Darul Uloom Deoband: The beating heart of the Muslim community دارالعلوم دیوبند ۔ ملت اسلامیہ کا دھڑکتا ہوا دل

دارالعلوم دیوبند ۔ ملت اسلامیہ کا دھڑکتا ہوا دل

مولانا ندیم الواجدی

دارالعلوم دیوبند ایک ایسے تناور درخت کی طرح ہے جس کی جڑیں زمین میں گہرائی تک پیوست ہیں ، جو  بلندی میں آسمان سے باتیں کررہا ہے اور جس کی شاخیں برگ و بارسمیت دور دور تک پھیلی ہوئی ہیں، اس ادارے کو ہم ایک ایسی کہکشاں سے بھی تشبیہ دے سکتے ہیں جو سینکڑوں ہزاروں ستاروں کے جھرمت میں اپنی کرنوں سے اجالے بیکھیر رہی ہے۔ بہ ظاہر یہ چھوٹی بڑی عمارتوں کے ایک مجموعے کا نام ہے مگر درحقیقت یہ مدینۃ العلوم ہے۔ دنیا میں اس سے بھی زیادہ وسیع اور کشادہ دارالعلوم ہیں، بڑی بڑی یونیور سیٹیاں ہیں، بڑے بڑے جامعات ہیں، ان کے وسیع کیمپس ہیں، جدید وقدیم طرز کی بے شمار فلک بوس عمارتوں پر مشتمل دانش گاہوں میں ہزاروں کی تعداد میں طلبہ زیر تعلیم ہیں، مگر اس ادارے کی بات ہی کچھ اور ہے اگر یہ کہا جائے تو غلط نہ ہوگا کے دارالعلوم دیوبند ملّت اسلامیہ کے سینے میں دھڑکتا ہوا دل ہے۔ شاید یہی وجہ ہے کہ اس کے آنگن میں سوئی بھی گرتی ہے تو اس کی آواز دور تک دھمک پیدا کرتی ہے، اس کے پیکر میں کوئی پھانس بھی چبھتی ہے تو ایسا لگتا ہے کہ اس کے چاہنے والوں کے سینے میں خنجر کی انی پیوست ہوگئی ہو۔ کچھ دنوں سے دارالعلوم میں جو کچھ ہورہا ہے ۔ اس سے ہر وہ شخص بے چین و مضطرب ہے جو اس ادارے سے روحانی وابستگی رکھتا ہے۔ وابستگان دارالعلوم میں کئی طرح کے لوگ ہیں ، ان میں وہ بھی ہیں جنہوں نے اس باغ علم سے خوشہ چینی کی ہے۔ اور اس کے چشمہ فیض سے جرعے کشید کئے ہیں ۔ اور بھی ہیں جو اس ادارے سے شرف تلمند تو نہیں رکھتے مگر اس کی عقیدت کے نور میں سر سے پاؤں تک ڈوبے ہوئے ہیں۔ ان میں بھی بڑی تعداد ایسے لوگوں کی ہےجنہوں نے دارالعلوم کو کبھی نہیں دیکھا ، وہ کبھی دیوبند نہیں آئے ،انہوں نے اس بستی کا صرف نام ہی نام سنا ہے۔ مگر جب جب یہ نام ان کے کانوں میں پڑتا ہے ۔ ان کی گردنیں بار احسان سے جھک جاتی ہیں۔ اور ان کی آنکھوں میں عقیدت ومحبت کے جگنو رقص کرن لگتے ہیں ۔ ان کے جنون عشق کا عالم یہ ہے کہ دارالعلوم کا نام آتے ہی ان کے کام سراپا شوق بن جاتے ہیں ، اس ادارے میں کوئی پتہّ کھڑکتا ہے تو ان کا دل دھڑکنے لگتا ہے اور ان کے ہاتھ بے دھڑک دعا کے لئے اٹھ جاتے ہیں۔ دنیا کے ہر حصہ میں اس ادارے سے محبت کرنے والے اور اس کے اکابر سے عقیدت رکھنے والے موجود ہیں وہ دارالعلوم کے موجودہ حالات سے انتہائی بے چین ہیں۔ دیوبند آنے والے ہر فون کا آغاز اس جملے سے ہوتا ہے دارالعلوم میں ہر طرح خیرت ہے نادر اختتام اس دعا پر  یا اللہ دارالعلوم کی حفاظت فرما، پھر متکلم کو کتنا بھی یقین دلایا جائے اسے تسلی و تشفی نہیں ہوتی کیونکہ اخبارات میں چھپنے والی خبریں ،مضامین اور اشتہارات سے مخاطب کی یقین دہانیوں کی نفی ہورہی ہے  اس کا بس نہیں چلتا کہ وہ اڑ کر دیوبند پہنچے اور اپنی آنکھوں سے خود دیکھے کہ دارالعلوم خیریت سے ہے یا نہیں؟

دارالعلوم دیوبند کو یہ شان محبوبیت کس طرح حاصل ہوئی، اس کی ایک لمبی داستاں ہیں جو ڈیڑھ صدی کے ماہ سال اور روز وشب پر پھیلی ہوئی ہے، ہم چند مضمون کے صفحوں میں یہ داستان عشق سمیٹنا بھی چاہیں تو ناکام رہیں ، اگر نہایت اختصار کے ساتھ محبوبیت کی یہ داستاں رقم بھی کی جائے تب بھی کئی ضخیم جلدیں تیار ہوجائیں ،البتہ اس داستاں کو ایک عنوان دیا جاسکتا ہے ۔ وہ ہے اس کے بانیوں کا اخلاص اور ان کی للّٰہیت ،دارالعلوم کی یہ مقبولیت ، یہ آفاقیت ،یہ مرجعیت ،شہرت سب کچھ انہیں دو لفظوں کیے دین ہے، اخلاص اور للّٰہیت ہی کا اثر تھا کہ انار کے درخت کے نیچے بیٹھ کر تعلیم کا آغاز کرنے والے ایک استاد اور شاگرد کا فیض علم پورے عالم میں پھیل گیا اور یہ درخت ایک ایسے شجر ۃ العلم کی صورت اختیار کر گیا جس کی روح پرور ہواؤں نے ساری دنیا کو حیات نو کا پیغام بخشا، آج کتنے مدرسے اور کتنے ادارے ہیں جو علم کے اجالے تقسیم کررہے ہیں۔ بعض انہیں اتنے بڑے ہیں کہ دیوبند جیسی چھوٹی جگہ میں ان کا تصور بھی نہیں کیا جاسکتا مگر ان میں کوئی دارالعلوم جیسا نہیں ہے۔

دارالعلوم دیوبند 1866میں قائم ہوا اس سے کم وبیش سوسال پہلے حضرت سید اح مد شہید ؒ اپنے مجاہد رفقا کے ساتھ جب دیوبند کی سرزمین پر پہنچے اور اس جگہ سے گزر ے جہاں آج دارالعلوم کی مرکزی عمارت دارالحدیث واقع ہے تو انہوں نے فرمایا مجھے یہاں سے علم کی خوشبو آرہی ہے، کسے معلوم تھا کہ یہ خوشبو جو جو صرف حضرت سید احمد شہید ؒ نے محسوس کی تھی یہاں سے اس طرح پھوٹے گی کہ سارا عالم اس سے مہک جائے گا۔ حکیم اسلام حضرت مولانا قاری محمد طیب صاحب ؒ سے ہم نے اس کی زبانی بھی سنا اور ان کی کتابوں میں بھی پڑھا کہ دارالعلوم غیبی اشارات سے وجود میں آیا اور اسے روز اوّل سے ہی تاید ایزدی حاصل رہی، بانی دارالعلوم حضرت مولانا محمد قاسم نانوتویؒ نے قیام دارالعلوم سے پہلے خواب میں دیکھا کہ میں خانہ کعبہ کی چھت پرکھڑا ہوں ماور میرے ہاتھ پاؤں کی بیسوں انگلیوں سے نہریں جاری ہیں اور اطراف عالم میں پھیل رہی ہیں ، دارالعلوم دیوبند کے عالمگیر فیض کی بنیاد پر کیا یہ نہیں کہا جائے گا کہ بانی دارالعلوم کا یہ خواب کتنا سچا تھا۔ علوم نبوت جن کا اصل سرچشمہ کتاب الٰہی ہے حضرت نانوتویؒ کے ذریعہ اقصائے عالم میں پھیلے اور اب تک پھیل رہے ہیں۔

دارالعلوم دیوبند کے مہتمم ثانی حضرت شاہ رفیع الدین یوبندیؒ نے جو بڑے صاحب کشف بزرگ تھے، مگر بلا کے ذہین ،معاملہ فہم ،دوراندیش اور مد بر انسان تھے ۔حضرت نانوتویؒ جو کچھ سوچتے وہ شاید رفیع الدین دیوبند کے ذریعہ عملی جامعہ پہن لیتا ،خود فرمایا کرتے تھے کہ دیوبند کا اہتمام میں نہیں کرتا حضرت نانوتویؒ کرتے ہیں، جو کچھ ان کے قلب میں وارد ہوتا ہے وہ میرے دل پر منعکس ہوجاتا ہے اور میں اسے عملی جامعہ پہنا دیتا ہوں، دارالعلوم دیوبند کے بارے میں حضرت شاہ رفیع الدین کے مبشرات بے شمار ہیں، ایک بار ایک طالب علم نے بدتمیزی کی تو فرمایا یہ دارالعلوم کاطالب علم نہیں ہے اتنا بدتمیز شخص دارالعلوم کا طالب علم ہو ہی نہیں سکتا ، تحقیق کی گئی تو بات سچ نکلی، حضرت سے پوچھا گیا کہ آپ نے کس طرح پتہ لگایا کہ یہ شخص دارالعلوم کا طالب علم نہیں ہے ،فرمایا کے میں نےایک مرتبہ خواب میں دیکھا کہ دارالعلوم کے احاطہ مولسری میں جو کنواں ہےوہ دودھ سے لبریز ہے، اس کی من پر سرکار دوعالمﷺ تشریف فرما ہیں اور دودھ تقسیم فرمارہے ہیں ،لینے والے آرہے اور دودھ لے جارہے ہیں کوئی گھڑا لیکر آرہا ہے تو کوئی لوٹا اور کوئی پیالہ ،کسی کے پاس برتن نہیں ہیں تو وہ چلو ہی بھر کر لے جارہا ہے ، اس طرح ہزاروں آدمی دودھ لے جارہے ہیں ،میں نے غور کیا تو اس خواب کی یہ تعبیر معلوم ہوئی کہ کنواں دارالعلوم کی صورت مثال ہے دودھ علم کی مثال ہے ،قاسم العلوم یعنی تقسیم کنندہ علم نبی کریم ﷺ ہیں اور دودھ لے جانے والے طلبہ ہیں جو حسب ظرف لیکر جارہے ہیں۔ دارالعلوم دیوبند کے اولین صدر مدرس حضرت مولانا محمد یعقوب نانوتویؒ فرمایا کرتے تھے کہ میں دارالعلوم دیوبند کی وسطی درسگاہ نودرے سے عرش تک نور کا ایک سلسلہ دیکھتا ہوں جس میں کہیں بھی فصل یا انقطاع نہیں ہے، یہ وہی نودرہ ہے جس کی تعمیر حضرت شاہ رفیع الدین کے دور اہتمام میں ہوئی، اس کی تعبیر بھی سراسر الہامی بتلائی جاتی ہے ، حضرت شاہ رفیع الدین کے بہ قول اس عمارت کی بنیادوں کے نشان بھی سرکار دوعالمﷺ نے خواب میں تشریف لا کر لگائے اور بعد میں اسی نشانوں پر تعمیر عمل میں آئی ۔ یہ تمام واقعات حکیم الاسلام حضرت مولانا قادری طیب صاحبؒ نے اپنے مضمون ‘‘الہامی مدرسہ’’ میں لکھے ہیں، جو ماہ نامہ الرشید لاہور کے دارالعلوم دیوبند نمبر میں مطبو ع ہے، جن واقعات کا تعلق ہمارے پاک طینت بزرگوں سے وہ،اور جن کے راوی حکیم الاسلام حضرت قاری محمد طیب صاحبؒ جیسے عالم باعمل ہوں ان کی صداقت میں کون بدبخت شبہ کرسکتا ہے؟

جن حالات میں دارالعلوم قائم ہوا، وہ بڑا نازک دور تھا، مسلمانوں کی حکومت کا آفتاب غروب ہوچکا تھا، اور اب  ان کا وجود مٹانے کی تیاری تھی، 1857تک شکست کے بعد اگر حضرت نانوتویؒ اور ان کے رفقا کمر ہمت نہ کستے تو بہت ممکن تھا کہ انگریز اپنے منصوبے میں کامیاب ہوجاتے ، اقتدار گنوانے کے بعد شکشتہ دل قوم کے دین وایمان کے سلامتی کے لئے جس اقدام کی ضرورت تھی وہ اقدام اللہ نے حضرت نانوتویؒ اور ان کے رفقا کرام کی قسمت میں لکھا تھا ،بزرگوں کی دعائیں ان کے ساتھ تھیں ، دارالعلوم دیوبند کے قیام کے بعد جب سید ا طائفہ حضرت حاجی امدا اللہ مہاجر مکی کو مکہ مکرمہ میں اس کی اطلاع دی گئی تو ان کی زبان سے بہ ساختہ یہ دعا نکلی ‘‘ اے اللہ اس ادارے کو اسلام اور علم دین کی حفاظت کا ذریعہ بنا’’ (سوانح قاسمی 2/250) دنیا نے دیکھا کہ حضرت حاجی امددا اللہ مہاجر مکی ؒ کے دل او رزبان سے نکلی ہوئی اس دعا نے دارالعلوم کو کہا ں سے کہاں پہنچا دیا۔

دارالعلوم دیوبند اپنی خدمات تاریخ ،ملہج ، مسلک ،مزاج، اور منہاج ،ہر لحاظ سے منفرد مقام رکھتا ہے ۔ اس کے اصول ہشتگانہ جو حضرت نانوتویؒ کی فکری بصیرت کا شاہ کار ہیں دارالعلوم کا قیمتی سرمایہ ہیں، دارالعلوم کا انتظام و انصرام ان ہی اصول ہشتگانہ کامر ہون منت ہے۔ کہنے کو یہ محض آٹھ اصول ہیں لیکن درحقیقت یہ دارالعلوم کا مکمل نظام اور اس کا دستور ہیں، تاریخ دارالعلوم میں ان کو دستور العمل ہی لکھا گیا ان میں عوامی رابطہ کے لئے سہولتوں کی فراہمی اور ان کی تعداد میں اضافہ ،مدرسین کا ذہنی وفکری ارتباط ،مقدار خواندگی، حکومت وقت اور امرازمانے سے دوری ،عوامی چندہ جیسے امور میں قیمتی ہدایات دی گئی ہیں۔ مہتمم مدرسہ اور شورائی نظام کے تعلق سے حضرت مولانا نوتویؒ نے جو ہدیات تحریر فرمائی ہے اسے پڑھ کر انداز ہوتا ہے  کہ حضرت نے دارالعلوم کا نظام جمہوری بنیادوں پر رکھا ہے۔ یہاں روزہ اوّل ہی سے شوریٰ قائم ہے جو مہتمم مدرسہ کو مشورہ دیتی ہے اور فیصلے کرتی ہے ، اس اصول کے تحت مہتمم کو اس قدر با اختیار نہیں رکھا گیا کہ کسی سے مشورہ لئے بغیر خود اہم اور بنیادی فیصلے کرے بلکہ اسے تو یہاں تک ہدایت دی گئی ہے کہ اگر بروقت مستقبل اصحاب مشورہ دستیاب نہ ہوتو واردوصادرذی عقل اور صاحب رائے افراد سے مشورہ لے لے، اہل مشورہ کو بھی ہدایت دی گئی ہے کہ وہ صرف اپنی رائے دے، اس کی صحت پر اصرار نہ کریں، اصحاب شوری کو چاہئے کہ وہ محض مدرسے کا مفاد ملحوظ رکھیں ،اخلاص کے ساتھ مشورہ دیں، سننے والے نیک نیتی اور دردمندی سے سنیں اور قبول کریں۔

حکیم الاسلام حضرت مولانا قادری محمد طیب صاحب نے لکھا ہے کہ یہ وہ اصول ہیں جو حضرت نانوتویؒ نے اپنے قلم سے لکھ کر پیش کئے تھے، یہ گراں قدر تحریر آج بھی خزانہ دارالعلوم میں محفوظ ہے، خلاف تحریر ک موقع پر جب مولانا محمد علی جوہر دارالعلوم تشریف لائے اور ان کو یہ تحریر دکھائی گئی تو ان کی آنکھوں میں آنسو آگئے۔ انہوں نے فرمایا ان اصول کا انسانی عقل سے کیا تعلق یہ تو خزینہ رب اور مخزن حکمت سے نکلے ہوئے اصول ہیں، تاریخ شاہد ہے جب جب ان اصولوں میں سے کسی اصول سے انحراف کیا گیا دارالعلوم بحران میں مبتلا ہوا، ضرورت ہے کہ ہم بھولا ہوا سبق دوبارہ یاد کریں، اور دیکھیں کہ ہم سے کب اور کہاغلطی ہوئی ہے۔ ہم نے اپنے محسن بانی دارالعلوم کے وضع کردہ اصولوں سے کتنا انحراف کیاہے اور کس قدر ارتباط رکھا ہے ان اصولوں کے ضمن میں یہ صاف لکھا ہے کہ ان پر عمل نہ کیا گیا تو پھر اس مدرسے کی خیر نہیں ۔( تاریخ دارالعلوم 1/47)

دارالعلوم دیوبند کچھ الگ خصوصیت کا  حامل تعلیمی ادارہ ہے ، اس کی ایک خصوصیت جو اس ادارے کو اس دنیا کے باقی تمام اداروں سے ممتاز بناتی ہے وہ اس کا مسلکی اعتدال اور جامعیت ہے ، حکیم الاسلام حضرت مولانا قادری محمد طیب ؒ کے قول ‘‘علم واخلاق کے جامعیت اس جماعت کا طرہ امیتاز رہا ہے اور ووسعت ظری ،روشن ضمیری ، اور رواداری کے ساتھ دین وملّت اور قوم وطن کی خدمت اس کا مخصوص شعار ، ا س سلسلہ مسلک کی جامعیت کا خلاصہ یہ ہے کہ وہ جامع علم ومعرفت جامع عقل وعشق ، جامع عمل واخلاق ،جامع مجاہدہ وجہاد، جامع دیانت وسیاست ، جامع روایت و درایت ،جامع خلوت وجلوت ، جامع عبادت ومدنیت ،جامع وحکمت ،جامع ظاہر وباطن، جامع حال وقال ہے۔ علما دیوبند کے اس دینی روح اور مسلکی مزاج کی نسبتوں سے آگر پہچان کر وایا جائے تو اس کا خلاصہ یہ ہے کہ وہ دنیا مسلم ہیں ،فرقہ اہل سنت والجماعت ہیں، مذہبی حنفی ہیں، کلا ماً ماتریدی واشعری ہیں، مشر باً صوفی ہیں، سلوکا چشتی بلکہ جامع سلاسل ہیں، فکر اولی اللّٰہی ہیں ، اصولاً قاسمی ہیں، فروعاً رشیدی ہیں، بیاناً یعقوبی ہیں، اور نسبتاً دیوبندی ہیں، و الحمد اللہ علی ھٰذہ الجا معیۃ (علما دیوبند کا دینی رخ اور مسلکی مزاج ص: 193) اللہ تعالیٰ جزائے خیر دے حکیم الاسلام قاری محمد طیب صاحب کو انہوں نے مسلک دیوبند کی اتنی وضاحت کردی ہے اور اس سے اپنی کتابوں میں اس طرح مدوّن کردیا ہے کہ اب قیامت تک اس کی روشنی میں کام کیا جاسکتا ہے ، پاکستان کے مفتی اعظم حضرت مولانا مفتی محمد شفیع عثمانیؒ نے ایک مرتبہ مدرسہ عربیہ نیو ٹاؤن کراچی کے طلبہ سے خطاب کرتے ہوئے فرمایا تھا: ایک صدی میں اس مرکز علوم دارالعلوم دیوبند سے دین کے ہر خطے میں علوم نبوت پھیلے ، اسلامی فروقوں اور جماعتوں کے اختلافی مسائل میں نظری وفکری اعتدال علم کے ساتھ عمل اور ظاہر کے ساتھ باطن کی اصلاح ،یہی دیوبند کا طرہ امتیاز ہے۔ جس نے اسے مقبولیت عامہ اور خاص برکات کا مظہر بنایا (ماہ نامہ بنیاد کراچی شمارہ ربیع الآخر 1386ھ) ترک وطن کر کے پاکستان چلے جانے کے بعد ایک مرتبہ حضرت مفتی صاحب دیو بند تشریف لائے ، اس موقع پر دارالعلوم دیوبند کے دارالحدیث میں طلبہ سے خطاب کرتےہوئے انہوں نے فرمایاتھا‘‘ آپ حضرات کوابھی اس نعمت خداوندی کی قدر نہیں ہے کہ اس نے آپ کا تعلیمی رشتہ دارالعلوم دیوبند سےمنسلک کردیا، جب اس بسم اللہ کی گنبد سے آپ باہر نکلیں گے اور کتاب وسنت اور فقہی مسائل کی تعبیر میں آپ کو افراط و تفریط کا ایک بھیانک منظر نظر آئے گا اس وقت معلوم ہوا گا کہ دیوبند اور اس کا معتدل مسلک کیسی عظیم نعمت ہے ، دنیا کےنشیب وفراز اور سر دوگرم دیکھنے فرقہ وارانہ مباحث سے گزر نے کے بعد اپنی تحقیق سے مجھ پر اس مسلک اعتدال کی خوبیاں منکشف ہویں ، (نقوش وتاثرات سفر تھانہ بھون ودیوبند ص48)

اتنے بڑے ادارے میں اختلافات کاہونا حیرت انگیم نہیں ہے، اصل چیز یہ ہے کہ اختلاف اس کی تاریخ اور مسلک کو کوئی گزندہ پہچا ئے ، دارالعلوم میں اختلافات پہلے بھی ہوئے ہیں اور اس سے بھی بڑے ہوئے ہیں، ان اختلافات سے دارالعلوم کو وقتی نقصان تو پہنچا لیکن خدا کے فضل وکرم سے وہ نقصان دائمی کبھی نہیں بنا ،دارالعلوم کی مثال اسلام کی سی ہے جس میں لچک ہے ، یہ دبانے سے ٹوٹتا نہیں بلکہ دبانے کے بعد اور ابھرتا ہے۔ ہمیں یہ یقین ہے کہ اس بحران کے بعد یہ پھر بے غبار ہوکر اپنے کام میں مصروف ہوگا، مجھے شیخ الاسلام حضرت مولانا شبیر احمد عثمانی کی ایک یادگار تقریر کے چند جملے یادآرہے ہیں ،دارالعلوم سے علیحدگی کے طوریل ماہ  سال گزارنے کے بعد جب حضرت ولا بحیثیت صدر مہتمم دارالعلوم میں تشریف لائے تو انہوں نے اپنی پہلی تقریر میں ارشاد فرمایا دارالعلوم دیوبند ایک  امانت الٰہی ہے، مسلمانوں کی ایک متاع عزیز ہے، اس کی تعمیر تقوی کی اینٹوں سے ہوئی ہے، اس کا سنگ بنیاد رکھنے والے امرا وغنیا نہ تھے بلکہ اس کی بنیاد ڈالنے والے چند مقدس نفوس فقرا اور اہل اللہ تھے اس لئے ان کی حفاظت انہیں کے اصول اور نقش قدم پر ہونی چاہئے اور سبھی کو ملکر اس کی حفاظت کرنا چاہئے (تاریخ دارالعلوم 2/242)

اس وقت ہمیں جس سوال پر سنجیدگی کے ساتھ غور کرنا ہے وہ یہ ہے کہ کہیں ہم اپنے مزاج ومنہاج سے ہٹنے تو نہیں جارہے ہیں ،کہیں نادانستگی میں ہمارا تعلق ماضی سے کمزور تو نہیں پڑرہا ہے ، یہاں میں پھر حضرت محمد مفتی شفیع صاحب عثمانی کے الفاظ مستعار لوں گا انہوں نے کئی جگہ لکھا ہے ‘‘ میرے والد ماجد حضرت مولانا محمد یٰسین صاحب دارالعلوم کے قرنِ اول کے طلبہ میں سے تھے ، وہ فرمایا کرتے تھے کہ ہم نے دارالعلوم کا وہ زمانہ دیکھا ہے جب اس کے ایک چپراسی سے لیکر صدر مدرس او رمہتمم تک ہر شخص صاحب نسبت ولی کامل تھا،دن کے وقت یہاں علوم وفنون کے چرچے رہتے تھے ،اور رات کے وقت اس کا گوشہ گوشہ اللہ کے ذکر اور تلاوت قرآن سے گونجتا تھا، (میرے والد ماجدص 52)

اس جملوں سے دارالعلوم کا جو تصورا بھرتا ہے وہ اس دارالعلوم سے بڑی حد تک مختلف ہے جو آج موجود ہے، ضرورت اس بات کی ہے کہ ہم پھر اسی فردوس گم گشتہ کو ڈھونڈ یں اور اسی دارالعلوم کو تلاش کریں، اسی طرح ہم دارالعلوم کی حفاظت کرسکتے ہیں میں اپنا یہ مضمون شیخ الا سلام حضرت مولانا تقی عثمان  کے ان قیمتی جملوں پر ختم کرتا ہوں جو موجودہ حالات میں ہم سب کے لیے مشعل راہ ہیں:

‘‘ اگر صرف وسعت مطالعہ ،قوت استعداد ، اور کثرت معلومات کا نام علم ہوتو یہ صفت آج بھی کامیاب نہیں لیکن اکابر دیوبند کی خصوصیت یہ ہے کہ علم وفضل کے سمندر سینے میں جذب کرلینے کے باوجود ان کی تواضع ،فنائیت اور للّٰہیت انتہا کو پہنچی ہوئی تھی یہ محاور ہ زبان زد عام ہے کہ پھلوں سےلدی ہوئی شاخ ہمیشہ جھکی رہتی ہے ،ہمارے زمانے میں اس محاور ہ کا عملی مظاہرہ یقیناً اکابر دیوبند کی زندگی میں نظر آتا ہے اور کہیں نہیں ‘‘ (اکابر دیوبند کیا تھےص 88)

URL: https://newageislam.com/urdu-section/darul-uloom-deoband-beating-heart/d/4213