Mon Apr 21 2025, 04:36 AM

Urdu Section ( 31 Dec 2022, NewAgeIslam.Com)

I Want to Remind You of Allah Almighty, Who Says That Anyone Who Takes Guidance Does So for His or Her Own Benefit- Part-116 میں تمہیں اللہ عزوجل کی یاد دِلاتا ہوں جو نصیحت قبول کرتا ہے وہ اپنے فائدہ کیلئے کرتا ہے

مولانا ندیم الواجدی

30دسمبر،2022

مُنْذِر بن ساویٰ العبدی شاہ بحرین کے نام مکتوبِ گرامی:

رسول اکرم صلی اللہ علیہ وسلم نے ایک خط بحرین کے حاکم منذر بن ساوی العبدی کو بھجوایا، یہ مکتوب گرامی حضرت علاء بن حضرمیؓ لے کر گئے، وہ خود بیان کرتے ہیں کہ میں نے رسول اللہ صلی اللہ علیہ وسلم کا والا نامہ اس کو سپرد کرتے ہوئے یہ نصیحت کی تھی

’’اے منذر! تو عقل مند بھی ہے اور ہشیار بھی ہے، مگر تیری یہ عقل مندی اور ہشیاری دنیاوی معاملات تک محدود ہے، آخرت کے بارے میں تو نادان بھی ہے اور ذلیل بھی، جس مذہب کا تو پیروکار ہے یعنی مجوسیت اور آتش پرستی وہ بدترین مذہب ہے، نہ اس میں اہلِ عرب کا سا شرف اور کرم ہے اورنہ اہلِ کتاب کا سا علم ہے، اس مذہب کے ماننے والے ان عورتوں سے نکاح کرتے ہیں جن کے ذکر ہی سے حیاء مانع ہے، اور ایسی چیزیں کھاتے ہیں جن کے تصور سے ہی ہر سلیم الطبع شخص کراہت محسوس کرتا ہے، اس مذہب کے متبعین دنیا میں اس آگ کی پرستش کرتے ہیں جو آخرت میں ان کو کھائے گی، اے منذر! اللہ نے تجھے عقل عطا فرمائی ہے، ان باتوں پر اچھی طرح غور کرلے اور خوب سوچ لے، جو شخص کبھی جھوٹ نہیں بولتا اس کی تصدیق کرنے میں اور اس کو سچا اور راست باز سمجھنے میں تجھے کیا پریشانی ہے، جو شخص کبھی خیانت نہیں کرتا اسے امین سمجھنے میں اور جو خلافِ واقعہ کوئی بات نہیں کرتا اس پر اعتماد کرنے میں تجھے کیا تردّدہے ، اگر آپ صلی اللہ علیہ وسلم ایسے ہیں اور بلاشبہ وہ ایسے ہی ہیںتو تجھے یہ بات سمجھ لینی چاہئے کہ وہ یقینی طور پر اللہ کے نبی اور اس کے رسول ہیں، وہ ایسے رسول ہیں کہ اگر کسی بات کا حکم فرمائیں تو کوئی ذی شعور یہ بات نہیں کہہ سکتا کہ کاش آپؐ اس چیز سے منع فرماتے، اور جس چیز سے وہ منع کرتے ہیں اس کے متعلق کوئی شخص یہ نہیں کہہ سکتا کہ کاش وہ اس چیز سے منع نہ فرماتے، یا جس چیز کو آپؐ نے معاف فرمادیا ہے اس کے متعلق کوئی یہ نہیں کہتا کہ کاش آپؐ کچھ اور معاف فرما دیتے، جس جرم کی جو سزا آپؐ نےتجویز فرمائی ہے اس کے متعلق بھی کوئی یہ نہیں کہہ سکتا کہ کاش اس سزا میں کچھ تخفیف ہوجاتی، کیوں کہ آپؐ کے تمام اوامر و نواہی اور آپؐ کے جملہ احکام و ارشادات اصحابِ عقل اور اہلِ نظر کے کمالِ عقل اور منتہائے نظر کے عین مطابق ہیں۔

(الروض الانف: ۴/۳۹۰)

منذر نے حضرت علاء الحضرمیؓ کا یہ خطاب توجہ سے سنا۔ اس نے جواب میں یہ کہا کہ میں جس دین سے وابستہ ہوں اس میں غور کرنے سے مجھ پر یہ حقیقت منکشف ہوتی ہے کہ ہمارا دین محض دنیا کے لئے ہے، آخرت کا اس دین سے کوئی تعلق نہیں ہے، اس کے برعکس تمہارے دین میں دنیا بھی ہے اور آخرت بھی، مجھے تمہارا دین قبول کرنے سے کوئی شے مانع نہیں ہے، اس میں زندگی کی تمناؤں کی تکمیل بھی ہے اور موت کی راحت بھی ہے، آج سے پہلے میں اس شخص کی نادانی پر ہنسا کرتا تھا جو تمہارا دین قبول کرلیتا تھا اور آج میں اس شخص پر تعجب کرتا ہوں جو تمہارے دین کو مسترد کردیتا ہے۔ (حوالہ سابق)

مکتوب گرامی کا مضمون

بسم اللہ الرحمن الرحیم

اللہ کے رسول محمدؐ کی طرف سے منذر بن ساویٰ کے نام! تم پر سلام ہو، میں تم سے اس خدا کی حمد بیان کرتا ہوں جس کے سوا کوئی معبود نہیں، اور میں گواہی دیتا ہوں کہ اللہ کے سوا کوئی معبود نہیں اور یہ کہ محمد اس کے بندے اور اس کے رسول ہیں، امابعد! میں تمہیں اللہ عزوجل کی یاد دلاتا ہوں، جو نصیحت قبول کرتا ہے وہ اپنے فائدے کیلئے کرتا ہے، اور جس نے میرے قاصدوں کی پیروی کی اور ان کی ہدایت پر عمل کیا، اس نے بلاشبہ میری پیروی کی اور جس نے ان کی خیر خواہی کی اس نے گویا میری خیرخواہی کی۔ میرے قاصدوں نے آکر تمہاری تعریف کی ہے، تم نے اپنی قوم کی جو سفارش کی ہے وہ میں نے قبول کرلی ہے، جو لوگ (تمہارے ملک میں) مسلمان ہوچکے ہیں ان کی املاک ان کے پاس چھوڑ دو جن پر وہ اسلام لانے کے وقت قابض تھے، میں خطاکاروں سے در گزر کرتا ہوں تم بھی ان کی معافی قبول کرلو، اور جب تک تم نیکی کے راستے پر گامزن رہوگے ہم تمہیں تمہارے منصب پر برقرار رکھیں گے، جو لوگ یہودی اور مجوسی رہیں گے ان پر جزیہ عائد کیا جائے گا۔ (زاد المعاد: ۴/۶۶)

اس خط سے ایسا معلوم ہوتا ہے کہ بحرین کے شاہ کے دل میں اسلام پہلے ہی گھر کر چکا تھا، خط کا مضمون یہ بھی بتلا رہا ہے کہ اس سے پہلے بھی اس کو خط لکھا گیا تھا، خط لے جانے والوں کے ساتھ اس نے اچھا سلوک کیا ، جس کی رسول اللہ صلی اللہ علیہ وسلم نے تعریف فرمائی ہے، نیز ایسا لگتا ہے کہ منذر بن ساویٰ نے رسول اللہ صلی اللہ علیہ وسلم کے پہلے مکتوب گرامی کے جواب میں کوئی خط لکھا تھا۔ گزشتہ سطروں میں ہم نے جس مکتوب کا متن اور ترجمہ لکھا ہے وہ اسی خط کے جواب میں لکھا گیا تھا، پہلے خط کا مضمون کیا تھا اس کا کوئی سراغ نہیں ملا۔ حضرت مولانا محمد ادریس کاندھلویؒ لکھتے ہیں کہ روایات سے یہ تو ثابت ہے کہ آپ صلی اللہ علیہ وسلم نے منذر بن ساویٰ کے نام دعوتِ اسلام کا خط تحریر فرمایا، لیکن باوجود تتبع وتلاش کے اس والا نامے کا متن معلوم نہ ہوسکا۔

(سیرۃ المصطفی: ۲/۴۰۶، حاشیہ : ۲)

البتہ دعوتی خطوط کے جواب میں منذر بن ساویٰ نے جو خط لکھ کر رسول اللہ صلی اللہ علیہ وسلم کی خدمت میں بھجوایا اس کا مضمون حسب ذیل تھا

’’حمد وصلوٰۃ کے بعد عرض ہے، یارسول اللہ! میں نے آپؐ کا مکتوب گرامی بحرین کے لوگوں کو پڑھ کر سنایا، ان میں سے کچھ لوگوں نے اسلام کو پسند کیا اور اس میں داخل ہوگئے اور بعض لوگوں نے اسے ناپسند کیا، میرے ملک میں یہودی بھی رہتے ہیں اور مجوسی بھی، ان کے بارے میں آپؐ اپنا حکم صادر فرمائیں۔‘‘(زاد المعاد: ۴/۶۶)

اس خط کے جواب میں رسول اکرم صلی اللہ علیہ وسلم نے وہ خط تحریر فرمایا جس کا متن شروع میں دیا گیا ہے۔ اس میں تین باتیں بہ طور خاص فرمائی گئی ہیں، ایک تو یہ کہ اگر تم ٹھیک رہے یعنی تم نے اسلام کے ساتھ اپنی وابستگی برقرار رکھی تو ہم تمہیں معزول نہیں کریں گے، بلکہ تم بہ دستور اپنے ملک کے حاکم بنے رہوگے، دوسری بات یہ ہے کہ جو لوگ مسلمان ہوچکے ہیں ان کی املاک ان کے پاس رہنے دو یا ان کو ان کے حال پر رہنے دو، اور جو لوگ اسلام قبول نہیں کررہے ہیں یعنی یہودی اور مجوسی ان کو تمہارے ملک میں رہنے کےلئے جزیہ (ٹیکس) ادا کرنا ہوگا۔

رسول اللہ صلی اللہ علیہ وسلم کا یہ مکتوب مبارک استنبول کے توپ کاپی میوزیم میں محفوظ ہے۔ یہ خط عثمانی خلیفہ سلطان عبد المجید خاں اول نے کسی فرانسیسی سیاح سے خریدا تھا۔ سلطان کا دور حکومت ۱۲۵۵؍ ہجری سے ۱۲۷۰؍ ہجری تک رہا، یقیناً یہ اسی دوران کسی وقت خریدا گیا ہوگا۔ فرانسیسی سیاح نے یہ مکتوب مبارک ۱۸۸۵ء عیسوی میں ایک مصری راہب سے خریدا تھا۔ یہ خط ایک باریک سیاہی مائل جھلّی پر لکھا ہواہے۔ جناب سید محبوب رضوی مرحوم لکھتے ہیں کہ منذر اور مقوقس کے نام خطوط کا اندازِ تحریر ایک دوسرے سے بڑی حد تک ملتا ہے، اس لئے بہت ممکن ہے کہ یہ مکتوب بھی حضرت ابوبکر صدیقؓ ہی کے دستِ مبارک سے لکھا ہوا ہو۔ (مکتوبات نبوی ص:۱۶۴، حضرت رسالت مآب کے مکاتیب : محمد ریاض ص:۱۱۹)

حارث بن ابی شَمِر الغَسَّانی کے نام مکتوب

یہ پانچواں خط ہے جو رسول اللہ صلی اللہ علیہ وسلم نے صلح حدیبیہ کے بعد روانہ فرمایا۔ خط لے کر جانے والے صحابی کا اسم گرامی حضرت شُجاع بن وہب الاسدی ہے۔ حارث دمشق کے حاکم کا نام ہے۔ قیصر روم کے ماتحت تھا۔ اتفاق سے ان دنوں رومیوں کو مجوسیوں پر فتح حاصل ہوئی تھی، اس خوشی میں قیصر روم ہر قل قسطنطنیہ سے چل کر حمص آرہا تھا، اسے وہاں سے پیادہ پا ایلیا جانا تھا، حارث الغسانی اسی کے انتظامات میں مصروف تھا۔ شجاع بن وہب دمشق پہنچ چکے تھے، لیکن حارث سے ان کی ملاقات نہیں ہوپارہی تھی۔ انہوں نے حارث کے دربان سے ذکر کیا کہ میں یثرب سے آیا ہوں، رسول اللہ صلی اللہ علیہ وسلم کا ایلچی ہوں اور آپؐ کا خط لے کر آیا ہوں جو مجھے حارث غسانی تک پہنچانا ہے۔ دربان نے کہا: ابھی حارث سے ملاقات ممکن نہیں ہے، وہ قیصر کے آنے کی وجہ سے بے حد مصروف ہے، آپ فلاں دن اس سے ملاقات کرسکتے ہیں، اس دن وہ محل سے برآمد ہوگا۔ شجاعؓ کہتے ہیں کہ دربان جس کا نام مُرِی تھا اور روم کا رہنے والا تھا، مجھ سے گفتگو کرنے لگا، اس نے کچھ سوالات رسول اللہ صلی اللہ علیہ وسلم کے متعلق بھی کئے۔ میں نے اسے اسلام اور پیغمبر اسلامؐ کے متعلق کچھ باتیں بتلائیں۔ میری باتیں سن کر وہ رونے لگا، اس نے کہا کہ میں انجیل پڑھتا ہوں، اپنے پیغمبر کے جو اوصاف تم نے بتلائے ہیں اور جو دعوت وہ لوگوں کو دے رہے ہیں انجیل میں یہ تمام اوصاف لکھے ہوئے موجود ہیں اور ان کی دعوت کا ذکر بھی ہے، مجھے یقین ہے کہ یہ وہی پیغمبر ہیں جن کے بارے میں حضرت عیسیٰ علیہ السلام نے بشارت دی تھی، میں ان پر ایمان لاتا ہوں اور ان کی تصدیق کرتا ہوں، لیکن مجھے ڈر ہے کہ کہیں حارث مجھے قتل نہ کرادے۔ بہر حال اس شخص نے میرا بہت اعزاز واکرام کیا اور میری بڑی خاطر مدارت کی۔

شجاعؓ کہتے ہیں ایک دن حارث اپنے محل سے نکلا، اور سر پر تاج لگا کر عام لوگوں کے لئے بیٹھا، مجھے بھی اس سے ملاقات کرنے کا موقع دیا گیا، میں نے رسول اللہ صلی اللہ علیہ وسلم کا مکتوب گرامی اس کے حوالے کردیا، اور جواب کا انتظار کرنے لگا۔ اس بدبخت نے خط پڑھا اور غصے سے ایک طرف پھینک دیا، اور کہنے لگا کہ یہ شخص کون ہے جو مجھ سے میری بادشاہت چھین لینا چاہتا ہے، اگر وہ یمن میں ہے تو میں اس کے پاس جاؤں گا، اس کے بعد اس نے حکم دیا کہ گھوڑے تیار کئے جائیں۔ یہ حکم دے کر وہ اپنی مسند سے اٹھ کھڑا ہوا اور مجھ سے کہنے لگا کہ تم نے جو کچھ یہاں دیکھا ہے وہ اپنے آقا کو جاکر بتلا دینا۔(جاری)

Urdu Section ( 31 Dec 2022, NewAgeIslam.Com)

I Want to Remind You of Allah Almighty, Who Says That Anyone Who Takes Guidance Does So for His or Her Own Benefit- Part-116 میں تمہیں اللہ عزوجل کی یاد دِلاتا ہوں جو نصیحت قبول کرتا ہے وہ اپنے فائدہ کیلئے کرتا ہے

Loading..

Loading..