Sun Mar 16 2025, 12:47 PM

Urdu Section ( 12 Sept 2022, NewAgeIslam.Com)

When the Companions of the Prophet Returned the Booty to Hazrat Zainab's Husband Abu Al-Aas Part-100 جب صحابہؓ نے غنیمت میں ملا ہوا مال حضرت زینبؓ کے شوہر ابو العاص کو واپس کردیا

مولانا ندیم الواجدی

9 ستمبر 2022

سَرِیَّہ عُکَّاشَہْ بِنْ مِحْصَنْ:

غزوۂ ذِی الْقَرَدْ کے فوراً بعد اسی ماہِ ربیع الاول میں رسول اللہ صلی اللہ علیہ وسلم نے عُکَّاشَہْ بن مِحْصَنْ کو بنو اسد کے مقابلے کیلئے غَمْر روانہ کیا، ان کے ساتھ چالیس جاں باز صحابہؓ تھے، مسلمانوں کی آمد کی خبر پاتے ہی وہ لوگ اپنے گھروں کو خالی چھوڑ کر فرار ہوگئے، انہیں تلاش کیا گیا، مگر ایک شخص کے علاوہ کوئی ہاتھ نہ آیا، اسی کو پکڑ کر لے آئے، اس سے پوچھ گچھ کی گئی، وہ مفرورین کا پتہ تو بتا نہ سکا، البتہ اس نے بنو اسد کی چراگاہ کی نشان دہی کردی، صحابہؓ وہاں گئے اور دو سو اونٹ پکڑ کر مدینے لے آئے، اس سریّے میں حضرت عکاشہ کے ساتھ ثابت بن اَقْرم اور سِبَاع بن وھب بھی تھے۔ (تاریخ الطبری: ۲/۶۴۰)

حضرت عُکاشہ کا شمار اجلہ صحابۂ کرامؓ میں ہوتا ہے، انہوں نے رسول اللہ صلی اللہ علیہ وسلم کے ساتھ بدر سے تبوک تک ہر جنگ میں حصہ لیا۔ سن بارہ ہجری میں مرتدین سے لڑتے ہوئے شہید ہوئے۔ (الاستیعاب: ۲/۲۰۸)

سَرِیَّہ محمد بن مَسْلمَہْ

ربیع الثانی سن چھ ہجری کو ایک فوجی دستہ ذوالقَصَّہْ کی طرف بھیجا گیا، اس جگہ کا فاصلہ مدینہ منورہ سے چوبیس میل ہے، اس دستے میں صرف دس افراد شامل تھے، حضرت محمد بن مَسْلمَہْ اس کی قیادت کررہے تھے، بنو ثعلبہ اور بنو عُوالی کے متعلق کچھ خبریں مل رہی تھیں، دس آدمیوں کا یہ دستہ ان کی سرکوبی کیلئے بھیجا گیا تھا، یہ لوگ رات کو وہاں پہنچے، دشمن پہاڑوں میں چھپ گیا، یہ لوگ سو گئے، سو آدمیوں کے ایک جتھے نے ان پر اچانک حملہ کردیا، نو آدمی شہید ہوگئے، محمد بن مَسْلَمَہ بھی شدید زخمی ہوئے، دشمن انہیں مردہ سمجھ کر چلے گئے، کوئی شخص مدینے جارہا تھا، اس نے زخمی محمد بن مَسْلمَہْ کو مدینے پہنچایا۔

رسول اللہ صلی اللہ علیہ وسلم کو جیسے ہی اس واقعے کی اطلاع ملی آپؐ نے چالیس صحابہؓ کا ایک لشکر حضرت ابو عُبَیْدہ بن جَرّاحؓ کی قیادت میں جائے وقوع پر روانہ فرمایا، لیکن دشمن کے لوگ فرار ہوگئے، کچھ مویشی صحابہؓ کے ہاتھ لگے جنہیں پکڑ کر وہ مدینے لے آئے، اس کو سَرِیَّہ ذوالقَصَّہ ثانی بھی کہا جاتا ہے، چند ہفتوں کے بعد بنی ثعلبہ کے کچھ آدمی اپنے اونٹوں کو چرانے کیلئے مدینے کے قریب ایک چراگاہ میں لے کر آئے، رسول اللہ صلی اللہ علیہ وسلم نے ابوعبیدہؓ کو دوبارہ چالیس افراد کے ساتھ بھیجا، وہ لوگ خود تو بھاگ گئے لیکن اپنے مویشی چھوڑ گئے، جن کو صحابہؓ نے اپنے قبضے میں لے لیا۔ (کتاب المغازی للواقدی: ۲/۵۵۱، طبقات ابن سعد: ۲/۷۵)

سَرِیّہ جَمُوم

اسی مہینے میں ایک اور سریّہ ہوا، رسول ا للہ صلی اللہ علیہ وسلم کو یہ خبر دی گئی تھی کہ بنو سُلَیم کے لوگ کسی غلط ارادے سے جمع ہورہے ہیں، آپؐ نے حضرت زید بن حارثہؓ کی قیادت میں پندرہ نفر ی ایک دستہ ان کی گوشمالی کیلئے روانہ فرمایا، یہ لوگ بنو سُلَیْم کے ٹھکانے کے قریب جَمُوم چشمے پر پہنچے، یہ جگہ مدینے سے چار میل کے فاصلے پر ہے، وہاں ایک عورت پانی بھر رہی تھی، اس نے بنو سلیم کے مکانوں تک رہنمائی کی، زید بن حارثہ ؓاور ان کے ساتھی کچھ لوگوں کو پکڑ کر مدینے لے آئے، بیس اونٹ مال غنیمت میں ملے۔ (طبقات ابن سعد: ۲/۷۵)

سَرِیّہ عِیْص

جمادی الاولیٰ سن چھ ہجری میں ایک اور مہم درپیش رہی، رسول اللہ صلی اللہ علیہ وسلم کو یہ خبر پہنچی کہ قریش کا ایک تجارتی قافلہ مدینے سے تقریباً پچاس میل مشرق میں ارض بنو سُلیم سے گزرنے والا ہے، آپؐ نے حضرت زید بن حارثہؓ کو ایک سو ستر سواروں کے ساتھ عِیْص کی طرف روانہ فرمایا۔ شام کی جانب سے آنے والا یہ قافلہ کسی جگہ ٹھہرا ہوا تھا، حضرت زیدؓ نے ان کو للکارا، مقابلہ ہوا، کچھ قریش شکست کھا کر بھاگ نکلے اور کچھ قید ہوگئے۔ ان کا تمام مال ومتاع مسلمانوں کے ہاتھ آیا، مال غنیمت میں چاندی کی کافی مقدار تھی جو بیت المال میں داخل کردی گئی، قیدیوں میں حضور کے داماد، حضرت زینبؓ کے شوہر ابو العاص بن رَبِیْع بھی تھے، اور ان کی والدہ اور حضرت خدیجۃ الکبریؓ کی بہن ہَالَہ بنت خُوَیْلَدْ بھی تھیں۔ (طبقات ابن سعد: ۲/۸۷) لیکن بعض مؤرخین اور اصحابِ سیر کہتے ہیں کہ ابوالعاص گرفتار نہیں ہوسکے تھے، بلکہ وہ فرار ہونے میں کامیاب ہوگئے تھے، چنانچہ علامہ ابن القیمؒ، حافظ ابن اسحاقؒکے حوالے سے لکھتے ہیں کہ جو مال غنیمت زید بن حارثہؓ اور ان کے رفقاء کے ہاتھ آیا وہ تمام مال آپ صلی اللہ علیہ وسلم نے ان لوگوں میں تقسیم کردیا جو سریّے میں شریک تھے، اس کے بعد ابوالعاص چھپتے چھپاتے مدینے پہنچے، اور اپنی اہلیہ محترمہ حضرت زینبؓ بنت رسول اللہ صلی اللہ علیہ وسلم سے امان کے طالب ہوئے، آپ نے اپنے شوہر کو امان دے دی، صبح فجر کی نماز میں انہوں نے اس کا اعلان بھی کردیا، حسب ضابطہ ان کی امان تسلیم کی گئی، ابو العاص نے حضرت زینبؓ سے درخواست کی کہ وہ رسول اللہ صلی اللہ علیہ وسلم سے کہہ کر میرا اور دوسرے لوگوں کا مال بھی واپس دلوادیں، رسول اللہ صلی اللہ علیہ وسلم نے اہل سریّہ کو بلا کر فرمایا: اس شخص کا ہمارے نزدیک کیا مقام ہے تم اچھی طرح جانتے ہو، تم نے اس کا اور اس کے ساتھیوں کا جو مال؛ غنیمت میں حاصل کیا ہے، اس پر تمہارا حق ہے جو اللہ نے تمہیں عطا کیا ہے، تم لوگ چاہو تو یہ مال انہیں واپس کردو، اور نہ چاہو تو نہ کرو، اس مال پر تمہارا پورا حق ہے، صحابہ کرامؓ نے عرض کیا: یا رسول اللہﷺ! ہم ان کا مال واپس کردیں گے، چنانچہ سب لوگ مال واپس لائے، کسی کے پاس کوئی کیل، یا کوئی رسی بھی تھی وہ بھی لے کر آگیا۔

ابو العاص یہ سامان لے کر مکے واپس گئے، لوگوں تک ان کی امانتیں پہنچائیں پھر لوگوں سے کہا اے اہل قریش! یہ بتلاؤ کہ کیا تم میں سے کسی کا کوئی حق مجھ پر باقی رہ گیا ہے، لوگوں نے کہا: اللہ آپ کو جزائے خیر دے، ہمارا کوئی حق آپ کے اوپر باقی نہیں ہے، آپ نہایت شریف النفس انسان ہیں اور حقوق کی ادائیگی میں کھرے ہیں، ابوالعاص نے کہا کہ میں مدینے میں اسلام قبول بھی کرسکتا تھا مگر میں اس ڈر سے مسلمان نہیں ہوا کہ تم لوگ یہ کہوگے کہ اس نے ہمارا مال ہڑپنے کیلئے اسلام قبول کیا ہے، اب جبکہ میں تمہارے حساب کتاب کی پائی پائی ادا کرچکا ہوں تو کہتا ہوں: اشہد ان لا الہ الا اللّٰہ وان محمدا عبدہ ورسولہ۔ (زاد المعاد: ۳/۲۰۵)

سَریّہ طَرِف

طَرِف مدینہ منورہ سے چھتیس میل دور مشرق کی سمت ایک چشمے کا نام ہے۔ خبر آئی تھی کہ کچھ دیہاتی لوگ مدینے پر حملہ کرنے کے ارادے سے جمع ہورہے ہیں۔ رسول اللہ صلی اللہ علیہ وسلم نے حضرت زید بن حارثہؓ کی قیادت میں پندرہ افراد کو روانہ کیا، مگر وہ لوگ اپنے مستقر سے فرار ہوگئے، حضرت زید بن حارثہؓ بیس اونٹ اور کچھ بکریاں لے کر چار راتوں کے بعد مدینے واپس آگئے، یہ واقعہ جمادی الاخر، سن چھ ہجری کا ہے۔ (زاد المعاد: ۳/۲۰۵)

سَرِیّہ حِسْمی

مدینے میں خبر آئی کہ بنو جُزَام؛ جو وہاں سے کوئی تین سو میل شمال میں تَیْماء کے قریب رہتے ہیں، مدینے سے آنے جانے والے قافلوں کو لو‘ٹ لیتے ہیں۔ حضرت دِحْیَہ کلبیؓ؛ رسول اللہ صلی اللہ علیہ وسلم کا گرامی نامہ لے کر قیصر روم کے پاس گئے تھے، اس نے رسول اللہ صلی اللہ علیہ وسلم کی خدمت میں پیش کرنے کیلئے قیمتی تحائف حضرت دحیہؓ کو دیئے، بنو جزام کے ایک شخص ہُنَیْد نے اپنے قبیلے کے کچھ افراد کے ساتھ مل کر مسلمانوں کے اس قافلے کو روک لیا اور ان سے تمام قیمتی چیزیں چھین لیں، صرف ایک پرانی اور بوسیدہ چادر رہنے دی، حضرت رِفَاعہ بن زید جو اسی قبیلے سے تعلق رکھتے تھے اور مشرف بہ اسلام ہوچکے تھے، اس واقعے کی اطلاع پاکر اپنے قبیلے میں گئے اور لٹیروں سے پورا سامان لا کر حضرت دحیہؓ کو دے دیا، حضرت دحیہؓ نے واپس آکر پورا واقعہ حضورؐ کی خدمت میں عرض کیا، آپؐ نے پانچ سو افراد کا ایک بڑا لشکر حضرت زید بن حارثہؓ کی سربراہی میں روانہ فرمایا، حِسمٰی کے مقام پر قبیلۂ بنو جُزام اور مسلمانوں میں جنگ ہوئی، یہ جگہ وادی القری سے شمال کی جانب فَدَکْ اور تَیْمَاء کے درمیان واقع ہے، مدینہ منورہ سے اس کا فاصلہ ایک سو پچیس میل ہے، گویا بنو جُزام کے لوگ اپنی آبادیوں سے نکل کر مدینے کی جانب بڑھ رہے تھے، راستے میں مڈبھیڑہوگئی، بنو جزام کو زبردست شکست ہوئی، ہنید اور اس کا بیٹا قتل ہوا، سو عورتیں اور بچے گرفتار ہوگئے، باقی لوگ ایک ہزار اونٹ اور پانچ ہزار بکریاں چھوڑ کر فرار ہوگئے۔ غلطی سے حضرت رفاعہ کے بیوی بچے بھی گرفتار ہوگئے، انھوں نے حضور پاکؐ کی خدمت میں حاضر ہوکر ان کو رہا کرنے کی درخواست کی، آپؐ نے حضرت علیؓ کو بھیجا کہ وہ زیدؓ سے کہہ کر تمام قیدیوں کو رہا کرادیں اور ان کا تمام مال بھی واپس کردیں۔ یہ جنگ بھی جمادی الاخری سن چھ ہجری میں ہوئی۔ (طبقات ابن سعد: ۲/۸۸)

صاحب ’’زاد المعاد‘‘ کہتے ہیں کہ یہ واقعہ یقینی طور پر حدیبیہ کے بعد پیش آیا، کیونکہ رسول اللہ صلی اللہ علیہ وسلم نے حدیبیہ سے واپس تشریف لانے کے بعد ایک ہی دن میں چھ قاصد مختلف شاہان عالم کے پاس روانہ فرمائے، ان میں سے ایک دِحیہ بن خلیفہ الکلبیؓ بھی ہیں، ان کو قیصر روم کے پاس خط لے کر بھیجا گیا تھا۔ (زاد المعاد: ۳/۲۰۶)

سَرِیّہ دَوْمَۃُ الْجَنْدَلْ

دَوْمَۃُ الْجَنْدَل، سعودی عرب کا ایک قدیم تاریخی شہر ہے جو فی الوقت صوبہ جوف کا دار الحکومت ہے، ریاض سے اس کی مسافت نو سو کلو میٹر اور مکہ مکرمہ سے بارہ سو کلو میٹر ہے۔ مدینہ منورہ کے جنوب مغرب میں واقع ہے۔ علامہ حموی معجم البلدان میں لکھتے ہیں کہ اس شہر میں دُوْماء بن اسماعیل نے ایک قلعہ تعمیر کیا تھا، جَنْدَلْ، پتھروں کو کہتے ہیں، اس کا واحد جَنْدَلَۃٌ ہے، (معجم البلدان: ۲/۲۵۲)۔ رسول اللہ صلی اللہ علیہ وسلم نے شعبان چھ ہجری میں یہاں بنو کلب کی تأدیب واصلاح کیلئے ایک لشکر روانہ فرمایا، یہ لوگ مدینے کے قافلوں اور مسافروں کو تنگ کیا کرتے تھے، یہ بھی خبر ملی تھی کہ وہاں کے باشندوں کا ارادہ مدینے پر حملہ کرنے کا ہے، اس لئے ضرورت تھی کہ بلا تاخیر اقدام کیا جائے، ویسے بھی یہ علاقہ حجاز اور شام کی سرحد پر واقع ہونے کی وجہ سے تجارتی قافلوں کیلئے بڑی اہمیت کا حامل تھا، یہاں سے بحر احمر اور خلیج عرب کا فاصلہ مدینہ منورہ کے مقابلے میں تقریباً نصف رہ جاتا ہے، اگر دومۃ الجندل کے لوگ اس علاقے میں حاوی ہوجاتے تو مسلمانوں کیلئے شام کی جانب آمد ورفت میں مشکلات پیدا ہوسکتی تھیں۔ مدینہ منورہ سے یہاں تک کا سفر پندرہ راتوں میں پایۂ تکمیل کو پہنچتا تھا۔ (جاری)

9 ستمبر 2022 ، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے