Sun Oct 06 2024, 12:05 PM

Urdu Section ( 24 Jan 2022, NewAgeIslam.Com)

Rumours of the Prophet's Martyrdom Struck the Muslims Like A Bolt of Lightning, and They Lost the War They Had Won Part-67 آپؐ کی شہادت کی افواہ مسلمانوں پر بجلی بن کر گری اور وہ جیتی ہوئی جنگ ہار گئے

مولانا ندیم الواجدی

21 جنوری 2022

رسول اللہ ﷺکی شہادت کی افواہ:

اسی دوران ابن قَمِئۃ اللیثی کافر کے ہاتھوں حضرت مُصْعَبْ بن عُمیرؓ شہید ہوگئے۔ وہ رسول اللہ صلی اللہ علیہ وسلم سے بے حد مشابہت رکھتے تھے، اس کافر بدبخت نے یہ گمان کیا کہ اس نے محمد صلی اللہ علیہ وسلم کو شہید کردیا ہے، وہ خوشی سے چلا اٹھا کہ اس نے (نعوذ باللہ) محمد کو قتل کردیا ہے۔ اس کی یہ آواز کافروں نے بھی سنی اور مسلمانوں تک بھی پہنچی، کافر خوشی سے جھوم اٹھے اور مزید پرجوش ہوگئے، دوسری طرف مسلمانوں میں مایوسی پھیل گئی، بعض کو یہ خیال ہوا کہ اب جنگ جاری رکھنے سے کیا فائدہ، رسولؐ اللہ تو اب ہم میں ہے نہیں۔ حضرت عثمانؓ کا یہی حال تھا، بہت سے مسلمان تو میدان چھوڑ کر چلے گئے، کچھ لوگ ہتھیار رکھ کر بیٹھ گئے، ان میں بعض ایسے بھی تھے جو ایک دوسرے سے یہ کہہ رہے تھے کہ اب زندہ رہنے سے کیا فائدہ، کیوں نہ رسول اللہ صلی اللہ علیہ وسلم کے دشمنوں سے لڑکر جام شہادت نوش کیا جائے۔ انس بن النّضرْؓ یہی سوچ رہے تھے، اور جو لوگ میدان چھوڑ کر جارہے تھے ان سے بھی یہی کہہ رہے تھے کہ رسولؐ اللہ کے بعد زندہ رہ کر کیا کروگے، آؤ، لڑؤ، اور لڑکر جان دے دو۔ انھوں نے یہ بھی کہا: دوستو، محمدؐ ہی تو شہید ہوئے ہیں، محمدؐ کا رب تو زندہ ہے، ہم رب کی خوشنودی ہی کے لئے تو لڑ رہے ہیں۔ سعد بن معاذ ؓملے تو ان سے کہنے لگے :اے سعدؓ! مجھے اُحد کے اس پار سے جنت کی خوشبو آرہی ہے۔ بہر حال وہ میدان میں کود پڑے، اور لڑتے لڑتے شہید ہوگئے، ان کے جسم پر تلواروں اور تیروں کے اسّی سے زیادہ زخم تھے، گویا پورا جسم چھلنی تھا۔ (الکامل فی التاریخ: ۲/۴۵، صحیح البخاری: ۵/۹۵، رقم الحدیث: ۴۰۴۸، سنن الترمذی: ۵/۳۴۸، رقم الحدیث: ۳۲۰۰) ۔

مگر یہ افواہ غلط تھی، رسول اللہ صلی اللہ علیہ وسلم زندہ تھے اور میدان میں موجود تھے، اگرچہ کفار آپؐ کی تلاش میں تھے، اور آپؐ کو نشانہ بنانا چاہتے تھے، مگر صحابۂ کرامؓ نے آپؐ کو اپنے حصار میں لے رکھا تھا۔ جس وقت میدان میں افرا تفری مچی ہوئی تھی اس وقت بھی متعدد صحابۂ کرامؓ آپؐ کے چاروں طرف موجود تھے اور آپؐ کی حفاظت کررہے تھے، چنانچہ مہاجرین میں سے حضرت ابوبکر صدیقؓ، حضرت عمر فاروقؓ، حضرت عبد الرحمٰن بن عوفؓ، حضرت ابو عبیدہ بن الجراحؓ، حضرت سعد بن أبی وقاصؓ، حضرت طلحہ بن عبید اللہؓ اور حضرت زبیر بن العوامؓ اور انصار میں سے حضرت سعد بن معاذؓ، حضرت سہیل بن حنیفؓ، حضرت ابو دجانہؓ، حضرت اُسید بن حضیرؓ، حضرت عاصم بن ثابتؓ، حضرت حُباب بن المُنذرؓ اور حضرت حارث بن صمّہؓ وہ حضرات ہیں جو پوری مستعدی کے ساتھ آپؐ کے قریب رہے، اور حملہ آوروںکو آگے بڑھنے سے روکتے رہے۔ (فتح الباری: ۷/۳۶۰)

حفاظتی نقطۂ نظر سے رسول اللہ صلی اللہ علیہ وسلم نے حضرت کعب بن مالکؓ کو اپنی زرہ دے دی تھی اور ان کی زرہ لے کر خود پہن لی تھی، اس صورت میں بہ ظاہر آپؐ کی پہچان مشکل تھی، مگر عتبہ بن أبی وقاص کو کسی طرح شناخت ہوگئی، وہ قریب تو نہ آسکا، مگر اس نے دور سے کچھ پتھر آپؐ کی طرف پھینکے، ایک پتھر آپؐ کے چہرۂ مبارک پر لگا، جس کی ضرب سے نیچے کا ایک دانت شہید ہوگیا، اور نیچے ہی کا لب بھی زخمی ہوگیا، یہ بدبخت مشہور صحابی حضرت سعد بن أبی وقاصؓ کا حقیقی بھائی تھاؤ وہ کہا کرتے تھے کہ مجھے جس قدر خواہش اور تمنا عتبہ کو قتل کرنے کی ہے کسی کی نہیں ہے۔ اسی دوران ابن شہاب، اور ابن قمیّہ نامی دو مشرک کچھ لوگوں کے ساتھ تلواریں لہراتے ہوئے آپؐ کی طرف بڑھے، جو صحابہؓ آپؐ کی حفاظت کررہے تھے انھوں نے سینہ سپر ہوکر ان کا مقابلہ کیا، اس کے باوجود ابن شہاب کی تلوار سے آپؐ کی مبارک پیشانی زخمی ہوگئی، ابن قمیّہ کی تلوار آپؐ کے خَود پر پڑی، سر مبارک محفوظ رہا، مگر خود کی آہنی کڑیاں آپؐ کے رخسار مبارک میں گھس گئیں، پیشانی کا خون حضرت ابو سعید الخدریؓ کے والد گرامی حضرت مالک بن سنانؓ نے چوس کر صاف کیا، آپؐ نے انہیں بشارت سنائی کہ تمہیں دوزخ کی آگ نہ چھو سکے گی، خود کی آہنی کڑیاں رخسار مبارک سے حضرت ابو عبیدہ بن الجراحؓ نے اپنے دانتوں سے پکڑ کر نکالیں، اس کی وجہ سے ان کے دو دانت ٹوٹ گئے ۔ (البدایہ والنہایہ: ۴/۲۳، ۲۴، سیرت ابن ہشام: ۳/۳۵)

ابو عامر فاسق نے ایک گڑھا مسلمانوں کے لئے کھودا تھا، رسول اللہ صلی اللہ علیہ وسلم کچھ دور چلے تو کمزوری اور نقاہت کی وجہ سے اور زرہ کے بوجھ کے باعث سنبھل نہیں پائے اور اس گڑھے میں جاگرے، حضرت علیؓ نے آپؐ کا دست مبارک تھاما اور حضرت طلحہ بن عبید اللہؓ نے سہارا دے کر اٹھایا، یہاں تک کہ آپؐ سیدھے کھڑے ہوگئے، رسول اللہ ﷺ نے فرمایا جو شخص روئے زمین پر چلتا پھرتا شہید دیکھنا چاہتا ہے وہ طلحہ بن عبیداللہؓ کو دیکھ لے۔ (سیرۃ ابن ہشام: ۳/۳۵)

صحابہ کرامؓ کی جاں نثاری:

اس موقع پر متعدد صحابۂ کرامؓ نے رسول اللہ صلی اللہ علیہ وسلم کی حفاظت کے لئے قربانی اور جاں نثاری کے قابل رشک مظاہرے کئے، ایک خاتون ام عمّارہؓ (نُسَیْبہ بنت کعب) بھی آپؐ کے دفاع میں پیش پیش رہیں، وہ کبھی آپ صلی اللہ علیہ وسلم کے دائیں طرف آجاتیں اور کبھی بائیں طرف، کبھی ان کے ہاتھ میں تلوار ہوتی اور کبھی تیر وکمان، ایک موقع پر وہ ابن قمیہ سے الجھ گئیں، یہ وہ بدبخت ہے جس نے رسول اللہ صلی اللہ علیہ وسلم پر تلوار سے حملہ کیا تھا، اس نے حضرت ام عمارہؓ پر بھی تلوار چلائی، تلوار ان کے کاندھے پر لگی، مگر وہ زخم کی پروا کئے بغیر لڑتی رہیں، جواب میں انھوں نے بھی ابن قمیہ پر وار کیا، اس کے جسم پر دو دو زرہیں تھیں اس لئے وہ بچ گیا، مگر ام عمارہؓ کو بھی راستے سے نہ ہٹا سکا، ایک موقع پر رسول اللہ صلی اللہ علیہ وسلم نے دیکھا کہ ام عمارہ کے پاس ڈھال نہیں ہے، آپ نے ایک صحابیؓ سے فرمایا کہ وہ اپنی ڈھال ام عمارہؓ کو دے دیں، ان کے ساتھ ان کے شوہر زید بن عاصمؓ، اور دو بیٹے حبیبؓ اور عبد اللہؓ بھی مشرکین سے شیروں کی طرف لڑ رہے تھے۔ (سیرت ابن ہشام: ۳/۳۷)

ایک موقع ایسا بھی آیا کہ رسول اللہ صلی اللہ علیہ وسلم کو دشمنوں نے گھیر لیا، آپؐ نے آواز لگائی کون ہے جو ہمارے لئے اپنے آپ کو بیچے گا، یہ سن کر زیاد بن مسکنؓ کھڑے ہوئے، بعض روایات میں ہے کہ عمارہ بن یزید بن مسکنؓ کھڑے ہوئے، ان کے ساتھ چار پانچ انصاری صحابہؓ بھی تھے، یہ سب حملہ آوروں سے لڑنے لگے، یہ کم تھے، حملہ آوروں کی تعداد زیاہ تھی، تمام صحابہ لڑتے لڑتے شہید ہوگئے، آخر میں زیاد یا عمارہ رہ گئے جو زخموں سے چور تھے، آپؐ نے صحابہ سے فرمایا کہ ان کو میرے قریب لاؤ، لوگوں نے اٹھا کر آپؐ کے قدموں میں ڈال دیا، زیادؓ یا عمارہؓ نے اپنے رخسار آپؐ کے قدموں پر رکھ دئے اور اپنی جان جاں آفریں کے سپرد کردی۔ (تاریخ الطبری: ۲/۶۵، ۶۶، الاصابہ: ۳/۱۹، الدلائل للبیہقی: ۳/۲۳۴)۔

حضرت ابودجانہؓ کفار کی طرف پشت کرکے کھڑے ہوگئے، اور دشمن جو تیر آپ صلی اللہ علیہ وسلم کی طرف پھینک رہے تھے انہیں اپنی پیٹھ پر روکتے رہے، ان کی پیٹھ پر ستر کے قریب زخم آئے، لیکن انھوں نے صبر واستقامت کا مظاہرہ کیا اور اس وقت تک اپنی جگہ سے نہیں ہلے جب تک مشرکین کے تیروں کا رخ دوسری طرف نہیں ہوگیا، حضرت کعب بن مالکؓ فرماتے ہیں کہ میں نے زرہ میں ملبوس ایک لمبے تڑنگے شخص کو دیکھا کہ وہ مسلمانوں پر بھاری پڑ رہا ہے، اور ان پر مسلسل حملے کررہا ہے، اتنے میں ایک نقاب پوش شخص سامنے آیا، اور اس نے لحیم شحیم شخص پر تلوار سے اتنا زبردست حملہ کیا کہ تلوار اس کے کاندھے سے لے کر ران تک چیرتی ہوئی چلی گئی وہ کافر زرہ سمیت دو ٹکڑوں میں بٹ گیا، نقاب پوش نے اپنا چہرہ کھولا تو وہ ابو دجانہؓ تھے۔ (البدایہ والنہایہ: ۵/۳۵۹)

حضرت سعد بن أبی وقاصؓ بھی بے جگری سے لڑ رہے تھے، یہ بھی آپؐ کے قریب ہی تھے، ان کو تیر چلاتے ہوئے دیکھ کر آپ خوش بھی ہورہے تھے اور ان کا حوصلہ بھی بڑھا رہے تھے، آپؐ اپنے ترکش سے تیر نکال کر ان کو دیتے اور فرماتے اے سعد تم پر میرے ماں باپ قربان ہوں اور تیر چلاؤ۔ حضرت علی کرم اللہ وجہہ فرماتے ہیں کہ میں نے کبھی نہیں سنا کہ رسول اللہ صلی اللہ علیہ وسلم نے کبھی کسی کے لیے فداک أبی وأمی کہا ہو۔ (صحیح البخاری: ۵/۹۷، رقم الحدیث: ۴۰۵۹، صحیح مسلم: ۴/۱۸۷۶، رقم الحدیث: ۲۴۱۱، تاریخ الطبری: ۲/۶۶، سیرت ابن ہشام: ۳/۳۷، کتاب الأغانی: ۱۴/۱۸،۱۹)

یہ دن حضرت طلحہؓ کے نام تھا، آپ صلی اللہ علیہ وسلم کی حیات طیبہ میں جب بھی غزوۂ اُحد کا ذکر ہوتا آپ ارشاد فرماتے وہ دن تو تمام کا تمام طلحہؓ کا تھا، ان الفاظ مبارکہ کے ذریعے آپ طلحہؓ کی کارکردگی کو سراہتے اور ان کی شجاعت کو داد دیتے، جب تک جنگ جاری رہی حضرت طلحہؓ آپ صلی اللہ علیہ وسلم کی حفاظت کے لئے آپ کے قریب ہی موجود رہے اور دشمنوں کی طرف سے آنے والے تیروں کو اپنے ہاتھوں پر روکتے رہے یہاں تک کہ ان کا ہاتھ شل ہوگیا، ان کے بدن پر چالیس کے قریب زخم شمار کئے گئے۔ (صحیح البخاری:۵/۲۲، رقم الحدیث: ۳۷۲۴، فتح الباری: ۷/۳۶۱) حضرت انسؓکے سوتیلے والد حضرت ابو طلحہ الانصاریؓ نے بھی تیر اندازی میں بے مثال بہادری کا مظاہرہ کیا جب بھی کوئی صحابی رسول اللہ صلی اللہ علیہ وسلم کے پاس سے گزرتے آپ ان سے فرماتے اپنے ترکش سے تیر نکال کر ابو طلحہؓ کو دو، حضرت ابو طلحہؓ نے اس غزوے میں کئی کمانیں توڑیں۔ (صحیح البخاری: ۵/۹۷، رقم الحدیث: ۴۰۶۴)

اس جنگ میں حضرت قتادہؓ کی آنکھ پھوٹ گئی تھی، اس کا قصہ کچھ یوں ہوا کہ رسول اللہ صلی اللہ علیہ وسلم تیر چلا رہے تھے کہ کمان کا ایک حصہ ٹوٹ گیا، انھوں نے وہ ٹوٹی ہوئی کمان رسول اللہ صلی اللہ علیہ وسلم سے اپنے ہاتھوں میں لے لی، کسی طرح اس کا ٹوٹا ہوا حصہ ان کی آنکھ میں لگ گیا، آنکھ پھوٹ گئی، اور قتادہؓ منہ کے بل نیچے گر پڑے، رسول اکرم صلی اللہ علیہ وسلم نے ان کی آنکھ پر دست مبارک پھیرا، وہ آنکھ دوبارہ روشن ہوگئی، بلکہ پہلے کی بہ نسبت اس آنکھ سے اور بہتر نظر آنے لگا۔ (دلائل النبوۃ للبیہقی: ۳/۲۵۲)

عبد الرحمن بن عوفؓ بھی جی جان سے لڑ رہے تھے، کسی کافر نے پتھر پھینک کر مارا، وہ ان کے چہرے پر لگا، جس سے ان کا ایک دانت ٹوٹ گیا، اور بدن پر بیس سے بھی زیادہ زخم آئے، ایک پاؤں بھی زخمی ہوگیا، جس سے وہ لنگڑے ہوگئے۔ (المستدرک للحاکم: ۳/۳۰۸)

خلاصہ یہ کہ تمام صحابہ نے میدان جنگ میں اپنی بہادری اور دلیری سے دشمنوں کو پیچھے ہٹنے پر مجبور کردیا، ان کو راہ فرار اختیار کرتے ہوئے دیکھ کر تیر انداز صحابہ پہاڑی سے ہٹ گئے، خالد بن ولید نے میدان خالی دیکھ کر دوبارہ حملہ کردیا، اِدھر یہ افواہ پھیل گئی کہ رسول اکرم صلی اللہ علیہ وسلم شہید ہوچکے ہیں، مسلمانوں پر یہ خبر بجلی بن کر گر پڑی، ان میں مایوسی پھیل گئی، بہت سے لوگ واپس جانے لگے، کچھ لوگ میدان سے ہٹ کر ایک طرف بیٹھ گئے، اس طرح جیتی ہوئی جنگ شکست میں بدل گئی۔(جاری)

21 جنوری 2022، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے