Thu Dec 12 2024, 08:01 PM

Urdu Section ( 10 May 2021, NewAgeIslam.Com)

Prophet (SAW) Could Have Settled in Mecca after Its Conquest Part-31 فتح مکہ کے بعد مکہ ہی مستقر بن سکتا تھا، مگر آپؐ نے ایسا نہیں کیا، پاسِ عہد مانع تھا

مولانا ندیم الواجدی

7 مئی 2021

مہاجرین اور انصار:

دوسری طرف انصار صحابہ کے فضائل بھی بے شمار ہیں۔ محدثین نے اپنی کتابوں میں انصار کے فضائل پر مستقل ابواب قائم کئے ہیں، اس موضوع پر مستقل کتابیں بھی لکھی گئی ہیں، انصار کی فضیلت کے لئے یہ بات کیا کم ہے کہ یہ لقب خود اللہ نے انہیں عطا کیا ہے، جیسا کہ قرآن کریم میں ہے: ’’اور مہاجرین وانصار میں سے جو لوگ پہلے ایمان لائے۔‘‘ (التوبہ:۱۰۰) ایک روایت میں ہے، رسول اللہ صلی اللہ علیہ وسلم نے ارشاد فرمایا: انصار کی محبت ایمان کی علامت ہے اور ان سے بغض رکھنا نفاق کی علامت ہے۔ (صحیح البخاری: ۱/۱۲، رقم الحدیث: ۱۷، صحیح مسلم:۱/۸۵، رقم الحدیث: ۷۴) ایک مرتبہ آپ صلی اللہ علیہ وسلم نے انصار کی کچھ خواتین اور بچوں کو شادی کی کسی تقریب سے واپس آتے ہوئے دیکھا، آپؐ انہیں دیکھ کر کھڑے ہوگئے اور ارشاد فرمایا: مجھے لوگوں میں سب سے زیادہ محبوب تم ہو، یہ بات آپؐ نے تین مرتبہ ارشاد فرمائی۔ (صحیح البخاری: ۵/۳۲، رقم الحدیث: ۳۷۸۵، صحیح مسلم:۴/۱۹۴۸، رقم الحدیث: ۲۵۰۸) ایک مرتبہ انصاری صحابہ کرامؓ سے خطاب کرتے ہوئے آپ صلی اللہ علیہ وسلم نے ارشاد فرمایا: اے گروہ ِانصار! کیا میں تمہارے پاس اس وقت نہیں آیا جب تم راہ راست سے بھٹکے ہوئے تھے، اللہ نے میری وجہ سے تمہیں ہدایت عطا فرمائی؟ کیا میں تمہارے پاس اس وقت نہیں آیا جب تم مختلف گروہوں میں بٹے ہوئے تھے، اللہ نے میری وجہ سے تمہارے دلوں میں الفت پیدا فرمادی؟ انہوں نے عرض کیا: کیوں نہیں، یا رسولؐ اللہ! اس کے بعد آپ صلی اللہ علیہ وسلم نے ارشاد فرمایا: تم لوگ یہ کیوں نہیں کہتے کہ آپؐ ہمارے پاس اس وقت تشریف لائے جب آپؐ کی قوم نے آپؐ کو وطن سے نکالا ہم نے آپؐ کو پناہ دی، آپؐ ہمارے پاس شکستہ حالت میں آئے تھے ہم نے آپؐ کی مدد ونصرت کی۔ انہوں نے عرض کیا: نہیں! یا رسول اللہﷺ! آپؐ کا ہمارے پاس تشریف لانا اللہ اور اس کے رسولؐ کا ہم پر احسان ہے۔ (مسند احمد بن حنبل:۱۹/۷۸، رقم الحدیث: ۱۲۰۲۱)

انصار کے لئے یہ کتنی بڑی فضیلت اور کس قدر عظیم سعادت ہے کہ رسول اللہ صلی اللہ علیہ وسلم نے ان کے ساتھ رہنا پسند فرمایا حالانکہ فتح مکہ کے بعد آپ وہاں تشریف لے جاسکتے تھے، لیکن انصار سے آپ نے جو وعدہ فرمایا تھا اسے پورا فرمایا اور دنیا سے پردہ فرمانے کے بعد قیامت تک کے لئے آرام گاہ کے طور پر اسی سرزمین کا انتخاب فرمایا۔ ایک مرتبہ آپؐ نے یہ بھی فرمایا کہ اگر لوگ کسی ایک گھاٹی کی طرف جارہے ہوں اور انصار دوسری گھاٹی کی طرف تو میں انصار کے ساتھ چلنا پسند کروں گا، اگر ہجرت نہ ہوتی تو میں انصار ہی میں سے ایک ہوتا۔ (سنن الترمذی:۵/۷۱۲، رقم الحدیث: ۳۹۰۱، مسند احمد بن حنبل:۱۶/۳۰۳، رقم الحدیث: ۱۰۵۰۸)

اوس و خزرج

یثرب کے ان دو قبیلوں کا ذکر پہلے بھی آچکا ہے۔ یہ دونوں قبیلے یمن سے یہاں آکر آباد ہوئے تھے۔ ابتدا میں شیر و شکر ہو کر رہے، بعد میں عربوں کی جنگجو فطرت غالب آئی اور یہ دونوں قبیلے آپس میں دست و گریباں رہنے لگے۔ خزرج عددی اعتبار سے بڑا اور اوس نسبتاً چھوٹا قبیلہ تھا۔ یہ دونوں قبیلے بات بات پر لڑنے کے لئے تیار رہتے تھے، ان کے درمیان بے شمار جنگیں ہوئیں، آخر ی لڑائی جو ہجرت سے کچھ پہلے لڑی گئی جنگ بُعاث کے نام سے مشہور ہے۔ یہ اس قدر ہولناک اور خونریز تھی کہ برسوں چلتی رہی اور اس میں دونوں قبیلوں کے تمام بہادر افراد مارے گئے۔ یہ آگ اس وقت تھمی جب ان دونوں قبیلوں کو اللہ تعالیٰ نے اسلام کے سایۂ رحمت میں جگہ دینے کا فیصلہ کیا۔ اسلام قبول کرنے کے بعد یہ دونوں متحد ہو کر رہنے لگے۔ قرآن کریم میں اوس و خزرج پر اللہ تعالیٰ کے اس بے پایاں احسان و کرم کا بہ طور خاص ذکر کیا گیا ہے۔ فرمایا: ’’اور اللہ تعالیٰ نے تم پر جو انعام کیا ہے اسے یاد رکھو، ایک وقت وہ تھا جب تم ایک دوسرے کے دشمن تھے، پھر اللہ نے تمہارے دلوں کو جوڑ دیا اور تم اللہ کے فضل سے بھائی بھائی بن گئے۔‘‘(آل عمران:۱۰۳)

اوس و خزرج مشرک و بت پرست تھے، یہ دونوں قبیلے قلب شہر میں رہتے تھے۔ اطراف میں کچھ یہودی قبائل آباد تھے جو نہایت مضبوط قلعوں میں رہتے تھے۔ یہودی نہ صرف یہ کہ اپنا علمی دبدبہ رکھتے تھے، بلکہ ان کو یہ زعم بھی تھا کہ وہ آسمانی کتاب کے حامل ہیں۔ تہذیبی، تمدنی اور ثقافتی اعتبار سے بھی یہ لوگ علاقے پر چھائے رہتے تھے۔ مالی اعتبار سے بھی مضبوط تھے، اوس و خزرج نے اپنی توانائی جنگوں میں ضائع کردی تھی۔ ایک طرح سے وہ یہودیوں کے دست نگر رہتے تھے اور ان سے مرعوب بھی ۔ اللہ کے رسول صلی اللہ علیہ وسلم کی تشریف آوری سے قبل ہی یثرب کے ان دو قبیلوں کے کافی لوگ مسلمان ہوچکے تھے، جو رہ گئے تھے وہ آپ صلی اللہ علیہ وسلم کی تشریف آوری کے بعد مسلمان ہوگئے، ان میں کچھ لوگ ایسے بھی تھے جو ظاہراً تو مسلمان ہوگئے مگر دل سے اپنے پرانے دین پر ہی قائم رہے۔ ایسے لوگوں میں دو نام اہمیت کے ساتھ قابل ذکر ہیں، ایک ابوعامر اور دوسرا عبداللہ بن اُبی بن سلول۔ دونوں کا تعلق خزرج سے تھا۔ ابوعامر کی نیکی اور دینداری کی دور دور تک شہرت تھی۔ لوگ اسے عزت کی نظر سے دیکھتے تھے۔ دوسری طرف عبداللہ بن اُبی اپنی سوجھ بوجھ اور دانش مندی کی وجہ سے مشہور تھا۔ رسول اللہ صلی اللہ علیہ وسلم کی تشریف آوری سے عین قبل اوس و خزرج کے مابین اس بات پر اتفاق ہوچکا تھا کہ عبداللہ بن اُبی کے سر پر یثرب کے بادشاہ کا تاج رکھ دیا جائے۔ تاج تیار ہوچکا تھا، بس کسی تقریب میں اُسے پہنانے کی رسم باقی تھی کہ رسول اکرم صلی اللہ علیہ وسلم مدینے میں تشریف لے آئے، آپؐ کے تشریف لانے کے بعد سب کے چراغ بجھ گئے، نہ ابوعامر کے تقوے اور طہارت کی اہمیت باقی رہی اور نہ عبداللہ بن اُبی کی سیاسی بصیرت میں کسی کے لئے کوئی دل کشی رہی۔ سب کا مرجع اور مرکز آپ صلی اللہ علیہ وسلم کی ذات والا صفات بن گئی، دونوں کو اپنی مذہبی اور سیاسی قیادت چھننے کا بڑا ملال تھا جو آخری وقت تک رہا، بہ ظاہر تو انہوں نے اپنی قوم کے ساتھ کلمہ شہادت پڑھ لیا، مگر دل سے کافر کے کافر ہی رہے۔ قرآن نے ایسے لوگوں کے لئے ایک نئی اصطلاح وضع کی؛ المنافقون۔ منافقین کا یہ ٹولہ شروع ہی سے سرگرم رہا اور تاریخ کے ہر دور میں اپنا کردار ادا کرتا رہا۔

قبائلِ یہود

مدینے کے اطراف میں یہودیوں کے تین بڑے قبیلے آباد تھے، بنو قینقاع، بنو نضیر اور بنو قریظہ۔ کچھ اور چھوٹے چھوٹے قبیلے بھی ان کے ارد گرد بسے ہوئے تھے۔ جب تک آپ صلی اللہ علیہ وسلم کی نبوت ظاہر نہیں ہوئی تھی یہودی علماء اپنے عوام کو مستقل طور پر یہ بتلاتے رہتے تھے کہ عنقریب نبی آخر الزماں تشریف لانے والے ہیں اور وہ اِن علامات کے ساتھ ظاہر ہوں گے، یثرب ان کا دار الہجرت ہوگا۔ اوس و خزرج کے وہ لوگ جو یہودی علماء کے پاس آتے جاتے اور اٹھتے بیٹھتے تھے یہ باتیں سن چکے تھے، اس لئے جب انہوں نے حج کے سفر میں یہ سنا کہ مکہ مکرمہ میں ایک شخص نے نبوت کا دعویٰ کیا ہے تو انہوں نے علماء یہود کی بتلائی ہوئی نشانیوں کے آئینے میں آپ صلی اللہ علیہ وسلم کی شخصیت کا عکس دیکھنے کی کوشش کی۔ تب ان پر منکشف ہوگیا کہ یہ تو وہی آخری پیغمبر ہیں جن کی پیش گوئی آسمانی کتابوں میں ہے، اس لئے انہوں نے سبقت کی اور یہ دین قبول کرلیا، ہونا تو یہ چاہئے تھا کہ یہودی پہلے اسلام قبول کرتے اور آپؐ پر ایمان لاتے، کیونکہ وہ آسمانی کتاب تورات کے حامل تھے، انہیں معلوم تھا کہ آخری پیغمبر کا ظہور ہونے والا ہے اور وہ ہجرت کرکے یہاں تشریف لانے والے ہیں، مگر جب آپ ﷺیہاں تشریف لے آئے تو علماء یہود کی اکثریت کا اور ان کے ساتھ عوام کا رویہ معاندانہ اور مخالفانہ رہا، آپؐ کی تشریف آوری سے یہود کے مذہبی وقار میں کمی آنے لگی، مشرکین میں یہودیت کی اشاعت بھی رک گئی اور وہ یہ سوچنے لگے کہ اوس و خزرج اور مکہ سے آئے ہوئے لوگ ان پر غالب آجائیں گے اور خطے میں ان کو جو سیاسی اور سماجی برتری حاصل ہے وہ ختم ہوجائے گی۔مستقبل کے ان ہی اندیشوں نے انہیںقبولِ حق سے باز رکھا۔

اسلام اور پیغمبر اسلام سے یہودیوں کے عناد اور دشمنی کی کچھ اور بھی وجوہات تھیں، جب آپ صلی اللہ علیہ وسلم ہجرت کرکے مدینے میں تشریف لائے تو آپؐ نے بیت المقدس کی طرف رخ کرکے نماز پڑھنی شروع کی، کیونکہ اس وقت بیت المقدس ہی قبلہ تھا، مکہ مکرمہ میں بھی مسلمان بیت المقدس ہی کی طرف رخ کرکے نماز ادا کرتے تھے۔ بیت المقدس واحد ایسا مقام ہے جو تینوں آسمانی شریعتوں کے ماننے والوں کی عقیدت کا مرکز رہا ہے اور آج تک ہے۔

یہودیوں نے جب یہ دیکھا کہ محمد صلی اللہ علیہ وسلم عبادت کے وقت اپنا رخ بیت المقدس کی طرف کر لیتے ہیں تو انہیں ایک گونہ خوشی ہوئی اور اس پر فخر بھی ہوا کہ مسلمان انہی کے قبلے کی طرف رخ کرتے ہیں، لیکن سن ۲؍ ہجری میں تحویل قبلہ کا واقعہ پیش آیا، تمام مسلمان مسجد حرام کی طرف رخ کرکے نماز پڑھنے لگے۔اس واقعے نے یہودیوں کے اعزاز کو شدید طور پر متاثر کیا اور ان کے فخر کو سخت چوٹ پہنچائی، وہ یہ کہنے لگے کہ محمدؐ ہر بات میں ہماری مخالفت کرنا چاہتے ہیں، قبلہ بدلنے کا معاملہ بھی اسی سے جڑا ہوا ہے، حالانکہ یہودیوں کا یہ خیال قطعاً غلط تھا۔ اللہ نے یہ بات پہلے ہی واضح کردی تھی کہ قبلے کا معاملہ محض علامتی ہے، اللہ ہر جگہ موجود ہے، اس کی عبادت کے لئے مشرق و مغرب سب برابر ہیں۔

یہود کو مشرکین کے مقابلے میں برتری حاصل تھی، اس کی وجہ یہ تھی کہ وہ آسمانی شریعت کی اتباع کے دعویدار تھے اور ان کے پاس آسمانی کتاب بھی موجود تھی ۔ مشرکین ِ مدینہ یہودیوں کے اس تفوق اور برتری کے معترف تھے، ہر معاملے میں ان سے دب کر رہتے تھے، ایک طرح سے یثرب کا نظامِ حکومت یہودیوں ہی کے ہاتھوں میں تھا۔ رسول اللہ ﷺکی تشریف آوری نے ان کی حیثیت عرفی کو متاثر کیا تھا۔ اب اقتدار و اختیار کا مرکز آپؐ کی ذات بن چکی تھی۔ مشرکین میں سے اگر کسی کے بچے پیدا ہوتے ہی مرجاتے تھے یا کسی کے اولاد نہ ہوتی تھی تو وہ یہ منت مانتا تھا کہ اگر میرے بچہ ہوا تو میں اسے یہودی بنائوںگا، اس طرح بہت سے مشرک والدین کے گھروں میں یہودیت فروغ پا رہی تھی۔ ان کے بچے یہودی بنتے جارہے تھے۔ یہودی علماء اس صورت حال سے خوش رہتے تھے، مگر اسلام نے لوگوں کے دلوں سے یہ توہم بھی نکال دیا کہ یہودی بنانے کے عہد سے بچے زندہ رہتے ہیں۔ اس سے بھی یہودیوں کے کاز کو سخت نقصان پہنچا۔ (جاری ہے)

7 مئی 2021، بشکریہ: انقلاب، نئی دہلی

Part: 1- I Was Taken to the Skies Where the Sound Of Writing with a Pen Was Coming (Part-1) مجھے اوپر لے جایا گیا یہاں تک کہ میں ایسی جگہ پہنچا جہاں قلم سے لکھنے کی آوازیں آرہی تھیں

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا