Quran and the Rights of Women in Modern Age دور حاضر کے تناظر میں قرآن اور حقوق نسواں

دور حاضر کے تناظر میں قرآن اور حقوق نسواں

عطیہ صدیقہ

اللہ تعالیٰ نے کائنات میں بے شمار مخلوقات تخلیق فرمائیں ۔ ان میں اشرف المخلوقات ‘‘انسان’’ کو پیدا کیا اور انسان میں دوصنف مردوعورت کو بنایا۔ سورۃ النسا میں اللہ تعالیٰ ارشاد فرماتے ہیں : ‘‘یَٰا یُّھَا اُلنَّاسُ اُتَّقُو ارَبَّکُمُ اُلَّذِی خَلَقَکُم مِّن نَّفَسِِ وَحِدَ ۃِِ وَخَلَقَ مِنَھا زِوََ جَھَا وَ بَثَّ مِنَھُمَا رِجَا لاَ کَثِرَا وَنِسَاَ ’’ (النسا)‘‘ اے لوگو! اپنے رب سے ڈرو جس نے تمہیں ایک جان سے پیدا کیا اور اسی سے اس کا جوڑا بنایا اور ان دونوں سے بہت سے مرد او عورتیں پھیلادیے۔’’

یہ اس بات کا اعلان تھا کہ ایک انسان اور دوسرے انسان کے درمیان جو جھوٹے امتیاز ات دنیا میں قائم رکھے ہیں ، وہ سب باطل ہیں، غلط ہیں ۔ سارے انسان نفس واحد سے پیدا ہوئے ہیں۔ پیدائشی طور پر نہ کوئی افضل ہے نہ حقیر ،سب برابر ومسافی حیثیت کے مالک ہیں۔ عورت اور مرد کے درمیان زمانہ قدیم سے جو فرق امتیاز چلا آرہا تھا، اس کی تردید کی گئی، اس میں یہ حقیقت واضح کی گئی کہ انسان اول کا جوڑا کسی اور نوع سے نہیں تھا ،بلکہ اسی کی نوع سے تھا او راس میں اولین جوڑے سے بے شمار مرد اور عورتیں پیدا ہوئے ۔ان کے درمیان رشتے اور تعلقات قائم ہوئے اور پوری نسل انسانی پھیلی ۔ اس لیے دونوں کے درمیان فرق و امتیاز نوع انسانی کے ایک بازو اور دوسرے بازو کے درمیان فرق و امتیاز ہے۔ ایک کل کے دو اجزا کے درمیا ن فریق ہے۔

اللہ تعالیٰ نے مرد وعورت کے دائرہ کار الگ الگ رکھے ہیں اور اس سے اعتبار سے انہیں جسمانی وذہبی صلاحتیں عطا فرمائی۔ مرد کے ذمہ یہ کام دیا گیا کہ وہ باہر کے کام کاج سنبھالے ،محنت مزدوری کر کے کما کر لائے ،معاشی جدوجہد کرے اور اپنے اہل وعیال کی ضروریات کو پورا کرے۔ عورت کے ذمہ یہ کام دیا کہ اس کا اصل میدان کار گھر ہے۔ اولاد کی تربیت ہے اور اس اعتبار سے اس کا مزاج ، رجحان اور نفسیات بنائی ہے۔ عورت کے اندر محبت ، دلداری ، ہمدردی وغم خواری ،ایثار وقربانی ،صبر وتحمل ،حلم وبردباری اور خدمت کے  جذبات مرد سے زیادہ رکھے ہیں۔ ان کی وجہ سے وہ اپنے ماحول کو مسرت اور خوشی راحت اور سکون اور دل جوئی اور محبت سے بھر سکتی ہے۔

اس کارخانہ حیات میں اللہ رب العزت نے کوئی چیز بے کار نہیں پیدا فرمائی ،بلکہ ہر ایک کامقام اور کام متعین کیااور اس کے مطابق صلاحیتیں ودیعت فرمائی ۔ جیسے کسی مشین کے پرزے کی ساخت او رکام مختلف ہوتے ہیں، لیکن ہر ایک اپنی جگہ نہایت اہم ہوتا ہے ۔ ہر پرزے کا مقام متعین ہوتا ہے۔ مشین میں اس پرزے کو اس کی متعین جگہ پرفٹ کرتے ہیں، تبھی جاکر وہ مشین مطلوبہ کام انجام دیتی ہے۔ لیکن اگر ہم کسی پرزے کو اس کی مقرر جگہ پر فٹ نہ کریں یا کسی دوسری جگہ فٹ کردیں تو وہ مشین یا تو چل ہی نہیں سکتی ،یاپھر مطلوبہ کام انجام نہیں دے سکتی ۔ٹھیک اسی طرح کائنات کے اس کارخانے میں اللہ تعالیٰ نے جس مخلوق کا جو کام اور جو جگہ مقرر کی ہے ، اس پر قائم رہے تبھی جاکر کام ٹھیک طور پر انجام پاتا ہے ۔ مرد وعورت کے ذمہ قرآن نے جو دائر ہ کار متعین کیے ہیں ،وہ اس کی فطرت کے عین مطابق ہے کسی کے کام او رمقام کو حقیر نہیں سمجھنا چاہئے۔

دور جدید میں نام نہاد ترقی کے نام پر ملٹی نیشنل کمپنیوں نے عورت کو اس کے گھر یلو کام کاج، خاندان اور خاندانی زندگی کی اہمیت کو گھٹا کر پیش کیا ہے، اس لیے کہ انہیں کم قیمت پر ملازمین کی ایک بڑی فوج درکار تھی۔ اس لیے انہوں نے عورت کے گھریلو کام کاج کو حقیر بنا کر اپنے مفاد کے لیے معاشی جدوجہد پر ابھارا ،جب کہ اسلام نے معاشی ذمہ داری مرد پر ڈالی ہے او ر عورت کو گھر کا انتظام سنبھالنے کی ۔ اس لیے کہ دونوں مل جل کر باہمی تعاون سے خاندان کا نظام چلائے۔

اس کا مطلب یہ نہیں کہ اسلام نے عورت کے لیے معاشی جدوجہد کو بالکل ممنوع قرار دینا ،بلکہ اسلام نے عورت کو اپنی اور دوسروں کی معاشی فکر سے آزاد رکھا ہے، اس کے باوجود اگر وہ معاشی سرگرمیوں میں حصہ لینا چاہئے تو ضرور حصہ لے سکتی ہے ،البتہ اس پربعض پابندیاں عائد ہوتی ہیں۔ ان پابندیوں کے دومقاصد ہیں، ایک یہ کہ خاندان کے نظام جو عورت کی بنیادی ذمہ داری ہے، میں کوئی خلل اور انتشار نہ پیدا ہو اور اس کے استحکام میں فرق نہ آئے ۔ دوسرے یہ کہ عورت یا عفت زندگی گزار سکے اور اسے ایسے حالات میں نہ ڈالا جائے کہ اس کے لیے اخلاقی حدود میں قائم رہنا دشوار ہوجائے، اگر ان حدود وقیمود کا پاس ولحاظ نہ رکھا جائے تو سماج میں بگاڑ پیدا ہوگا،جس کا خمیازہ سبھی کو بھگتنا ہوگا۔ موجودہ دورنظریاتی دور ہے، اب ہتھیاروں او رکھلے میدان میں جنگ نہیں لڑی جارہی ہے، بلکہ نظریات وخیالات کوبد لا جارہا ہے، لوگوں کے Mindset کو بدلنے میں میڈیا بہت بڑا رول ادا کررہا ہے۔ پرنٹ میڈیا و الیکٹرانک میڈیا کے ذریعہ بعض برائیوں کی تشہیر اس بڑے پیمانے پرکی جارہی ہے کہ لوگ برائیوں کو اچھا اور مہذب سمجھ کر قبول کررہے ہیں۔ مغربی ممالک نے عورت کو جوبے قید آزادی دی ہے اور جس کی وجہ سے خاندان جو معاشرے کی بنیادی اکائی ہوتا ہے ، وہ بکھر گیا ہے۔ سماجی نظام پوری طرح سے درہم برہم ہوگیا۔ اب اسی راہ پرمشرقی ممالک چلنا چاہتے ہیں۔ جس کے بھیانک تنائج ‘‘بغیر شادی کے ساتھ اپنے Live in relationship بغیر شادی کے جنسی زندگی Casual Sexاور Homo sexuality جیسے رواج فروغ پارہے ہیں۔

انسان کو جو اللہ نے اشرف المخلوقات بنایا ہے ، وہ اپنی عقل سے کام لے کر سمجھ سکتا تھا کہ جس راہ پر چل کر مغرب تباہ وبرباد ہوا ہے، اس راہ پرمجھے نہیں چلنا چاہئے ،لیکن اس کی آنکھ پر ‘‘ھل من مزید’’ کی پٹی بندھی ہے۔ اسے کچھ سجھائی نہیں دیتا سوائے اندھا دھند تقلید کے اور اسی کو تہذیب او ر مساوات کا نام دیتا ہے۔

دور قدیم نے جہالت کی بنا پر اور دورجدید نے نام نہاد ترقی کے نام پر عورت کے اصل مقام کے تعین میں ہمیشہ غلطی کی ہے۔ افراط اور تفریط کا شکار ہوا ہے، لیکن اللہ اور اس کے رسولؐ کی تعلیمات سے ہمیں جو رہنمائی ملتی ہے، اس کے مطابق اگر ہم عورت کو اصل مقام دیں گے ، اپنے معاشرے اور سماج کی تشکیل کریں گے تبھی یہ سماج امن وسکون کا گہوارہ بن سکتا ہے ۔ اس لیے کہ اسلام اعتدال کی راہ بتاتا ہے اور اعتدال ہی صراط مستقیم ہے۔ اللہ تبارک وتعالیٰ کے نزدیک عورت او رمرد کی کامیابی ایمان وعمل صالح سے وابستہ ہے۔ اس کے نزدیک مرد اور عورت دونوں برابر ہیں۔ ازلی وابدی طور پر نہ تو کسی کے لیے برتری کا پروانہ لکھ دیا گیا ہے اور نہ کسی کے حق میں کم تری کا فیصلہ ہوچکا ہے ۔ مرد  اور عورت میں جو بھی ایمان اور حسن عمل سے آراستہ ہوگا وہ دنیا اور آخرت میں کامیاب ہوگا اور جس کا دامن ان اوصاف سے خالی ہوگا وہ دونوں ہی جگہ ناکام و نامراد ہوگا۔

 مَنََ عَمِلَ صَٰلِحَا مِّن ذَکَرِِ اَ وََ اُنثَیٰ وَھُوَ مُؤََ مِنُُ فَلَنُحَیِیَنَّہُ و حَیَوٰۃََ طَیِّبَۃََ وَلَنَجْزِ یَنَّھُمََ اَ جَرَھُم بِاَ حَسَنِ مَا کاَ نُوا یَعَمَلُونَ (النحل97)‘‘جو شخص بھی نیک عمل کرے گا چاہے وہ مرد ہو یا عورت اگر وہ مومن ہے تو ہم (اس دنیامیں) اسے پاکیزہ زندگی بسر کرائیں گے اور (اخرت میں ) ایسے لوگوں کو ضرور ان کے اچھے کاموں کا اجر عطا کریں گے’’۔

آخرت کے دن جب حساب وکتاب قائم ہوگا، انسان کی قسمت کا فیصلہ اس کی جنس کی بنیاد پر نہیں ایمان او رعمل کی اساس پر ہوتا ہے ۔ جس کسی کے دامن میں ایمان اور حسن عمل کی دولت ہوگی اس دنیا میں اسے ‘‘حیات طیبہ’’ نصیب ہوگی۔ وہ  کسی مرحلہ میں صراط مستقیم سے نہیں بھٹکے گا اور غلط راہ پرگامزن نہیں ہوگا۔ اللہ تعالیٰ اسے رزق حلال عطا کرے گا، مشکلات میں صبر وقناعت دے گا۔ قیامت کے روز جنت کے دروازے اس کے لیے کھولیں گے اور وہاں کی ابدی نعمتوں کا وہ حقدار قرار پائے گا۔ یہ ایک قائدہ کلیہ ہے اس میں مرد اور عورت کے درمیان فرق نہیں ۔ اللہ تعالیٰ ہمیں دنیا وآخرت میں کامیاب عطا فرمائے اور اس کے حدود کا پاس ولحاظ کرنے کی توفیق عطا فرمائے(آمین)

URL: https://newageislam.com/urdu-section/quran-rights-women-modern-age/d/3555