Fri May 23 2025, 04:17 PM

Urdu Section ( 1 Sept 2022, NewAgeIslam.Com)

When Thumamah Ibn Uthal Proclaimed, "O Makkans, You Will Not Get From Yamama Even a Single Grain of Wheat," Part-98 جب ثمامہ بن اُثال نے کہا اے اہل مکہ تمہیں یمامہ کے گیہوں کا ایک دانہ بھی نہیں ملے گا

مولانا ندیم الواجدی

26 اگست 2022

ثُمَامَہ بن اُثَال کی گرفتاری:

واپسی پر بنو حنیفہ کے ایک سردار ثُمامہ بن اُثَال سے آمنا سامنا ہوگیا، محمد بن مسلمہؓ اور ان کے رفقاء ثمامہ سے واقف نہیں تھے، ان کو دشمن قبیلے کا ایک فرد سمجھ کر گرفتار کرلیا، ان کومدینے لے آئے اور مسجد نبویؐ کے ایک ستون سے ان کو باندھ دیا۔ رسول اللہ صلی اللہ علیہ وسلم کو اس قیدی کے بارے میں بتلایا گیا، اس وقت یہ واضح ہوچکا تھا کہ ثمامہ کا تعلق بکر بن وائل سے ہے اور یہ قبیلہ جس کی ایک شاخ بنوحنیفہ ہے یمامہ بحرین میں سکونت پزیر ہے۔ یہ قبیلہ بھی مسلمانوں سے سخت عداوت رکھتا تھا۔ رسولؐ اللہ ان کے پاس تشریف لائے اور فرمایا: اے ثمامہ! تم میرے متعلق کیسا گمان رکھتے ہو، انہوں نے عرض کیا: میرا گمان آپ کے متعلق اچھا ہے، اگر آپ مجھے قتل کردیں گے تو یہ ایک خونی مجرم کا قتل ہوگا، اور اگر آپ اچھا سلوک فرمائیں گے تو یہ ایک ایسے شخص پر احسان ہوگا جس کا سر ہمیشہ بار احسان سے جھکا رہے گا اور اگر آپ مال چاہتے ہیں تو میں مال بھی پیش کرسکتا ہوں۔

یہ سن کر آپؐ خاموش رہے، دوسرے دن آپ پھر تشریف لے گئے، اور ثمامہ سے وہی دریافت فرمایا جو پہلے دن پوچھا تھا، ثمامہ نے جواب دیا اگر آپ احسان فرمائیں تو یہ ایک شکر گزار شخص پر آپ کا احسان ہوگا۔ آپ خاموش ہی رہے۔ تیسرے دن آپؐ نے پھر وہی سوال کیا، ثمامہ نے جواب میں کہا کہ میں اس سے پہلے دو مرتبہ جواب دے چکا ہوں، میرا جواب آج بھی وہی ہے۔ رسولؐ اللہ نے حکم دیا کہ ثُمامہ کو رہا کردیا جائے۔ آزاد ہونے کے بعد ثمامہ قریب کے ایک باغ میں گئے، غسل کیا اور مسجد نبویؐ میں واپس آکر مسلمان ہوگئے، کلمۂ شہادت پڑھنے کے بعد انہوں نے عرض کیا: یارسول اللہ! آج سے پہلے آپؐ کے چہرے سے زیادہ کوئی چہرہ میرے نزدیک ناپسندیدہ نہیںتھا اور آج آپؐ کا روئے مبارک روئے زمین کے تمام چہروں سے زیادہ مجھے عزیز ہے، آج سے پہلے آپ کے دین سے زیادہ کوئی دین مجھے برا نہیں لگتا تھا اور آج آپ کا دین مجھے سب سے زیادہ پسند ہے، آج سے پہلے آپؐ کا یہ شہر مجھے سخت ناپسند تھا، آج آپؐ کا یہ شہر ہی مجھے سب سے زیادہ محبوب ہے۔ پھر عرض کیا: یارسولؐ اللہ! میں تو عمرہ کرنے کے ارادے سے نکلا تھا کہ آپ کے لوگ مجھے گرفتار کرکے یہاں لے آئے، اب میرے لئے کیا حکم ہے؟ آپؐ نے عمرہ کرنے کی اجازت عطا فرمائی اور یہ بھی فرمایا کہ ان شاء اللہ تم سلامتی کے ساتھ یہ سفر کروگے۔

ثمامہ مکے میں:

مدینے سے رخصت ہوکر حضرت ثمامہ مکے پہنچے، تلبیہ ان کی زبان پر تھا، بیت اللہ کا طواف کیا، لیکن بتوں کی طرف نگاہ بھی نہیں کی، ذراسی دیر میں یہ بات جنگل کی آگ کی طرح مکے میں پھیل گئی کہ بنو حنیفہ کا سردار ثمامہ بن وائل ناصبی (بے دین) ہوگیا ہے۔ خبر کے اس طرح پھیلنے کے باوجود انہوں نے اپنے اسلام کو چھپانے کی کوشش نہیں کی، بلکہ دھڑلے سے کہا کہ بے دین اور ناصبی تو تم لوگ ہو، میں تو محمد صلی اللہ علیہ وسلم کے ساتھ مسلمان ہوگیا ہوں، اور اے اہل مکہ کان کھول کر سن لو، تمہیں یمامہ کے گیہوں کا ایک دانہ بھی نہیں ملے گا، ہاں اگر محمدؐ اجازت دیں گے تو میں تمہیں گیہوں لانے دوں گا۔ ثمامہ نے جو دھمکی دی تھی وہ انہوں نے پوری کرکے دکھائی، یمامہ جاکر انہوں نے مکے کے لئے گیہوں کی برآمد پر پابندی لگادی، اہل مکہ کے لئے یمامہ کا گیہوں بڑی اہمیت رکھتا تھا، اس پابندی سے ان کیلئے سخت مشکلات پیدا ہوئیں، بالآخر مکہ مکرمہ کے سرکردہ لوگوں نے آپؐ سے درخواست کی کہ وہ ثمامہ سے کہہ کر یہ پابندی ہٹوادیں۔ آپؐ نے ثمامہ کو حکم دیا وہ اہل مکہ کو گیہوں فروخت کرنے کا سلسلہ جاری رکھیں۔ (صحیح البخاری: ۵/۱۷۰، رقم الحدیث: ۴۳۷۲، صحیح مسلم: ۳/۱۳۸۶،رقم الحدیث: ۱۷۶۴)

تلبیہ پڑھنے والے پہلے مسلمان

حضرت ثمامہ پہلے مسلمان ہیں جنہوں نے عمرہ کیا، اور تلبیہ پڑھا، کہتے ہیں کہ انہوں نے بآواز بلند تلبیہ پڑھا، جسے سن کر قریش کے نوجوان بپھر گئے، وہ سمجھے کہ کوئی مسلمان عمرہ کرنے مدینے سے یہاں آگیا ہے، ذرا سی دیر میں بھیڑ اکٹھا ہوگئی، کچھ لوگوں نے تلواریں نکال لیں، تاکہ اس مسلمان کو قتل کردیں جس نے خانۂ کعبہ میں اپنے نئے دین کے ساتھ گھسنے اور عمرہ کرنے کی کوشش کی ہے۔ قریب تھا کہ کچھ لوگ ان پر حملہ کرتے، اچانک بڑے، بوڑھے وہاں پہنچ گئے، انہوں نے نوجوانوں سے کہا جانتے بھی ہو یہ شخص کون ہے، یہ یمامہ کے سردار ہیں، اگر تم ان کو قتل کردیتے ہو تو یہ معاملہ انتہائی سنگین ہو گا، ان کے قتل سے جنگ کی جو آگ بھڑکے گی اسے بجھانا مشکل ہوجائے گا۔

حضرت ثمامہ بن اثال نے لمبی عمر پائی، انہوں نے غزوۂ موتہ میں بھی حصہ لیا۔ رسول اللہ صلی اللہ علیہ وسلم کی وفات کے بعد جب یمامہ میں ارتداد پھیلا اور مسیلمہ بن کذاب کے فتنے نے سر ابھارا تو یہ حضرت ثمامہ ہی تھے جنہوں نے ان فتنوں کا بے جگری کے ساتھ سامنا کیا، ان کی کوششوں سے تین ہزار مرتد دوبارہ داخل اسلام ہوگئے۔ (الاستیعاب فی معرفۃ الاصحاب: ۱/۲۱۵)

غزوۂ بنی لِحْیَان

غزوۂ بنی قُریظہ سے فارغ ہونے کے بعد رسول ؐ اللہ نے چھ ماہ تک کسی جنگی مہم میں بہ راہِ راست شرکت نہیں فرمائی اور نہ مدینے سے باہر تشریف لے گئے۔ چھ ماہ بعد آپؐ نے رَجِیْع کے شہیدوں کا بدلہ لینے کا ارادہ فرمایا، گزشتہ صفحات میں رَجِیْع کا درد انگیز واقعہ تفصیل کے ساتھ لکھا جاچکا ہے، حضرت عاصِم بن ثابتؓ اور حضرت خُبَیْب بن عَدِیؓ اور ان کے متعدد رفقاء کو بنی لِحْیان نے بِئرِمَعُونہ پر گھیر لیا اور ایسے حالات پیدا ہوئے کہ دونوں صحابی اس دارِ فانی سے رخصت ہوگئے۔ اس واقعے سے آپؐ کو گہرا صدمہ پہنچا تھا، مگر عسکری مہمات اور نو زائیدہ مملکت کی انتظامی مصروفیات کے باعث آپ ان ظالموں کی سرکوبی کیلئے تشریف نہ لے جاسکے، اب اس کا ارادہ فرمایا اور صحابہؓ کو حکم دیا کہ وہ ایک عظیم مقصد کیلئے کوچ کی تیاری کریں۔

تقریباً دو سو صحابہؓ کا لشکر اس مقصد کیلئے تشکیل دیا گیا، اس لشکر میں بیس گھوڑے بھی شامل تھے، حسبِ سابق حضرت عبد اللہ ابن ام مکتومؓ کو اپنا قائم مقام بنا کر آپؐ نے مدینے سے کوچ فرمایا، جنگی حکمت عملی کے تحت آپؐ نے بنو لِحْیَان کی طرف جانے والا سیدھا راستہ اختیار نہیں کیا بلکہ شام کی طرف جانے والا راستہ اختیار فرمایا، بنو لِحْیان کی آبادی مدینے سے تقریباً دو سو میل کے فاصلے پر تھی، آپؐ اُدھر بہ راہِ راست بھی تشریف لے جاسکتے تھے، لیکن آپؐ نے مصلحتاً اپنا ارادہ مخفی رکھا، یہاں تک کہ صحابہؓ بھی اس بات سے واقف نہیں تھے، بلکہ یہ سمجھ رہے تھے کہ شام کی جانب کوئی مہم درپیش ہے۔

آپؐ جبلِ غُراب سے ہوتے ہوئے مَحِیْض تک پہنچے، بَتْرَاء سے گزرنا ہوا، اس کے بعد بائیں جانب مڑ گئے، اور وادئ بَیْن سے ہوتے ہوئے صُخَیْراتُ الْیَمَام تک جا پہنچے، یہاں سے ایک راستہ مکہ مکرمہ کی طرف جاتا ہے، یہاں پہنچ کر آپؐ نے ایک اور راستہ اختیار فرمایا، اس راستے پر آپ نے تیز رفتاری کے ساتھ سفر کیا اور وادئ غُران تک پہنچ گئے، یہی اصل منزل تھی، بنو لحیان کی آبادی اسی وادی کے اطراف میں پھیلی ہوئی تھی، یہاں پہنچ کر آپ نے پڑاؤ ڈال دیا، خبر ملی کہ بنو لِحْیان اپنی بستیوں سے نکل کر پہاڑوں میں رو پوش ہوگئے ہیں، آپؐ نے سفر کو مخفی رکھنا چاہا؛ لیکن بنو لِحْیان کو خبر ہو ہی ہوگئی کہ مسلمانوں کا لشکر ان سے لڑنے کیلئے مدینے سے نکل چکا ہے، اسی لئے وہ اپنے گھروں سے فرار ہوگئے۔

ان حالات میں یہاں ٹھہرنا بے سود تھا، اس لئے سرکار دوعالم ؐ نے عُسْفان تک جانے کا فیصلہ فرمایا، تاکہ اہل مکہ دیکھ لیں کہ مسلمان ان کے دروازوں تک پہنچ چکے ہیں۔ عسفان پہنچ کر آپؐ نے پہلے دو سوار کُراعُ الغَمَمْ تک روانہ فرمائے، پھر حضرت ابوبکرؓ کی قیادت میں مزید دس سوار ان کے پیچھے پیچھے بھیجے، کراعُ الغمم عسفان سے بہ جانب ِمکہ آٹھ میل کے فاصلے پر ایک وادی ہے، حضرت ابوبکرؓ کا دستہ کراعُ الغمم تک پہنچا تو مشرکین مکہ میں خوف وہراس پھیل گیا، اور یہی وادی عُسفان میں آنے اور ٹھہرنے کا مقصد بھی تھا، مختصر قیام کے بعد مسلمانوں کا یہ کارواں جانب مدینہ عازم سفرہوا۔ (سیرۃ ابن ہشام: ۳/۲۰۶، ۲۰۷، زاد المعاد: ۳/۵۲)

والدہ کی قبر پر:

واپسی میں آپ صلی اللہ علیہ وسلم اَبْوَاء میں ٹھہرے، اور اپنی والدہ محترمہ مرحومہ کی قبر پر تشریف لے گئے، وہاں پہنچ کر آپؐ نے وضو فرمایا، دو رکعت نماز پڑھی، والد ہ کی قبر پر پہنچ کر آپؐ رونے لگے، آپ کو روتا دیکھ کر صحابۂ کرامؓ بھی رونے لگے، اس سے معلوم ہوتا ہے کہ ماں کی محبت اولاد کے دل سے کبھی نہیں نکلتی۔ اس وقت آپؐ کی عمر مبارک چھپن ستاون برس تھی اور والدہ محترمہ کے انتقال کو پچاس سال سے زیادہ ہوگئے تھے۔ (زاد المعاد: ۳/۲۰۷) - (جاری)

26 اگست 2022 ، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے