Sat Apr 19 2025, 11:44 AM

Urdu Section ( 20 Aug 2022, NewAgeIslam.Com)

The Prophet (PBUH) Dealt With the Banu Qurayzah in a Manner Consistent With Both Jewish Tribal Depravity and War Politics Part-97 آپ ؐ نے بنو قر یظہ سے جو معاملہ فرمایا وہ جنگی سیاست اور یہود قبائل کی افتاد طبع کے مطابق تھا

مولانا ندیم الواجدی

19 اگست 2022

زبیر ابن باطا قرظی

یہ ایک بوڑھا یہودی تھا جو قید ہو کر آیا تھا، اس پر حضرت ثابت بن قیسؓ کی نظر پڑ گئی، عہد جاہلیت میںجنگ بعاث کے موقع پر اس شخص نے حضرت ثابتؓ کو پکڑ لیا تھا، مگر ان کو قتل کرنے کے بجائے پیشانی کے بال کاٹ کر انہیں آزاد کردیا تھا۔ آج حضرت ثابتؓ نے اس بوڑھے کو دیکھا تو اس کا احسان یاد آگیا، وہ اس کے قریب گئے اور پوچھا: بڑے میاں! مجھے پہچانتے ہو؟ اس نے کہا: بھلا میں تمہیں کیسے بھول سکتا ہوں۔ انہوں نے کہا: میں تمہارے احسان کا بدلہ چکانا چاہتا ہوں، اس نے کہا: شریف آدمی ہی شریف آدمی کے احسان کا بدلہ چکا تا ہے۔ یہ سن کر حضرت ثابت بن قیسؓ رسول اللہ صلی اللہ علیہ وسلم کی خدمت میں حاضر ہوئے اور عرض کیا: یارسولؐ اللہ! میری خاطر اس کا خون معاف کردیجئے، میں اس کے پرانے احسان کا بدلہ چکانا چاہتا ہوں۔ آپ صلی اللہ علیہ وسلم نے اس کو معاف فرمادیا۔ حضرت ثابتؓ بوڑھے کے پاس آئے اور اس سے کہا تم آزاد ہو، جہاں چاہو جاسکتے ہو، اس نے کہا :ـ میں بوڑھا آدمی، اہل و عیال کے بغیر زندہ رہ کر کیا کروں گا۔ حضرت ثابتؓ نے حضورؐ سے کہہ کر اس کے اہل و عیال بھی واپس دلا دئیے، بیوی بچے پا کر بوڑھا بولا: حجاز میں بیوی بچے ہوں اور مال و دولت نہ ہو، ایسی زندگی سے کیا فائدہ، حضرت ثابت نے اس کامال بھی واپس دلا دیا۔

چاہئے تو یہ تھا کہ وہ بوڑھا حضرت ثابتؓ کا شکریہ ادا کرتا اور کہیں جا کر بس جاتا، یا اس حسن سلوک پر اسلام ہی قبول کرلیتا، مگر بعض لوگوں کے دلوںمیں قوم پرستی کا بت اندر تک پیوست ہوتا ہے ۔ اس بوڑھے کے ساتھ بھی معاملہ کچھ ایسا ہی تھا۔ سب کچھ پانے کے بعد بھی اسے اپنے دوستوں اور قبیلے کے سرداروں کی فکر تھی۔ اس نے حضرت ثابتؓ سے پوچھا: اچھا یہ بتلائو کہ ہمارے سردار کعب بن سعد کا کیا ہوا؟ انہوںنے جواب دیا اس کو قتل کردیا گیا۔ اس نے پھر پوچھا حیی ابن اخطب کس حال میں ہے؟ فرمایا: وہ بھی قتل ہوچکا ہے۔ اس نے پھر دریافت کیا شداد بن سموئل کے ساتھ کیا سلوک کیا گیا ہے؟انہوں نے بتلایا کہ وہ بھی اب زندہ نہیں ہے۔ یہ سن کر بوڑھا یہودی کہنے لگا: ان سب کے بعد اب جینے میں کیا لطف باقی ہے، اگرمجھ پر احسان ہی کرنا ہے تو یہ احسان کرو کہ مجھے جلد از جلد میرے دوستوں سے ملادو، حضرت ثابتؓ نے ہاتھ پکڑ کر اسے آگے کردیا، کچھ ہی لمحوں میںوہ بھی اپنے دوستوں کے پاس جا چکا تھا۔ (مجمع الہیثمی ۶؍۱۴۱، ۱۴۲، سیرت ابن ہشام ۳؍۱۷۴)

بنی قریظہ کو یہ سزا کیوں دی گئی؟

اس سوال کا بہترین جواب مولانا محمد اسماعیل ریحان، استاذ دارالعلوم کراچی نے اپنی کتاب ’’تاریخ ملت اسلامیہ‘‘ میں قدرے تفصیل سے دیا ہے،لکھتے ہیں: ’’بنو قریظہ سے یہ سلوک یقیناً حضور اللہ صلی اللہ علیہ وسلم کے معمول کے خلاف تھا، آپ صلی اللہ علیہ وسلم جاں بخشی کرسکتے تھے مگر آپؐ نے سزا جاری کرنے کو ترجیح دی، اس کا اصل سبب تو یہی تھا کہ آسمانی حکم یہی تھا، اللہ تعالیٰ نے جس طرح حضرت جبریل علیہ السلام کو بھیج کر بنو قریظہ پر حملے کو ایک دن بھی ملتوی نہیں ہونے دیا، اسی طرح ان مجرموں کی سزا بھی آسمان پر ہی طے ہوچکی تھی، جو سعد بن معاذؓ کی زبان پر جاری ہوگئی۔ دُنیا کے سابقہ اور موجودہ قانون کے مطابق بھی باغیوں کو موت کی سزا دی جاتی ہے، خود یہودیوں کی مذہبی کتاب تورات ایسے قضیے میں سزائے موت سناتی ہے جیسا کہ عہد نامہ عتیق میں ہے کہ خداوند کسی شہر کو تیرے قبضے میں کردے تو اس کے ہر مرد کو تلوار کی دھار سے قتل کر۔ (بائبل، دشتناء، باب ۲۰، آیات ۱۰ تا ۱۴)

رہی یہ بات کہ آسمانی حکم سے ہٹ کر کیا اس اقدام کے پیچھے کوئی خاص زمینی وجہ بھی کارفرما تھی ؟ اس کا جواب اثبات میں ہے، مگر وجہ صرف یہ نہ تھی کہ لوگ یہودی تھے، کیوںکہ یہودی تو بنو قینقاع اور بنو نضیر بھی تھے، مگر آپ صلی اللہ علیہ وسلم نے ان سے ایسا سخت سلوک نہیں کیا؟ زمینی وجہ بنو قریظہ کی طبعی شرانگیزی بھی نہیں تھی، کیوںکہ دوسرے یہود بھی یقیناً فتنہ پرور تھے، جنہیں حضور صلی اللہ علیہ وسلم نے جلا وطن کرنے پر اکتفاء کیاتھا، پھر بنو قریظہ سے رعایت نہ برتنے کی وجہ کیا تھی؟ اگر غور کریں تو معلوم ہوگا کہ بنو قینقاع اور بنو نضیر کی طرف سے شرانگیزیاں اور بد عہدیاں عام حالات میں ہوتی تھیں، جبکہ بنو قریظہ نے اعلانیہ بغاوت کا گھنائونا جرم اسلامی ریاست پر عین بیرونی حملے کے دوران کیا تھا، جس کی وجہ سے اس جرم کی سنگینی کئی گنا بڑھ گئی تھی، اس لئے انہیں اس سنگین ترین جرم کے مطابق نہایت کڑی سزا دی گئی۔

رہی یہ بات کہ اگر حضور صلی اللہ علیہ وسلم اپنی طبعی رحم دلی کے مطابق کرم کا معاملہ فرما دیتے تو کیا کوئی نقصان ہوجاتا؟ جی ہاں! یقیناً ہوتا۔ ظاہر ہے کہ بنوقریظہ کو معاف کردینے کے باوجود انہیںان کے ٹھکانوں پر آباد رکھنے کی گنجائش نہیں نکل سکتی تھی، یہ اپنی آستین میں سانپ پالنے کے مترادف تھا، انہیں جلاوطن ہی کرنا پڑتا مگر اس کا نتیجہ کیا نکلتا؟ اس سے قبل بنو قینقاع اور بنو نضیر کے بہت سے لوگ جلا وطن ہو کر خیبر کے قلعوں میں جا بسے تھے اور وہاں یہودیوں کی ایک عظیم جمعیت تیار ہوگئی تھی جو مدینے کی سلامتی کے لئے خطرہ تھی۔ بنو قریظہ کے لوگ جا کر ان کی طاقت میں مزید اضافے کا سبب بنتے، اس طرح بنو قریظہ کی جاںبخشی کرنا خود اپنے پیروں پر کلہاڑی مارنے کا مصداق ہوتا۔

یہاں انسانی فطرت اورمعاشرتی فلسفے کایہ پہلو قابل توجہ ہے کہ کوئی مقتدر قوت جو سزا یا معافی دونوں پر قدرت رکھتی ہو عام اذہان کے نزدیک مقتدر تب ہی مانی جاسکتی ہے جب وہ کبھی معاف کرتی دکھائی دے اور کبھی سزا جاری کرے۔ اگر کوئی صاحب اختیار شخص ہر معاملے اور ہر مسئلے میں فقط معافی کا پہلو اختیار کرتا رہے تو عام لوگ یہی تصور کریںگے کہ وہ حقیقت میں صاحب اختیار نہیں بلکہ دوسروں کو معاف کرنے پر مجبور ہے۔ اسے سزا جاری کرنے کااختیارسرے سے دیا ہی نہیں گیا، اس سوچ کا لازمی نتیجہ یہ ہوگا کہ عادی مجرم غنڈے، بدمعاش اور چور اُچکے بے خوف ہو کر وارداتیں کرنے لگیںگے اور معاشرے سے قانون کااحترام اٹھ جائے گا۔

مجرموں کو سزا کا خوف ہی سرکشی سے باز رکھ سکتا ہے اوریہ خوف تب ہی باقی رہ سکتا ہے جب سزائوں کا گاہے بہ گاہے عملی طور پر نفاذ بھی ہوتا رہے، جس طرح کائنات کے حاکم اعلیٰ اللہ تعالیٰ اگر چہ معافی اور درگزر سے کام لیتے ہیں مگر کبھی کبھی وہ مجرموں کو عاد اورثمود کی طرح عبرت کا نشان بھی بنا کر دکھادیتے ہیں۔ اسی طرح اللہ کے آخری رسول صلی اللہ علیہ وسلم بھی اگرچہ اکثر مواقع پر سراپا رحم و کرم نظر آتے ہیں، لیکن کبھی ایسا بھی ہوتاہے کہ آپ معافی کے بجائے سزا جاری کرنے کو ترجیح دیتے ہیں۔ مجرموں پر حدود و قصاص جاری کرنے کی متعدد مثالیں سنت نبویہ میں موجود ہیں، البتہ کسی قوم کے اجتماعی جرم پر اجتماعی سزاد دینے کی یہ سیرت نبوی میں واحد مثال ہے۔ اس کے سوا ہر جگہ آپؐ نے یا تو سب کو معاف کردیا یا مخصوص مجرموں کو مستثنیٰ کرکے اکثریت سے درگزر کا معاملہ فرمایا۔ سیرت نبویہ میںایسی سخت مثال بھی ایک رحمت ہے، اگر یہ نہ ہوتی تو اسلامی ریاست کے خلاف سازشوں اور بغاوت کی سزا جاری کرنا مشکل بلکہ ناممکن ہوجاتا، ہر سنگین سے سنگین بغاوت اور سازش قابل معافی قرار پاتی، مصنف ’’نبیؐ رحمت‘‘ کا تبصرہ توجہ کے قابل ہے۔ وہ لکھتے ہیں کہ: ’’رسولؐ اللہ نے بنو قریظہ سے جو معاملہ فرمایا وہ جنگی سیاست اور عرب کے یہود قبائل کی سرشت اور افتاد طبع کے مطابق تھا، ان کے لئے اسی قسم کی سخت اور عبرت ناک سزا کی ضرورت تھی جس سے عہد شکنی کرنے والوں اور دھوکہ دینے والوں کو ہمیشہ کے لئے سبق مل جاتا اورآئندہ نسلیں اس سے عبرت پکڑتیں۔‘‘ (نبی رحمت ص۳۴۵، تاریخ امت مسلمہ؍۲۹۹، ۳۰۰)

غزوۂ خندق کے بعد

جیسا کہ بیان کیا جاچکا ہے کہ غزوۂ خندق میں کفار ومشرکین کو ذلت ناک شکست کا سامنا کرنا پڑا، گزشتہ چار پانچ برسوں کی صورت حال یہ رہی کہ مکہ مکرمہ کے قریش مسلسل یہ کوشش کرتے رہے کہ مسلمان مدینہ منورہ میں سکون سے نہ رہیں، اس سلسلے میں کئی جنگیں بھی انہوں نے لڑیں، مدینے پر حملہ آور بھی ہوئے، چیلنج دے کر بھی گئے، غزوۂ خندق کیلئے وہ لوگ بڑے طمطراق کے ساتھ آئے تھے، دوسرے قبائل کو بھی اپنے ساتھ لگا کر لائے، دس ہزار کا بڑا لشکر تھا، گھوڑے، اونٹ بڑی تعداد میں تھے، اسلحہ بھی بہت تھا، کافروں کو مکمل یقین تھا کہ مسلمانوں کیخلاف ان کی یہ آخری جنگ ہوگی اور ان کا قصہ اس جنگ کے ساتھ ہی ختم ہوجائے گا لیکن خندق کھودنے کی حکمت عملی کے سبب دونوں فریقوں میں دو بہ دو جنگ کی نوبت ہی نہیں آئی، کوہِ احد کے دامن میں وہ بیس پچیس دن اسی طرح پڑے رہے، پھر خدا کی نصرت مسلمانوں کے شامل حال ہوئی، اور دشمنوں کو دُم دباکر بھاگنا پڑا۔

قدرتی طور پر مسلمانوں کو دشمن کی شکست سے بڑا حوصلہ ملا، اس کے برعکس مشرکین کے حوصلے پوری طرح پست ہوگئے، اس صورت حال کے پیش نظر اللہ کے رسول صلی اللہ علیہ وسلم نے صحابۂ کرامؓ سے فرمایا: الآن نغزوہم، ولا یغزوننا، نحن نسیر إلیہم۔ (صحیح البخاری:۵/۱۱۰، رقم الحدیث: ۴۱۱۰) ’’اب ہم ان پر چڑھائی کریں گے، وہ ہم پر چڑھ کر آنے کے قابل نہیں رہے، اب ہم ان تک پہنچیں گے۔‘‘ حدیث بالکل واضح ہے کہ اب تک تو یہ لوگ ہم پر چڑھ چڑھ کر آتے تھے، آج کی شکست نے ان کی کمر توڑ دی ہے، اب یہ لوگ اس قابل نہیں رہے کہ ہم پر حملہ آور ہوں، چنانچہ ایسا ہی ہوا، غزوۂ خندق کے بعد کفار اقدامی جنگ نہ لڑ سکے، دوسری طرف رسولؐ اللہ نے دشمنوں کو چین سے بیٹھنے نہیں دیا، اور ان کے ٹھکانوں تک ان کا پیچھا کیا، غزوۂ خندق سن پانچ ہجری کی آخری جنگ تھی، آنے والے سال میں یعنی سن چھ ہجری میں آپؐ نے دو غزوؤں میں حصہ لیا، اور تقریباً چودہ سرایا مختلف قبائل میں ان کی سرکوبی کے لئے روانہ کئے، ان غزوات اور سرایا کا مقصد دشمن کی رہی سہی طاقت کو کچلنا تھا، اگر ان پر لگاتار یورشیں نہ ہوتیں تو وہ پھر منظم ہوکر مدینہ منورہ پر حملہ آور ہوسکتے تھے، یہ تدبیر مؤثر ثابت ہوئی، اور دشمن کو دوبارہ ابھرنے اور سر اٹھانے کا موقع نہ مل سکا۔(جاری)

Urdu Section ( 20 Aug 2022, NewAgeIslam.Com)

The Prophet (PBUH) Dealt With the Banu Qurayzah in a Manner Consistent With Both Jewish Tribal Depravity and War Politics Part-97 آپ ؐ نے بنو قر یظہ سے جو معاملہ فرمایا وہ جنگی سیاست اور یہود قبائل کی افتاد طبع کے مطابق تھا

Loading..

Loading..