Tolerance and Patience: Fundamental Teachings of Islam رواداری و برداشت دین اسلام کا بنیادی سبق

رواداری و برداشت دین اسلام کا بنیادی سبق

حضرت عبداللہ بن عمر رضی اللہ عنہ سے روایت ہے کہ رسول اللہ صلی للہ صلی علیہ وسلم نے فرمایا آدمی کو اپنے والدین کو گالی دینا گناہ کبیرہ میں سے ہے۔ صحابہ نے عرض کیا کہ یارسول اللہ کیا آدمی اپنے والدین کو گالی دےسکتا ہے؟ فرمایا ،ہاں ہو کسی کے باپ کو گالی دیتا ہے تو وہ اس کے باپ کو گالی دیتا ہے ، وہ اس کی ماں کو گالی دیتا ہے تو وہ اس کی ماں کو گالی دیتا ہے۔

آج ہمارے معاشرے میں یہی چیز ایک فتنا اور ایک وبال کی صورت میں عام ہوچکی ہے، جس کے نتیجے میں ہر گھر ،خاندان ،معاشرہ ،صوبوں اور علاقوں میں نفرت پھیلتی جارہی ہے۔ ایک دوسرے کے خلاف بیان بازی اس قدر عام ہوچکی ہے کہ حق اور باطل میں فرق کرنا مشکل ہوگیا ہے ،حالانکہ اللہ تعالیٰ نے قرآن مجید میں سورہ انعام کی آیت نمبر 108میں ارشاد فرمایا : اور تم لوگ ان کو برانہ کہو جن کی یہ پرستش کرتے ہیں اور اللہ کے سوا پس وہ برا کہنے لگیں گے اللہ کو بے ادبی سے بغیر سمجھے ،اسی طرح ہم نے ہر طریقے والوں کے لئے ان کا عمل آراستہ کررکھا ہے پھر ان سب کو اپنے رب کے پاس پہنچنا ہے تب وہ جتلا دے گا ان کو جو کچھ وہ کرتے ہیں۔

اس میں اللہ تعالیٰ نے ایک اہم اصول کی ہدایت فرمائی ہے اور یہ اصول اسلامی تہذیب وتمدن کا ایک بنیادی اصول ہے اور وہ یہ کہ جو کام خود کونا جائز نہیں اس کا سبب اور ذریعہ بننا بھی جائز نہیں ، اگر ایک کام کرنا انسان برا سمجھتا ہے تو پھر اس کا م کا محرک بننا بھی درست نہ ہوگا، اسی سے رواداری کا اصول سمجھ میں آتا ہے۔

یہ آیت رسول اللہ صلی اللہ علیہ وسلم پر جن حالات میں نازل ہوئی اگر ان حالات کو پیش نظر رکھا جائے تو خوب اچھی طرح یہ بات واضح ہوجائے گی کہ انسان کو کس حد تک رواداری کا خیال رکھنا چاہئے۔

ابن جریر کی تفصیلات کے مطابق جب رسول اکرم صلی للہ علیہ وسلم کے چچا ابوطالب مرض الموت میں تھے تو قریش کے مشرک سردار جو رسول اللہ صلی اللہ علیہ وسلم کی دشمنی اور آپ کو تکلیفیں پہنچانے میں لگے ہوئے تھے، ان کو یہ فکر ہوئی کہ ابوطالب کی وفات ہمارے لئے ایک مشکل مسئلہ بن جائے گی کیو نکہ اگر ہم ابوطالب  کے بعد ان کو قتل کریں گے تو لوگ کہیں گے کہ ابوطالب کے سامنے تو کچھ نہ کرسکے اب اکیلا پاکر قتل کردیا۔ لہٰذا اب وقت ہے ہم خود ابوطالب سے مل کر فیصلہ کن بات کرلیں، لہٰذا قریش کے چند سرداروں نے یہ مشورہ کر کے ابوطالب کے پاس جانے کےلئے ایک وفد مرتب کیا، جس میں ابوسفیان ،ابو جہل، عمر وبن عاص قریش کے سردار تھے۔ ابوطالب سے اس وفد کے لئے وقت لینے کا کام ایک شخص مطلب کے سپرد ہوا، اس نے ابوطالب سے اجازت لے کر وفد کو وہاں پہنچایا۔ وفد نے ابوطالب سے کہا کہ آپ کو معلوم ہے کہ آپ کے بھتیجے نے ہمارے معبودوں کو اور ہمیں سخت تکلیف پہنچارکھی ہے ،ہم چاہتے ہیں کہ آپ ان کو بلا کر ان کو سمجھادیں کہ وہ ہمارے معبودوں کو برا نہ کہیں ۔ ابوطالب نے رسول اللہ صلی اللہ علیہ وسلم کو اپنے پاس بلایا اور کہا یہ آپ کی برادری کے سردار آئے ہیں اور یہ کہتے ہیں کہ آپ ہمیں اور ہمارے معبودوں کو برا کہنا چھوڑ دیں تو پھر ہم بھی آپ کو اور آپ کے معبود کو برانہ کہیں گے  اس طرح مخالفت ختم ہوجائےگی۔

رسول اکرم صلی اللہ علیہ وسلم نے فرمایا ، اچھا یہ بتاؤ اگر میں تمہاری یہ بات مان لو ں تو کیا تم ایک ایسا کلمہ کہنے کے لئے تیار ہوجاؤگے ،جس کے کہنے سے تم سارے عرب کے مالک ہوجاؤگے ؟ ابوجہل بولا، ایسا کلمہ ایک نہیں ہم دس کہنے کو تیار ہیں ۔آپ بتائیں وہ کیا ہے؟ آپ نے فرمایا لا الہ الا اللہ یہ سنتے ہی سب برہم ہوگئے ۔ ابوطالب نے کہا کہ اے میرے بھتیجے اس کلمہ کے سوائے کوئی اور بات کہو کیو نکہ آپ کی قوم اس کلمہ سے گھبراگئی ہے۔آپ نے فرمایا چچا جان میں تو اس کلمہ کے سوا کوئی دوسرا کلمہ نہیں کہہ سکتا اگر چہ وہ آسمان سے آفتاب لاکر میرے ہاتھ میں رکھ دیں، اس پر وہ لوگ ناراض ہوکر کہنے لگے کہ پھر ہم بھی آپ کے معبود کو برا کہیں گے اس پر سورہ انعام کی یہ آیت نازل ہوئی کہ آپ ان کے بتوں کو برا نہ کہیں جن کو ان لوگوں نے خدا بنار کھا ہے ،ورنہ وہ اپنی بے راہ روی اور بے سمجھی سے اللہ تعالیٰ کو برا کہیں گے۔

روادی کا یہ سنہری اصول ذہن میں آنے کے بعد ایک سوال ابھرتاہے کہ قرآن کریم کی بہت سی آیات میں بتوں کا تزکرہ سخت الفاظ میں آیا ہے، جیسے فرمایا: یہ بت بھی کمزور اور ان کے چاہنے والے بھی کمزور ۔ ایک اور جگہ ارشاد فرمایا : یعنی تم اور جن بتوں کی تم عبادت کرتے ہو وہ سب جہنم کا ایندھن ۔ تو ان آیات میں بتوں کو برا کہا گیا ہے پھر رواداری کا مطلب کیا ہوا؟اسی بات کا جواب روح المعانی میں تفصیل سے دیا گیا ہے کہ ان آیات میں کسی کو برا بھلا کہنا مقصود نہیں بلکہ غلط کام کا برا انجام بتانا مقصود ہے، لہٰذا یہ رواداری کے خلاف نہیں ۔

رواداری کی ایک مثال حدیث میں ہے کہ رسول اللہ صلی اللہ علیہ وسلم نے صحابہ کرام سے مخاطب ہوکر فرمایا کوئی شخص اپنے ماں باپ کو برا بھلا نہ کہے، صحابہ کرام نے عرض کیا یا رسول اللہ یہ کیسے ممکن ہے کہ کوئی شخص اپنے ماں باپ کو برا بھلا کہے؟ آپ صلی اللہ علیہ وسلم نے فرمایا :ہاں ،انسان خود تو اپنے ماں باپ کو برا نہیں کہتا لیکن جب وہ کسی دوسرے شخص کے والدین کو براکہے گا تو اس کے نتیجہ میں وہ دوسرا اس کے ماں باپ کو برا کہے گا اس کا سبب یہ بیتا بنا تو یہ ایسا ہی ہے جیسے خود اس نے اپنے ماں باپ کو برا کہا ۔ جب معاشرے میں کسی بھی مرحلے میں دوسرے کو بر ا کہا جائےگا تو جواب میں برا ہی سننے کو  ملے گا۔ یہاں سے فساد کا دروازہ کھل جائے گا، جس سے ایک گھر کے افراد میں پھوٹ پڑجاتی ہے ،باپ بیٹا ایک ساتھ کھانا چھوڑ دیتے ہیں صرف اس لئے کہ باپ نے اسے برا کہا جسے بیٹا اچھا سمجھتا تھا او ربیٹے نے اسے برا کہا جسے باپ اچھا سمجھتا تھا۔

بشکریہ ۔روز نامہ صحافت ، نئی دہلی

URL: https://newageislam.com/urdu-section/tolerance-patience-fundamental-teachings-islam/d/5498