Darul Uloom! History Is Repeating Itself دارالعلوم !تاریخ اپنے کو دہرا رہی ہے

بدر کاظمی

دارالعلوم دیوبند ہندوستانی مسلمانوں کی عالمگیر شہرت کی حامل دینی و مذہبی درسگاہ ہے جو مسلمانوں کے دینی تشخص اور روحانی اقدار کی پاسباں ،غیر ملکی استعمار کے خلاف آزادی واستقلال کی علامت ، بوریہ نشیں علمائے گرام کی جدوجہد ،قربانی وایثار کی عظیم یادگار ہے.....مگر افسوس ہندوستانی مسلمانوں کی عدم توجہی ،انتشار و افتراق اور نام نہاد علماء کی باہمی رقابت ،آسائش و آرائش ، جاہ ومنصب کی طلب جھوٹ سچ، حق ونا حق ، حرام وحلال سے بے نیازی نے اس عظیم درسگاہ کی اقدار وروایات کو پامال اور اس کے دینی وروحانی کردار کو اس درجہ مجروح کردیا ہے کہ اس کے تعلق سے ایک ادنیٰ سی فکر ،ایک ادنیٰ سا اضطراب ، ایک ادنیٰ سے تشویش بھی مسلمانوں کے کسی حلقے میں پیدا نہیں ہوتی اور اگر کسی حلقے سے دارالعلوم کے تعلق سے اظہار تشویش کیا بھی جاتا ہے تووہ دارالعلوم کی اقدار وروایات اور اس کے تاریخی ،دینی ، مذہبی وروحانی کردار سے نہیں بلکہ اپنے مقتداء اور ممدوح کی ذاتِ گرامی کی خوشنودی اور اس کے اختیار واقتدار کی سلامتی کے لئے کیا جاتا ہے۔

سانحہ 1982اس کی ابتداء تھی جب وزیر اعظم مسز اندرا گاندھی کی نظر عنایت سے مدنی گروپ نے دارالعلوم پر قبضہ حاصل کیا تھا اور دارالعلوم کی مجلس شوریٰ کی ہیئت حاکمہ کا نعرہ بلند کرتے ہوئے اپنے وقت کے امام حکیم الاسلام حضرت قاری طیب صاحب علیہ الرحمہ پر ایسے ایسے بے سروپا الزامات اور بے جان تہمتیں لگائی گئیں نیز خانوادۂ قاسمی کو رسوا وبدنام کرنے کیلئے ملک وبیرون ملک ہر شیطانی حربہ استعمال اورجھوٹ اس کثرت سے بولا گیا کہ جس سے شیطان بھی پناہ مانگتا ہے، جسے ذرائع ابلاغ نے سچ ثابت کرنے کیلئے ساری صحافتی و اخلاقی قدروں کو پامال کر کے اس فرشتہ صفت انسان کو بالآخر معاملہ اللہ کے حوالے کر خاموشی اختیار کرلینے پر مجبور کردیا اور اس نے اس کا فیصلہ اللہ پر چھوڑ دیا، جسے تاریخ نے محفوظ کرلیا۔

اسعد مدنی صاحب کی ایماء پر جو اس تنازعہ کے روح رواں تھے شوریٰ کے ایک رکن مولانا مرغوب الرحمن صاحب کو دارالعلوم کا مہتمم بنایا گیا، اس یقین و امید کے ساتھ کہ وہ اسعد صاحب کی سیاسی امنگوں، آرزؤں کی تکمیل میں معاون ہوں گے اور وہ دارالعلوم کا آزادنہ استعمال اپنے سیاسی مفادات کے لئے کرسکیں گے.......مگر مولانا مرغوب الرحمن نے ایک وقت انتہائی صبر وتحمل کا مظاہرہ کیا اور یہ عندیہ دیا کہ وہ اس گروپ کے عزائم کی راہ میں کوئی مشکل یا دشواری پیدا نہیں کریں گے لیکن دھیرے دھیرے انہوں نے اپنے اخلاص و للہیت ، دیانت وامانت ، زہد وتقویٰ کے باعث نہ صرف دارالعلوم میں بلکہ اہالیانِ دارالعلوم دیوبند کے دلوں میں خصوصاً اور ملک میں عموماً وہ اخلاقی قوت برتری حاصل کرلی جس کے نتیجے میں ہر فیصلہ وہ انتہائی غور وفکر اور اپنی صوابدید کے مطابق دارالعلوم کے مفادات کو ملحوظ رکھ کر کرتے ہیں ۔ انہوں نے ان بوریانشیں علماء کو قریب سے دیکھا اور ان سے فیض حاصل کیا تھا جن کے خون اور پسینے کا گار ا دارالعلوم کی عمارت میں لگا ہے۔ انہوں نے ان بزرگانِ دین کے اخلاق ،کردار ، افعال واعمال اور ان کے نقش قدم کو اپنی منزل و منہج بنالیا۔اسی کے ساتھ انہوں نے تدبر وفراست ،بے نفسی اور انکساری، تحمل اور بردباری سے دارالعلوم کے اساتذہ وملازمین کو بڑی حد تک مطیع اور ارکان شوریٰ کو دارالعلوم کے مفادات اور ان کے تحفظ کی حدود تک رہنے کا پابند بنا کر دارالعلوم کی عظمت ووقات کو بحال رکھا۔ اسعد مدنی صاحب کے انتقال کے بعد جمعیۃ علماء ہند کو لے کر چچا بھتیجے کی چیقلش ،سردوگرم جنگ میں گوکہ ایک حد تک وہ بھتیجے کے حمایتی رہے مگرجب اس جنگ کی آنچ دارالعلوم تک پہنچی اور دفتر اہتمام میں اس کی چنگاری چھوڑ کر اس خزاں رسیدہ بزرگ کو ڈرانے دھمکانے کی کوشش کی گئی تو دارالعلوم کے اقدار وروایات کی امین اس خدا رسیدہ بزرگ نے بغیر کسی تردوکے ایک جھٹکے میں اسی شوریٰ کے ذریعہ جوان دونوں مہارتیوں کے باپ اور بھائی کے ذریعہ وجود میں آئی تھی دارالعلوم سے باہر کا راستہ دکھا کر 1982کے داغ کو کسی حد تک دھونے کی کوشش کی۔ ارکان شوریٰ بھی ان تمام حالات وواقعات سے بہت کچھ جان اور سمجھ چکے تھے اور ان کو یہ احساس ہوگیا تھا کہ ان پر ایک بڑی ذمہ داری عائد ہے اور وہ اس درسگاہ کے امین ومحافظ ہیں اور انہیں اس کے کردار کا تحفظ ہر حال میں کرنا ہے........لہٰذا مولانا مرغوب الرحمن کی وفات کے فوراً بعد موجود ارکان شوریٰ نے مولانا ابوالقاسم بناسی کو عارضی طور پر مہتمم مقرر کیا تو اس پر ایک حلقہ میں چہ می گوئیاں شروع ہوگئیں اور اس تقریب کو ہدف تنقید بناتے ہوئے اشراف واجلاف کی پھلجھڑی چھوڑی گئی کہ ایک انصاری (جولاہا) دارالعلوم کا مہتمم ہوگا؟خیال رہے کہ اس کی ابتدا لکھنؤ سے ارشد مدنی صاحب کے برادرنسبتی رکن شوریٰ عبدالعلیم فاروقی نے یہ کہہ کر کی کہ ابو القاسم کا تقرر غیر آئینی ، غیر دستوری ہے۔ مورخہ 10جنوری 2011کو مجلس شوریٰ نے دارالعلوم کو سیاسی ریشہ دوانیوں اور جمعیۃ کی زورآزمائی سے نجات دلاتے ہوئے مولانا غلام محمد وستانوی کا بطور مہتمم انتخاب کیا تو وہ لوگ جو دارالعلوم کو اپنے اقتدار واختیار کا زینہ بنائے ہوئے تھے، سکتہ کی کیفیت میں آگئے......اور انہوں نے قاسمی غیر قاسمی کا شوشہ چھوڑا ، جس پر کسی نے توجہ نہیں دی اور ہر حلقہ سے غلام محمد وستانوی کے مہتمم بنائے جانے پر خوشی ومسرت کا اظہار کیا جانے لگا۔ اسی درمیان ان کے ’’پٹھان ‘‘ہونے کا شوشہ چھوڑا گیا مگر یہ دونوں چیزیں لوگوں میں ہدف علامت بنیں تو مہاراشٹر کی کسی تقریب میں مولانا وستانوی کے ذریعہ ایک وزیر کو سپاس نامہ دیئے جانے جس میں کسی دیوی دیوتا کی تصویر تھی اسے بنیاد بنا کر مورتی پیش کرنے سے تعبیر کرتے ہوئے ہنگامہ کھڑا کرنے کی تدبیر کی گئی۔

اس پر بیان بازی جاری تھی کہ مولانا ایک بیان ٹائمز آف انڈیا میں آگیا ۔جس نے جلتی پر تیل کا کام کیا اور اس حلقے کو ایک بڑی ہتھیار مل گیا، حالانکہ مورتی اور مودی دونوں پر مولانا کا وضاحتی بیان اور معذرت آج اخبارات میں آگئی ہے مگر شاید اس سے ان لوگوں کی تسلی نہیں ہوگی جو اس عظیم درسگاہ کو اپنے خاندانی اور سیاسی مفادات کا ذریعہ سمجھتے ہیں۔ اس طرح ایک بار پھر 1982کی طرح جھوٹ وافتراء ،بے جا الزامات ودشنام طرازی کا ایک سلسلہ ہے جو برابر جاری ہے۔ نوبت یہاں تک آگئی ہے کہ بجائے اس کے کہ ’’بزرگوار‘‘ خود کچھ کہیں کچھ مغیچوں کو اس کام پر لگادیا ہے کہ وہ اس آگ میں ایندھن ڈاتے رہیں ۔ چنانچہ اب کچھ گمنام (جمعیۃ الطلباء) کے نام سے جس کا وجود ہی نہیں ہے انتہائی اشتعال انگیز فوٹو اسٹیٹ، ہینڈ بل، اشتہارات تقسیم کئے جارہے ہیں ، جن میں مولانا غلام محمد وستانوی لغو، گھٹیا اور گھناؤنے الزامات کے ساتھ ایسے انکشافات بھی کئے جارہے ہیں جنہیں دیکھ کر افسوس کے ساتھ ہنسی بھی آتی ہے ۔ یہ کہ مولانا کو ڈابھیل کی مجلس شوریٰ سے اس لئے نکالا گیا کہ وہ مدرسہ بورڈ کے حامی ہیں، مولانا غلام محمد ذاکر نائک کے ساتھ مختلف پلیٹ فارموں سے علماء کو گالیاں دیتے رہے ہیں۔ علماء کو اسرائیلی کا ایجنٹ بتاتے رہے ہیں جن کا متعدد قبیح افعال کے سبب زمانہ طالب علمی میں مدرسہ سے اخراج ہوا ہے اور یہ کہ وہ اسرائیل کے ایجنٹ ہیں وغیرہ وغیرہ ۔ اور اس میں طلبہ کو للکار تے ہوئے کہا گیا ہے شیخ الاسلام کے سپوتو! اٹھو........یہاں شیخ الاسلام کے اصل سپوتوں سے یہ ضرور پوچھا جاسکتا ہے کہ اسرائیل کے ایجنٹ ایسے شخص کو جس کے متعلق آپ کو یہ سب باتیں معلوم تھیں شوریٰ کارکن کس نے بنایا؟ انہیں 10سال سے شوریٰ میں کیوں رکھا ہوا ہے؟اور آج تک مولانا وستانوی کے مناقب مسجد رشید میں کون بیان کررہا تھا؟ جس میں ان کی تعلیمی خدمات اور انتظامی صلاحیتوں کی تشہیر کی جارہی تھی؟ ان سے رشتہ داریاں کیوں قائم کی جارہی تھی؟ سویہ سب چیزیں ثابت کرتی ہیں کہ یہ سراسر بیہودہ یا دہ گوئی اور الزام تراشی ہے، جس کی کوئی بنیاد نہیں ہے بلکہ غم اور تکلیف یہ ہے کہ دارالعلوم ہاتھ سے نکلتا نظر آرہا ہے ۔ اس لئے نہ اخلاق اقدار کا پاس ہے نہ کسی رشتے یا قرابت داری کا لحاظ۔

ایک طوفان و بدتمیزی ہے جو اٹھایا جارہا ہے۔دارالعلوم کے اقدار وروایات کا خیال نہ کل پیش نظر تھا نہ آج ہے.......جہاں تک محبان دارالعلوم اور اہل دیوبند کا تعلق ہے ان کے لئے دارالعلوم عظمت ووقار کی علامت ، ان کے بزرگوں کی ایک نشانی اہالیان دیوبند کے بزرگوں کا قائم کردہ وہ ادارہ ہے جس کے سر پر کلمۂ طیبہ کا تاج ہے......جو کسی مخصوص گھرانے یا تنظیم کی جاگیر نہیں، اس کا تحفظ وہ ہر حال میں کریں گے، ان کے نام پر جو چند لوگ جو ابھی شعور کو بھی نہیں پہنچے اچھل کود کر رہے ہیں وہ محض تعلق خاطر کا ایک بھونڈا نمونہ ہے، جسے سنجیدگی سے نہیں لیا جانا چاہئے۔

کل تک یہ لوگ مولانا وستانوی کے تقرر 12جن پرتھ پر لیا گیا فیصلہ بتارہے تھے ،اب یہ بی جے پی اورمودی کا ایجنٹ بتارہے ہیں، انہیں خود نہیں معلوم وہ کیا کہہ رہے ہیں؟ اس موقع پر ہم مولانا وستانوی سے بھی درخواست کریں گے کہ اہتمام کا یہ منصب اس بات کا متقاضی ہے کہ بولا کم جائے، عمل زیادہ ہو۔ آپ کا کام اور عمل ہی اس کا جواب ہوگا۔

URL: https://newageislam.com/urdu-section/darul-uloom!-history-repeating-itself/d/3993