Sat Mar 14 2026, 11:53 AM

Urdu Section ( 14 Nov 2025, NewAgeIslam.Com)

History and Civilization of Islam-Part-75 تاریخ وتمدن اسلام

خلیق احمد نظامی

(حصہ۔75)

6 نومبر،2025

بس جو آدمی رات دن پچاس دکھوں میں مبتلا رہتاہو، اس کونہ نعمتوں میں مزا آسکتاہے، نہ خدمتوں میں، نہ او رکسی چیز میں“

حضرت محبوب الہٰیؒ کی تعلیم اور افکار کی اس طرح ترجمانی خواجہ صاحب سے بہتر آج تک کسی سے بن نہ آئی۔’نظامی بنسری‘ ایک مرقع ہے، دل کش، بصیرت افروز، روح پرور، جس میں محبوب الہٰیؒ کی جیتی جاگتی تصویر دیکھی جاسکتی ہے۔

(1)خواجہ صاحب کے مضامین او رکتابوں کو ایک مکمل Bibliography جلد از جلد تیار ہونی چاہئے، او ریہ سب کتابیں ایک جگہ پرریسرچ کرنے والوں کے لیے موجود ہونی چاہئیں۔اس سے خواجہ صاحب کے علمی کاموں کی نوعیت اور وسعت کااندازہ لگانے میں مدد ملے گی۔

(2)کہتے ہیں کہ انگلستان کے مشہور شاعر Wordsworthکو وہ مقبولیت او رعظمت حاصل نہ ہوتی، جو آج اس کو انگریزی ادب میں حاصل ہے، اگر Matthew Arnold نے اس کے کلام کا انتخاب شائع نہ کردیا ہوتا۔ خواجہ صاحب کے علمی وادبی کاموں کے انتخاب کی بھی شدید ضرورت ہے۔ اس طرح ان کے افکار کے اثر ونفوذ کادائرہ بڑھ جائے گا۔یہ جلد یں مضامین کے اعتبار سے پورے مطالعہ اور محنت کے بعد تیار کی جانی چاہئیں۔ایک ایسے مصنف کو جس کا دائرہ عمل بہت وسیع ہو،بہت سی باتیں وقتی ضرورت سے کہنی پڑتی ہیں۔ انتخاب کرتے وقت یہ ملحوظ رکھنا ہوگا کہ مستقل اہمیت کی کوئی چیز نظر انداز نہ ہوجائے۔

(3)خواجہ صاحب کی ایک مفصل سوانح حیات مرتب کرنے کی بھی ضرورت ہے۔ واحدی صاحب کا کام سرسری ہے اورنامکمل۔خواجہ صاحب کی زندگی ہندی مسلمانو ں کی ساٹھ سالہ کاوشوں کی تاریخ ہے، جس کومرتب کرنے کیلئے تاریخی عوامل، حالات گروہ پیش، اور سیاسی، سماجی اور ثقافتی تحریکوں کا جائزہ ضروری ہے۔ایسے ہی وسیع تاریخی چوکٹے میں ان کی تصویر بنائی اور سجائی جاسکتی ہے۔خواجہ صاحب کے کام سے زیادہ سے زیادہ لوگوں کو متعارف کرانے کیلئے یہ چیزیں ضروری ہیں۔ ویسے حقیقت تو یہ ہے کہ۔

ہرگز نمیرد آنکہ دِلش زندہ شد بعشق

ثبت است برجریدہئ عالم دوام ما

خواجہ حسن نظامیؒ کے عملی اور دینی رجحانات کا پس منظر

خواجہ حسن نظامیؒ کی شخصیت کے اتنے دلکش اورمختلف النوع پہلو ہیں کہ جس طرف نظراٹھ جاتی ہے، جی چاہتا ہے کہ بس دیکھتے ہی رہے۔

بقول شیخ سعدیؒ۔

ازخیال تو بہرسو کہ نظر میکروم

پیش چشمم در ودیوار مصور می شد

مفسر، مصنف، مقرر، معلم، مبصر، مصلح، شیخ طریقت، ادیب وانشاء پرداز۔۔ وہ جس میدان سے گزرے،اپنی انفرادیت کا نہ مٹنے والانقش چھوڑا کر آگے بڑھے۔ ان کی ذات میں غیر معمولی دلکشی او ررعنائی تھی۔

نرم دم گفتگو، گرم دم جستجو

رزم ہویا بزم ہو،پاک دل وپاک باز

ان کے ساتھ تاریخ کا ایک دور زبان حال سے یہ کہتاہوا رخصت ہوگیا۔

آخری بادل ہیں اک گزرے ہوئے طوفان کے ہم جس شخص کے کاموں کادائرہ اتنا وسیع او رہمہ گیر ہو، اس کی جہد وسعی کے بعض دور رس نتائج تک اگر معاصرین کی نظر نہ پہنچ پائے، تو کوئی تعجب کی بات نہیں۔ لیکن اب وقت آگیاہے کہ ان کی سیرت اورکارناموں کے ہر ہر پہلو کو روشنی میں لایا جائے۔حقیقت یہ ہے کہ خواجہ صاحبؒ کی مکمل اورمفصل سوانح حیات کسی دیدہ ور مصنف کی راہ دیکھ رہی ہے۔ خواجہ صاحبؒ کی ذات میں ہماری علمی اور تہذیبی زندگی کی بہت سی گرانقدرروایات جمع ہوگئی تھیں۔ ہندوستان میں اسلامی علوم اور ثقافت کی تاریخ اگر پیش نظر ہوتو اس حقیقت کے تسلیم کرنے میں کوئی تامل نہیں ہوسکتا کہ یہاں روحانی اصلاح وتربیت کی سب سے ممتاز شخصیت حضرت شیخ نظام الدین اولیاءؒ کی، او رعلوم ومعارف کی نابغہ روزگار ہستی حضرت شاہ ولی اللہ دہلویؒ کی تھی۔ ہندوستان کی روحانی او رعلمی دنیا کے یہ دورروشن مینارے ہیں، جن کی ضیاپاشیوں نے ہر طرف اجالا کردیا تھا۔ خواجہ صاحب کا تعلق ایک طرف حضرت محبوب الہٰیؒ کی مسند ارشاد وتربیت سے تھا، تو دوسری طرف ان کی علمی زندگی نے ولی اللہی خانوادے کے علمی مرکزوں او را س کے مشہور اساتذہ کی صحبت میں جلا پائی تھی۔ پھر تونسہ اور گولڑہ کے جن مشایخ سے وہ وابستہ تھے، وہ اس دور کی روحانی زندگی کے سب سے بڑے سرچشمے تھے۔ اس علمی اور روحانی فضانے خواجہ صاحبؒ کے دل ودماغ کے ریشہ ریشہ کو متاثر کیا تھا۔ ثقافتی اعتبار سے وہ عہد مغلیہ کے آخری دور کی جیتی جاگتی تاریخ تھے۔ انہوں نے سلطنت مغلیہ کی جان کنی کا حال اپنے خون جگر سے لکھا تھا۔ خود بھی روئے تھے اور دوسروں کو بھی رلایا تھا۔ ہندوستان میں شاید ہی دوسرا ایسا شخص ہوجس نے عہد مغلیہ کی یاد کو اس طرح سینے سے لگائے رکھا ہو۔ اس کی نظر میں سلطنت مغلیہ ایک حکومت سے زیادہ ایک تہذیبی نشانی تھی، جس کے گرد ہندوستان کی مشترکہ تہذیب نے پرورش پائی تھی،اور جس کی یاد اخلاق و انسانیت کی اعلیٰ قدروں کی یاد تھی۔ تقسیم ہند سے بہت پہلے انہوں نے ’منادی‘ کی پیشانی پریہ عبارت لکھوائی تھی:”دین الہٰی اکبر شاہی کا ہفت روزہ اخبار جو ہندوستان کو اکبر اعظم کے اصول پر ایک دل بناناچاہتا تھا۔“

سلطنت مغلیہ کا ان کے دل میں جو مقام تھا، وہ اس عبارت سے صاف ظاہر ہے۔ ادب و انشاء کے میدان میں خواجہ صاحب نے دہلی، پنجاب اور لکھنؤ کے ادبی میلانات کے لیے ایک مشترک میدان پیدا کردیا۔ اردو کو خالص عوامی زبان بنانے کی تحریک نے ان کی ذات کے گردنشونما پائی، یا یوں کہیے کہ چشتی مشایخ، بالخصوص بابا صاحبؒ اور حضرت محبوب الہٰیؒ کے جماعت خانوں میں جس ہندوی زبان کے پہلے جملے بولے گئے تھے، اس کی آخری منزل خواجہ حسن نظامی کی زبان تھی۔(جاری)

-----------------

Related Article: History and Civilization of Islam تاریخ وتمدن اسلام

Related Article: History and Civilization of Islam-Part-2 تاریخ وتمدن اسلام

Related Article: History and Civilization of Islam-Part-3 تاریخ وتمدن اسلام

Related Article: History and Civilization of Islam-Part-4 تاریخ وتمدن اسلام

Related Article: History and Civilization of Islam-Part-5 تاریخ وتمدن اسلام

Related Article: History and Civilization of Islam-Part-6 تاریخ وتمدن اسلام

Related Article: History and Civilization of Islam-Part-7 تاریخ وتمدن اسلام

Related Article: History and Civilization of Islam-Part-8 تاریخ و تمدنِ اسلام

Related Article: History and Civilization of Islam-Part-9 تاریخ و تمدنِ اسلام

Related Article: History and Civilization of Islam-Part-10 تاریخ وتمدن اسلام

Related Article: History and Civilization of Islam-Part-11 تاریخ وتمدن اسلام