The land of the Sinking Sun ڈوبتے سورج کی زمین

URL: https://newageislam.com/urdu-section/the-land-sinking-sun-/d/4085

سمیع اللہ ملک

وہ 1925میں پیدا ہوا، چھ سال کی عمر میں ولی عہد بنا اور 22سال کی عمر میں ایران کا بادشاہ بن گیا، وہ محمد رضا شاہ پہلوی تھا لیکن پوری دنیا اسے شاہ ایران کے نام سے جانتی تھی۔ وہ ایشیا میں امریکہ کا سب سے بڑا دوست تھا، یورپی پریس اسے ‘‘ امریکن گورنر’’ کہتا تھا اور وہ امریکی وفاداری میں بہت آگے چلا گیا، امریکہ نے اسے روشن خیالی او ر اعتدال پسندی کا حکم دیا  اور اس نے ایران میں داڑھی اور پردہ پر پابندی  لگادی ۔ اس کے دور میں کوئی عورت باپردہ نکلتی تھی تو پولیس سرے سے عام اس کا برقع پھاڑ دیتی، شاہ ایران نے تمام زمانہ اسکولوں، کالجوں، اور یونیورسٹیوں میں سکرٹ کو یونیفارم بنادیا ، شراب نوشی، رقص اور زنا فیش بن گیا۔ شاہ کے دور میں ایران دنیا کا واحد ملک تھا جس میں کالجوں میں شراب کی دکانیں تھیں، یونیورسٹیوں میں خواتین کی سود ے بازی ہوتی تھی۔

اس مکروہ کاروبار کو قانونی حیثیت حاصل تھی ، شاہ کے زمانے میں دوجرنیلوں کے ہم جنس پر ست بیٹوں نے آپس میں شادی کی ، سرکاری سطح پر نہ صرف ان کی دعوت ولیمہ ہوئی بلکہ شاہ اور اس کا بینہ نے خصوصی طور پراس تقریب میں شرکت کی۔ شاہ نے امریکہ کی محبت میں ایران میں موجود 44ہزار امریکیوں کی سفارتی حیثیت دے دی، امریکہ نے شاہ ایران کے دفتر میں ‘‘ گرین فون’’ لگا رکھا تھا اور اسے امریکہ سے جو ہدایت ملتی تھی وہ ان پرفوری عمل درآمد کراتا تھا لیکن پھر شاہ کی امریکہ نواز پالیسیوں پر بغاوت ہوئی، یہ بغاوت تین سال تک چلتی رہی، شاہ نے 12شہروں نے مارشل لا لگا دیا ،عوام نے اسے تسلیم کرنے سےانکار کردیا، شاہ نے حکومت شاہ پور بختیار کے حوالے کی اور ملک سے فرار ہوگیا، اس کا خیال تھا امریکہ اب اس کی وفاداریوں کا بدلہ دیگا لیکن جوں ہی شاہ ایران کا طیارہ ایران کے حدود سے نکلا ،امریکہ نے آنکھیں پھیر لیں ، شاہ پہلے مصر گیا ،پھر مراکش ،بہاماس اور پھر میکسیکو ،وہ اس دوران امریکہ سے مسلسل مدد مانگتا رہا لیکن وائٹ ہاؤس اس کا ٹیلی فون تک نہیں سنتا تھا۔شاہ ایران سولہ سال تک مارا مارا پھرتا رہالیکن کسی نے اس کی مدد نہیں کی، امریکہ نے اس کے ایکاؤنٹس تک ‘‘منجمد’’ کردیے، آخر میں انورالسادات کام آیا اور اس نے اسے پناہ دے دی۔ جولائی 1980میں قاہرہ میں اس کا انتقال ہوا، انتقال کے وقت اس کے پاس اس کی تیسری بیوی کے سوا کوئی نہ تھا لوگ اس کا جنازہ تک پڑھنے نہ آئے چنانچہ اسے اس کے بیڈروم ہی میں دفن کردیا گیا۔

یہ صرف رضا شاہ پہلو ی کی کہانی نہیں ، امریکہ کا ہر  حکمران دوست اسی انجام کا شکا ہوا، آپ ‘‘اناس تاسیو’’ کی مثال لیجئے ،وہ نکارہ گوا میں امریکی ایجنٹ تھا، نکارا گوا میں کمیونزم کی تحریک شروع ہوئی تو امریکہ نے اناس تا سیو کو ڈالر اور اسلحہ دے کر کمیونزم کے خلاف کھڑا کردیا۔ انس تا سیو امریکہ کی جنگ کو اپنی جنگ سمجھ کر لڑتا رہا،1979میں نکارا گوار میں اس کے لیے حالات مشکل ہوگئے ،وہ ملک سے فرار ہوا لیکن جوں ہی اس نے نکارا گوار سے باہر قدم رکھا، امریکہ نے اسے پہچاننے سے انکار کرگیا، اس نے امریکہ آنے کی کوشش کی لیکن امریکی حکومت نے اجازت نہ دی، یوں اناس تاسیو جنگلوں اور غاروں میں چھپ کر زندگی گزار نے لگا، وہ 1980میں اسی پریشانی کے عالم میں انتقال کرگیا اور اس کے چند قریبی دوستوں نے پیرا گوائے کے شہراس نشن میں  دفن کردیا،آج لوگ اس کے نام تک سے واقف نہیں ہیں۔

چلی کے آمر ‘‘جنرل اگارتے اگستو پنوشے’’ نے 1973میں سی آئی اے کی مدد سے جنرل ایلنڈ و کی منتخب حکومت پر شب خون مارا تھا ،پنوشے نے اقتدار میں آتے ہی چلی کے عوام کے خلاف آپریشن شروع کردیا۔ پنوشے 1990تک چلی پرحکمران رہا ، ان 17برسوں میں پنوشے نے امریکہ کے کہنے پر ہزاروں شہری کا قتل کرائے ۔ امریکہ کی ناپسندیدہ تنظیموں پر پابندیاں لگیں اور امریکہ کی خواہش پر اپنے شہریوں کے انسانی حقوق غصب کیے عوام 1990میں پنوشے کے خلاف اٹھ کھڑے ہوئے اور مارچ 1990میں لندن فرار ہوگیا، اس کا خیال تھا کہ برطانیہ اور امریکہ اس کی  وفاداریوں کی قدر کریں گے لیکن لندن آتے ہی برطانیوی پولس نے اسے گرفتار کیااور اسے  اسکے گھر میں نظر بند کردیا، اس نے اس ناروا سلوک امریکہ سےاحتجاج کیا لیکن امریکی حکومت نے اسے جواب تک نہ دینے کی زحمت  نہ کی ۔ برطانوی حکومت نے اسے 2000میں چلی کے حوالے کردیا۔ اس کے خلاف مقدمہ چلا، 3دسمبر 2006کو اسے ہاٹ اٹیک ہوا اور وہ دم توڑ گیا، اس کی موت پر پورے ملک میں خوشیاں منائی گئیں جبکہ امریکی حکومت نے ایک سطر کا تعزیتی پیغام تک جاری نہ کیا۔

نگولا کا باغی سردار ‘‘جوناس سیومنی’’ میں امریکہ نواز لیڈر تھا، وہ برسہا برس انگولا میں امریکی مفادات کی جنگ لڑتا رہا،نومبر1992میں امریکہ نےاسے کمیو نسٹوں کے ساتھ امن معاہدے کا حکم دیا، اس نے معاہدے پر ستخط کردیے جس کے نتیجے میں جو ناس سیومنی بے دست وپا ہوگیا ، معاہدے پر ستخطوں کے دوماہ بعد کمیو نسٹوں نے ‘‘ہامبو’’ میں اس کے ہیڈ کواٹر پر حملہ کردیا وہ فرار ہوگیا، آج اس واقعہ کو اٹھارہ سال گزر چکے ہیں، جو ناس سیومنی جان بچا نے کے لیے چھپتا پھررہا ہے لیکن امریکی حکومت اس کا ٹیلی فون تک نہیں سنتی ’’

جنرل نویگا ’’ پامامہ میں امریکی کا آلہ کار تھا، اسے بھی امریکہ نے کمیونسٹوں کے خلاف استعمال کیا وہ 1990تک امریکی مفادات کی جنگ لڑتا رہا لیکن امریکہ کی تسلی نہ ہوئی لہٰذا امریکہ نے پانامہ پر حملہ کردیا، صدر نوریگا گرفتا ر ہوا امریکی ایما پر عدالت نے اسے 40سال قید بامشقت کی سزا سنا دی اور نوریگا گذشتہ چودہ برس سے جیل میں امریکی دوستی کاخمیازہ بھگت رہا ہے۔

‘‘فرنینڈ مارکوس’’ 22برس تک فلپائن میں امریکی مفادات کی جنگ لڑتا رہا ۔ اس نے فلپائن سے کمیو نسٹوں کو چن چن کر ختم کردیا لیکن 1986میں امریکہ ہی نے اس کی حکومت ختم کرادی ، مار کوس امریکہ آگیا، امریکہ نے اسے پناہ تودے دی لیکن اسے وہ عزت اور وہ توقیر نہ دی جس کا وہ حقدار تھا، مارکوس نے باقی زندگی ہونو لولو کے ایک چھوٹے سے مکان میں گزاری اور اسے ایک عام پناہ گزین کے برابر وظیفہ ملتا تھا ۔مارکوس 1999میں اسی بے بسی کے عام میں آنجہانی ہوگیا۔

1979ہی میں امریکہ نے رہو ڈیشیا میں بشپ اہبل منرور یواکو موغا بے اور نکو مو کے مقابلے میں کھڑا کیا۔ بشپ امریکیوں کے لیے لڑتا رہا لیکن جب وہ لڑتے لڑتے کمزور ہوگیا تو امریکہ نے اس کی امداد سے ہاتھ کھینچ لیا اور صدرصدام کی کہانی تو پوری دنیا جانتی ہے ۔ انقلاب ایران کے بعد امریکہ نے صدام حسین کو استعمال کرنے کا فیصلہ کیا، صدام حسین نے امریکہ کی ایما پر 22ستمبر 1980کو ایران پرحملہ کردیا، یہ جنگ 20اگست 1988تک 8سال جاری رہی اور اس میں دس لاکھ افراد ہلاک اور 20لاکھ زخمی ہوئے ۔ صدام حسین 1990تک امریکہ کا دوست رہا لیکن پھر امریکہ نے تیل کے لالچ میں عراق پرحملہ کردیا، اس جنگ میں 86ہزار عراقی شہری شہید ہوئے 2003کو بغداد میں پھانسی دے دی گئی ۔

شاہ ایران سے لے کر صدام حسین تک امریکی تاریخ دوست کشی کی ہزاروں مثالوں سے بھری پڑی ہے۔ امریکی اپنی خارجہ پالیسی کو ‘‘ڈسپوزل پالیسی ’’کہتے ہیں ۔ ان کا فلسفہ ہے خرید و ،استعمال کر و اور پھینک دو، امریکی قوم بلیڈ کند ہونے سے پہلے بیوی بدل لیتے ہیں چنانچہ یہ لوگ اپنے دوستوں کو کاغذ کے گلاس ،پلیٹ ، ٹشو اور گندی جراب سے زیادہ اہمیت نہیں دیتے ۔ یہ لوگ ہمیشہ کیس ٹو کیس اور پراجیکٹ ٹوپر اجیکٹ چلتے ہیں چنانچہ ان کے دوست جنرل اگستو پنوشے ہوں جنرل رضا شاہ پہلو ی ہوں یا جنرل صدام حسین یہ لوگ اس وقت انہیں دوست سمجھتے ہیں جب تک وہ ان کے لیے خدمات سر انجام دے سکتے ہیں اور جس وقت انہیں محسوس ہوتا ہے یہ شخص اس پر بوجھ بنتا جارہا ہے، یہ اس کے ساتھ ذوالفقار علی بھٹو اور جنرل ضیا الحق جیسا سلوک کرتے ہیں اور یہ اس کے بعد ان کی قبروں تک پر ‘‘سابق’’ کی مہر لگادیتے ہیں۔

یہ ہے امریکی دوستی اور اسکا انجام اور امریکہ پچھلے 234برس سے ‘‘دوستی’’ کے اسی فلسفے پر کار بند ہے اور اس نے آج تک کسی شخص کے لیے اپنی یہ پالیسی نہیں بدلی لیکن دلّی سرکار کے مہربان یہ سمجھ رہے ہیں 2007تک پہنچ کر امریکہ نے اپنا سارا فلسفہ بدل لیا ہے اور وہ اب بحیرہ عرب کے آخری سال اور بحرا وقیانوں کی آخری لہر تک دلی سرکار کا ساتھ دے گا۔ ہمارے یہ دوست بھول گئے ہیں وہ امریکی جو اپنی ماں، اپنے باپ کو بھول جاتے ہیں ، ان کی دوستی محض اپنے مفادات کی خاطر ہوتی ہے۔ امریکہ کو اس خطے کی ابھرتی ہوئی سپر طاقت چین کا محاصرہ درکار ہے جس کے لئے پاکستان قطعی موزوں نہیں کہ پاک چینی دوستی اس راستے کا سب سے بڑاپتھر ہے۔ یہیں وجہ ہے کہ دلّی میں کھڑے ہوکر اوبامہ نے بھارت کی مستقل نشست کی حمایت تو کردی لیکن چند دنوں کے بعد امریکہ ہی کے ایک اعلیٰ عہدیدار نے اس کو انتہائی مشکل قرار دیا۔

امریکہ ڈوبتے سورجوں کی زمین ہے اور ڈوبتے سورجوں کے بیٹے ہمیشہ چڑھتے سورجوں کے دوست ہوتے ہیں۔ امریکہ کی وفاداری ہمیشہ اپنے مفادات سے وابستہ رہی ہے اور آئندہ بھی اس میں کوئی تبدیلی کا ا مکان نہیں ۔ بس ایک دوبرس کی بات ہے، اگر دلّی سرکار امریکی ایما پر چین کے خلاف انکی امیدوں پرپورے نہ اترے تو اس کے بعد نیا کپ ،نئی پلیٹ اور نیا گلاس ہوگا اور کوئی نیا اوبامہ ہوگا۔

URL: https://newageislam.com/urdu-section/the-land-sinking-sun-/d/4085