Mon Jan 20 2025, 08:57 AM

Urdu Section ( 14 Dec 2021, NewAgeIslam.Com)

Then He Said, ‘It Was Not For a Prophet to Take Up Arms and Put Them Down’ Part-61 تب آپ نے ارشاد فرمایا: کسی نبی کے لئے یہ مناسب نہیں کہ ہتھیار لگا کر اُتاردے

مولانا ندیم الواجدی

10 دسمبر،2021

جنگ کی تیاری

اس فیصلے کے بعد تمام ہزیمت خوردہ مشرکین ایک نئے جذبے کے ساتھ جنگ کی تیاری میں مصروف ہوگئے۔ پہلے مرحلے میں انہوں نے مکہ مکرمہ کے ارد گرد رہنے والے قبائل کے ساتھ رابطہ کیا اور انہیں اپنے عزم سے آگاہ کیا۔ کنانہ اورتہامہ کے قبائل قدم بہ قدمن مشرکین کے ساتھ تھے،بہت سے لوگ جن میں سرفہرست عمر و بن العاص، طلحہ بن ابی طلحہ ، ہبیرہ بن ابی وہب وغیرہ تھے ، وفود کی شکل میں اور انفرادی طور پر مختلف قبیلوں میں پہنچے اور ان کے جاں بازوں کو اس فیصلہ کن جنگ میں شرکت کی دعوت دی۔ اس جنگ کی خاص بات یہ تھی کہ اس میں شرکت کیلئے عورتوں کوبھی ساتھ لیا گیا، ان میں کئی خواتین وہ تھیں جن کے باپ، بھائی یا بیٹے بدر میں مارے گئے تھے اور وہ انتقام کی آگ میں جل رہی تھیں ، چنانچہ ابوسفیان اورجو لشکرکفار کا قائد تھا اور اپنی بیوی ہند بنت ابی عتیہ کو لے کر گیا،عکرمہ بن ابی جہل کے ساتھ ام حکیم، حارث بن ہشام کے ساتھ فاطمہ ، بنت ولید ، صفوان ابن ابی امیہ کے ساتھ برزہ بنت مسعود تھیں، او ربھی کچھ خواتین تھیں جن کاذکر تاریخ کی کتابوں میں تفصیل کے ساتھ موجود ہے۔ عورتوں کو ساتھ لے جانے کامقصد اس کے سوا کچھ نہ تھا کہ وہ رجزیہ اشعار پڑھیں گی، لڑنے والوں کی ہمت بڑھائیں گی اور بھاگنے والوں کو غیرت دلائیں گی۔ ویسے بھی عربوں کو اپنی بہو بیٹوں ،ماؤں بہنوں اور بیویوں کی حرمت کے سلسلے میں کچھ زیادہ ہی غیرت تھی، عورتوں کو فوج کا حصہ اس لئے بھی بنایا گیا تاکہ ان کے بے حرمتی کے خیال سے لڑنے والے خم ٹھونک کر میدان میں اتریں ،سینہ ٹھونک کر لڑیں اور میدان جنگ سے فرار ہونے کی کوشش نہ کریں۔(سیرت بن ہشام ،3؍7)

ابوعزہ بن عبداللہ بھی مشرکین کے ساتھ روانہ ہوا،حالانکہ یہ وہ شخص ہے جس رسول اللہ صلی اللہ علیہ وسلم نے زبردست احسان فرمایا تھا ، یہ شخص بدر کی جنگ میں قید ہوا او راسے دوسرے قیدیوں کے ساتھ مدینے لایا گیا، جب یہ تمام قیدی رسول اللہ صلی اللہ علیہ وسلم کی خدمت میں پیش ہوئے او رانہیں بتلایا گیا کہ اب تمہاری رہائی زر فدیہ دے کر ہی ہوسکتی ہے تو اس نے عرض کیا یا رسول اللہ صلی اللہ علیہ وسلم میں ایک غریب آدمی ہوں ، اس پر کثیرالعیال بھی ہوں، میری غربت اور محتاجگی کا حال آپ پر مخفی نہیں ہے، اس لئے آپ صلی اللہ علیہ وسلم مجھ پر احسان فرمائیں او رمجھے زر فدیہ لئے بغیر ہی آزاد کردیں۔ رسول اللہ صلی اللہ علیہ وسلم نے اسے اس وعدے پر رہا فرما دیا کہ وہ آئندہ کبھی بھی کفار کے ساتھ مسلمانوں کے مقابلے میں نہیں آئے گا۔غزوہ احد کیلئے جب لوگوں کی بھیڑ اکٹھی ہونے لگی توصفوان بن امیہ نے اس سے کہا کہ اے ابوعزہ تم ایک بہترین شاعر ہو، اس موقع پر تمہیں بھی ہمارے ساتھ ہونا چاہئے، کچھ نہیں تو تم اپنی شاعری ہی کے ذریعے ہماری مدد کردینا، اس نے جواب دیا کہ مجھ پر محمد صلی اللہ علیہ وسلم نے احسان کررکھا ہے،میں ان کے سامنے خو د کو ظاہر نہیں کرناچاہتا ۔ انہوں نے مجھے اس شرط پر چھوڑ دیا تھاکہ آج کے بعد میں ان کے خلاف کسی کو نہ ورغلاؤں گا اور نہ بھڑکاؤں گا ۔مگر صفوان کے دیئے ہوئے لالچ کے سامنے اس کے قدم لڑکھڑا گئے ، وہ اپنے وعدے پر قائم نہ رہ سکا ۔ صفوان نے اس کو یہ لالچ دیا کہ تم ہمارے ساتھ چلو اور اپنی ذات سے اس جنگ میں حصہ لو، اگر خیریت کے ساتھ واپس آگئے تو میں تمہیں مالامال کردوں گا اور اگر مارے گئے تو تمہاری بیٹیاں میری بیٹیوں کے ساتھ رہیں گی، تنگی اور خوش حالی میں جو میری بیٹیوں کا حال ہوگا وہی حال تمہاری بیٹیوں کاہوگا، اس لالچ کے آگے وہ ڈھیر ہوگیا اور جنگ میں حصہ لینے کیلئے آمادہ ہوگیا۔( سیرت ابن ہشام ، 3؍20)

قریش نے اس جنگ میں حصہ لینے کے لئے لوگوں کو کس کس طرح آمادہ کیا اور انہیں کیسے کیسے لالچ دیئے ، اس کااندازہ وحشی کے واقعہ سے لگایا جاسکتا ہے۔ یہ جبیربن مطعم کا غلام تھا، جب فوج میں بھرتی کرنے کے لئے وفود نے قبائل کا دورہ شروع کیا تو نافع بن عبدمناف نے جبیر سے رابطہ کیا، جبیر نے اپنے غلام وحشی کو سامنے کردیا، یہ بہترین تیر انداز تھا، اس کانشانہ کم ہی خطا ہوتاتھا، جبیر نے اس سے کہا کہ تم بھی ہمارے ساتھ چلو،اگر تم نے میرے چچا طعیمہ بن عدی کے بدلے محمد صلی اللہ علیہ وسلم کے چچا حمزہ رضی اللہ عنہ بن عبدالمطلب کو قتل کردیا تو میں تمہیں آزاد کردو ں گا۔ جبیربن مطعم کی زبان سے آزادی کا نام سن کر وحشی فوراً تیار ہوگیا۔ (سیرت ابن ہشام ،3؍18)

دوسری طرف ہند بنت عتیہ ابن ربیعہ بھی اپنے دو بھائیوں ابو حذیفہ بن عتیہ اور ولید بن عتیہ او راپنے باپ عتیہ ابن ربیعہ کے قتل کاانتقام لینے کے لئے بے چین تھی، اسے جب یہ معلوم ہوا کہ وحشی حمزہ کے قتل کے لئے خصوصی ہدایت ملی ہے تو اس نے بھی وحشی کو لالچ دیا او رکہا کہ اگر تونے حمزہ کو قتل کرکے میرا کلیجہ ٹھنڈا کردیا تو میں تجھے خوش کردو ں گی۔ (کتاب المغازی ، واقدی ، 1؍285)

قریش کی روانگی

قریش کا یہ فوجی قافلہ پورے جاہ و حشم او رمکمل ساز وسامان کے ساتھ 5 ؍شوال المکرم سن 3ھ کو مکہ مکرمہ سے روانہ ہوا، اس قافلے میں شامل لوگوں کی تعداد تین ہزار تھی، سات سو لوگ زرہ پوش تھے ، دو سو گھوڑے اور تین ہزار اونٹ بھی ساتھ تھے، لمبا سفر طے کر کے یہ قافلہ مدینے کے باہر جبل احد کے قریب مقام عینین میں خیمہ زن ہوا، فوج کی قیادت ابوسفیان کررہاتھا، گھوڑ سواروں کا دستہ خالد بن ولید کی سرکردگی میں تھا، پندرہ عورتیں بھی ان کے ساتھ تھیں جو تمام راستے رجزیہ اشعار پڑھ کر مشرکین کالہو گرما تی رہیں۔

حضور اکرم صلی اللہ علیہ وسلم کو قریش کی تیاری اور روانگی کی خبر مل چکی تھی، حضور صلی اللہ علیہ وسلم کے چچا حضرت عباس رضی اللہ عنہ بن عبدالمطلب اگرچہ جنگ بدر اسیروں میں شامل تھے، مگر وہ دوبارہ مشرکین کے ساتھ لڑنے کیلئے نہیں آئے، بلکہ انہیں جیسے ہی یہ اطلاع ملی کہ قریش ایک فیصلہ کن جنگ کرنے کے ارادے سے نکلنے کاعزم رکھتے ہیں، انہوں نے قبیلہ غفار کے ایک ہوشیار آدمی کو اس شرط کے ساتھ مدینے بھیج دیا کہ وہ تیز رفتار سواری کے ذریعے جلد از جلد مدینے پہنچے اور رسول اللہ صلی اللہ علیہ وسلم کی خدمت میں حاضر ہوکر مشرکین کے عزائم کی اطلاح دے۔ (سیرت ابن کثیر،3؍20 ، زادالمعاد،3؍150)

صحابہ سے مشورہ

رسول اللہ صلی اللہ علیہ وسلم کو جیسے ہی یہ اطلاع ملی کہ قریش جنگ کے ارادے سے ایک بڑی تعداد کے ساتھ مدینے آرہے ہیں، آپ صلی اللہ علیہ وسلم نے حضرت انس رضی اللہ عنہ اور حضرت مونس رضی اللہ عنہ کو مکہ کی طرف دوڑایا تاکہ وہ دونوں یہ دیکھ کر آئیں کہ قریش کا قافلہ کہاں تک پہنچ چکا ہے۔ انہوں نے آکر خبردی کہ قریش مدینے کے قریب آکر فرد کش ہوچکے ہیں ۔ اس کے بعد آپ صلی اللہ علیہ وسلم نے حضرت حباب بن منذر رضی اللہ عنہ کو یہ دیکھنے کے لئے بھیجا کہ فوج میں کتنے لوگ شامل ہیں۔ انہوں نے واپس آکر قریش کی تعداد سے آگاہ کیا۔ اس رات مدینے میں سب لوگ جاگتے رہے ، بہت سے صحابہ رضی اللہ عنہ کو مدینے کے اطراف میں مناسب جگہوں پر بٹھا یا گیا تاکہ وہ دشمنوں کی نقل و حرکت پرنظررکھیں او رکوئی غیر معمولی بات نظر آئے تو فوراً حاضر خدمت ہوکر اس کی اطلاع دیں۔ حضرت سعد بن معاذ رضی اللہ عنہ ، اسید بن حضیررضی اللہ عنہ اور سعد بن عبادہ رضی اللہ عنہ مسجد نبوی کی نگرانی پر مامور کئے گئے، یہ جمعہ کی شب تھی، جمعہ کی صبح کو آپ صلی اللہ علیہ وسلم نے تمام صحابہ رضی اللہ عنہ کو مشورے کے لئے جمع فرمایا، آپ صلی اللہ علیہ وسلم نے ان سے دریافت فرمایا کہ اس صورت حال میں ہمیں کیا کرناچاہئے ، کیاہم لوگ وہاں پہنچ کر ان کامقابلہ کریں جہاں وہ اس وقت پڑاؤ ڈالے ہوئے ہیں یا مدینے میں ٹھہر کر ان کاانتظار کریں۔ خود آپ کی رائے یہ تھی کہ مدینے سے باہر نہ نکلا جائے ،بلکہ یہیں رہ کر ان کا مقابلہ کیا جائے، جب وہ مدینے پر حملہ آور ہوں گے تو ان کو یہیں گلی کوچوں میں گھیر گھیر کر ماراجائے گا، عبداللہ بن ابی منافق کی بھی رائے یہی تھی۔ اس نے تو یہاں تک کہا کہ جو جنگیں ہم نے مدینے میں رہ کر لڑی ہیں ان میں ہم نے کامیابی حاصل کی ہے اور جن جنگوں میں ہم دشمنوں سے مقابلے کے لئے باہر نکلے ہیں ان میں ہمیں شکست کامنہ دیکھنا پڑا ہے۔

بعض پر جوش صحابہ رضی اللہ عنہ کی رائے اس کے برعکس تھی، ان میں کچھ صحابہ رضی اللہ عنہ وہ بھی تھے جو جنگ بدر میں شریک نہ ہوسکے تھے، ان کی دلی تمنا یہ تھی کہ باہر نکل کر دشمنوں سے لڑا جائے۔ دراصل یہ شوق شہادت تھا جو انہیں کوئی لمحہ گنوائے بغیر دشمنوں سے دو بدو ہونے پر اکسارہاتھا، حالانکہ رسول اللہ صلی اللہ علیہ وسلم کی رائے اس کے برعکس تھی۔ جہاں دیدہ اورتجربہ کار عبداللہ بن اُبی بھی باہر نکلنے کے مخالف تھا، بہت سے اکابر صحابہ رضی اللہ عنہ بھی یہی چاہتے تھے کہ رسول اللہ صلی اللہ علیہ وسلم کی رائے گرامی پر عمل کرنا ہی بہتر ہے، مگر پرُ جوش اورجوان العمر صحابہ کااصرار جاری رہا۔

حضرت حمزہ رضی اللہ عنہ ، حضرت سعد بن عبادہ رضی اللہ عنہ اور حضرت نعمان بن مالک رضی اللہ عنہ اس سلسلے میں پیش پیش تھے۔ حضرت نعمان رضی اللہ عنہ نے عرض کیا یا رسول اللہ! ہمیں جنت سے محروم نہ فرمائیں، حضرت حمزہ رضی اللہ عنہ نے عرض کیا: اس ذات کی قسم جس نے آپ صلی اللہ علیہ وسلم پر قرآن نازل کیا ہے میں اس وقت تک کھانانہیں کھاؤں گا جب تک مدینے سے باہر نکل کر تلوار سے دشمن کا مقابلہ نہ کرلوں، رسول اللہ صلی اللہ علیہ وسلم نے اپنی رائے واپس لے لی، آپ صلی اللہ علیہ وسلم گھر کے اندر تشریف لے گئے او رہتھیار لگا کر باہر تشریف لائے۔

بعض صحابہ نے اصرار کیا اوربہت زیادہ اصرار کیا، مگر جلد ہی انہیں اپنی غلطی کااحساس بھی ہوگیا۔ آپ صلی اللہ علیہ وسلم ہتھیار لگاکر باہر تشریف لائے تو اصرار کرنے والے صحابہ کرام رضی اللہ عنہ نے عرض کیا: یا رسول اللہ صلی اللہ علیہ وسلم ! اگر آپ مدینے میں ہی رہنا پسند فرماتے ہیں تو ہمیں اپنی رائے پر اصرار نہیں ہے، آپ صلی اللہ علیہ وسلم اپنی رائے عالی پر عمل فرمائیں ، اب تک ہم نے آپ صلی اللہ علیہ وسلم کی خدمت میں جو معروضات پیش کیں وہ بربنائے شوقِ شہادت تھیں، اب ہمیں اپنی غلطی کا احساس ہوگیا ہے، آپ صلی اللہ علیہ وسلم کی رائے کے سامنے ہماری رائے کی نہ کوئی اہمیت ہے نہ قیمت ، ہماری التجا ہے کہ آپ صلی اللہ علیہ وسلم اپنی رائے کے مطابق ہی فیصلہ فرمائیں۔

رسول اللہ صلی اللہ علیہ وسلم نے ارشاد فرمایا: کسی بنی کے لئے یہ مناسب نہیں ہے کہ وہ ہتھیار لگا کر اتار دے، یہاں تک کہ اللہ اس کے اور دشمن کے درمیان کوئی فیصلہ نہ کردے۔ گویا آپ صلی اللہ علیہ وسلم نے یہ اعلان فرما دیا کہ اب جنگ باہر نکل کر ہی ہوگی، یہ ہتھیار اب جنگ کے بعد ہی اتارے جائیں گے۔ (زاد المعار، 3؍148، مسند احمد، 3؍351 ، سنن دارمی،2؍129) (جاری)

10 دسمبر،2021 ، بشکریہ : انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے