Thu Oct 10 2024, 02:23 PM

Urdu Section ( 30 Apr 2022, NewAgeIslam.Com)

Sacrifice of the Ansaar (Supporters) and The Prophet’s Prayer for them and Their descendants Part-81 ‘انصار کے ایثار پر آپؐ نے دُعا دی:’ یا اللہ! انصار اور ان کی اولاد پر اپنی خاص مہربانی فرما

مولانا ندیم الواجدی

29 اپریل، 2022

بنی نضیر کا محاصرہ:

یہود قلعہ بند ہوکر بیٹھ گئے اور عبد اللہ بن أبی کی مدد کا انتظار کرنے لگے۔ رسول اللہ صلی اللہ علیہ وسلم نے محمد بن مسلّمہؓ کو ان کے پاس یہ پیغام لے کر روانہ فرمایا کہ تم سب لوگ میرے شہر سے نکل جاؤ، تم نے عہد شکنی کی ہے، میں تمہیں دس دن کی مہلت دیتا ہوں۔ یہود نے کوئی جواب نہیں دیا۔ ان کو بھروسہ تھا کہ قبیلۂ اوس کے لوگ ان کی مدد کو آئیں گے۔ ان کو یہ بھی یقین تھا کہ عبد اللہ بن أبی کا لشکر بھی امروز فردا میں یہاں آنے والا ہے۔ محمد بن مسلمہؓ کو دیکھ کر وہ یہ سمجھے تھے کہ وہ قبیلۂ اوس کا کوئی پیغام لے کر آئے ہیں، اس کا اظہار انہوں نے محمد بن مسلمہؓ سے کیابھی۔ محمد بن مسلمہؓ نے کہا :کہاں کا اوس اور کیسا خزرج، اب سب ایک ہیں، دِل بدل گئے ہیں، اسلام نے وہ تمام معاہدے اور میثاق مٹا ڈالے ہیں جو ایک قبیلے کے دوسرے قبیلے کے ساتھ تھے۔ یہود نے جلا وطن ہونے سے صاف انکار کردیا، ان کے ایک سردار حی بن اخطب نے قاصد کو بھیج کر یہ کہلو ا دیا کہ ہم یہاں سے ہلنے والے نہیں ہیں، آپ کا جو دل چاہے وہ کریں، یہ بات سن کر رسول اللہ صلی اللہ علیہ وسلم نے نعرۂ تکبیر بلند کیا، تمام مسلمانوں نے بھی نعرۂ تکبیر کہا، آپ نے فرمایا: یہود جنگ چاہتے ہیں۔ (تاریخ الطبری: ۲/۵۵۳، السیرۃ النبویہ: ۳/۱۴۶)

مسلمانوں کا محاصرہ چار دن تک جاری رہا، اس دوران مسلمانوں نے بنی نضیر کے کھیت کاٹ لئے اور باغات جلا ڈالے، یہ منظر دیکھ کر یہود بلبلا اٹھے اور چیخ چیخ کر کہنے لگے، اے محمد! آپ تو زمین میں فساد پھیلانے سے روکتے تھے، اور جو یہ کام کرتا تھا اس کی مذمت کرتے تھے، اب آپ خود ہی آگ لگوا رہے ہیں، اور درختوں کو کٹوا رہے ہیں۔ رسول اللہ صلی اللہ علیہ وسلم نے اس کا کوئی جواب نہیں دیا، اس وقت آپؐ نے جو کیا سب اللہ کے حکم سے تھا، حضرت عمرؓ فرماتے ہیں کہ قرآن کریم کی یہ آیت اسی سلسلے میں نازل ہوئی:

’’(اے مومنو! یہود بنو نَضیر کے محاصرہ کے دوران) جو کھجور کے درخت تم نے کاٹ ڈالے یا تم نے انہیں اُن کی جڑوں پر کھڑا چھوڑ دیا تو (یہ سب) اللہ ہی کے حکم سے تھا اور اس لئے کہ وہ نافرمانوں کو ذلیل و رسوا کرے۔‘‘ (حشر:۵)

بنی نضیر ڈر گئے:

یہ صورت حال دیکھ کر یہودی خوف زدہ ہوگئے۔ کہاں تو وہ اس قدر شیر ہورہے تھے کہ اپنی جگہ سے ایک انچ بھی ہٹنے کے لئے تیار نہیں تھے اور کہاں معافی اور جاں بخشی کی درخواست پر اتر آئے۔ انہوں نے رسول اللہ صلی اللہ علیہ وسلم کی خدمت میں یہ پیغام بھیجا کہ آپؐ ہمیں امان عطا کریں اور یہاں سے نکلنے دیں، رسول اللہ صلی اللہ علیہ وسلم نے ان کی جان بخش دی، حالاں کہ وہ اس قابل نہیں تھے کہ ان کی جان بخشی جاتی، بلکہ ایک نبی کو قتل کرنے کی سازش کرنا ان کا اتنا بڑا جرم تھا کہ اس کی پاداش میں ان کو قتل کا حکم صادر کیا جاتا۔ مگر رسول اللہ صلی اللہ علیہ وسلم سراپا رحمت تھے اور آپؐ کے دل میں انسانیت کے لئے بے پناہ شفقت تھی۔ آپؐ نے ان کی اس درخواست پر فراخ دلی سے فرمایا: جاؤ، چلے جاؤ۔آپؐ نے ان کو جانے کی اجازت ہی نہیں دی بلکہ یہ بھی فرمایا کہ تم اپنے اونٹوں پر جس قدر سازو سامان لاد کر لے جاسکتے ہو، وہ بھی لے جاؤ، ہاں اسلحہ لے جانے کی اجازت نہیں ہے۔ (سیرت ابن ہشام: ۳/۱۳۲)

بنی نضیر جلا وطن کئے گئے:

اس اجازت اور رخصت کے بعد بنی نضیر نے اپنے اونٹوں پر سامان لادنا شروع کیا، جو کچھ وہ لے جاسکتے تھے، انھوں نے اونٹوں پر رکھا، یہاں تک کہ اپنے گھروں میں لگے ہوئے لکڑی کے در، دروازے اور کڑیاں تک اتار کر رکھ لیں، قافلے میں چھ سو اونٹ تھے جو سب کے سب سامان سے لدے ہوئے تھے، عورتیں اور بچے بھی ان پر سوار تھے، مرد پیادہ پا تھے، ان کے پیچھے غلام اور باندیاں گاتے بجاتے چل رہے تھے، موسیقی کے آلات بھی ساتھ تھے، ایسا لگ رہا تھا جیسے یہ لوگ نکالے نہ جارہے ہوں بلکہ کسی تفریحی سفر پر روانہ ہورہے ہوں۔ یہ در اصل اپنی کھسیاہٹ، جھلاہٹ اور مایوسی کو چھپانے کی ایک تدبیر تھی۔ بعض لوگوں نے سونا چاندی بھی اونٹوں پر لادا۔ تنہا سلام بن أبی حقیق نے بیل کی کھال سے بنے ہوئے تھیلے میں سونا چاندی بھر رکھا تھا۔ وہ کہہ رہا تھا کہ یہ ہے اصل سرمایہ جو ہمارے کام آئے گا، یہاں ہمارے باغات چھین لئے گئے، لیکن خیبر میں ہم نئے باغ خرید لیں گے۔یہود کے انخلاء کے اس عمل کی نگرانی محمد بن مسلّمہ ؓنے کی، بنی نضیر کی بڑی تعداد شام کی طرف روانہ ہوگئی، کچھ لوگ خیبر میں ٹھہر گئے، ان میں سلام بن أبی حقیق، حي بن اخطب، کنانہ بن الربیع بن أبی حقیق وغیرہ قابل ذکر ہیں۔ خیبر میں ان کو ہاتھوں ہاتھ لیا گیا، اور ان کی سیادت کو تسلیم کیا گیا، قبیلۂ بنی نضیر کے صرف دو شخص یہاں رہ گئے، ایک یامین بن عمیر، اور دوسرے ابوسعد بن وہب، یامین اور ابو سعد نے اس شرط پر اسلام قبول کرلیا کہ ان کے اموال انہی کے پاس رہیں گے۔ چناں چہ جو کچھ ان کا تھا وہ ان کو دے دیا گیا، باقی کھیت، باغات وغیرہ سب رسول اللہ صلی اللہ علیہ وسلم کے دستِ تصرف میں آگئے۔ یہ بھی روایت ہے کہ رسول اللہ صلی اللہ علیہ وسلم نے یامین سے فرمایا کہ کیا تم نہیں جانتے کہ عمرو بن حجاش میرے ساتھ کیا کرنا چاہتا تھا، اس پر وہ خاموش رہے، لیکن انھوں نے کرائے پر ایک آدمی کو تیار کیا، اس نے عمرو بن حجاش کو قتل کر ڈالا، آپ صلی اللہ علیہ وسلم نے یامین سے یہ شکوہ اس لیے کیا کہ عمرو بن حجاش ان کا چچا زاد بھائی تھا۔ (البدایہ والنہایہ: ۴/۸۶، السیرۃ الحلبیہ: ۲/۵۶۵)

بنی نضیر کے انخلاء کے بعد ان کے بچے کچھے مکانوں سے پچاس زرہیں، پچاس خود اور تین سو چالیس تلواریں نکلیں، کھیتی کی زمینیں اور کھجوروں کے باغات بھی ہاتھ آئے، اور بھی کچھ سازوسامان رہا ہوگا، یہ مال فئ تھا، شریعت کی اصطلاح میں فئ اس مال کو کہتے ہیں جو مسلمانوں کو بغیر لڑے ہاتھ آجائے۔ اس مال پر رسول اللہ صلی اللہ علیہ وسلم کا پورا حق تھا کہ آپ جس طرح چاہتے استعمال کرتے لیکن آپﷺ نے یہ تمام مال واسباب مہاجرین پر تقسیم فرمادیا۔ اب تک مہاجرین کی بڑی تعداد انصار کے گھروں میں مقیم تھی۔ ایک دن آپؐ نے ثابت بن قیس کو طلب فرمایا اور انہیں حکم دیا کہ تم اپنی قوم کو یہاں بلاکر لاؤ۔ انہوں نے عرض کیا: خزرج کو؟ آپؐ نے فرمایا: نہیں! اوس وخزرج سب کو، حسب الحکم سب لوگ حاضر خدمت ہوگئے۔ اس کے بعد آپؐ نے خدا کی حمد وثنا بیان کی، مہاجرین کے ساتھ انصار کی مہربانیوں کا ذکر فرمایا، اس کے بعد فرمایا: اے گروہ انصار، اگر تم چاہو تو میں بنی نضیر کا تمام مال تم میں اور مہاجرین میں برابر برابر تقسیم کردوں اور مہاجرین حسب سابق تمہارے ساتھ رہیں، اور اگر تم چاہو تو میں یہ مال مہاجرین کو دے دوں، اور وہ تمہارے گھر خالی کردیں، انصار نے عرض کیا: یا رسولؐ اللہ! ہم دل سے اس بات پر راضی ہیں کہ آپ یہ تمام مال مہاجرین کو عطا فرمادیں۔ اس کے بعد بھی مہاجر بھائی ہمارے ساتھ ہی ہمارے گھروں میں قیام کریں، انھوں نے یہاں تک کہا کہ آپ یہ مال بھی مہاجر بھائیوں کو دے دیں اور ہمارے مال میں سے بھی جتنا چاہیں ان کو دے دیں۔ یہ سن کر آپ صلی اللہ علیہ وسلم بے حد خوش ہوئے، اور یہ دُعا دی: اے اللہ! انصار اور ان کی اولاد پر اپنی خاص مہربانی فرما۔ اس کے بعد انصار سے فرمایا: اے گروہ انصار اللہ تمہیں اس ایثار کا بہترین صلہ دے، ہمارے اور تمہارے تعلق پر غنوی شاعر کا یہ شعر صادق آتا ہے:

جزی اللّٰہ عنا جعفرا حین ازلقت

بنا نعلنا فی الواطئین فزلّت

أبو أن یملّون ولو أن أمّنا

تلاقی الذی یلقون منا لملّت

(ترجمہ) اللہ جعفر کو جزائے خیر دے کہ جب ہم نے پہلا قدم رکھا اور ٹھوکر کھائی تو انہوں نے ہمیں سنبھال لیا، اور وہ ہم سے اکتائے نہیں، حالاں کہ جو کچھ ہماری طرف سے پیش آرہا تھا اسے دیکھ کر تو ہماری ماں بھی اکتا جاتی۔

بہر حال آپؐ نے تمام مال مہاجرین کو دے دیا۔ انصار میں سے صرف أبودجانہؓ اور سہل بن حنیفؓ کو بھی کچھ دیا گیا، کیوں کہ یہ دونوں حضرات غربت کی وجہ سے اس کے مستحق تھے۔

اس تقسیم سے ایک فائدہ یہ ہوا کہ انصار کا بوجھ ہلکا ہوگیا، مہاجرین انصار کے گھروں سے نکل کر بنی نضیر کے مکانوں میں چلے گئے، بہت سے مہاجر صحابہؓ کو خوش حالی میسر آگئی۔

(صحیح مسلم: ۳/۱۳۷۶، رقم الحدیث: ۱۷۵۷، المواہب اللدنیہ للزرقانی: ۲/۸۶، سیرت ابن ہشام: ۳/۱۳۳)

قرآن کریم کی سورۂ حشر:

اس سورہ کا نزول بنی نضیر کے ان واقعات کے پس منظر میں ہوا، اس میں فرمایا گیا کہ بنی نضیر کو یہ گمان تھا کہ ان کے قلعے انہیں بچالیں گے، پھر اللہ نے ان کے دلوں میں ایسا رعب ڈالا کہ وہ خود ہی اپنے گھروں کو اپنے ہاتھوں سے اجاڑنے لگے، اگر اللہ نے ان کی قسمت میں جلا وطنی نہ لکھی ہوتی وہ دنیا ہی میں ان کو عذاب دیتا، آخرت میں تو ان کے لئے دوزخ کا عذاب ہے ہی، اس کے بعد مال فئ کے متعلق ہدایت ہے کہ یہ مال ان حاجت مند مہاجرین کا حق ہے جنہیں اپنے گھروں اور اپنے مالوں سے بے دخل کیا گیا ہے، اور یہ مال ان لوگوں کا حق بھی ہے، جو پہلے ہی سے مدینے میں ایمان کے ساتھ مقیم ہیں، جو کوئی ان کے پاس ہجرت کرکے آتا ہے یہ اس سے محبت کرتے ہیں اور جو کچھ ان مہاجرین کو دیا جاتا ہے یہ اپنے سینوں میں اس کی کوئی خواہش بھی محسوس نہیں کرتے، اور ان کو اپنے اوپر ترجیح دیتے ہیں، چاہے ان پر تنگ دستی کی حالت گزر رہی ہو۔ غرضیکہ اس سورہ میں بنی نضیر کے متعلق واقعات کا تذکیری اسلوب میں ذکر ہے، اسی لئے حضرت عبد اللہ بن عباسؓ اس سورت کو سورۂ بنی نضیر کہا کرتے تھے۔

(تفسیر ابن عباس:۱/۴۶۳)

جیسا کہ پہلے عرض کیا گیا کہ یہ واقعہ غزوۂ اُحد کے بعد ۴ ھ؁ربیع الاول کے مہینے میں پیش آیا، محمد بن شہاب زہریؒ کا خیال ہے کہ غزوۂ بنی نضیر جنگ بدر کے چھ ماہ بعد پیش آیا، حافظ ابن قیمؒ لکھتے ہیں کہ ابن شہاب کو اس سلسلے میں مغالطہ ہوا ہے، بدر کے چھ ماہ بعد غزوۂ بنی قینقاع پیش آیا تھا، غزوۂ اُحد کے بعد غزوۂ بنی نضیر ہے، غزوۂ خندق کے بعد قریظہ ہے اور حدیبیہ کے بعد خیبر ہے۔ (زاد المعاد: ۳/۲۴۹)(جاری)

29 اپریل، 2022 ، بشکریہ : انقلاب ، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے