد

بنی قریظہ کے یہودیوں سے بھی مسلمانوں نے امن کا معاہدہ کررکھا تھا۔ مسلمان اس معاہدے کی پاسداری کرتے چلے آرہے تھے، رسول اللہ صلی اللہ علیہ وسلم کو خدشہ تھا کہ بنی نظیر کے یہودیوں کی طرح بنو قریظہ کے یہودی بھی عہد شکنی کریں گے، اور کفار ومشرکین سے جاملیں گے۔ یہ لوگ مدینہ کے جنوب میں سکونت پزیر تھے، اس وقت مدینے کی تمام سمتیں اور جہتیں اہمیت کی حامل تھیں۔ مشرکین چاہتے تھے کہ مدینہ کی جنوبی سمت غیرمحفوظ ہوجائے، اس کے لئے بنو قریظہ کو اپنے ساتھ ملانا ضروری تھا۔

مشرکین کا سردار حی بن اخطب خود قریظہ کے سردار کعب ابن اسد کے پاس گیا۔ پہلے تو اس نے دروازہ نہ کھولا، اور یہ کہہ کر حی ابن خطب کو ٹرخانے کی کوشش کی ہم نے محمد صلی اللہ علیہ وسلم سے معاہدہ کررکھا ہے، اس معاہدے کو توڑنے کی کوئی وجہ نہیں ہے، خدا کی قسم! میں یہ معاہدہ نہیں توڑوں گا، میں نے محمدؐ کو سچا اور عہد پورا کرنے والا پایا ہے، ویسے بھی تو اپنے ساتھ ذلت اور رسوائی کے سوا کچھ نہیں لاتا۔

اس صاف اور دو ٹوک جواب کے بعد بھی حی بن اخطب وہیں کھڑا رہا، آخر مجبور ہوکر کعب نے دروازہ کھول دیا۔ دونوں میں کیا باتیں ہوئیں اور کس طرح حی بن اخطب نے کعب کو شیشے میں اتارا، یہ الگ موضوع ہے، فی الحال تو یہ بتلانا مقصود ہے کہ بنو قریظہ نے معاہدۂ صلح توڑ دیا، اور مشرکین کے ساتھ مل گئے۔ غداری اور بدعہدی یہودیوں کی سرشت میں داخل ہے، دونوں کے درمیان طے یہ پایا کہ اگر کفار کو شکست ہوتی ہے تو حی ابن اخطب بنو قریظہ کے ساتھ اسی قلعے میں آکر رہے گا تاکہ مسلمانوں کی طرف سے جو تکلیف انہیں پہنچے حی ابن اخطب بھی اس میں شریک ہو۔

بنو قریظہ کی عہد شکنی سے کفار کے خیموں میں مسرّت کی لہر دوڑ گئی، آپ صلی اللہ علیہ وسلم کو اس صورت حال سے سخت صدمہ ہوا، لیکن چوں کہ ابھی کوئی بات پوری طرح واضح نہیں تھی اس لئے آپؐ نے تحقیق حال کے لئے سعد بن معاذؓ، سعد بن عبادہؓ، عبد اللہ بن رواحہؓ اور خوات بن جبیرؓ کو بنو قریظہ کی طرف بھیجا کہ جاؤ اور تحقیق کروکہ جو خبر ہمیں ملی ہے وہ صحیح ہے یا غلط۔ اگر خبر صحیح ہو تو یہاں پہنچ کر اشاروں کنایوں میں بات کرنا اور مبہم انداز میں خبر دینا، اور اگر خبر غلط ہو تو بلند آواز سے بتلانا تاکہ سب لوگ سن لیں۔ وفد نے واپس آکر مبہم انداز میں عرض کیا، بنو قریظہ نے وہی کیا جو عَضَل اور قَارَّہ نے کیا تھا۔

خبر سچی تھی، اور بنو قریظہ سے اس کے علاوہ توقع بھی کیا جاسکتی تھی، اور یہ ایک بڑا واقعہ تھا مگر ان کی اس بدعہدی کو صبر وتحمل کے ساتھ برداشت کرنا ہی وقت کا تقاضا تھا۔ حالات اس بات کے متقاضی تھے کہ بنو قریظہ کی عہدشکنی کی وجہ سے مدینے کی جو سمت غیر محفوظ ہوگئی ہے اس کے تحفظ کے اقدامات کئے جائیں، چناں چہ اسی وقت سلمہ بن اسلمؓ کی قیادت میں دو سو صحابہؓ کو اور زید بن حارثہؓ کی قیادت میں تین سو صحابہؓ کو روانہ کردیا گیا۔ دوسری طرف بنو قریظہ نے بھی جنگ میں براہ راست شرکت کرنے کے لئے بیس اونٹ روانہ کردئے جو کھجور، جو اور انجیر سے لدے ہوئے تھے۔ (السیرۃ النبویہ لابن کثیر: ۳/۱۹۹، البدایہ والنہایہ: ۴/۹۵، السیرۃ الحلبیہ: ۲/۳۲۳)(جاری)

22 جولائی 2022، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے