Deoband Controversy: The honour of Darul Uloom at stake نرغے میں دارالعلوم دیوبند کا وقار

نرغے میں دارالعلوم دیوبند کا وقار

فضیل احمد ناصری القاسمی

فخر المحدثین حضرت مولانا سید محمد انظر شاہ کشمیریؒ کو بندہ نے ایک مرتبہ یہ پیش گوئی کرتے ہوئے سنا تھا کہ مولانا مرغو ب الرحمن بجنوری کی موجودگی بہت سے فتنوں کو دبا ئے ہوئے ہے، ان کے بعد دارلعلوم بڑی آزمائشوں میں مبتلا ہوگا۔بندہ نے بھی مولانا بجنوری پر لکھے گئے اپنے ایک مقالے میں یہ تحریر کیا تھا‘‘ (مولانا خاموش اور مولانا عمید الزماں ) سورماؤں کو کھونے کا غم اور ان زخموں کی ٹیس میں ابھی تازہ ہی تھی کہ جانے والے سن کی طرح اس آنے والے سن نے بھی جھٹکا دیا اور وہ بھی کرارا جھٹکا جو بڑے بڑے جھٹکوں کا پیش خیمہ بن سکتا ہے ’’ اور ‘‘مرحوم اپنی صفائی باطن اور پاکیزہ فطرت کی بنا پر عزیمت کی ایسی مثال قائم کرگئے کہ ان کے جانشینوں کے لئے اس راہ پر چلنا کسی معجزہ سے کم نہ ہوگا۔’’ احقر نے جس وقت یہ لکھا تھا اس وقت تک ہنگامے کی کوئی صورت نہ تھی، مولانا مفتی ابوالقاسم بنارسی عبوری مہتمم نامزد کئے گئے تھے لیکن بعد کے حالات نےثابت کردیا کہ حضرت شاہ صاحب ؒ کی پیش گوئی اور ہمارا اندیشہ درست تھا۔ اب عالم یہ ہے کہ 11جنوری سے ہنوم دارالعلوم کے حالات دھماکے خیز بنے ہوئے ہیں اور نوبت یہاں تک پہنچ گئی ہے کہ اس کے نومنتخب مہتمم مولانا غلام و ستانوی نے استعفیٰ دینے کے پیش کش کردی ہے۔

 بات دراصل یہ ہے کہ مدرسہ اشاعت العلوم اکل کو ا مہاراشٹر کے بانی و مہتمم مولانا غلام محمدوستانوی کو دارالعلوم کی مجلس شوریٰ نے باتفاق رائے اور باجماع امت مہتمم منتخب کرلیا، وہ جنوری کی 11تاریخ تھی اور آج 26جنوری ہے۔ ان 15دنوں میں دارالعلوم کے سر سے جو قیامت گزری اور گزررہی ہے وہ ہر بیدار مغز مسلمان و محب شریعت محمدیؐ کو تڑپا دینے کے لئے کافی ہے۔ بندہ کی عادت رہی ہے کہ متنازعہ موضوع پر بات نہیں کرتا ، اس بار بھی مصلحت کی یہی دبیز چادر اوڑھ رکھی تھی ، خصوصاً دارالعلوم جیسے ادارے کے سلسلہ میں کچھ کہنے کی جرأت بالکل بھی نہیں ہوپارہی تھی کیوں کہ ایسے موقع پر رائے زنی کرنا بھڑکے چھتّے میں ہاتھ ڈالنا ہے اور پھر بندہ کو مسلسل قول کا مرض بھی نہیں ، اس لے خاموش تھا اور قلم کے ہونٹ سے رکھے تھےلیکن پچھلے دنوں 2ایسے آدمیوں سے ملاقات ہوئی جن میں سے ایک مولانا وستانوی کا حامی تھا اور دوسرا ان کا مخالف اور دونوں کے پاس اپنے اپنے دلائل تھے۔ مخالف وستانوی کا کہنا تھا کہ وہ دارالعلوم کا منصب اہتمام سنبھالنے کے اہل نہیں کیو نکہ وہ ہٹلر ثانی ،قاتل اہل ایمان یعنی نریندر مودی کے پرستار ہیں، ان کی تعریفیں کرتے ہیں، انہیں ہرطبقے کا خیر خواہ تسلیم کرتے ہیں، جب کہ حالت یہ ہے کہ گجرات میں وحشت و بربریت اور قتل وقتال کا جو ماحول اس نے گرم کیا تھا او رمسلمانوں کے خلاف جس طرح مودی کی مشنری کام کر رہی تھی اس نے جرمنی میں نازیوں کے ذریعہ یہودیوں کے خلاف ہونے والے ہولو کاسٹ کا بھی مات دے دیا تھا، مودی ایسا انسان ہے کہ بی جے پی سے کٹا ہوا ہر مسلمان اور سیکولر غیر مسلموں نے بھی اسے ننگ انساینت اور خدا کی زمین پر بوجھ یقین کیا۔

 ایسے شخص کی حمایت میں مولانا وستانوی کا آنا ان کی مفسد ذہنیت کی غمازی کررہا ہے ۔ اس کے ماسوادہ مورتی نواز بھی ہیں۔ اورنگ آباد کی ایک سیاسی تقریب میں مہاراشٹر کے ایک وزیر جنے دت شرساگر کے ایک استقبال میں انہوں نے اپنے ہاتھوں سے ایک فریم پیش کیا تھا جس میں رادھا کرشن کی مورتی تھی۔ علاوہ ازیں مہتمم  بننے کے بعد علمائے کرام سے ملنے کے بجائے سیاسی پنڈتوں سے ملنا شروع کردیا۔ مزید براں یہ اہتمام انہیں منجانب اللہ نہیں ملا ہے بلکہ انہوں نے اس کے حصول کے لیے بڑی جوڑ توڑ سے کام لیا ہے اور مجلس شوریٰ کے بعض اہم ارکان کو انہوں نے خرید بھی لیا ہے،نیز یہ کہ مولانا وستانوی دارالعلوم کے غیر فارغ التحصیل او رمسلک دارالعلوم سےیکسر نا آشنا ہیں ۔ وہ اکابر کی وراثت اس ادارہ کو عصری یونیورسٹی بنانے کی کوشش میں ہیں ۔لہٰذا انہیں مہتمم بنے رہنے کا حق نہیں ۔ان کے اہتمام کے خلاف طلبہ کا ہر احتجاج ،اخبارات کی ہر رپورٹ ،علما ودانشوروں کی ہررائے نہ صرف قابل قبول ہے بلکہ واجب العمل بھی ۔ ہم ایسے حضرات کی کھلی حمایت کرتے ہیں ۔ یہ ولائل تو مخالف وستانوی کے تھے لیکن دوسری طرف حامی وستا نوی کے دلائل یہ تھے کہ مولانا وستانوی خود سے مہتمم نہیں بنے ہیں بلکہ انہیں دارالعلوم کا باوقار ادارہ مجلس شوریٰ نے منتخب کیا ہے۔

 اس مجلس کی ہیئت حاکمہ اور قوت نافذہ کی حیثیت حاصل ہے۔ یہ مجلس اولو الا مر ہے جس کی اطاعت نہ صرف بہتر بلکہ واجب ہے۔ امیر کوئی بھی بنے اس کے خلاف بغاوت جائز نہیں۔ خلیفہ خواہ صالح ہویا فاسق وفا جر علما اسلام کا متفقہ فیصلہ ہے کہ خلیفۃ المسلمین کے خلاف خروج کرنے والا مستحق سزا ہے ۔ جب دارالعلوم کی الوالا مر مجلس نے انہیں اپنا خلیفہ چن لیا ہے تو ان کے خلاف چارہ جوئی کا کسی کو کوئی حق نہیں ہے۔ جہاں تک 12اکتوبر 2010کو مورتی پیش کرنے کا سوال ہے تو وہ مورتی کے احترام اور عقیدت میں نہیں  بلکہ وزیر کے اعزاز میں ایسا کیا گیا تھا۔ کیا آج مسلمانوں کی جیب میں گاندھی کی تصویر یں نہیں ہوتیں ؟ کیا علما اور دانشور مسلمان اس ملک کو گاندھی کا ہندوستان نہیں کہتے؟ رہی بات مودی نوازی کی تو آخر لوگ کیو ں بھول جاتے ہیں کہ ہمارے علما نے کانگریس کا ہمیشہ ساتھ دیا اور اپنے کانگریسی ہونے کو فخر یہ بیان کیا۔ کیا کانگریس مسلمانوں کی قاتل نہیں؟ کیا مودی نے کانگریس سے بھی زیادہ مسلمانوں کو نقصان پہنچایا ہے؟ کیا بابری مسجد کانگریس نہیں ڈھائی؟ کیا مسلمانوں کی پسماندگی کی ذمہ دار کانگریس نہیں ہے؟ کیا نورمسجد انہدام کی ذمہ داری کانگریس پر عائد نہیں ہوتی؟ وغیرہ وغیرہ ۔

 لہٰذا لوگوں کا یہ احتجاج ،یہ نعرہ بازی اور علما کی پگڑی اچھالنے والے یہ اقدامات غلط ،سراسر غلط اور حق سے بعید ہیں۔ ان اقدامات سے دارالعلوم کا وقار مجروح ہورہا ہے۔ مجلس شوریٰ کی اہمیت پامال ہورہی ہے ۔ مسلک اہل سنت والجماعت کا صحیح ترجمان دارالعلوم اور اس کے وابستگان علما وطلبہ کی جگ ہنسائی ہورہی ہے ۔ غیر وں کو ہم پر ہنسنے کاموقع مل رہا ہے ۔ جو کام ہا ہو کے ذریعہ انجام پارہا ہے وہ خاموش طریقے سے بھی کام انجام پاسکتا تھا۔ راقم نے دونوں کی مدلل گفتگو سنی۔ ان تقریروں کے سننے کے بعد دل نے کہا کہ شوریٰ کے فیصلے کی تغلیظ یا تصحیح کا حق تو ان اکابر کو ہے جنہیں مزاج دارالعلوم اور اس کے منہاج سے گہری واقفیت ہے،جو اپنی علمی گہرائی اور وسعت مطالعہ کے علاوہ وخواص میں بھی کامل اثر ورسورخ رکھتے ہیں۔ اس لیئے بندہ اس قضیہ پر خود کو تبصرہ کرنے سے عاجز پاتا ہے ۔ لیکن احقر چوں کہ دارالعلوم کا ایک فرزند بھی ہے، وہاں کی علمی اور روحانی فضا میں اس نے بوئے مدینہ محسوس کی ہے، اس کے درودیوار سے بھی اس نے جینے کے سلیقے اور آداب سیکھے ہیں، وہاں کے نورانی ماحول میں 3سال گذارنے کی سعادت حصہ آئی ہے اور اس کی حیثیت یہ ہے :

گوداں نہیں پہ داں کےنکالے ہوے تو ہیں

 کعبہ سے ان بتوں کو بھی نسبت ہے دور کی

اس لیے اتنا تو ضروری ہی عرض کرسکتا ہے کہ دارالعلوم میں اس وقت جو کچھ بھی ہورہا ہے اس سے کوئی اچھا پیغام نہیں جارہا ہے۔ اس کی عظمت متاثر ہورہی ہے ،اس کا نام بدنام  ہورہا ہے ۔ یہ اخبارات ورسائل اور یہ الیکٹرانک میڈیا اس معاملے میں کوئی اچھا کام نہیں کررہے ہیں۔ یہ ماں اور بیٹے کا معاملہ ہے ، اسے گھر سے باہر نہیں جانا چاہئے۔ اس کی بہتر صورت یہی تھی کہ ملک کے ہر صوبہ کی سرگردہ علمی شخصیات سامنے آتیں اور اساتذہ کرام کی رائے معلوم کرکے ایک اجتماعی عرضداشت لکھ اپنے دستخط کے ساتھ شوریٰ کے حوالے کرتیں یا کوئی اور اچھی اور پرامن راہ نکالی جاتی، اس سے حالات خوشگوار بھی رہتے اور دارلعلوم کو تنقید کی زد سے بچایا بھی جاسکتا تھا۔ خیر جو ہونا ہو ،ہولیکن اتنا ضرور عرض ہے کہ ایشیا کی اس عظیم درسگاہ پر حرف نہ آنے پائے۔ ورنہ اگر اسی طرح معاملہ چلتا رہا تو اس کا سفینہ اور بھی ڈانواڈول ہوگا، اس کے حرف گیروں کو مزید مواقع میسر آئیں گے اور یہ کوئی اچھی علامت نہ  ہوگی۔

بشکریہ : ہندوستان ایکسپریس  ، نئی دہلی

URL: https://newageislam.com/urdu-section/deoband-controversy-honour-darul-uloom/d/4030