Why Dalit Muslims should be recognized as Scheduled Castes دلت مسلمانوں کو شیڈیولڈ کاسٹ کیوں تسلیم کیا جانا چاہئے؟

 

ارشد عالم، نیو ایج اسلام

18 اپریل 2023

 حکومت اور دلت بہوجن دانشوروں کو اس کی مخالفت بند کرنی چاہیے۔

 اہم نکات:

ہندوستان کی سپریم کورٹ نے حال ہی میں کہا ہے کہ وہ اس بارے میں فیصلہ کرنا چاہتی ہے کہ آیا دلت مسلمانوں اور عیسائیوں کو شیڈیولڈ کاسٹ کا درجہ دیا جانا چاہیے یا نہیں۔

عدالت نے یہ موقف اس لیے لیا کیونکہ یکے بعد دیگرے حکومتیں اس معاملے پر ایک نہیں رہی ہیں۔

یہ تعصب اس لیے ہے کہ دلت بہوجن دانشور ایس سی کوٹہ میں دلت مسلمانوں کو شامل کرنے کی مخالفت کرتے رہے ہیں۔

 -----

 مسلم (اور عیسائی) گروپوں نے طویل عرصے سے سپریم کورٹ سے اس درخواست کے ساتھ رجوع کیا ہے کہ نام نہاد مساوات پسند مذاہب میں داخل ہونے والی سابقہ اچھوت ذاتوں کو شیڈول کاسٹ (ایس سی) کا درجہ دیا جائے۔ ہم جانتے ہیں کہ 1950 کے صدارتی آرڈیننس کے ذریعے، SC کا درجہ صرف تین مذہبی گروہوں تک محدود تھا: ہندو، نو بدھ اور سکھ، جس کا نتیجہ یہ ہوا کہ مسلم اور عیسائی بننے والی سابق اچھوت ذاتوں کو اس دائرے سے خارج کر دیا گیا۔ دلت مسلم اور عیسائی جماعتیں طویل عرصے سے یہ کہتی آئی ہیں کہ یہ مذہب کی بنیاد پر امتیازی سلوک ہے، جو کہ غیر آئینی ہے۔ کافی عرصہ قبل، 1995 میں، مدر ٹریسا نے بھی اس امتیاز کو اجاگر کرنے کے لیے ایک دن کا روزہ رکھا تھا۔ لیکن یہ کون ذاتیں ہیں جو ایس سی کی فہرست میں شامل ہونا چاہتی ہیں اور کیوں؟

 دلت مسلمان کون ہیں؟

 دلت مسلمان (اور عیسائی) سے مراد وہ سابق اچھوت ذاتیں ہیں جنہوں نے اسلام قبول کیا لیکن سماجی بدنامی کی وجہ سے امتیازی سلوک کا سامنا کرنا پڑا۔ ہندوستان میں متعدد وجوہات کی بنا پر لوگوں نے اپنا دھرم بدلا، کم از کم اس وجہ سے کہ یہ ذاتیں ہندوؤں کی طرف سے اپنے ساتھ ہونے والے غیر انسانی سلوک سے بچنا چاہتی تھیں۔ تاہم، دھرم بدلنے کے بعد بھی، ان کی سماجی حیثیت میں کوئی تبدیلی نہیں آئی۔ انہیں مسلمانوں نے برابر تسلیم نہیں کیا۔ 1981 میں میناکشی پورم کا دھرم پریورتن اس کی ایک بہترین مثال ہے۔ سینکڑوں دلتوں نے اسلام قبول کیا لیکن یہ بات سب کو معلوم ہے کہ مسلمانوں نے ان مذہب تبدیل کرنے والوں کے ساتھ ازدواجی تعلقات قائم کرنے سے انکار کر دیا۔

ایسے شواہد موجود ہیں جن سے یہ معلوم ہوتا ہے کہ مسلمانوں نے نچلی ذات کے لوگوں کے ساتھ اتنا ہی برا امتیازی سلوک کیا جیسا کہ ہندوؤں نے کیا تھا۔ غوث انصاری، زرینہ بھٹی اور امتیاز احمد جیسے ماہر عمرانیات اور ماہر بشریات نے آزادی کے بعد کے دور میں بھی مسلم معاشرے سے ان کے کثیر سطحی اخراج کو دستاویزی شکل دی ہے۔ کچھ دستاویزات ہیں جن سے پتہ چلتا ہے کہ بعض مقامات پر، ان ذاتوں کے الگ الگ قبرستان اور یہاں تک کہ مساجد بھی ہیں۔ اعظم گڑھ میں اپنے فیلڈ ورک کے دوران، میں نے ہلالخور/صفائی کرنے والے ذات کے ان لوگوں کا انٹرویو کیا جو اپنی مسجد بنا رہے تھے۔ انہوں نے مجھے بتایا کہ شہر میں اکثریتی مسلم ذات، راوتارا، ہمیں اپنی مساجد میں سکون سے نماز پڑھنے نہیں دیتے تھے۔ نتیجتاً وہ اپنی علیحدہ مسجد بنانے پر مجبور ہوئے۔

 اسلام کا دعویٰ یہ ہے کہ یہ مساوات کا مذہب ہے؛ سماجی حقائق اگرچہ بہت مختلف ہو سکتے ہیں۔ علی انور کی کتاب بہار کے دلت مسلمان کے اندر ایک چھوٹے سے سروے کے ذریعے ان ذاتوں کی نازک حالت پر روشنی ڈالی گئی ہے۔ انہوں نے ان ذاتوں کے اندر تعلیم کی کمی کو بھی اجاگر کیا ہے اور زوردار انداز میں یہ دلیل دی ہے کہ جب تک ان کے لیے کوئی مثبت اقدامات نہ کیے جائیں، ان کی حالت بہتر ہونے کا امکان نہیں ہے۔

 یہی وہ ذاتیں ہیں جو اب مطالبہ کر رہی ہیں کہ ہمیں شیڈیولڈ کاسٹ کی فہرست میں شامل کیا جائے تاکہ ہم حکومت سے وہ فوائد حاصل کر سکیں جو شیڈیولڈ کاسٹ کو حکومت دیتی ہے۔ یہ بات قابل غور ہے کہ ایسی تمام مسلم ذاتیں او بی سی زمرہ کے اندر ہیں، جس کا مطلب ہے کہ انہیں مجموعی طور پر 27 فیصد کوٹہ کے اندر تحفظات حاصل ہیں۔ یوں تو تکنیکی طور پر انہیں پسماندہ ذاتوں کے طور پر تسلیم کیا جاتا ہے لیکن ان کا مطالبہ ایس سی کوٹہ میں شامل کیے جانے کا ہے۔ یہ مطالبہ صرف اس لیے ہے کہ ان کے لیے او بی سی کوٹہ میں آنے والے مزید 'اعلی درجے کی' ذاتوں سے مقابلہ کرنا انتہائی مشکل ہے۔

 حمایت کی کمی

 ان کا مطالبہ اب تک بڑے پیمانے پر سنا نہیں گیا ہے۔ یکے بعد دیگرے آنے والی حکومتیں ان مسلم ذاتوں کی سماجی و اقتصادی حالت کا تعین کرنے کے لیے سروے کرانے میں بھی ناکام رہی ہیں۔ سچر کمیٹی کی رپورٹ نے انہیں ایک الگ زمرہ کے طور پر پیش کیا لیکن آخر کار تجزیہ کے مقصد سے انہیں او بی سی کے ساتھ ملا دیا۔ دوسری طرف رنگناتھ مشرا کمیٹی نے انہیں ایس سی کوٹہ میں شامل کرنے کی وکالت کی۔ کانگریس کی قیادت والی یو پی اے حکومت کے ذریعہ ان کمیٹیوں کی تشکیل کے باوجود ان کی سفارشات پر عمل نہیں کیا گیا۔

 موجودہ بی جے پی حکومت نے درحقیقت سپریم کورٹ میں یہ موقف اختیار کیا ہے کہ دلت مسلمانوں (اور دلت عیسائیوں) کو ایس سی کا درجہ نہیں دیا جانا چاہیے کیونکہ اسلام ایک مساوات کا مذہب ہے اور اسلام میں اچھوت کا کوئی تصور ہی نہیں ہے۔ ستم ظریفی یہ ہے کہ یہ وہی حکومت ہے جو پسماندہ مسلمانوں کے مسئلے کی وکالت کرتی ہے اور دلیل دیتی ہے کہ انہیں حکومتی ڈھانچے میں شامل کیا جانا چاہیے۔ پارٹی نے پسماندہ مسلمانوں سے ملاقاتیں کرنے اور ان کے ساتھ یکجہتی پیدا کرنے کی دعوت بھی دی ہے۔ وزیر اعظم خود ایسے پیغامات میں سب سے آگے رہے ہیں۔ انہوں نے بارہا پارٹی میٹنگوں میں اور عوامی پلیٹ فارموں سے پسماندہ مسلمانوں کے مسائل کو سمجھنے کی اپیل کی ہے۔ لیکن یہ دیکھ کر افسوس ہوتا ہے کہ حکومتی پالیسی کی سطح پر اس کے لیے کوئی کوشش نہیں کی گئی۔ بلکہ، یہ جان کر بڑی تکلیف ہوتی ہے کہ جب دلت مسلمانوں کے لیے مثبت کارروائی کی بات آتی ہے تو اس حکومت کا موقف پچھلی حکومتوں سے مختلف نہیں رہا ہے۔

 لیکن صرف حکومت کا موقف ہی تشویشناک نہیں ہے۔ ہندو دلت اور او بی سی ذاتوں سے تعلق رکھنے والے دانشور بھی دلت مسلمانوں (اور عیسائیوں) کو ایس سی کوٹہ میں شامل کیے جانے سے مطمئن نہیں ہیں۔ حیرت کی بات یہ ہے کہ ایک طرف تو وہ تقریباً ہر بات پر حکومت کی مخالفت کرتے ہیں، لیکن جب دلت مسلمانوں کو ان کے جائز حقوق سے محروم کرنے کی بات آتی ہے تو ان دانشوروں اور حکومت کے درمیان زبردست اتحاد پایا جاتا ہے۔ یہاں تک کہ ان کا استدلال بھی وہی ہے جو حکومت کا ہے: کہ چونکہ اسلام اچھوت کی اجازت نہیں دیتا، اس لیے مسلم معاشرے میں اچھوت ذاتوں کا کوئی وجود نہیں ہو سکتا۔ اس دلیل میں تاریخی حقائق کا فقدان ہے لیکن سب سے پہلے اس دلیل کے دوغلے پن کا رد کرنا ضروری ہے۔

سکھ مذہب بھی چھوا چھوت کو نہیں مانتا۔ درحقیقت، یہ اس کی شدید مذمت کرتا ہے۔ لنگر (اجتماعی کھانے) کا ادارہ وضع کیا گیا تاکہ تمام ذاتیں ایک ساتھ مل کر کھانا کھا سکیں۔ لیکن سکھ ایس سی کی فہرست میں شامل ہیں۔ اگر یہ دانشور ایماندار ہیں تو انہیں یہ مطالبہ کرنا چاہیے کہ سکھوں کو ایس سی کی فہرست سے خارج کر دیا جائے کیونکہ سکھ مذہب چھوا چھوت کو نہیں مانتا۔

 یہاں تک کہ مسلم دانشور اور سیاست دان بھی ان ذاتوں کو ایس سی زمرے میں شامل کرنے کے مطالبات کو بیان کرنے میں سست روی کا مظاہرہ کر رہے ہیں۔ ہم مسلم سیاست دانوں کی طرف سے آئین ساز اسمبلی کے مباحثوں میں اس مسئلے کو اٹھانے کی کوئی کوشش نہیں دیکھتے ہیں۔ نیز، علما کا طبقہ بھی ایک لمبے عرصے سے مسلمانوں میں ذات پات کے وجود سے بالکل اسی دلیل کی بنیاد پر انکار کرتا آیا ہے جو آج حکومت دے رہی ہے۔ منڈل کمیشن کی رپورٹ کے نفاذ کے بعد بھی سید شہاب الدین جیسے سیاستدان تمام مسلمانوں کے لیے ریزرویشن کا مطالبہ کر رہے تھے۔ انہوں نے نہ صرف مسلمانوں میں ذات پات کے وجود پر آنکھیں بند کر لیں بلکہ اس افواہ کو بھی جاری رکھا کہ مسلمانوں کو کوئی ریزرویشن نہیں ملنے والا۔ لیکن یقیناً، ہم جانتے ہیں کہ منڈل کے بعد، مسلمانوں کی اکثریت پہلے ہی او بی سی کوٹہ کے تحت آ چکی تھی اور وہ شیڈیولڈ ٹرائب کے مذہب غیر جانبدار زمرے کے تحت ترجیحی سلوک کے لیے بھی اہل تھے۔

 اس پریشانی کی ایک بڑی وجہ یہ بھی ہے کہ زیادہ تر مسلم دانشور اور سیاست دان خود اشرف/اونچی ذات تھے اور پسماندہ مسلمانوں کی بہتری کے بارے میں بات کرنے میں کوئی دلچسپی نہیں رکھتے تھے۔ اس لیے یہ کوئی تعجب کی بات نہیں ہے کہ وہ مسلم کمیونٹی کے اندر دلت جماعتوں کے وجود کو بمشکل ہی تسلیم کریں گے۔

 یہ بھی ریکارڈ پر رکھنا ضروری ہے کہ حالانکہ دیر سے ہی سہی لیکن کچھ اہم مسلم تنظیمیں اپنے سماج میں ذات پات کی بات کرتی رہی ہیں۔ جمعیت علمائے ہند، مسلم علماء کی سب سے بڑی تنظیم، اگرچہ یہ بنیادی طور پر دیوبندیوں کی ہے، حال ہی میں ان دلت مسلم جماعتوں کے بارے میں ہمدردی سے بات کی ہے۔ تاہم، موجودہ حکومت کی طرح، ہم نے ان کے اچھے اچھے بیانات کے بعد کوئی قابل ذکر کارروائی نہیں دیکھی۔ اگر وہ واقعی سنجیدہ ہیں تو انہیں دلت اور شودر مسلمانوں کو اپنی پالیسی ساز اداروں میں شامل کرنے سے کون سی چیز روکتی ہے؟

بچاؤ میں عدالتیں؟

 ایک تنقید جو ہماری عدلیہ پر اکثر کی جاتی ہے وہ یہ ہے کہ اس میں نچلی ذاتوں کی نمائندگی کا فقدان ہے کیونکہ اس نے خود کو ریزرویشن کی ریاستی پالیسی سے مستثنیٰ کر رکھا ہے۔ لیکن یہ وہی عدالت ہے جس نے اب حکومت سے کہا ہے کہ وہ آگے بڑھ کر اس معاملے پر غور کرے گی کہ آیا دلت مسلمانوں (اور عیسائیوں) کو ایس سی ریزرویشن ملنا چاہیے یا نہیں۔ یہ کیس برسوں سے چلا ہے اور ہر حکومت اس معاملے پر کوئی موقف اختیار کرنے سے گریزاں رہی ہے۔

 موجودہ حکومت نے ہندوستان کے واحد دلت چیف جسٹس کے جی بالاکرشنن کی قیادت میں ایک کمیٹی تشکیل دی ہے۔ حکومت نے سپریم کورٹ سے استدعا کی ہے کہ جب تک کمیشن کی رپورٹ کو حتمی شکل نہیں دی جاتی، معزز ججز کوئی فیصلہ نہ سنائیں۔ تاہم، چونکہ یہ معاملہ تقریباً دو دہائیوں سے زیر التوا ہے اور مذکورہ رپورٹ ابھی جلد سامنے نہیں آنے والی، اس لیے سپریم کورٹ نے فیصلہ کیا ہے کہ وہ مزید انتظار کیے بغیر اپنی کارروائی کو آگے بڑھائے گی۔ اپنے تبصرے میں، کورٹ نے یہ بھی کہا کہ کسی بھی مذہب میں داخل ہونے کے باوجود سماجی بدنامی جاری رہ سکتی ہے، اور یہ ایک ایسی حقیقت ہے جسے ریاست کے ساتھ ساتھ دلت بہوجن دانشوروں نے بھی پوری طرح سے فراموش کر دیا ہے۔

 ان دانشوروں نے بجا طور پر کہا ہے کہ اس ملک کی عدالتوں پر اعلیٰ ذاتوں کا غلبہ ہے۔ لیکن ستم ظریفی یہ ہے کہ یہ استحقاق کا مقام ہے جو بالکل واضح طور پر بتا رہی ہے: کہ مذہب کی تبدیلی امتیازی سلوک اور اخراج کو ختم نہیں کرتی۔ اس کا مطلب ہے ہے کہ صرف اس لیے کہ کوئی شخص اسلام قبول کر لیتا ہے اس کا مطلب یہ نہیں ہے کہ اس کے تمام داغ اور دھبے ایک لمحے میں دھک جائیں گی۔ مذہبی تبدیلی کا عمل خود بخود سماجی قبولیت کا باعث نہیں بنتا۔ ایک ایسی قوم میں شامل ہونا جو دلت مسلمانوں سے نفرت کرتی تھی اور یہاں تک کہ انہیں ارزل (واحد رزیل) کہتی تھی یقیناً اس کا مطلب یہ تھا کہ ان کی تبدیلی کے بعد بھی سماجی بدنامی جاری رہے گی۔

 یہی وہ سماجی دھبہ ہے جس پر توجہ دینے کی ضرورت ہے۔ صرف یہی پوچھنے سے کہ کیا اسلام میں اچھوت کا تصور ہے یا نہیں؛ کام نہیں چلے گا۔ مذہبی کتابوں کا سہارا لے کر جب کوئی ایک بہت ہی پیچیدہ سماجی مسئلے پر واضح طور پر بحث کر رہا ہو تو ان لوگوں پر برا اثر پڑتا ہے جو سماجی انصاف کے چیمپئن ہونے کا دعویٰ کر رہے ہوں۔

 -----

English Article:  Why Dalit Muslims Should be Recognized as Scheduled Castes

 

URL:    https://newageislam.com/urdu-section/dalit-muslims-scheduled-castes-/d/129687

New Age Islam, Islam Online, Islamic Website, African Muslim News, Arab World News, South Asia News, Indian Muslim News, World Muslim News, Women in Islam, Islamic Feminism, Arab Women, Women In Arab, Islamophobia in America, Muslim Women in West, Islam Women and Feminism