Sun Mar 23 2025, 04:18 PM

Urdu Section ( 21 Nov 2022, NewAgeIslam.Com)

I Bear Witness That 'You Are the Prophet Whom We People Of the Book Were Waiting For' Part-110 میں گواہی دیتا ہوں کہ آپؐ وہی نبی ہیں جن کا ہم اہل کتاب انتظار کررہے تھے

مولانا ندیم الواجدی

18 نومبر،2022

شاہِ حبشہ نجاشی کے نام خط

شاہ حبشہ نجاشی کے نام جن کا اصل نام اصحمہ بن الجبر تھا رسول اکرم صلی اللہ علیہ وسلم نے تین خطوط لکھے، پہلا خط ہجرت حبشہ کے موقع پر حضرت جعفرؓ لے کر گئے تھے، اس خط کا آغاز اِن الفاظ سے ہوتا ہے: وقد بعثت الیکم ابن عمی جعفر ومعہ نفر من المسلمین۔ ’’میں تمہارے پاس اپنے چچا زاد بھائی جعفر کو بھیج رہا ہوں، ان کے ساتھ کچھ اور مسلمان بھی ہیں۔‘‘ اس کالم میں، ہجرت حبشہ کے بیان میں اس خط کا ذکر کیا جاچکاہے۔

دوسرے مکتوب گرامی نامے کے متعلق دو روایتیں ہیں، ایک روایت کے مطابق رسول اللہ صلی اللہ علیہ وسلم نے اپنے دوسرے خط میں نجاشی کو حکم دیا تھا کہ وہ ام حبیبہ بنت ابی سفیانؓ کا نکاح آپ صلی اللہ علیہ وسلم سے کردے، ام حبیبہؓ اپنے شوہر کے ساتھ ہجرت کرکے حبشہ چلی گئی تھیں، وہاں جاکر ان کا شوہر مرتد ہوکر عیسائی بن گیا اور اسی حال میں مر گیا، رسول اللہ صلی اللہ علیہ وسلم کو اس کی اطلاع ملی تو آپؐ نے نجاشی کو یہ پیغام دیا، اس نے حکم کی تعمیل کی اور چار سو دینار میں حضرت ام حبیبہ کا نکاح رسول اللہ صلی اللہ علیہ وسلم سے کردیا، اس خط میں دوسرا حکم آپ ؐنے یہ دیا تھا کہ جو مسلمان حبشہ میں ہیں ان کو مدینے بھیجنے کا انتظام کردے، اس نے اس حکم کی بھی تعمیل کی، تمام مہاجرین کو دو کشتیوں میں سوار کراکے بھجوا دیا اور ان کو زاد راہ بھی دیا۔ (الوفاء باحوال المصطفی: ۲/۷۳۷)

دوسری روایت حضرت عبد اللہ بن عباسؓ کی ہے، انہوں نے نجاشی کے نام رسول اللہ صلی اللہ علیہ وسلم کے مکتوب گرامی کی عبارت نقل کی ہے، جس کا اُردو ترجمہ یہ ہے ’’اس پر سلامتی ہو جو ہدایت کی اتباع کرے اور اللہ اور اس کے رسول پر ایمان لائے، میں گواہی دیتا ہوں کہ اللہ ایک ہے، اس کا کوئی شریک نہیں، اور اس کے سوا کوئی عبادت کے لائق نہیں، اس کے نہ کوئی بیوی ہے اور نہ بیٹا، محمد اس کے بندے اور اس کے رسول ہیں، میں اسلام قبول کرنے کی دعوت دیتا ہوں، کیوںکہ میں اللہ کا رسول ہوں، اسلام لے آؤ، سلامتی کے ساتھ رہو گے، اے اہل کتاب! ایک ایسی بات کی طرف آجاؤ جو ہمارے اور تمہارے درمیان ایک جیسی ہے، اور وہ یہ ہے کہ ہم اللہ کے سوا کسی اور کی عبادت نہ کریں، اس کے ساتھ کسی کو شریک نہ ٹھہرائیں، اور ہم میں سے کوئی، خدا کو چھوڑ کر، کسی اور کو اپنا رب نہ بنائے، اگر وہ منہ موڑ لیں تو یہ گواہی دو کہ ہم مسلمان ہیں، اگر تم نے یہ دعوت قبول نہ کی تو تم پر اپنی قوم نصاری کا گناہ ہوگا۔‘‘ (المستدرک علی الصحیحین للحاکم: ۱۰/۲۸، رقم الحدیث: ۴۲۱۴)

اگر اس خط کو دوسرا مکتوب مان لیا جائے تو اس خط کو ہی جس میں حضرت ام حبیبہؓ کے نکاح اور مہاجرین کی واپسی کا تذکرہ ہے تیسرا ماننا پڑے گا، اور اگر اسے دوسرا مانا جائے تو حضرت عبد اللہ بن عباسؓ نے جس خط کا ذکر فرمایا ہے، اسے تیسرا ماننا پڑے گا، یا ان دونوں کو ایک ہی خط کا مکمل مضمون تسلیم کرنا ہوگا، کیوں کہ ایک مکتوب گرامی نامے کا ذکر علامہ ابن القیمؒ نے زاد المعاد میں کیا ہے، مشہور محقق اور سیرت نگار ڈاکٹر حمید اللہ نے اپنی کتاب ’’الوثائق السیاسیۃ‘‘ میں لکھا ہے کہ یہی وہ خط ہے جو رسول اللہ صلی اللہ علیہ وسلم نے نجاشی کو تحریر فرمایا تھا، بہر حال اس دعوے سے اس بات کی نفی نہیں ہوتی کہ اس کے علاوہ دوسرے خطوط نہیں بھیجے گئے۔ بعض حضرات یہ بھی کہتے ہیں کہ ڈاکٹر حمید اللہ صاحب جس خط کا حوالے دے رہے ہیں وہ خط رسول اللہ صلی اللہ علیہ وسلم نے اصحمہ نجاشی کی وفات کے بعد ان کے جا نشین کو تحریر فرمایا تھا، اس کی تائید حافظ ابن کثیر کے بیان سے بھی ہوتی ہے کہ دوسرا مکتوبِ نبوی ملنے کے بعد شاہ نجاشی نے اسلام قبول کرلیا تھا۔ (البدایہ والنہایہ: ۴/۲۶۲)

تیسرے مکتوب گرامی کے سلسلے میں یقین کے ساتھ یہ بات نہیں کہی جاسکتی کہ وہ اصحمہ نجاشی کو لکھا گیا تھا، غالب گمان یہ ہے کہ اس کا مکتوب الیہ اصحمہ کا جانشیں نجاشی ہے، مکتوب گرامی میں نام کی صراحت بھی نہیں ہے، بلکہ یہ لکھا ہے إلی النجاشی عظیم الحبشہ۔ (سر براہ حبشہ نجاشی کے نام) اس خط کے سلسلے میں قابل ذکر بات یہ ہے کہ خوش قسمتی سے اس خط کی اصل کاپی دریافت ہوچکی ہے، ڈاکٹر حمید اللہ اپنی کتاب میں لکھتے ہیں:

’’گیارہ مئی انیس سو انتالیس عیسوی کو جب میں نے آکسفورڈ میں ابتدائے سن ہجری کے چند عربی مکتوباتِ مدینہ پر لیکچر دیا تو پروفیسر مار گویتھ نے جلسے میں بیان کیا کہ ایک مکتوبِ نبویؐ جو نجاشی حبشہ کے نام بھیجا گیا تھا؛ دستیاب ہوگیا ہے اور اسکارٹ لینڈ کے ایک شخص کے پاس ہے۔ جلسے کے بعد میں نے پروفیسر کے توسط سے اس شخص کو ایک خط بھیجا، کئی ماہ بعد مجھے اس کا جواب حیدر آباد میں ملا، خط نویسندہ مسٹرڈی فلاپ کا سیام ان دنوں شام میں تھا، جواب میں مکتوبِ مبارک کی ایک نقل جو ہاتھ سے کی گئی تھی منسلک تھی اور وعدہ کیا گیا تھا کہ اسکارٹ لینڈ واپسی پر مجھے فوٹو بھی دیا جائیگا، نیز اس مکتوب پر ایک مضمون بہت جلد لندن کے رسالے جے آر ای ایس میں بھی چھپے گا، بعد میں یہ مضمون مذکورہ رسالے کے جنوری انیس سو چالیس کے شمارے میں چھپا، اور اس مذکور مکتوب کا فوٹو بھی شائع ہوا۔ (رسول اکرم کی سیاسی زندگی ص: ۴۰۱)

یہ خط ایک جھلی پر لکھا ہوا ہے جو ساڑھے تیرہ انچ لمبی اور نو انچ چوڑی ہے، اس میں حروف کی شکل گول اور جلی ہے، اس لئے آسانی سے پڑھا جاسکتا ہے، یہ بھورے رنگ کی سیاہی سے لکھا ہوا ہے اور خط کی سترہ ستر یں ہیں، آخر میں ایک انچ قطر کی گول مہر کا نشان ہے جو فوٹو میں صاف نہیں ہے۔ (رسولؐ اللہ کا سفارتی نظام، مؤلفہ محمد یونس ص: ۳۹۲)

رسول اکرم صلی اللہ علیہ وسلم نے نجاشی ملک ِ حبشہ کے نام مکتوب گرامی عمرو بن امیہ الضمریؓ کے ذریعے حبشہ روانہ فرمایا، یہ صحابی حبشہ سے انہی دنوں دوسرے مہاجرین کے ساتھ مدینے تشریف لائے تھے، خط کی عربی عبارت کا ترجمہ ذیل میں درج ہے:

’’بسم اللہ الرحمن الرحیم۔

اللہ کے رسول محمدؐ کی طرف سے حبشہ کے عظیم نجاشی کی جانب۔

سلام ہو اس پر جو ہدایت کی اتباع کرے، امابعد!میں تمہارے سامنے اس اللہ کی تعریف کرتا ہوں جس کے سوا کوئی معبود نہیں ہے جو بادشاہ ہے، تمام عیبوں سے پاک ہے، امن دینے والا ہے ، اور سب کا نگہبان ہے، اور میں اس بات کی گواہی دیتا ہوں کہ مریم کے بیٹے عیسیٰ اللہ کی روح اور اس کا کلمہ ہیں، جسے اللہ نے پاک کنواری اور عفیفہ و طاہرہ مریم کی جانب القا کیا ، جس سے وہ حاملہ ہوگئیں اور عیسیٰ کو اللہ نے اپنی خاص روح اور پھونک سے پیدا کیا، جس طرح اللہ تعالیٰ نے آدم کو اپنے دست قدرت سے پیدا فرمایا، میں تمہیں اللہ کی طرف بلا رہا ہوں جو یکتا ہے اس کا کوئی شریک نہیں ہے اور اس کی مسلسل فرماں برداری کی دعوت دیتا ہوں، اور اس بات کی دعوت دیتا ہوں کہ اللہ کی طرف سے جو کچھ میرے پاس آیا ہے، اس کی اتباع کرو اور اس پر ایمان لاؤ، بلاشبہ میں اللہ کا رسول ہوں، میں نے اللہ کا حکم پہنچا دیاہے، اور تمہیں نصیحت کرچکا ہوں، تم میری نصیحت قبول کرلو، اس پر سلامتی ہو جو ہدایت کی اتباع کرے۔‘‘ (السیرۃ النبویہ لابن اسحاق: ۱/۸۱، تاریخ ابن خلدون: ۲/۳۶، البدایہ والنہایہ: ۳/۱۸۴)

حضرت عبد اللہ ابن عباسؓ کی روایت میں لکھا ہے کہ نجاشی نے خط پڑھ کر آنکھوں سے لگایا، اور تواضع واحترام کے اظہار کے لئے زمین پر بیٹھ گیا، پھر ایک ڈبہ منگوایا، اس میں آپ صلی اللہ علیہ وسلم کے بھیجے ہوئے خطوط محفوظ کئے اور کہا کہ جب تک یہ خطوط ہمارے پاس رہیں گے، ہمارا ملک محفوظ رہے گا۔ خط دینے سے پہلے حضرت عمرو بن اُمیّہ ضمریؓ نے نجاشی سے کہا تھا: اے اصحمہ! ہم آپ سے کچھ کہنا چاہتے ہیں ہمیں آپ پر اعتماد ہے اور آپ کے ساتھ حسن ظن ہے، ہم نے جب بھی آپ سے کسی خیر کی امید رکھی وہ پوری ہوئی، ہم نے آپ کے سایہ امن میں بے خوف ہوکر وقت گزارا، ہمیں آپ سے معلوم ہوا کہ انجیل حجت ہے، اس لئے ہمیں اپنے اور آپ کے درمیان اسی کو شاہد عدل قرار دے لینا چاہئے، اس کی شہادت رد نہیں کی جاسکتی، وہ ایسا منصف قاضی اور عدل پرور حاکم ہے جو اپنے فیصلوں میں حد سے تجاوز نہیں کرتا، اگر آپ نے یہ دعوت قبول نہیں کی تو آپ رسول اللہ ﷺکے حق میں ایسے ہی ثابت ہوں گے جیسے یہود حضرت عیسیٰ علیہ السلام کے حق میں تھے، رسول اللہ ﷺ نے اپنے قاصد اور سفیر دوسرے بادشاہوں کو بھی روانہ فرمائے ہیں مگر ان کی بہ نسبت آپ سے اُمید زیادہ ہے۔

اصحمہ نجاشی نے کہا کہ میں گواہی دیتا ہوں کہ آپؐ وہی نبی ہیں جن کا ہم اہل کتاب انتظار کررہے تھے، جس طرح حضرت موسیٰ علیہ السلام نے راکب الحمار (گدھا سوار) سے حضرت عیسیٰ کی بشارت دی تھی اسی طرح حضرت عیسیٰ علیہ السلام نے راکب الجمل (اونٹ سوار) سے حضرت محمد رسول اللہ صلی اللہ علیہ وسلم کی بشارت دی ہے، مجھے آپؐ کی نبوت اور رسالت کا اس درجہ یقین ہے کہ دیکھنے سے بھی اس میں کچھ اضافہ نہ ہوگا، میں اسلام قبول کرتا ہوں۔ اس کے بعد اس نے مکتوب گرامی کا جواب لکھوایا، حدیث کی کتابوں میں اس کا متن بھی محفوظ ہے، ہم یہاں صرف ترجمہ لکھتے ہیں:

’’محمد رسولؐ اللہ کی خدمت میں نجاشی اصحمہ کی جانب سے، اے اللہ کے نبی صلی اللہ علیہ وسلم، آپؐ پر اللہ کی طرف سے سلام، اس کی برکت اور اس کی رحمت نازل ہو، جس کے سوا کوئی عبادت کے لائق نہیں اور جس نے مجھے اسلام کی طرف ہدایت دی، اما بعد! یا رسولؐ اللہ! مجھے آپ کا گرامی نامہ ملا، جس میں آپؐ نے حضرت عیسیٰ علیہ السلام کا کچھ ذکر فرمایا ہے، آسمان وزمین کے رب کی قسم! آپؐ نے جو کچھ فرمایا ہے حضرت عیسیٰ علیہ السلام ایسے ہی ہیں، وہ اس سے ذرہ برابر بھی بڑھے ہوئے نہیں ہیں، پھر آپؐ نے جو دعوت ہمیں دی ہے ہم نے اسے سمجھ لیا ہے۔ آپؐ کے چچا زاد بھائی اور ان کے رفقاء ہمارے پاس آئے تھے، میں گواہی دیتا ہوں کہ آپؐ اللہ کے رسول ہیں، میں نے آپ سے بیعت کرلی ہے، میں نے آپؐ کے چچازاد بھائی کے ہاتھ پر بیعت کی اور اللہ رب العالمین کے لئے اسلام قبول کیا ہے، میں اپنے بیٹے کو آپ کی خدمت میں بھیج رہا ہوں، اور اگر آپؐ چاہیں تو میں خود بھی حاضر ہوسکتا ہوں، میں گواہی دیتا ہوں کہ جو کچھ آپ فرماتے ہیں وہ حق ہے، والسلام علیک ورحمۃ اللہ وبرکاتہ ۔ (کتاب الوفاء باحوال المصطفی: ۲/۷۲۵)

شاہ حبشہ نجاشی نے اپنے وعدے کے مطابق اپنے بیٹے کو رسول اللہ صلی اللہ علیہ وسلم کی خدمت عالیہ میں حاضری دینے کے لئے بھیجا، اس کے ساتھ ساٹھ افراد کا لمبا چوڑا قافلہ بھی تھا، سمندری سفر میں کشتی الٹ گئی اور تمام افراد ڈوب گئے، سن نو ہجری میں غزوۂ تبوک کے بعد اصحمہ نجاشی کی وفات کی اطلاع بہ ذریعہ وحی ملی، آپ صلی اللہ علیہ وسلم نے اسی دن صحابہ کو بتلایا کہ نجاشی انتقال کرگئے ہیں، آپؐ نے ان کی غائبانہ نماز جنازہ بھی پڑھی، جن حضرات فقہاء نے غائبانہ نماز جنازہ کی اجازت دی ہے وہ اسی واقعہ سے استدلال کرتے ہیں، احناف کے یہاں غائبانہ نماز جنازہ جائز نہیں ہے، نماز جنازہ کے صحیح ہونے کیلئے جنازہ کا سامنے ہونا شرط ہے، نجاشی کی غائبانہ نماز پڑھی گئی، فقہاء نے اس کو نجاشی کی خصوصیت قرار دیا ہے۔ روایات سے یہ بھی معلوم ہوتا ہے کہ نجاشی کا جنازہ آپ صلی اللہ علیہ وسلم کے سامنے کردیا گیا تھا، غائبانہ نماز جنازہ پڑھنا آپ صلی اللہ علیہ وسلم کا معمول نہیں تھا، کیونکہ بہت سے صحابہ مدینے سے باہر شہید ہوئے، آپ کو ان کی شہادت کی خبر دی گئی مگر آپؐ نے ان کی نماز جنازہ نہیں پڑھی۔ (جاری)

Urdu Section ( 21 Nov 2022, NewAgeIslam.Com)

I Bear Witness That 'You Are the Prophet Whom We People Of the Book Were Waiting For' Part-110 میں گواہی دیتا ہوں کہ آپؐ وہی نبی ہیں جن کا ہم اہل کتاب انتظار کررہے تھے

Loading..

Loading..