What Kind of Revenge Is It That One becomes Blood-Thirsty? اپنوں کے خون کاپیاسا یہ کیسا انتقام

سہیل انجم

جب انتقام کی لہریں موج خوں بن کر اپنوں کے سروں سے گزر نے لگیں تو سوچنا پڑتا ہے کہ آخر یہ کیسا انتقام ہے جس کی پیاس اپنوں کے خون سے بھی نہیں بجھ رہی ؟ جب عبادت گاہوں ،درگاہوں ،مذہبی جلوسوں اور پر امن آبادیوں اور شاہراہوں پر خود کش حملے کر کے بے قصور اور معصوم انسانوں کے لہو کے دریا بہائے جائیں تو سوال اٹھتا ہے کہ آخر یہ کیسا جہاد ہے جو بربریت کی داستانیں رقم کررہا ہے ؟ آپریشن ایبٹ آباد میں القاعدہ کے بانی سربراہ اسامہ بن لادن کی ہلاکت کے بعد اسلام کے ان ‘‘مجاہد وں’’ ،غازیوں اور شہیدوں ’’ نے انتقام لینے کی جو دھمکی دی تھی اس کو اپنے ہی دینی بھائیوں کے کشتوں کے پشتے لگا کر بروئے کار لا یا جارہا ہے۔

ایک محتاط انداز ے کے مطابق اس واقعہ کے بعد سے اب تک سو سے زیادہ بے قصوروں کو انتقام کی قربانی گاہ پر بھینٹ چڑھا یا جاچکا ہے لیکن پیاس ہے کہ بجھتی ہی نہیں اور آگ ہے کہ ٹھنڈی ہوتی ہی نہیں ۔ اکثر یہ سوال ذہن میں اٹھتاہے کہ القاعدہ اور طالبان اوردوسری اس قسم کی مذہبی جماعتیں جس اسلام کی نمائندگی کررہی ہیں کیا اس میں خود کشی شہادت اور ظلم وبربریت کار ثواب ہے۔اس اسلام نے جس نے جنگ میں بھی نہتوں پر حملے کو ممنوع قرار دیا تھا ،جس نے عورتوں ،بچوں ، ضعیفوں اور بیماروں کے تحفظ کی ہدایت کی تھی، جس نے پناہ مانگنے والے کو پناہ دینے کی تلقین کی تھی،جس نے دوسرے مذاہب کو برا بھلا کہنے سے روکا تھا ،کیا اسی اسلام کے ایسے ماننے والے پیدا ہوگئے ہیں جو ان ہدایات کی خلاف ورزی کو عین اسلام سمجھتے ہیں ۔ اسامہ بن لادن کو امریکی کمانڈوز نے ہلاک کیا تھا اور اسامہ کے پیرواسلام کے پیرؤوں کو ماررہے ہیں اور موت کا انتقام لے رہے ہیں ۔

انتقام کی یہ آگ نائن الیون کے بعد امریکی فوجی کارروائیوں کے بعد سے ہی بھڑک رہی ہے ۔القاعدہ کے ‘‘مجاہدین’’ مختلف ملکوں میں ان لوگوں کو نشانہ بنا رہے ہیں جو بقول ان کے اسلام کے دشمن ہیں ۔ یوں تو ہندوستان سمیت دوسرے ملکوں میں جانے کتنی کارروائیاں کی گئی ہیں اورکتنے ہی بے قصور انسانوں کو موت کے گھاٹ اتارا گیا ہے لیکن مملکت خداداد پاکستان میں انسانی لہو کا سیلاب آیا ہوا ہے۔ نائن الیون کے بعد سے لے کر اب تک خود کش حملوں اور جوابی کارروائیوں میں کم وبیش 35ہزار لوگ مارے جاچکے ہیں ،ہزاروں خواتین بیوہ ، ہزاروں بچے یتیم اور ہزاروں ضعیف بڑھاپے کی لاٹھی کے محتاج ہوگئے ہیں ۔ لیکن یہ سلسلہ روز وشب ہے کہ ختم ہونے کا نام ہی نہیں لے رہا اور یہ ایسی داستان غم ہے کہ مختصر ہی نہیں ہورہی ۔ہم انسانی لاشوں کے مینار بنانے ، مسلم سروں کی پکی ہوئی فصلیں کاٹنے اور مسلمانوں کے لہو سے دجلہ وفراط کو رنگین کردینے کے تاریخی واقعات کا ذکر باچشم نم کرتے ہیں لیکن کیا 35ہزار انسانی لاشوں سے مینار نہیں بنایئے جاسکتے ۔ سچ بات تو یہ ہے کہ درجنوں مینار بن کر کھڑے ہوسکتے ہیں اور درجنوں قبرستانیں آباد ہوسکتی ہیں ۔ لیکن کشت وخون کا بازار ہے کہ اب تک گرم ہے، لاشیں ہیں کہ اب تک گررہی ہیں ،دھرتی کی مانگ کر انسانی خون سے رنگنے کا سلسلہ اب تک جاری ہے۔ اس کے لئے وہ بھی ذمہ دار ہیں جو بقول خود جہاد کررہے ہیں اور وہ بھی ذمہ دار ہیں جو ا ن جہادی کارروائیوں کے جواب میں کارروائیاں کرتے ہیں اور وہ بھی کم ذمہ دار نہیں جو ان کو نیست ونابود کرنے کےلئے آپریشن چلاتے ہیں ۔ اور یہ بھی ایک حقیقت ہے اسلام اپنے نام پر کی جانے والی ان کارروائیوں سے شرمسار ہے۔برسات تو ہر سال آتی ہے ،گلی کو چے بارش کے پانی سے سال بہ سال شرابور ہوتےہیں، دریاؤں میں طغیانیاں بھی آتی ہیں اور سیلابوں سے زمین کا چہرہ بھی دھل اٹھتا ہے لیکن انسانی خون کے دھبے نہ مٹنے کے ہیں نہ مٹ رہے ہیں۔

ہم اپنے ہی بھائیوں کے ہاتھوں تہہ تیغ کیے جانے والے اپنے دوسرے بھائیوں کی لاشوں سے اٹھنے والے تعفن کو برداشتگ کرنے پر مجبور ہیں اور اپنے ہی جگر گوشوں کو انسانی بم بنتے ہوئے بے چارگی سے دیکھ رہے ہیں۔ دواسلامی ملکوں کے مابین ایک عشرے تک جاری اس ہلاکت خیز جنگ کو ہم بھولے نہیں ہیں جس میں کمسن اور نوخیز بچوں کے ہاتھوں میں ’’جنت کی کنجی ’’ تھما کر محاذ جنگ پر ہر اول دستے میں بھیج دیا جاتا تھا، آج بھی کم سن بچوں کا استعمال کیا جارہا ہے اور نوجوانوں کو جنت میں داخلے کا پروانہ تھما کر خود کش حملہ آور بنایا جارہا ہے ۔ انسانوں کو بموں میں تبدیل کیا جارہا ہے اور انہیں خود کشی کے زرہ بکتر سے لیس کر کے بے قصوروں کی بھیڑ میں جھونک دیا جارہا ہے۔

آج تو اسلام اور کفر کے درمیان کوئی جنگ بھی نہیں ہورہی پھر بھی جہاد کا پرچم بلند ہے اور طبل جنگ مسلسل بجے جارہا ہے ۔ اس یکطرفہ جنگ میں کھڑے ہوئے فوجیوں کے بالمقابل ان کے اپنے ہی لوگ ہیں اور وہ اپنوں کی ہی لاشوں سے گزر تے ہوئے جنت میں داخلے کا راستہ تلاش کررہے ہیں۔القاعدہ  ، طالبان ،جماعت الدعوی ،لشکر جھنگوی ،سپاہ صحابہ ،تحریک جعفر یہ پاکستان ،تحریک نفاذ شریعت محمدی ،سنی تحریک ،سپاہ محمد پاکستان اور الگ الگ مسلکوں کے لیٹر ہیڈ پر قائم متعدد تنظیمیں ہیں جو اس کشت وخون کی ذمہ داران ہیں۔

اسلام کے ان نام نہاد ٹھیکیداروں نے اپنی خون کو آشام معرکہ آرائیوں سے اسلام کو بھی بدنام کیا ہے، جہاد کو بھی رسوا کیا ہے اور انسانیت کو بھی شرمسار کیا ہے۔ ان کی انہی حرکتوں کے سبب پوری دنیا کے مسلمانوں کی پیشانی پر دہشت گرد ہونے کی مہر لگادی گئی ہےاور جہاں بھی دہشت گرد ی کاکوئی خونی واقعہ ہوتا ہے اغیار کی دزدیدہ نظریں مسلمانوں کی جانب اٹھ جاتی ہیں ۔ نئے برانڈ کے ان مسلمانوں کا کہنا ہےکہ وہ ان طاقتوں کے خلاف صف آرا ہیں جو اسلام اورمسلمانوں کےدشمن ہیں اور اسی لیے وہ ان کے ٹھکانوں کونشانہ بنارہے ہیں ۔لیکن یہ کہا ں کی دانشمندی ہےکہ اس جنگی جنون کی آگ میں اپنے ہی اسلامی بھائیوں اور ان کی املاک اور ان کے اثاثوں کو ایندھن کےطور پر استعمال کیا جائے ۔اگر ان کے دشمن امریکہ، برطانیہ اور دوسرے مغربی ممالک ہیں تو نشانہ مسلمانوں کو کیوں بنایا جاتا ہے۔

مسلکی اختلافات کے تئیں عدم برداشت کے رویے کا مظاہرہ کر کے دوسرےمکاتب فکر کےلوگوں کو کیوں تہہ تیغ کیا جاتا ہے۔ کیا اسلام دشمن طاقتوں کا مقابلہ اپنے ہی لوگوں کو مار کر ہوسکتا ہے ۔ جب کوئی انسانی بم پھٹتا ہے تو وہ مسلم نوجوان تو اپنی جان گنواہی دیتا ہے ، دوسرے بے قصوروں کو بھی موت کے گھاٹ اتار دیتا ہے ۔دوسری طرف ان لوگوں سے انتقام لینے کی کوشش میں یا ان کو نیست ونابود کرنے کے عزائم کی تکمیل میں جو کارروائیاں ہوتی ہیں ان کی زد میں بے قصورمسلمانوں پر ہی پڑتی ہے۔ لیکن ان کو اس سے کوئی فرق نہیں پڑتا ۔آخر یہ کیسا انتقامی چکر ہے جو دونوں طرف چل رہا ہے اور دونو ں جانب سے مسلمان ہی پس رہے ہیں۔

القاعدہ اور طالبان کے وجود اوران کے ابھار کے سلسلے میں بعض دیگر طاقتوں کو موردالزام ٹھہرایا جاتا ہے اور یہ کہا جاتا ہے کہ انہوں نے پہلے ان کو استعمال کیا اور اب ان کو ختم کرنے کے درپے ہے۔ لیکن سوال یہ پیدا ہوتا ہے کہ کیسے مسلمان ہیں جو دوسروں کے ہاتھوں استعمال ہوجاتے ہیں اور ان کی یہ کیسی مومنانہ فراست ہے کہ بار بار اسی ایک ہی سوراخ سے ڈسے جارہے ہیں اور پھر بھی خود کو ہی اصلی مسلمان ہونے کا دعوی کرتے ہیں بلکہ خود کو قرن اولی کا اصل جانشین تصور کرتے ہیں۔ جب ہم دوسروں پر یہ الزام لگاتے ہیں تو کیا اس کے آئینے میں اور کوئی چہرہ نظر نہیں آتا ۔کیا اس میں ہم اپنے آپ کونہیں دیکھ پاتے اور کیا اس آئینے میں ایسی مسلم سیاسی طاقتیں نظر نہیں آتیں جو دہشت گردی مخالف جنگ میں Selective Approach اپنا تی ہیں اور اس طرح ان طاقتوں کی بشت پناہی اور پرورش وپرداخت کرتی ہیں۔

آج ایسے طبقات پیدا ہوگئے ہیں جو ان عناصر کے ہمنوا اور حمایتی ہیں ۔جن کی آنکھوں پر مغربی طاقتوں کی اندھی دشمنی کی عینک چڑھی ہوئی ہے اور جو یہ دیکھ ہی نہیں پارہے کہ دراصل اس دشمنی کا رخ اب خود اپنوں کی جانب ہی مڑگیا ہے ۔ یہ کیسے مسلمان ہیں جواپنے ہی بھائیوں کو مارکر مسروروشاداں ہوتےہیں اور سمجھتے ہیں کہ وہ اسلام دشمن طاقتوں سے انتقام لے رہے ہیں ۔کیا ایسی حرکتوں کو شرعی جواز حاصل ہوسکتا ہے اور کیا یہ اقدامات اسلام کی میزان میں تولے جاسکتے ہیں ۔بہر حال جو لوگ یہ سمجھتے تھے کہ القاعدہ کے سربراہ کی ہلاکت کے بعد یہ سلسلہ رک جائے گا وہ سخت قسم کے غلط فہمی کے شکار تھے۔ سچ بات تو یہ ہے کہ اب بھی ایک طوفان کشت وخون ہے جو جاری ہے اور جس کی شدت میں کمی کا سروست کوئی امکان بھی نہیں ہے۔ مغرب دشمنی میں یہ لوگ بھول گئے ہیں کہ دنیا کہا ں سے کہاں پہنچ گئی ہے اور ہم ہیں کہ خون کی ہولی کھیلنے میں مگن ہیں۔

ضرورت دور جدید کی ترقیات کے دوش بہ دوش چلنے کی ہے اور تنگ نظری اورعصبیت کے خول سے باہر آنے کی ہے۔ یہ دور انفارمیشن ٹیکنالوجی کے انقلاب کا دور ہے اور مسلمان چاہیں تواس انقلاب کا سہارا لے کر پوری دنیا میں اسلام کی دعوت وتبلیغ کا کام کرسکتے ہیں اور اسلام کی تعلیمات کو عام کرسکتے ہیں ۔لیکن اس کے لیے اس ذہنیت کو خیر باد کہنا ہوگا جو مسلمانوں کو مسلمانوں کا ہی دشمن بنائے ہوئے ہے۔ اورجس کی وجہ سے وہ اس قیامت خیز بھنور میں پھنسے جارہے ہیں۔

URL: https://newageislam.com/urdu-section/kind-revenge-that-one-becomes/d/4827