Blood donation and Shariah guidelines عطیۂ خون اور شریعت کی رہ نمائی

عطیۂ خون اور شریعت کی رہ نمائی

دارالعلوم کے ‘فتوے’ کے حوالے سے میڈیا کی ایک تازہ شرارت کا جائزہ لے ہیں :مولانا ندیم الواجدی

ایک مرتبہ پھر دارالعلوم کا فتویٰ اخبارات کی سرخیوں میں ہے، کئی ٹی وی چینلوں نے اس فتویٰ کو خبر کے طور پر نشر کیا ہے، ہم ان کالموں میں کئی بار لکھ چکے ہیں کہ کچھ سالوں سے میڈیا غیر ضرو ری طو ر پر مسلمانوں کے باوقار اور قابل اعتماد اداروں کے بالخصوص دارالعلوم دیوبند سے جاری کئے گئے فتوؤں کو توڑ مروڑ کر یا ان کو سیاق وسباق سے جدا کر کے شائع کررہا ہے ، اس کا مقصد سستی شہرت حاصل کرنا بھی ہے اور دارالعلوم دیوبند کی ساکھ کو نقصان پہنچانا بھی ہے۔ حال ہی میں ایک ہندی اخبار نے دارالعلوم کی ویب سائٹ سے ایک فتویٰ لے کر شائع کیا ہے جو خون کا عطیہ دینے کے سلسلے میں ہے، خدا جانے فتویٰ کیا ہے، اس کے الفاظ کیا ہیں اس لیے فتوے کا جو نمبر شائع کیا گیا ہے، ویب سائٹ پر اس نمبر کا فتویٰ موجود ہی نہیں ہے، لینے والے نے کہا ں سے یہ فتویٰ لیا اور اس سے کیا سمجھا ہم نے دارالعلوم دیوبند کے شعبہ دارالافتا کے ایک ذمہ دار مفتی صاحب سے رابطہ قائم کیا تو  انہوں نے بتلایا کہ اخباروالے نے انگ دان( عضو کا عطیہ دینے) کے سلسلے میں مجھ سے سوال کیا تھا جس کے جواب میں میں نے کہہ دیا تھا کہ شریعت میں انگ دان جائز نہیں کیونکہ انسان اپنے جسم کا مالک نہیں ہے،اگلے دن اخبار نے مفتی صاحب کا بیان اس طرح پیش کیا گویا انہوں نے رکت دان یعنی خون کے عطیئے کو حرام قرار دیا ہو، ابھی یہ بیان آیا ہی نہیں  تھا کہ کسی مسلم اسکالرس میدان میں کود پڑے اور  انہوں نے دارالعلوم کے اس فتوے کے خلاف بیان واضعے شروع کردئے ،سب سے پہلے وحیدالدین خاں بولے  انہوں نے فتوے کو غلط بتاتے ہوئے کہا کہ خون کا عطیہ دینے سے مسلمانوں کو روکا نہیں جاسکتا، انہوں نے کہا کہ ہم مسلمانوں سے یہ اپیل کرتے ہیں کہ وہ خون کا عطیہ دینے آئیں اور ایسا کرتے رہیں ،جامعہ ملیہ اسلامیہ میں اسلامی علوم کے شعبے کے چیئر مین پروفیسر اختر الواسع نے فرمایا کہ زندگیاں بچانے کے لئے خون کا عطیہ ضروری ہے ،انہوں نے یہ بھی یاد دلایا کہ اسلامی فقہ اکیڈمی نے پہلے ہی یہ کہا تھا کہ خون کا عطیہ دینا کوئی مسئلہ نہیں ہے۔

اس تفصیل کے بعد عرض ہےکہ میڈیا کی موجودگی روش نہایت افسوس ناک ہے، مسلم تنظیموں کو بیٹھ کر اس مسئلے پر غور وخوض کرنا چاہئے کہ من گھڑت خبریں ،بتصرے اور بیانات شائع کرنے کا جو رجحان پیدا ہوا ہے اس پر کس طرح قابو پایا جائے ، اس طرح کے رجحان سے بڑی غلط فہمیاں پھیلتی ہیں اور لوگوں کو اسلام جیسے صاف ستھرے مذہب پر انگلی اٹھانے کا موقع ملتا ہے، اور مذہبی ادارے بھی اس کی زد میں آتے ہیں ،اس کا ایک حل تو یہ ہے کہ اس طرح کے اخبارات اور ٹی وی چینلوں کے خلاف قانونی چارہ جوئی کی جائے ،دوچار مرتبہ اگر یہ قدم اٹھالیا گیا تو اس رجحان میں کمی ضرور آئے گی، لیکن سب سے بہتر صورت یہ ہے کہ مسلمانوں کے اپنے ٹی وی چینل ہوں ،ہماری ملی جماعتیں بڑی آسانی کے ساتھ ٹی وی چینل قائم کرسکتی ہیں، بس اس کے لئے تھوڑے حوصلے اور ہمت اور بڑی منصوبہ بندی کی ضرورت ہے ، دوسری بات ہمیں اپنے دانشوروں سے عرض کرنی ہے کہ وہ کسی موضوع پر تبصرہ کرنے سے پہلے متعلقہ شخص یا ادارے سے فون کر کے پوچھ لیں کہ آیا اس نے ایسا کہا بھی ہے یا نہیں ،اگر پوچھنے کی فرصت نہ ہو تو ایک دوروز انتظار ہی کی زحمت اٹھالیں ،ہوسکتا ہے جس بیان پر آپ تبصرہ کرنا چاہتے ہیں اس کی تردید آجائے ،یا اس کی تصحیح کردی جائے ، مولانا وحید الدین خاں جیسے حضرات ہمارے مخاطب نہیں ہیں جن کا واحد مقصد ہی مخالفت برائے مخالفت ہے، اور ج ن کی زندگی کا نصب العین ہی اسلامی تعلیم اور تاریخ کومسخ کرتا ہے۔

اب آئیے زیر بحث موضوع کی طرف ،لیکن اس سے پہلے بہ طور تمہید یہ عرض کرنا ہے کہ اس کا ئنات میں انسان سے زیادہ مکرم اور افضل کوئی دوسری مخلوق نہیں ہے، ہر ذرہ اسی کی بہتر اور بامقصد زندگی کے لئے تخلیق کیا گیا ہے، لیکن اللہ تعالیٰ کی مرضی اور منشا یہ ہے کہ انسان اس وسیع کائنات میں برگ آوارہ کی طرح نہ پھر ے بلکہ اپنے خالق ومالک کی مرضی کا پابند رہ کر زندگی گزارے ،اسی لیے پیغمبر بھیجےگئے ،شریعتیں نازل کی گئیں ،اور کتابیں  اتاری گئیں ،اسلام آخری شریعت ہے جو انسان کی فلاح کے لئے نازل کی  گئی ہے ،ظاہر ہے جو چیز جس کے لئے بنائی گئی اور جس کے لئے بھیجی گئی اسی میں اس کی فلاح ہوگی ،اور اس کی مصلحتوں کا خیال ضرور رکھا گیا ہوگا ،اس لئے شرعی احکام کو پتھر کی طرح جامد نہیں رکھا گیا ،بلکہ ان میں انسانی طبائع کے تغیرات اور اس کے دائمی اور عارضی مصلحتوں کو سامنے رکھا گیا ہے اس لیے اگر ہم یہ کہیں تو غلط نہ ہوگا کہ معاملے کے صرف دو پہلو نہیں ہوتے حلال اور حرام ،بلکہ کچھ ایسے بھی پہلو ہوتے ہیں جن کی بنیاد پر کوئی  حرام چیز حلال یا حلال چیز حرام ہوجاتی ہے ،کوئی حکم ساقط ہوجاتا ہے یا کسی حکم کا اضافہ کردیا جاتا ہے ، شریعت میں اس کے بے شمار مثالیں ہیں ،مختصراً اتنا سمجھ لیجئے کہ بہت سے احکام میں کسی مصلحت کی وجہ سے تبدیلی ممکن ہے، اصول فقہ میں اس مصلحت کو ضرورت وحاجت اور اضطرار جیسی اصطلاحات سے تعبیر کیا جاتا ہے ، پھر اضطرار اور حاجت میں بھی فرق ہے ،جیسا کہ علامہ الحموی نے شرع الاشباہ والنظائر میں لکھا ہے کہ اضطرار یہ ہے کہ کسی ممنوع چیز کو استعمال کئے بغیر زندگی نہ بچ سکتی ہو ،ایسی صورت میں کچھ شرائط کے ساتھ حرام کا استعمال جائز ہوجاتا ہے ،اور حاجت یہ ہے کہ کسی ممنوع چیز کے استعمال نہ کرنےس ے جان کی ہلاکت کا تو خوف نہیں البتہ مشقت اور تکلیف بہت زیادہ ہے، ایسی حالت میں حرام چیزوں کے استعمال کی اجازت تو نہ ہوگی البتہ بہت سے احکام شرعیہ میں سہولت اور تخفیف ہوجائے گی ، جیسے حالت مرض میں وضو کے بجائے تیمم کی گنجائش ہے کھڑے  ہوکر نماز پڑھنے کے بجائے بیٹھ کر یا لیٹ کر نماز پڑھی جاسکتی ہے یا روزہ قضا کیا جاسکتا ہے۔

اس تمہید کے بعد عرض ہے کہ خون فی نفسہ ناپاک چیز ہے ، اس کی نجاست اور حرمت نص قطعی ہے ثابت ہے ،قرآن کریم میں اللہ تعالیٰ کا ارشاد ہے : اِنَّمَا حَرَّمَ عَلَیکُمُ اُلًمَیًتَۃَ وَ اُ لدَّمَ وَلَحْمَ اُلْخِنزِ یرِ وَماَ اُھِلَّ بَہِ لِغَیْرِ اؑللہِ(سورہ البقرہ :173) ’’اس نے تم پر حرام کیا ہے مردو جانور ،خون، سورکا گوشت اور جو جانور اللہ نام پر ذبح کیا گیا ہو۔’’

یہ آیت اگر چہ بہت واضح ہے لیکن اس میں جو احکام ہیں وہ نہایت مجمل ہیں اس اجمال کو فقہائے امت نے کتاب سنت کی روشنی میں دور کر کے بہت سے احکام مستنط کئے ہیں ،اب خون ہی کا معاملہ لے لیجئے ،اس آیت میں خون کو حرام قرار دیا گیا ہے، اس سبیہ سمجھ میں آتا ہے کہ ہر طر ح کا خون حرام ہے خواہ وہ انسان ہو یا جانور کا ،تھوڑا ہو یا بہت ، بہتا ہوا یا منجمد ،لیکن درحقیقت بات صرف اتنی ہی نہیں ہے، اس کی مزید تشریح قرآن کریم کی دوسری جگہوں پر آئی ہے اور احادیث میں بھی وارد ہے جس کی روشنی میں خون کے احکام باضابطہ طور پر فقہا نے مرتب کردئے ہیں اور لقہہ کی کتابوں میں موجود ہیں ،مثال کے طور پر قرآن  کرام کی سورۂ انعام میں اودما مسفوحاً(الانعام :145) فرمایا گیا ہے جس کے معنی ہیں بہنے والا خون گویا وہ خون حرام ہے جو بہنے والا ہو ، منجمد حرام نہیں ہے۔ اسی لیے گردہ کلیجی اورتلی وغیرہ اجزا ان جانوروں کے باتفاق فقہا جائز ہیں جن کا گوشت کھانے کی اجازت ہے ۔اور جو شریعت کے بتلائے ہوئے طریقے پر ذبح کئے گئے ہوں ،مگر ان کا خون پینے کی اجازت نہیں ہے، اس آیت کا اگلا حصہ وہ ہے جس پر فقہی مسائل میں اضطرار کی عمارت کھڑی کی گئی ہے:فرمایا

فَمَنِ اُضْطُرَّ غَیْرَ بَا غ وَلاَ عَا دِِ فَلَآ اِ ثْمَ عَلَیْہِ اِنَّ اُللہ غَفُوُرُ رَّحِیمُ(سورۃ البقرہ :173)‘‘ جو شخص بے اختیار ہوجائے نہ وہ نافرمان ہو اور نہ حد سے تجاوز کرنے والا ہو اس پر کوئی گناہ نہیں ہے، بے شک اللہ بڑے غفور رحیم ہیں۔‘‘ یہ ایک ایسا  اصول بیان کیا گیا ہے جس میں مجبورانسان کے لیے بڑی سہولتیں ہیں ، فقہا نے اسی اصول کی روشنی میں مجبوری یعنی حالت اضطراب کی حالت پیش آئے یہ فیصلہ کرسکتا ہے کہ اسے ممنوعہ اشیا استعمال کرنی چاہئیں یا نہیں، قرآن کا طرز بیان بڑا حکیمانہ ہے، صرف دوتین لفظوں کے ذریعے قرآن کریم نے اضطرار کی حالت میں حرام کے استعمال کی نوعیت متعین کردی ہے، جن میں سے ایک لفظ غیر باغ ہے یعنی وہ فرماں بردار بندہ بن کر ہی یہ چیز استعمال کرے،ظاہر ہے فرماں برداری ایک ایسا وصف ہے جو اسے محض ضرورت کے مطابق ہی استعمال پر آمادہ کرے گی اور جیسے ہی یہ ضرورت پوری ہوگی اس کے ہاتھ خود بہ خود رک جائیں گے ،اسی کو ولاعاد کہہ کر اور مؤکد کردیا گیا کہ ذہن کے کسی گو شے میں بھی حد سے تجاوز کرنے کا خیال نہ ہوناچاہئے ،مثال کے طور پر ایک شخص بھوک سے بے چین وبے قرار ہے اور بھوک اتنی بڑھی ہوئی ہے کہ اگر کھانے کو کوئی چیز میسر نہ ہوئی تو اس کا دم بھی نکل سکتا ہے مگر کوئی جائز وپاک غذاپیٹ بھرنے کے لئے موجود نہیں ہے یہ وہ کیفیت ہے جسےشریعت نے اضطراف سے تعبیر کیا ہے، اس صورت میں اس شخص کو حرام چیز استعمال کرنے کی اجازت ہے،مگر صرف اس قدر جس سے زندگی بچ جائے، ناجائز غذا کےاستعمال سے لذت کا م ووہن مقصود نہ ہو، اگر اس شرط کے ساتھ حرام غذا استعمال کرے گا تو اس پر کوئی گناہ نہیں ہوگا، اور وہ عنداللہ معذور اور مجبور سمجھا جائے گا ،قلا الم علیہ میں ایک لطیف نکتہ یہ بھی پوشیدہ ہے کہ گناہ نہ ہونے کا یہ مطلب نہیں ہے کہ ہو حرام وناپاک چیز حلال وطیب ہوگئی بلکہ اس کامطلب یہ ہے کہ اس کی حرمت اور نجاست اپنی جگہ ہے ،لیکن تم نے جان بچانے کے لئے اس کا جو استعمال کیا ہے اس سے تم گنہ گار نہیں ہوں گے ،کیونکہ تمہارا یہ فعل اللہ کی اجازت ومرضی سے اور ا کی متعین کردہ حدود کے اندررہ کر ہوا ہے۔

خون کے متعلق فقہا نے ان آیات کی روشنی میں جو کچھ لکھا ہے اس کا حاصل بھی یہی ہے کہ خون اصلاً ناپاک ونجس ہے اور ناپاک ونجس چیزوں کے جو احکام ہیں وہ احکام خون کے سلسلے میں بھی واجب العمل ہیں،یعنی اس کا کھانا پینا بھی حرام ہے ،اس کا خارجی استعمال بھی جائز نہیں ہے، بلکہ اگر خون بدن پر یا کپڑے پر لگ جائے تو اس کو صاف کرنا ور دھونا ضروری ہے ،ورنہ ان عبادات کی تکمیل نہیں ہوگی جن میں بدن اور کپڑوں کی طہارت مقصود ہے، اس میں کچھ اور بھی تفصیلات ہیں جو طہارت کے ابواب میں لکھی ہوئی موجود ہیں، یہاں ان کا موقع ومحل نہیں ہے ، کیوں کہ قرآن کریم میں مطلقاً دم فرمایا گیا ہے ،اس لفظ کے اطلاق کا تقاضا یہ ہے کہ خون کے ہر طرح کا استعمال ناجائز ہو، چنانچہ جس طرح دیگر نجاستوں کی خرید و فروخت حرام ہے اور ان سے نفع کمانا حرام ہے اسی طرح خون کی خریدوفروخت بھی حرام ہے اور اس سے نفع اٹھانا بھی جائز نہیں ہے۔

اس تفصیل سے یہ بات تو واضع ہوگئی کہ ازرو ئے قرآن کریم خون نجس ہے ۔۔۔۔۔۔۔مونداور خنزیر کی طرح خون کو بھی نجس اور ناپاک قرار دیا گیا ہے ،پھر یہ انسان کا جز وبدن بھی ہے انسان بحیثیت انسان مکرم ومحترم ہے اس کے تمام اجزا ئے بدن  بہ شمول خون واجب التکریم ہیں ،نجاست کے پہلو سے بھی اور اس شرف تکریم کی بنا پر بھی خون کا داخلی اور خارجی استعمال ناجائز قرار دیا گیا ہے، اب صرف یہ سوال رہ جاتا  ہے کہ کیا خون کو بہ طور دوا استعمال کیا جاسکتا ہے ،آج کل اس کا استعمال عام ہے ،خاص طور پر جب کسی حادثے کےبعد مجروح انسان کے بدن کا خون ضائع ہوجاتا ہے ،یا کسی بیماری کی وجہ سے جسم میں خون کی کمی پیدا ہوجاتی ہے اس صورت میں اطبا کسی دوسرے کا خون لےکر مریض کے جسم میں داخل کرتے ہیں ، کیا ازروئے شرع ایسا کیا جاسکتا ہے ،اور اگر اس کی اجازت ہے تو یہ خون کس کا حاصل کیا جائے، ایک صو رت تو یہ ہے کہ مریض کاکوئی عزیز قریب ازراہ تعلق اپناخون پیش کردے، دوسری صورت یہ ہے کہ بلڈ بینک سے خرید اجائے دونوں صورتیں برابر ہیں یا ان میں کو ئی فرق ہے۔

جہاں تک میرے علم میں ہے اس سلسلے میں سب سے پہلے حضرت مولانا مفتی محمد شفیع عثمانی ؒ نے غور وخوض کیا ،نہ صرف خود غورکیا بلکہ اس وقت کے متعدد پاکستانی علما کو خون کے استعمال سے متعلق سوالات بھیج کر ان کی رائے دریافت کی، یہ تمام تحقیقات اور ان کے نتائج مطبوعہ شکل میں موجود ہیں ،حضرت مفتی صاحب نے اپنی تفسیرمعارف القرآن میں اور جواہر فلسفہ میں اس موضوع کے تمام پہلوؤں پر سیر حاصل بحث کی ہے، بعد کے تمام  فقہا نے حضرت مفتی صاحب کی تحقیقات پر ہی اپنے فتوؤں کی بنیاد رکھی ہے، مثال کے طور پر حضرت مولانا مفتی عبدالرحیم لاجپوری نے فتاوی رحیمیہ میں اور حضرت مولانا محمد یوسف لدھیانوی ؒ نے ‘‘آپ کے مسائل اور ان کا حل’’ میں خون کے متعلق کئے گئے سوالات کے جواب میں حضرت مفتی صاحب کے جواب کی عبارت من وعن نقل کردی ہے،دوسرے فتاویٰ بھی میں حضرت مفتی صاحب کی رائے سے انحراف نہیں کیا گیا اس سے معلوم ہوا کہ آج سے پچاس سال پہلے جب کہ میڈیکل سائنس نے اس قدرترقی بھی نہیں کی تھی ہمارے علما نےبہت سے پیچیدہ وطبی مسائل کا شرعی حل تلاش کرلیا تھا۔

تمام اصحاب فتویٰ اس بات پر متفق ہیں کہ انسان کا خون اس کے جسم سے نکلنے کے بعد ناپاک ہوجاتا ہے ،اس کا تقاضا تو یہی ہے کہ ایک انسان کاخون دوسرے کے ۔۔۔۔۔ داخل نہ کیا جائے ،لیکن بعض اوقات ایسے حالات پیدا ہوجائیں جب خون دینا ناگزیر ہوجاتا ہے ،اور ڈاکٹر مثاثر شخص کی زندگی بچانے کے لیے خون چڑھانے کو ضروری قرار دیتے ہیں، کسی بیمار کی وجہ سے بھی بدن میں خون کی کمی ہوجاتی ہے اور اس کے تصفیئے وتنفیئے نظام درہم برہم ہوجاتا ہے ،اس طرح کے مریضوں کو مستقل طور پر جسم کا فاسد خون نکلواکر صاف اور نیا خون جسم میں داخل کرانا پڑتا ہے، بعض اوقات انسان کسی حادثے میں مجروح ہوجاتا ہے اور اس کے جسم سے خون کی بہت زیادہ مقدار بہہ کر اس کی کمزوری اور نقاہت کا سبب بن جاتی ہے، نہ صرف نقاہت پیدا ہوجاتی ہے بلکہ مریض موت وحیات کی کشمکش میں مبتلا ہوجاتا ہے ،اس حالت میں اگر مریض کے جسم میں کسی دوسرے کا خون داخل نہ کیا جائے تو اس  کے مرنے کا خطرہ پیدا ہوجاتا ہے ،یہ اضطرار کی حالت ہے ،تمام فقہا واصحاب فتاویٰ نے ایسے حالات میں جسم میں خون چڑھا نے کی اجازت دی ہے ، اور یہ اجازت قرآن کریم سے بھی ثابت ہے۔

حضرت مفتی شفیع صاحبؒ نے لکھا ہے کہ اگرچہ خون انسان کا جزو بدن ہے ،مگر اس کو کسی دوسرے انسان کے جسم میں منتقل کرنے کے لئے آپریشن کرنے یا جسم کے اعضا کو کاٹنے کی ضرورت پیش نہیں آتی ،بلکہ سرنج کے ذریعہ خون نکال کر دو سرے کے جسم میں داخل کردیا جاتا ہے، یہ ایسا ہی جیسے ماں کا دودھ بچے کی ضرورت کے لیے جائز قرار دیا گیا ہے، بلکہ اگر دودھ سے علاج ناگزیر ہوتو بڑے بھی اس سے مستفیدہوسکتے ہیں ،جیسا کہ فتاوی عالمگیر ی میں ہے ،لا باس یان بسعط الرجل بلن المراۃ ونشرہ للنعوا (255/5) ‘‘اس میں کوئی حرج نہیں کہ عورت کا دودھ بہ طور دوا آدمی کی نام میں ڈالا جائے یا اسے پلایا جائے’’ اگر خون کو دودھ پر قیاس کیا جائے تو یہ قیاس بعید نہیں ہے دودھ بھی خون کی بدلی ہوئی صورت ہے اور یہ بھی جز بدن ہے، فرق صرف یہ ہے کہ دودھ پاک ہوتا ہے اور خون ناپاک ،حرمت کی پہلی وجہ تکریم انسانی تووجہ ممانعت نہ ہونی چاہئےکیونکہ اس اعتبار سے دودھ اور خون میں کوئی فرق نہیں ہے، البتہ نجاست کا معاملہ رہ جاتا ہے ،اس کے باوجود علاج کے بہ طور بعض فقہا نے خون کے استعمال کی اجازت دی ہے اس لیے انسان کا خون دوسرے انسان کے جسم میں منتقل کرنے کا شرعی حکم یہ معلوم ہوتا ہے کے عام حالات میں تو ایسا کرنا جائز نہیں ،یعنی محض طاقت حاصل کرنے یا حسن بڑھانے کے لیے خون چڑھوانا جائز نہیں لیکن علاج ودوا کے بہ طور اضطرار ی حالت میں بلاشبہ جائز ہے ،اضطراری حالت سے مراد یہ ہے کہ مریض کی جان کو خطرہ ہو ،اور کوئی دوسری دوا جان بچانے کی موجود نہ ہو، اور خون دینے سے اس کی جان بچنے کا ظن غالب ہو ،ان شرطوں کے ساتھ تو خون دینا تو اس نص قرآنی کی روسے جائز ہے جس  میں مضطر کے لیے مرادر جانور کھا کر جان بچانے کی اجازت صراحنا مذکور ہے ،لیکن اگر اضطرار ی حالت نہ ہو اور دوسری دوائیں بھی کام آسکتی ہوں تو اسی حالت میں مسئلہ مختلف فیہ ہے (معارف القرآن :419/1)

غیر اضطراری حالت میں خون دینے کا مسئلہ اس لیے مختلف فیہ ہے کہ اگر مریض کی جان کسی دوسری دوا سے بچ سکتی ہو تو پھر ناپاک چیز استعمال کرنے کی ضرورت کیا ہے، اس لیے بعض فقہا اضطراری حالت میں تو خون چڑھانے کی اجازت دیتے ہیں ، اس کے علاوہ کی صورت میں اجازت نہیں دیتے لیکن اکثر فقہا نے درج ذیل وہ صورتوں میں بھی اجازت دی ہے۔(1) جب ماہر ڈاکٹر کی نظر میں خون دینے کی حاجت ہویعنی مریض کی ہلاکت کا خطرہ نہ ہو لیکن اس کی رائے بھی خون دئے بغیر صحت کا امکان نہ ہو تب بھی خون دینا جائز ہے(2)جب خون نہ دینے کی صورت میں ماہر ڈاکٹر کے نزدیک مرض کی طوالت کا اندیشہ ہو،اس صورت میں خون دینے کی گنجائش ہے مگر اجتناب بہتر ہے ، کمافی الہند یہ : وان قال الطیب یعجل شفا ک فیہ وجہاد (ج 3555) (آپ کے مسائل اور ان کا حل :175/9) جو حضرات حرام اشیا سے تداوی کے قائل ہیں وہ واقعہ عرینہ سے استدلال کرتے ہیں کہ سرکاردوعالمﷺنے اصحاب عرینہ کو اونٹ کا پیشاب پینے کی اجازت دی تھی ،(بخاری باب الدوا بابرال الابل :2163/5رقم:5395، سنن الفرمدی:106/1رقم :72) اسی طرح حدیث کی کتابوں میں یہ بھی مذکور ہے کہ ایک صحابی حضرت عرلمجہ کی ناک سڑگل گئی تھی، سرکار دوعالمﷺ نے انہیں اجازت مرحمت فرمائی کہ وہ سونبے کی ناک لگوالیں ، حالانکہ سونا مردوں کے لئے حرام ہے،(ترمذی 206/1)

اب ا س وضاحت کے بعد کہ دوا کے بہ طور حون چڑھانا جائز ہے یہ سوال اپنی جگہ باقی رہ جاتا ہے کہ کیا خون کا عطیہ دینا بھی جائز ہے یا اسے بھی انسانی جسم کے دوسرے اعضا پر قیاس کیا جائے گا جن کا دینا جائز نہیں ہے اس سے مربوط ایک سوال یہ بھی ہے کہ اگر کسی کا خون عطیہ میں نہ ملے تو اسے خرید نے کی اجازت ہے یا نہیں ، اور یہ سوال بھی پیدا ہوتا ہے کہ جب خون کا خرید ناجائز ہے تو اس کا فروخت کرنا بھی جائز ہے یا نہیں؟

جہاں تک اس آخری سوال کا تعلق ہے تو یہ بات بالکل طے شدہ ہے کہ خون کی فروخت قطعاً جائز نہیں ہے ، کیونکہ حدیث شریف میں خون کی فروخت سے صراتاً منع فرمایا گیا ہے ،فقہا نے لکھا ہے کہ جو چیزیں نجس العین ہوتی ہیں ان کے بیع جائز نہیں ہے ،البتہ ضرور ت ان فائدہ اٹھایا جاسکتا ہے ،اس کے باوجود اگر کوئی شخص خون فروخت کرتا ہے تو بیچنے والے کے لئے اس کی قیمت سے فائدہ اٹھانا جائز نہیں ہے(عنا یۃ علی حامش فتح القدیر :202/5))یہ تو خون کی فروخت کا معاملہ ہوا لیکن اس سلسلے میں کسی کا کوئی اختلاف نہیں ہے کہ اگر بلاقیمت خون نہ ملے تو قیمت دے کر خریدناجائز ہے ،حضرت مولانا مفتی شفیع عثمانی نے لکھا ہے ‘‘خون کی بیع تو جائز نہیں لیکن جن شرائط کے ساتھ مریض کو خون دینا جائز قرار دیا گیا ہے ان حالات میں اگر کسی کو خون بلا قیمت نہ ملے تو اس کے لئے قیمت دے کر خون حاصل کرنا بھی جائز ہے (جواہر الفقہ 38/2) اس طرح یہ بھی جائز ہے کہ کسی مریض کو خون دیدیا جائے ،بشرطیکہ کوئی ماہر ڈاکٹر یہ رائے ظاہر کرے کہ اگر مریض کو خون نہ دیا گیا تو مریض کی ہلاکت کا فوری خطرہ نہیں ہے مگر خون دئے بغیر صحت کا امکان نہیں ہے (حوالہ سابق)

حادثات بہت زیادہ بڑھ گئے ہیں اس لیے یہ ضروری ہوگیا ہے کہ ہسپتال میں ہر وقت خون مہیا رہے تاکہ بوقت ضرورفت مریضوں کے جسم میں داخل کیا جاسکے اور ان کی زندگی بچائی جاسکے، آپریشن کے ہسپتالوں میں خون کا انتظام رکھا جاتا ہے تاکہ اگر مریض کے جسم سے زیادہ خون بہہ جائے تو محفوظ خون سے اس کے جسم سے بہہ جانے والے خون کی کمی پوری کی جائے، اس مقصد کے لیے آج کل بلڈ بینک قائم کئے جاتے ہیں ،مختلف لوگ رضا کارانہ طور پر بلڈ بینکوں میں جاکر یا اس مقصد کے لیے لگائے گئے خصوصی کیمپوں میں شریک ہوکر خون عطیہ کرتے ہیں، یہ خون بلڈ بینکوں میں محفوظ کرلیا جاتا ہے ،یہ اس لیے بھی ضروری ہے تاکہ بلڈ گروپ ملا کر ضرورت مند کو بلا تاخیر خون دے دیا جائے ، بعض اوقات مریض کے خون کا گروپ عطیہ دینے والے شخص کے گروپ سے مختلف ہوتا ہے اس صورت میں دشواری پیش آتی ہے اور تاخیر سے مریض کونقصان پہنچنے کا اندیشہ رہتا ہے ،اگر پہلے سے ہسپتالوں میں بلڈ بینکوں میں خون محفوظ ہوتو عطیہ دینے والے کے خون کے تبادلے میں مریض کے گروپ کے مطابق خون حاصل کیا جاسکتا ہے ،ہمارے مفتیان کرام نے یہ پہلو بھی نظر انداز نہیں کیا، حضرت مولانا قاضی مجادہد الاسلام ؒ نے تحریر فرمایا کہ ‘‘ دوسروں کا خون استعمال کرنا ظاہر ہے کہ اضطراری حالت میں جائز ہے ، جب خون کا استعمال جائز ہے تو خون کا ہبہ کرنا بھی جائز ہے ،ہبہ(دان) کرنے کے لئے حالت اضطراری کا انتطٓر ضروری نہیں ،اگر بروقت خون نہیں ملایا خون ایک دوسرے کے موافق ثابت نہیں ہوا تو جب تک گروپ ملایا جائے اور گروپ والے آدمی کو تلاش کیا جائے مریض کی جان چلی جائے گی ، لہٰذا خون کا عطیہ دینا اس کا بینک قائم کرنا اور اچھے کام کےلئے کیمپ لگانا جائز اور درست ہے( فتاوی قاضی،ص 2010)

URL: https://newageislam.com/urdu-section/blood-donation-shariah-guidelines-/d/3767