Vastanavi affair in the Urdu Press:Yellow Journalism, Corruption, Sectarian War Or Zionist Conspiracy?

زرد صحافت کیخلاف دیوبند میں صدائے احتجاج بلند

اشتعال انگیزی کا الزام عائد کرتےہوئے اخبار کی کاپیاں نذر آتش کی گئیں

دیوبند: دارالعلوم دیوبند کے مہتمم مولانا غلام محمد وستانوی کے منصب اہتمام کا معاملہ کسی طرح تھمنے کا نام نہیں لے رہا ہے۔ آج بعد نماز جمعہ طلبہ دارالعلوم اور باشندگان دیوبند کی ایک بڑی تعداد نے اس پورے معاملے میں آگ بھڑکانے کیلئے دہلی سے شائع ہونے والے ایک اخبار اور اس کے ذمہ دار کو مورد الزام قرار دیتے ہوئے مذکورہ روزنامہ کے خلاف زبردست احتجاج کیا اور اخبار کی کاپیاں نذر آتش کیں۔ احتجاج پر آمادہ لوگوں کو عام خیال تھاکہ دارالعلوم کے قضیے کو طول دینے کے پیچھے مسلکی منافرت کا رفرما ہے۔ احتجاج میں شریک سماجی کارکن حاجی ریحان الحق نے کہا کہ مخالف مسلک کے لوگ کبھی نہیں چاہتے ہیں کہ دیوبندی مکتب فکر امن وسکون سے تعلیم و تبلیغ کا کام انجام دیتا رہے ، سماج وادی پارٹی کے ریاستی سکریٹری معاویہ علی نے اس موقع پر کہا کہ مولانا وستانوی کے مخالفین نے ہی دیوبند کے خلاف تحریک چلانے اور دارالعلوم دیوبند کو بدنام کرنے میں اخبار کا بھرپور تعاون کیا ہے۔ انہوں نے سوال کیا کہ آخر کون دیوبند میں اس اخبار کے مدیر ان ومالکان عالم اسلام کے اس عظیم علمی دانش گاہ کو  بدنام کرنے کے لیے کسی بھی حد تک جاسکتے ہیں۔اخبار کے خلاف احتجاج کے دروان مظاہرین نے مولانا وستانوی زندہ آباد کے نعرے بھی بلند کئے اور مولانا سے اپیل کی کہ وہ جلد دیوبند واپس آئیں اور وہ دارالعلوم کے منصب اہتمام کر سنبھالیں ۔ اس احتجاجی پروگرام میں دیوبند کے سینکڑوں لوگوں کے علاوہ کثیر تعداد میں طلبہ نے شرکت کی۔ جس میں سید حارث ، رمضان قریشی ، کلیم قریشی، طیب انصاری ، فیروز بخت ، نسیم عثمانی،محمد شمیم، وسیم عثمانی، خالد ممبر، محمد عثمان ، احمد، سکندر خاں، عمر ان ملک، اسلم مکھیا وغیرہ کے نام خصوصی طور پر قابل ذکر ہیں۔

 ادھر دوسری جانب دہلی میں متعدد ملی انجمنوں کے ذمہ داروں کی جانب سے اس مسئلے پر جاری بیان بازی کے سلسلے کو ختم کرنے کیلئے ایک اجتماعی بیان جاری کیا گیا ہے۔جس میں ڈاکٹر ظفر الاسلام خان مجتبیٰ فاروق ،ڈاکٹر قاسم رسول الیاسی ، اور ڈاکٹر تسلیم رحمانی وغیرہ کے نام شامل ہیں۔ بیان میں کہا گیا ہے کہ دارالعلوم دیوبند کے نومنتخت مہتمم غلام محمد وستانوی کے ٹائمز آف انڈیا میں شائع انٹرویو کو لے کر اخباری بیانات اوربعض طلبا کیا جانب سے احتجاج کا جو سلسلہ شروع ہوا ہے اس سے بین الاقوامی شہرت یافتہ اور معروف وممتاز دینی درسگاہ دارلعلوم دیوبند کا وقار مجروح ہورہا ہے۔ اسی کے ساتھ ہندوستانی مسلمانوں کی آپسی چپقلش اور انتشار نمایاں ہوکر ہماری ملی ودینی تصویر کو بھی داغدار کررہا ہے۔ہونا تو یہ چاہئے تھاکہ اس سلسلے کو ذمہ دار لوگوں کے درمیان آپسی بات چیت اور افہام وتفہیم سے حل کرلیا جاتا ہم اب جب کہ مولانا وستانوی کے بیان سے اٹھنے اولے تنازعہ پر شوریٰ اجلاس طلب کرلیا گیا ہے تو اخباری بیانات کے اس سلسلے کو قطعی طور پر ختم ہوجانا چاہئے اور اس مسئلہ کو پوری طرح دارالعلوم کی مؤقر شوری کو سونپ دینا چاہئے ۔ اصول طور ا س سلسلہ میں کسی بھی فیصلہ کا اختیار صرف دارالعلوم کی مجلس شوری کو ہے۔ یہ مسئلہ سڑکوں پر یا زردصحافت کے صفحات پر نہیں حل ہوسکتاہے۔ اس رجحان کی ہم سخت مذمت کرتے ہیں اور ملت کے تمام افراد سے اپیل کرتے ہیں۔ کہ انصاف او رپر امن جمہوری طریقوں سے ہی اپنے مسائل حل کریں۔

زر د صحافت یا مسلکی جنگ

پرویز صہیب احمد

‘‘مودی’’ اور ‘‘مورتی’’ تو محض ایک بہانہ ہے ۔مولانا غلام محمد وستانوی صرف ایک آلہ کار ہیں۔ نشانہ تو دراصل دارالعلوم تحریک ہے جسے رسوا او ر بدنام کرنے کی دانستہ کوشش ہورہی ہے ۔ دہلی کے بعض اردو اخبار ات کی ‘‘ٹارگٹ مہم’’ کو دیکھتے ہوئے یہ نتیجہ اخذ کرنا غلط نہ ہوگا کہ ادارالعلوم دیوبند کو تختۂ مشق بناتے ہوئے ‘‘ مسلکی جنگ’’ کو پیش نظر رکھا گیا ہے تو تعصب کے مرض میں مبتلا بعض صحافتی اداروں نے عالمی شہرت یافتہ اس علمی ادارے کی وقعت کو کمزور کرنے کے بے بنیاد باتو ں کو بھی رنگ آمیزی کے ساتھ پیش کرتے ہوئے صحافتی اخلاقیات کا جنازہ نکال کر رکھ دیا ہے اور یوں دیوبند بالفاظ دیگر سنی علما ان کے نشانے پر آگئے ہیں۔ اس حقیقت کو نہیں جھٹلا یا جاسکتا کہ دارالعلوم دیوبند کے خلاف جن دو اردو اخبارات نے سب سے زیادہ اشتعال انگیزی برپا کرنے کی کوشش کی ہے اور جنہوں نے اس تنازعہ میں کلیدی رول ادا کیا ہے ان دونوں اخبار کے ذمہ دار ان مسلکی طور پر دارالعلوم کی تحریک ،فکر وتعلیم سے اتفاق نہیں رکھتے ۔

اس لیے بادی النظر میں یہ گمان گزرتا ہے کہ انہوں نے ا س موقع کو غنیمت جاننا اور صحافتی اخلاقیات کی وہ ساری حدیں پار کردیں جن کی مثال دور دور تک دیکھنے کو نہیں ملتی ۔ بظاہر ان کو اس عمل سے دو فائدے ہوئے ۔ وقتی طور پر جن لوگوں نے وستانوی صاحب کی مخالف کی تھی، ان سے لین دین کی گئی۔ مزے کی بات یہ بھی ہے کہ وستانوی صاحب کے خلاف نہ لکھنے کے لیے بھی انہی دونوں اخباروں کے ذمہ داروں نے ہندوستان کے ایک مشہور عالم دین کی سیاسی رہائش گاہ پر میٹنگ کی لیکن بات نہ بن سکی۔دوسرا فائدہ یہ ہوا کہ انہوں نے اپنی شرارتوں سےاپنے مسلکی آقاؤں کو خوش کیا ۔ چنانچہ ‘‘مودی’’ اور ‘‘مورتی’’ کو بنیاد بنا کر اگر دونوں اخبارات کے ذمہ دار ان مجلس شوریٰ کے معزز ومحترم اراکین کی پگڑیاں بھی اچھال رہے ہیں تو اس میں غیر متوقع کچھ بھی نہیں ہے۔رہی بات مولانا وستانوی کی ‘‘مودی نوازی’’ یا ‘‘مورتی پرستی’’کو جائز ٹھہرانے یا ان کے افعال وکردار کو باجواز بنانے کی تو ہم یہ کہہ سکتے ہیں کہ ان کے مذکورہ افعال وکردار کو کسی بھی صورت میں ‘‘ناقابل برداشت’’ کہا جائے گا اور مواخذہ کا حق شوریٰ کو حاصل ہے جس پر 23فروری کواراکین شوریٰ یقیناً باز پرس کے عمل سے گزریں گے ۔

لیکن یہ سوال اپنی جگہ برقرار ہے کہ صحافتی اخلاقیات کی دھجیاں اڑانے والے عناصر ‘‘ حق وصدارت’’ کے علمبردار کیسے ہوسکتے ہیں۔ ان اردو اخبار کی پالیسی کو دیکھ کر آنکھیں نم  ہوجاتی ہیں اور غصہ سے مٹھیاں بھینچ جاتی ہیں کہ لوگ اپنے ذاتی مفادات کے حصول کے لیے دارلعلوم دیوبند کے ناموس کو بھی داؤ پر لگانے میں بھی محسوس نہیں کرتے اور اس کے عین برخلاف دہائی یہ دی جاتی ہے کہ دارالعلوم دیوبند کی ‘‘حفاظت’’ کیلئے یہ سب کیا جارہا ہے۔ آخر ماجرا کیا ہے؟ کیوں یہ کھیل کھیلا جارہا ہے؟ ان صحافتی اداروں کا دین ودھرم آخر ہےکیا ؟ اگر مطلوبہ رقم انہیں مل جاتی اور ‘‘سودا’’ طے ہوجاتا تب مولوی وستانوی ان کی نگاہ میں ‘‘عالم باعمل ’’بن جاتے ؟ کیا یہ سب صرف ‘‘مال کمانے’’ کیلئے ہورہا ہے ؟ یا یہ کہ دارالعلوم کے خلاف کوئی گہری سازش ہے؟ جس طرح الیکٹرونک میڈیا میں اسلام کے حساس پہلوؤں سے جڑی خبرو ں کو بار بار مخصوص انداز سے پیش کرتے ہوئے اسلام کو ایک دقیانوس مذہب قرار دینے کی کوشش ہوتی رہی ہے اور بعید از صداقت باتوں کو رنگ وروغن کی آمیزش کے ساتھ ناظرین کے سامنے پیش کیا جارہا ہے ٹھیک اسی طرح دارالعلوم دیوبند کے ایشو پر دہلی کے متعدد اردو اخبارات نے بھی بطور خاص چاشنی بھری خبریں نذر قارئین کرنے کی مہم چلا رکھی ہے جسے پڑھتے ہوئے یہی تاثر بھرنا ہے کہ بعض اردو اخبار والے بھی دارالعلوم دیوبند اور ان نے جڑے عالموں کے تمسخر میں اپنے صفحات کو سیاہ کرتے ہوئے اس عالمی شہرت یافتہ ادارے کو رسوا اور بدنام کرنے میں کوئی بھی دقیقہ باقی نہیں چھوڑنا چاہئے۔

 اس کے پیچھے کیا راز ہے؟ یہ غور کرنے کی بات ہے ۔ بیشک مسلک پر مبنی تعصب اس پورے تنازعہ میں حاوی نظر آرہا ہے اور ہر دو جانب علمائے دارالعلوم کو رسوا کرنے کی کوشش ہورہی ہے لیکن یہ بھی ایک کڑوی حقیقت ہے کہ یہ صحافتی ادارے خود اپنے مسلک کے بھی وفادار نہیں ہیں اور ماں وزر کی خاطر اپنے عقائد و نظر کو بھی بالائے طاق رکھنے سے گریز نہیں کرتے جیسا کہ خود حالیہ واقعہ سے ظاہر ہوتا ہے۔ ‘‘مودی نوازی’’ اور ‘‘مورتی پرستی’’ اگر صرف ایک بہانا نہیں ہوتا تو ان لوگوں کی بھی خبرلی جاتی جو مولوی وستانوی سے زیادہ سنگین جرم کے مرتکب ہوچکے ہیں اور قوم ملت سے ابھی تک نہ تو انہوں نے اپنے گناہ کیلئے معافی مانگی ہے اور نہ ہی آئندہ کیلئے ایسے افعال وکردار سے تو بہ ہی کیا ہے۔( ملت اسلامیہ ان چہروں کو بخوبی پہچانتی ہے) جو کبھی ذاتی مفاد کیلئے گاندھی جی کو ‘‘نایک’’ یا ‘‘آئیڈیل’’ قرار دے دیتا ہے تو کبھی ‘‘ بھگوا دہشت گردی’’ میں ملوث بتائے جانے والے آر ایس ایس لیڈر اندریش کے ساتھ خفیہ میٹنگ کرتا ہے ، بابری مسجد پر آئے کورٹ کے فیصلہ کو صحیح ٹھہرا کر واہ واہی لوٹتا ہے اور لعنت وملامت کے بعد ‘ذاتی رائے’ کہہ کر جان چھڑا لیتا ہے۔ یہ ایک چھوٹی سی مثال ہے ورنہ سچی بات یہ ہے کہ ایسی سینکڑوں مثالیں موجود ہیں جن میں قوم وملت سے متعلق صاحبان ‘‘سودے بازی’’کرتے رہے ہیں  لیکن ‘‘حق وصداقت’’ کی علمبرداری کے دعویداروں کو ان کی خبر لینے کی فرصت نہیں ۔ کون کب کس کی گود میں بیٹھتا رہا ہے؟ کب کہاں سے یہود و ہنود سے راہ ورسم بڑھائی جاتی رہی ہے ؟ کن کن لوگوں کا دامن ‘‘خفیہ دروۂ اسرائیل’’ کے حوالے سے داغدار رہا ہے؟ کن کن بڑی ہستیوں نے ‘‘بھگوا برادری’’ کے سامنے زانوے اب تہہ کئے ہیں؟ اس کی کہانی گرچہ بڑی طویل ہے لیکن یہ بھی سچ ہے کہ ایسی عظیم ہستیاں ‘‘بغیر کسی معافی اور توبہ استغفار کے ‘‘محترم ’’ بنی ہوئی ہیں۔

قصہ مختصر یہ ہے کہ ‘‘حق وصداقت’’ کا یہ کون سا پیمانہ ہے؟ یہ سمجھ سے پرے ہے کہ ایسی تمام شخصیات لائق صد احترام بنی ہوئی ہیں اور صرف مولانا وستانوی پر ہی نزلہ کیوں گرایا جارہا ہے؟۔ کہا جاسکتا ہے کہ پیش نظر دارالعلوم ہے، لہٰذا اس کو بدنام کرنے کی مہم چلائی جارہی ہے ۔ ٹائمس آف انڈیا کی خبر کو بنیاد بتاتے ہوئے پہلے دارالعلوم دیوبند غلام وستانوی کو مشرک ، مادہ پرست وغیرہ کہا گیا اور مہتمم دارالعلوم کو بے عزت کرنے کی ساری حدیں پار کردیں گئیں۔ اب اس درمیان اسی ٹائمس آف انڈیا نے اپنی 28فروری کی اشاعت میں ایک نیاشگوفہ چھوڑا ہے، جس میں یہ کہا گیا ہے کہ دارالعلوم دیوبند میں ہورہی ہنگامہ آرائی کے پیچھے مولانا سید راشد مدنی ہی ہیں۔اخبار ہذا کا یہ تجزیہ موقر کو بدنام کرنے کی دانستہ کو شش کہلا سکتی ہے لیکن اردو کے جن اخباروں نے دارالعلوم دیوبند کی شبیہ کو مسخ کرنے کی  ناپاک کوشش کی ہے اور مسلسل کررہے ہیں انہیں کس زمرے میں رکھا جائے؟ یہ ایک بڑا سوال ہے۔ اب سوال پیدا یہ ہوتا ہے کہ آیا یہ اسلام کی جڑیں ہلانے کی کوشش ہے یا یہود ونصاریٰ کی تخریب کا ر ذہن اس کے پیچھے ہے؟ غور کرنے کا مقام ہے۔ ہم تو بار گاہ الہٰی میں یہی دعا کرتے ہیں کہ اللہ تعالیٰ دارالعلوم کو نظر بد سے بچا ئے اور آنے والی 23تاریخ کو مجلس شوریٰ کی میٹنگ میں یہ قضیہ کسی بھی طور پر ختم ہوتا کہ مزید رسوائی سے بچا جاسکے اور شرپسند عناصر اپنے مقاصد میں ناکام ہوں۔

URL: https://newageislam.com/urdu-section/vastanavi-affair-urdu-press-yellow/d/4025