Tue Dec 09 2025, 04:02 AM

Urdu Section ( 26 Oct 2025, NewAgeIslam.Com)

History and Civilization of Islam-Part-57 تاریخ وتمدن اسلام

خلیق احمد نظامی

(حصہ۔57)

18اکتوبر،2025

ایک ایسے زمانہ میں جب علم عمل سے بیگانہ ہوتا جاتا تھا، خانقاہیں رات کے آغوش میں تسبیح ومناجات میں مصروف تھیں، لیکن زمانہ پکار رہاتھا کہ۔

نکل کر خانقاہوں سے ادا کررسم شبیری

مولاناحسین احمد مدنیؒ نے وقت کی آواز کوسنا، سمجھا اور اس پرلبیک کہا۔مدرسہ کو خانقاہ سے اور خانقاہ کو مدرسہ سے قریب لائے۔ ایک ہاتھ میں جام شریعت لیا، دوسرے میں سندانِ عشق۔چشتیہ سلسلہ کے سوز وگداز اور نقشبندیہ سلسلہ کی تہذیب واحتیاط دونوں کواپنارہبر بنایا۔ دیوبند کا علمی رشتہ شاہ ولی اللہ دہلویؒ سے اور روحانی رشتہ خواجہ معین الدین چشتی سے اس طرح استوار کیا کہ دینی زندگی میں نئی توانائی پیداہوگئی۔پھر جب آزادی وطن کے لیے قربانی دینے اورقید وبند کے مصائب برداشت کرنے کا وقت آیا، تو ایسے سرفروشانہ بازار میں سرگرم عمل ہوئے کہ شاملی کے جہاد کی صدائے بازگشت دیوبند سے مالٹا تک گونج اٹھی۔ وہ ایک کڑی ہیں اس عظیم الشان تحریک کی جو بالاکوٹ سے سیداحمد شہیدؒ کی قیادت میں اٹھی اور شاملی میں نیاپیکر اختیار کرکے یاغستان کے پہاڑوں اورمالٹا کے بیابانوں تک پہنچی۔

خدا رحمت کندایں عاشقان پاک طینت را

تاریخ میں ایسی مثالیں بہت کم ملیں گی کہ ایک شخص بیک وقت روحانی زندگی اور سیاسی زندگی کے تقاضوں کو اس طرح پورا کرسکاہو جیسے مولانا مدنیؒ۔ اس کا راز صرف ایک تھا، اور وہ یہ کہ ان کی ذات میں دونوں زندگیاں ایک ہی مقصد کے تابع تھیں۔ ان کا عقیدہ تھا کہ رب کائنات سے جس نے اپنارشتہ نہیں جوڑا، وہ مقصد حیات سے بیگانہ رہا، جس نے غلامی کی زنجیروں کونہیں توڑ ا اس نے اپنے احساس اور خودداری کی دنیا کوویران کردیا۔ عبادت انسان کی تخلیق کا مقصد ہے اور آزاد زندگی اس مقصد کی تکمیل کے لیے از بس ضروری۔یہی وہ بنیادی سانچے ہیں جو انسان کو انسان بناتے ہیں اور اس کے پیکر خاکی میں وہ قوت بیدار کرتے ہیں جس کے بغیر وہ صحیح معنی میں خلیفہ اللہ فی الارض کے اعزاز کا مستحق نہیں ہوسکتا۔

تلاش وجستجو کی نظر جب مولانا مدنیؒ کی زندگی کی گہرائیوں تک پہنچتی ہے تو انسانیت، دلنوازی خلق اور آفاقی فکر کی ایک دنیا آباد نظر آتی ہے، جس کا آب ورنگ چشتی خانقاہوں کا فیضان ہے۔حضرت خواجہ معین الدین چشتیؒ سے پوچھا گیا کہ بہترین ا طاعت کیاہے؟ فرمایا: درمانگان رافر یادرسیدن وحاجت بیچارگان روا کردن و گرسنگاں راسیر گردانیدن۔پھر فرمایا: خدائے تعالیٰ اس کوعزیز رکھتا ہے جس میں دریا کی سی سخاوت، آفتاب کی سی شفقت، او رزمین کی سی تواضع ہوتی ہے۔ یہ شان ربوبیت ہے کہ جب سورج اور روشنی افق پرنمودار ہوتا ہے تو محلوں او رجھونپڑوں دونوں کو یکسا گرمی او ر روشنی پہنچاتا ہے۔دریا کی فیض بخشیاں اپنے پرائے کا امتیاز نہیں کرتی۔وہ امیر وغریب، عاصی عابد،سب ہی کی تشنگی کو دور کرنے کے لیے بے چین رہتی ہے۔ زمین کا دامن ہرذی روح کو پناہ دینے کے لیے کھلا رہتا ہے۔ جب تک انسان عملاً الخلق عیاں اللہ کا قائل نہ ہوجائے، وہ اس زمین پر اپنی خلافت کی ذمہ داری سے عہد برانہیں ہوسکتا۔ اس کے پیش نظر ہمیشہ یہ رہنا چاہیے کہ۔

بندہ عشق از خدا گیرد طریق

می شود برکافر ومومن شفیق

حضرت شیخ نظام الدین اوالیاؒ ء اوراپنی مجلسوں میں حضرت ابراہیم علیہ السلام کا قصہ بیان فرمایا کرتے تھے کہ بغیر کسی کو کھانے میں شریک کیے کبھی کھانا نہ کھاتے تھے۔بعض اوقات مہمان کی تلاش میں میلوں نکل جاتے۔ ایک دن ایک مشرک مہمان تھا۔ اس کو شریک طعام کرنے میں ان کو کچھ تامل ہوا۔ وحی نازل ہوئی، ”ابراہیم! ہم اس شخص کو جان دے سکتے ہیں اور توکھانا نہیں دے سکتا؟“

چشتیہ سلسلہ کی یہ تعلیم مولانامدنیؒ کے مزاج میں سرایت کرگئی تھی۔ انہوں ن اسی کی روشنی میں اپنی فکر ونظر کی دنیا بسا ئی تھی۔ ایک مرتبہ مولانا محمد الیاسؒ نے ان سے کہا کہ ”مولانا! مسلمانوں کے لیے دعا فرمائیے۔“ فوراً فرمایا:”کیا غیر مسلم مخلوق خدا نہیں؟“۔ یہ مرکزی نقطہ تھا اس فکر کا جو چشتیہ سلسلہ سے ان کو ملی تھی۔ ان کا عقیدہ تھا کہ خالق کائنات کی ربوبی انسان کواعلیٰ انسانی مقاصد کی چاکری میں مصروف دیکھنا چاہتی ہے، کیونکہ آفاقی نقطہ نظر کے بغیر زندگی کی اعلیٰ قدریں بے جان رہتی ہیں۔ ان کے سماجی روابط کی بنیادیں، ان کی اجتماعی سیاسی جدوجہد کاپس منظر یہی تصور تھا۔ ان کا خیال تھا کہ جس طرح انسان کو زمین، پانی اور سورج سے محروم نہیں کیاجاسکتا،اسی طرح اس سے آزادی نہیں چھینی جاسکتی۔ وہ سیاست میں اقتدار کی تمنا میں داخل نہیں ہوئے تھے، بلکہ ایک انسانی فریضہ کی بجاآوری کا جذبہ اس میدان میں لے آیا تھا۔ ہندوستان میں صرف دوشخصیتیں ایسی ہیں جنہوں نے آزادی کیلئے سب کچھ قربان کردینے کے باوجود اس سے فائدہ نہیں اٹھایا۔ جب آزادی کا خواب شرمندہ تعبیر ہوا تو گاندھی جی فرقہ واریت کی آگ بجھانے میں لگ گئے۔ مولانا مدنیؒ نے روحانی او راخلاقی قدروں کوبیدار کرنے میں اپنی بقیہ زندگی صرف کردی۔سچ ہے۔

قوموں کی تقدیر وہ مردِ درویش

جس نے نہ ڈھونڈی سلطان کی درگاہ

اس مضمون میں مولانا مدنیؒ کو بہ حیثیت محدث، مجاہد اور پیرطریقت دیکھنے کی کوشش کی گئی ہے۔ لیکن ان تینوں حیثیتوں پر گفتگو کرنے سے پہلے مناسب ہے کہ بہ حیثیت انسان ان کی شخصیت وکردار کی بنیادی حقیقتیں سمجھ لی جائیں۔

انسان دوستی اورغم گساری سے مولانا مدنیؒ کا خمیرتیار ہوا تھا۔ ان کی پوری زندگی تفسیر ہے حالی کے ان اشعار کی۔

چیست انسانی! تپیدن درغم ہمسایگان

ازسموم نجد در باغ عدن پ ژماں شدن

خوار دیدن خویش را از خواری ابنائے جنس

درشبستان تنگ دل از محنت زنداں شدن

(جاری)

--------------------

Related Article: History and Civilization of Islam تاریخ وتمدن اسلام

Related Article: History and Civilization of Islam-Part-2 تاریخ وتمدن اسلام

Related Article: History and Civilization of Islam-Part-3 تاریخ وتمدن اسلام

Related Article: History and Civilization of Islam-Part-4 تاریخ وتمدن اسلام

Related Article: History and Civilization of Islam-Part-5 تاریخ وتمدن اسلام