Thu Apr 24 2025, 04:28 PM

Urdu Section ( 2 Aug 2022, NewAgeIslam.Com)

Allah Accepted the Prayers of His Prophet and Opened the Gates of Victory Part- 94 اللہ نے اپنے رسولؐ کی دُعائیں قبول فرمالیں اور فتح ونصرت کے دروازے کھول دیئے

مولانا ندیم الواجدی

29 جولائی 2022

محاذ جنگ کی صورت حال

بنو قریظہ کی حمایت اور براہ راست جنگ میں شرکت کے بعد کفار کے حوصلے بلند ہوگئے، خندق عبور کرکے مسلمانوں تک پہنچنے کی ان کی کوششیں تیز ہوگئیں، رات ہوتے ہی بڑی تعداد میں ان کے گھوڑے خندق کے قریب گھومتے پھرتے، اور صبح تک اس کوشش میں رہتے کہ خندق عبور کرلیں مگر ناکام رہتے۔ ایک رات خالد بن ولید نے اپنے چند گھڑ سواروں کے ساتھ خندق عبور کرنے میں کامیابی حاصل کر لی، لیکن اس محاذ پر حضرت اسید بن حضیرؓ دو سو جاں بازوں کے ساتھ موجود تھے، معمولی جھڑپیں ہوئیں، حضرت طفیل بن نعمانؓ ان جھڑپوں میں شہید ہوگئے۔

دونوں طرف سے تیر اندازی کا سلسلہ ایک مہینے تک چلتا رہا، کفار نے کئی تدبیریں سوچیں، مگر ناکام رہے۔ ایک روز مشورہ ہوا کہ بس بہت ہوچکا، اب سب کو مل کر زبردست حملہ کرنا ہے۔ عکرمہ بن ابی جہل، نوفل بن عبد اللہ، ضرار بن خطاب اور عمرو بن عبدود وغیرہ ایک جگہ سے خندق عبور کرنے میں کامیاب ہوگئے۔ انہوں نے سامنے آکر مسلمانوں کو دعوت مبارزت دی، عمر بن عبدود بدر میں زخمی ہوگیا تھا، اس نے قسم کھائی تھی کہ میں اس وقت تک سر میں تیل نہیں لگاؤں گا جب تک اپنا بدلہ نہ لے لوں گا۔ اس کی دعوت مبارزت کے جواب میں حضرت علیؓ ابن ابی طالب سامنے آئے۔ حافظ ابن کثیر لکھتے ہیں کہ جب عمرو نے للکارا تو حضرت علیؓ کھڑے ہوئے اور حضورؐ سے مقابلے کی اجازت چاہی۔ آپؐ نے فرمایا یہ عمرو ہے۔

مقصد یہ بتلانا تھا کہ تم ابھی کم سن ہو، وہ مشہور اور تجربہ کار پہلوان ہے۔ حضرت علیؓ بیٹھ گئے۔ عمرو نے پھر للکارا، حضرت علیؓ دوبارہ کھڑے ہوئے اور دوبارہ اجازت چاہی۔ آپؐ نے دوبارہ بھی یہی کہا کہ تم ابھی چھوٹے ہو، وہ پہلوان ہے۔ تیسری مرتبہ جب عمرو نے للکار کر کہا کوئی ہے جو میرے مقابلے میں آئے، اور حضرت علیؓ نے کھڑے ہوکر اجازت طلب کی، تب آپؐ نے اجازت دے دی۔ کہتے ہیں کہ اس وقت عمرو بن عبدود کی عمر نوے سال سے زیادہ تھی۔ اس نے انہیں یہ کہہ کر واپس کرنا چاہا کہ تم ابھی چھوٹے ہو، میں بچوں کو قتل کرنا پسند نہیں کرتا، میرے کسی مقابل کو بھیجو، حضرت علیؓ نے نہایت بے خوفی سے جواب دیا کہ میں تو تم جیسے لوگوں ہی کا کام تمام کرنا پسند کرتا ہوں۔ یہ سن کر عمرو غصے میں آگیا، گھوڑے سے اتر کر حضرت علیؓ کی طرف بڑھا، ان پر تلوار سے حملہ کیا، جس کو حضرت علیؓ نے بہ کمال ہشیاری ڈھال سے روک لیا، اگرچہ پیشانی زخم آلود ہوگئی، دوسرا وار حضرت علیؓ کی طرف سے ہوا، عمرو اس حملے کی تاب نہ لا سکا اور وہیں ڈھیر ہوگیا۔ مسلمانوں نے نعرۂ تکبیر بلند کیا، عمرو کا انجام دیکھ کر باقی لوگوں نے راہِ فرار اختیار کرنے میں ہی عافیت سمجھی۔ اسی افراتفری میں نوفل بن عبد اللہ خندق میں جا گرا، حضرت علیؓ نے وہیں پہنچ کر اس کا خاتمہ کردیا۔ ابن سعد کہتے ہیں کہ ان کو زبیر بن عوامؓ نے قتل کیا تھا۔ ممکن ہے دونوں نے ہی قتل کیا ہو، یہ دن بڑا سخت تھا، تمام دن تیر برستے رہے، پتھروں کی بارش بھی ہوتی رہی، مسلمانوں کو نمازیں پڑھنے کا موقع بھی نہیں ملا، مسلسل چار نمازیں قضا ہوگئیں۔

کفار نے اپنے سردار نوفل کی لاش لینے کے لئے دس ہزار درہم کی پیشکش کی ، آپ صلی اللہ علیہ وسلم نے ان کی یہ پیشکش ٹھکرادی اور فرمایا کہ وہ بھی ناپاک تھا، اس کی دیت بھی ناپاک ہے، ہم اس پر بھی لعنت بھیجتے ہیں اور اس کی دیت پر بھی۔ آپؐ نے بغیر کسی معاوضے کی اس کی لاش واپس کردی۔ (البدایہ والنہایہ: ۴/۱۰۶،الکامل لابن اثیر: ۴/۱۰۷، الطبقات الکبری: ۲/۶۸)

دشمنوں کی صفوں میں گھس پیٹھ

حضرت ابوہریرؓ اور حضرت جابرؓ سے روایت ہے کہ رسول اللہ صلی اللہ علیہ وسلم نے فرمایا: اَلْحَرْبُ خُدَعَۃٌ جنگ ایک چال ہوتی ہے۔ (صحیح البخاری: ۴/۶۴، رقم الحدیث: ۳۰۲۹، صحیح مسلم:۳/۱۳۶۱، رقم الحدیث: ۱۷۳۹) اس کا مفہوم یہ ہے کہ جنگ میں دشمن کو نقصان پہنچانے اور مسلمانوں کی تکلیف کو دور کرنے کے لئے فریق مخالف کو دھوکا دینا شریعت میں ممنوع نہیں ہے۔

ابھی حالات جوں کے توں تھے اور یہ اندازہ نہیں تھا کہ دونوں طرف کی افواج کتنی مدت تک اس سخت موسم میں ایک دوسرے کے خلاف یوں ہی صف آراء رہیںگی۔ تمام صحابہؓ جی جان سے مدینے کی اور اپنے اموال کی حفاظت میں لگے ہوئے تھے، دعاؤں کا سلسلہ بھی جاری تھا، کچھ صحابہؓ رسول اکرم صلی اللہ علیہ وسلم کی خدمت اقدس میں حاضر ہوئے اور عرض گزار ہوئے کہ یارسولؐ اللہ! مارے خوف کے ہمارا برا حال ہے، کیا اس موقع کے لئے کوئی دُعا ہے جو ہم پڑھ لیا کریں، فرمایا: ہاں! تم یہ دُعا پڑھا کرو: اَللّٰہُمَّ اسْتُرْعَوْرَاتِنَا وَآمِنْ رَوْعَاتِنَا (مسند احمد بن حنبل: ۱۷/۲۷، رقم الحدیث:۱۰۹۹۶) ’’اے اللہ ہمارے عیبوں کی پردہ پوشی فرما اور ہمارے خوف کو امن میں تبدیل کردے۔‘‘

رسول اللہ صلی اللہ علیہ وسلم کا دعاؤں میں تضرع ہم نے پڑھا ہے اور یہ تضرع اس وقت اور بڑھ جاتا تھا جب آپؐ غزوات میں ہوتے تھے۔ غزوۂ خندق کے موقع پر بھی آپؐ ربّ کائنات کے حضور گڑ گڑاتے رہے اور فتح ونصرت کی دُعا مانگتے رہے۔ آپؐ کی زبان مبارک پر یہ دُعا کثرت سے رہتی، جیسا کہ صحیحین میں عبد اللہ بن أبی اوفیؓ سے روایت ہے کہ اس غزوے کے موقع پر آپؐ نے یہ دُعا فرمائی: اَللّٰہُمَّ مُنْزِلَ الْکِتَابِ سَرِیْعَ الْحِسَابِ اِہْزِمِ الْاَحْزَابَ، اَللّٰہُمَّ اہْزِمْہُمْ وَزَلْزِلْہُمْ۔ ’’اے اللہ! کتاب نازل کرنے والے اور جلد حساب لینے والے، ان جماعتوں اور گروہوں کو شکست دے، اے اللہ ان کو شکست دے اور ان کے پاؤں اکھاڑ دے۔‘‘ (صحیح البخاری: ۴/۴۴، رقم الحدیث: ۲۹۳۳،صحیح مسلم: ۳/۱۳۶۳، رقم الحدیث: ۱۷۴۲)اللہ تعالیٰ نے اپنے پیغمبر کی دُعا قبول فرمائی اور ایسے حالات پیدا ہوئے کہ کفار و مشرکین نے مدینے سے بھی بھاگنے ہی میں عافیت سمجھی۔

ایک دن قبیلۂ غطفان کے ایک سردار نعیم بن مسعود اشجعیؓ چھپتے چھپاتے رسول اللہ صلی اللہ علیہ وسلم کی خدمت میں حاضرہوئے اور عرض کیا: یارسولؐ اللہ! میں مسلمان ہوچکا ہوں، مگر میرے قبیلے کے لوگ اس سے بے خبر ہیں، آپؐ جو خدمت مجھ سے لینا چاہیں وہ لے لیں، میں ہر طرح سے حاضر ہوں، آپ صلی اللہ علیہ وسلم نے فرمایا: لڑائی تو حیلہ اور تدبیر ہی کا نام ہے، تم اس سلسلے میں جو کرنا چاہتے ہو وہ کرو۔

رسول اللہ صلی اللہ علیہ وسلم کی اجازت پاکر نعیم بن مسعودؓ پہلے بنو قریظہ کے پاس گئے ان کے بڑوں سے ملے، اور ان سے کہا کہ تم لوگ اس لڑائی میں شریک تو ہوگئے ہو، مگر تم نے اس کا انجام نہیں سوچا، اس جنگ میں اگر قریش اور غطفان کو فتح ہوتی ہے تب تو خیر بات دوسری ہے، لیکن اگر شکست ہوئی تو یہ لوگ تو اپنا راستہ لیں گے، پھر تمہارا کیا ہوگا۔ یہاں محمدؐ ہوں گے اور تم ہوگے، اس وقت نہ تمہیں قریش بچانے آئیں گے اور نہ غطفان والے آئیں گے۔ بنو قریظہ نے کہا: ہاں یہ بات تو ہے، بتلاؤ کیا کریں، اگر تمہارے ذہن میں کوئی تدبیر ہو تو ہمیں اس سے آگاہ کرو۔ نعیم بن مسعودؓ نے کہا: میرے ذہن میں ایک تدبیر ہے اگر تم اس پر عمل کرلو تو ہوسکتا ہے شکست کی صورت میں وہ تدبیر تمہارے کام آجائے۔ اپنے اطمینان کے لئے بہ طور ضمانت ان سے چند آدمی طلب کرلو جو تا اختتام جنگ تمہارے قبضے میں رہیں، تاکہ شکست کے بعد وہ تمہیں تنہا چھوڑ کر نہ بھاگیں بلکہ اپنے ان ساتھیوں کی بھی فکر کریں گے جو تمہارے پاس ہوں گے۔ یہودیوں نے کہا: آپ کا مشورہ بہترین ہے، ہم ضرور ان سے ضمانت کے طور پر چند آدمی طلب کریں گے۔

یہاں سے نکل کر اشجعیؓپہلے قریش کے پاس پہنچے اور ان سے کہا کہ مجھے پتہ چلا ہے کہ بنو قریظہ محمد (صلی اللہ علیہ وسلم) سے مصالحت کرنا چاہتے ہیں، انہوں نے محمد (صلی اللہ علیہ وسلم) کو ایک پیغام بھیجا ہے جس میں انہوں نے اپنی غلطی کی معافی مانگی ہے، اور یہ کہا ہے کہ ہم معافی کے عوض آپ کی خدمت میں قریش اور غطفان کے کچھ سردار گرفتار کرکے پیش کردیں گے۔ میں نے سنا ہے کہ محمد (صلی اللہ علیہ وسلم) اس پیش کش کو قبول کرلیں گے، قریش کے پاس سے اٹھ کر وہ غطفان کے خیموں میں گئے، ان سے بھی اسی طرح کی گفتگو کی۔

اس کے بعد قریش اور غطفان نے عکرمہ ابن ابی جہل وغیرہ کو بنی قریظہ کے پاس یہ پیغام لے کر بھیجا کہ بہت دن گزر چکے ہیں، اب لڑائی ختم ہونی چاہئے، تم لوگ بھی میدان میں آؤ، سب مل کر حملہ کریں تو بات بنے۔ بنی قریظہ نے جواب دیا کہ پہلی بات تو یہ ہے کل سبت (سنیچر) ہے اور آپ لوگوں کو معلوم ہے کہ ہم سبت کے دن کوئی کام نہیں کرتے۔ دوسری بات یہ ہے کہ ہمیں تمہارا بھروسہ نہیں ہے، تم پردیسی لوگ ہو، اگر تمہیں شکست ہوگئی تو تم ہمیں تنہا چھوڑ کر چل دو گے، یہاں محمد سے لڑنے کے لئے ہم تنہا رہ جائیں گے، تم لوگ ایسا کرو کہ اپنے چند سردار ہمارے پاس گروی رکھ دو۔ اس جواب سے قریش اور غطفان کو یقین ہوگیا کہ بنی قریظہ ساتھ دینے والے نہیں ہیں۔ انہوں نے صاف کہہ دیا کہ ہم کوئی آدمی تمہیں نہیں دیں گے، تم ہمارا ساتھ دینا چاہو تو دو، نہ دینا چاہو تو نہ دو۔ اشجعیؓ کی اس بہترین تدبیر سے قریظہ اور قریش وغطفان میں پھوٹ پڑ گئی۔ (سیرۃ ابن ہشام: ۳/۲۴، زاد المعاد: ۳/۲۷۳، البدایہ والنہایہ: ۴/۱۱۱ ، ۱۱۳)۔

تیز ہواؤں کے جھکّڑ

اللہ تعالیٰ نے اپنے رسول صلی اللہ علیہ وسلم کی دعائیں قبول فرمالیں، اندھیری رات کا سفر ختم ہوا، اور صبح مسرّت طلوع ہوئی، بڑے سخت اور صبر آزما حالات تھے، مسلمان ایک مہینے تک دشمنوں کے نرغے میں رہے، اللہ کو رحم آیا، اور اس نے فتح ونصرت کے دروازے کھول دیئے۔ رات کا وقت تھا، دشمن کے تمام لوگ نیند کے مزے لے رہے تھے کہ تیز آندھی چلی، ان کے تمام خیمے اکھڑ گئے، سامان الٹ پلٹ ہوگیا، گردو غبار سے فضا اس قدر بھر گئی کہ سانس لینا دوبھر ہوگیا، بلکہ آنکھ کھول کر دیکھنا بھی مشکل ہوگیا۔

قریش وغطفان کے بہادر جوان، رؤساء اور سردار مارے خوف کے ادھر ادھر بھاگنے لگے، ٹھنڈی ہواؤں کے تیز جھکڑ تو تھے ہی نادیدہ فرشتے بھی مسلمانوں کی مدد کو آپہنچے تھے، قرآن کریم نے اس صورت حال کی ان الفاظ میں منظر کشی کی ہے: ’’اے ایمان والو! یاد کرو، اس وقت تم پر کیسا انعام کیا جب تم پر بہت سے لشکر چڑھ آئے تھے، پھر ہم نے ان پر ایک آندھی بھی بھیجی اور ایسے لشکر جو تمہیں نظر نہیں آتے تھے، اور تم جو کچھ کررہے تھے اللہ اس کو دیکھ رہا تھا۔‘‘ (الاحزاب: ۹)

ہوا کا طوفان ایک ہی طرف تھا

علامہ قرطبیؒ نے لکھا ہے کہ ہواؤں کا یہ طوفان رسول اللہ صلی اللہ علیہ وسلم کا کُھلا معجزہ تھا، اس لئے کہ آپ صلی اللہ علیہ وسلم اور مسلمان کفار سے کچھ زیادہ دور نہیں تھے، صرف خندق درمیان میں حائل تھی، لیکن ہوا کا طوفان کفار کی طرف تھا، مسلمان بالکل محفوظ تھے، اس کے ساتھ ہی فرشتے بھی اتر آئے، انھوں نے خیمے اکھاڑ دیئے اور ان کی طنابیں کاٹ دیں، روشنیاں گل کردیں، ہانڈیاں الٹ دیں، مخالف لشکر کے گھوڑے ایک دوسرے پر چڑھ دوڑے، ان کے دل مارے خوف کے لرزنے لگے، ان کے لشکروں میں نعرۂ تکبیر کی آوازیں گونجنے لگیں، ہر شخص اپنے قریب کے لوگوں کو آوازیں دے رہا تھا، اور بچاؤ بچاؤ کررہا تھا۔ (تفسیر القرطبی: ۱۴/۱۴۴)۔

وہی ہوا جو ہونا تھا، کفار ومشرکین کا یہ لشکر جرار وہاں سے سراسیمہ ہوکر بھاگا، قرآن کریم میں ان کی واپسی کا ذکر کچھ اس طرح ہے: ’’اور اﷲ نے کافروں کو ان کے غصّہ کی جلن کے ساتھ (مدینہ سے نامراد) واپس لوٹا دیا کہ وہ کوئی کامیابی نہ پا سکے، اور اﷲ ایمان والوں کے لئے جنگِ (احزاب) میں کافی ہوگیا، اور اﷲ بڑی قوت والا عزت والا ہے۔‘‘ (الاحزاب:۲۵)۔ (جاری)

29 جولائی 2022، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے