Fri Apr 25 2025, 10:45 AM

Urdu Section ( 29 Nov 2022, NewAgeIslam.Com)

His Religion Will Spread As Far As the Ends of the Seas and Rivers -Part-111 انؐ کا دین وہاں تک پھیلے گا جہاں تک سمندروں اور دریاؤں کی انتہا ہے

مولانا ندیم الواجدی

25 نومبر،2022

شاہ مصر مقوقس کے نام خط:

دوسرا خط آپ صلی اللہ علیہ وسلم نے حاطب بن أبی بلتعہ کے ذریعے مصر و اسکندریہ کے قبطی النسل بادشاہ جُرَ یح بن متی کے پاس روانہ فرمایا، اس کا لقب مقوقس تھا، اس مکتوب گرامی کامتن حسب ذیل تھا:

‘‘ بسم اللہ الرحمن الریم۔

اللہ کے بندے اور اس کے رسول محمد صلی اللہ علیہ وسلم کی طرف سے عظیم قبط مقو قس کے نام، اس شخص پر سلامتی ہو جو ہدایت کی پیروی کرے،اما بعد! میں تمہیں اسلام قبول کرنے کی دعوت دیتا ہوں، اسلام لے آؤ ، سلامت رہوگے، اللہ تعالیٰ تمہیں دہرے اجر سے نوازے گا اور اگر تم نے روگر دانی کی تو تم تمام قبطیوں کے گناہ گار رہوگے، اے اہل کتاب! تم ایسی بات کی طرف آؤ جو ہمارے اور تمہارے درمیان مشترک ہے او روہ یہ ہے کہ ہم اللہ کے سوا کسی کی عبادت نہ کریں، او رنہ کسی کو اس کاشریک ٹھہرائیں ، او رنہ ہم میں سے کوئی کسی کو اللہ کو چھوڑ کر اپنا رب بنائے، اور اگر روگردانی کریں تو تم کہہ دو کہ گواہ رہنا ، ہم تو مسلمان ہیں’’۔ (زادالمعاد: 66/4)

حضرت حاطب بن أبی بلتعہؓ یہ خط لے کر پہلے مصر پہنچے ، معلوم ہوا بادشاہ ان دنوں اسکندریہ میں ہے، آپ وہیں چلے گئے۔ جس وقت شاہی محل پہنچے ،بادشاہ اس وقت دریا کے کنارے واقع اپنے محل کے ایک جھروکے میں بیٹھا ہوا تھا۔حضرت حاطب نے اشارے سے خط دکھلا کر بتلادیا کہ میں ایک خط لے کر آیا ہو ں او ربادشاہ کوپیش کرناچاہتاہوں ۔ بادشاہ نے اسی وقت اندر بلالیا ، حضرت حاطب نے نامہ مبارک اسے دیا ،اس نے نامہ مبارک اور حضرت حاطب دونوں کے ساتھ اعزاز واحترام کامعاملہ کیا، خط پڑھا، او راسے ایک ڈبے میں رکھ کر اپنی کنیز کے حوالے کردیا۔

حضرت حاطب کو مقوقس نے ایک مکان میں ٹھہرایا، اور ان کی راحت و آرام کا پورا خیال رکھا۔ ایک روز اس نے انہیں دربار میں بلا بھیجا۔حضرت حاطب وہاں تشریف لے گئے۔ اس وقت دربار میں بہت سے سرکردہ لوگ ،زعماء او رعلماء موجود تھے۔ مقوقس نے حاطبؓ سے کہا کہ میں تم سے ایک سوال کرناچاہتا ہوں ،اس کا جواب سوچ سمجھ کر دینا، حاطبؓ نے کہا: پوچھئے ،مقوقس نے پوچھا: تم جب صاحب کا خط لے کر یہاں آئے ہو کیا واقعی وہ اللہ کے رسول او را س کے نبی ہیں، انہوں نے جواب دیا: کیوں نہیں ! وہ اللہ کے رسول اور اس کے نبی ہیں، مقوقس نے کہا: اگر واقعی اللہ کے رسول ہیں تو انہوں نے اس وقت اپنی قوم کے حق میں بددعا کیوں نہیں کی جس وقت قوم نے ان کو مکّے سے نکالا تھا؟

حضرت حاطبؓ نے مقوقس سے پوچھا : کیا تم حضرت عیسیٰ علیہ السلام کو اللہ کا رسول نہیں مانتے؟اس نے کہا: کیوں نہیں! حضرت عیسیٰ اللہ کے رسول تھے، یہ ہمارا عقیدہ ہے۔حاطبؓ نے پوچھا: پھر حضرت عیسیٰ علیہ السلام نے اپنی قوم کے حق میں اس وقت بددعا کیوں نہیں کی جب وہ ان کو سولی پر لٹکارہی تھی ، وہ تو اللہ نے حضرت عیسیٰ کو زندہ آسمان پر اٹھا لیا ورنہ ان کی قوم ان کو پھانسی پر لٹکا چکی تھی۔

مقوقس نے کہا: بلاشبہ تم صاحب عقل و فہم ہواور عقل مند ودانا شخص کے پاس سے آئے ہو۔اس کے درباریوں کو مخاطب کرتے ہوئے کہا: اس سرزمین پر تم سے پہلے ایک شخص گزرا ہے، جو خود کو رب اعلا سمجھا کرتا تھا، اللہ نے اس کو ہلاک کرڈالا ، آج وہ اگلوں اور پچھلوں کے لئے نشان عبرت بنا ہوا ہے، مقوقس نے کہا: ہمارا ایک دین ہے ، ہم اسے چھوڑ نہیں سکتے ، ہاں اگر اس سے بہتر کوئی ، دین ملتا ہے تو ہم اس نئے دین کو اپنانے پر غور کرسکتے ہیں ۔ حضرت حاطبؓ نے فرمایا: ہم تمہیں اسلام کی دعوت دیتے ہیں جسے اللہ تعالیٰ نے تمام ادیان سے بہتر دین بنایا ہے۔ یہ دین اسلام ہے جس کے بارے میں اللہ تعالیٰ نے وعدہ فرمایا ہے کہ وہ اس کو تمام دینوں پر غالب کرے گا، محمد صلی اللہ علیہ وسلم کو نبوت عطا ہوئی تو انہوں نے لوگوں کو اس دین کی دعوت دی ، قریش کا رویہّ انتہا ئی سخت رہا، یہودیوں نے بھی شدید ترین مخالفت کی، البتہ نصاریٰ نے اپنا رویہّ نرم رکھا۔میں قسم کھا کر یہ بات کہتا ہوں کہ جس طرح حضرت موسیٰ علیہ السلام نے حضرت عیسیٰ علیہ السلام کی آمد کی بشارت دی تھی، اسی طرح حضرت عیسیٰ علیہ السلام نے حضرت محمد صلی اللہ علیہ وسلم کی بشارت دی ہے، دونوں میں کوئی فرق نہیں ہے۔ ہم تمہیں قرآن کی طرف بلاتے ہیں ، تم اہل تورات کو انجیل کی دعوت دیتے ہو، اگر کوئی قوم کسی نبی کا زمانہ پالے تو ا س قوم پر لازم ہوجاتاہے کہ وہ اپنے زمانے کے نبی کی اطاعت کرے۔ تم نے ہمارے نبی محمد صلی اللہ علیہ وسلم کا عہد پالیا ہے، تمہیں ان کی اتباع کرنی ہوگی۔ ہم تمہیں حضرت عیسیٰ علیہ السلام کے دین سے روکتے نہیں ہیں، بلکہ ان کے احکام پر عمل کرنے کا مشورہ دیتے ہیں، یعنی انہوں نے جس رسول کی بشارت دی ہے کہ وہ مبعوث ہوگا اور اس کا نام احمد ہوگا، اس بشارت کو حضرت عیسیٰ علیہ السلام کاحکم سمجھ کر اس پر عمل کرو۔

جواب میں مقوقس نے کہا کہ میں نے تمہارے نبی کے معاملے میں غور وفکر کرکیا ہے ، اور میں اس نتیجے پر پہنچا ہوں کہ وہ اچھے کاموں کا حکم دیتے ہیں او ربرے کاموں سے روکتے ہیں ، وہ کسی ناپسندیدہ بات کا حکم نہیں دیتے اورکسی پسندیدہ بات سے نہیں روکتے ،نہ وہ گمراہ جادوگر ہیں، او رنہ جھوٹے کاہن ہیں، بلکہ ان کے اندر نبوت کی نشانیاں دیکھتا ہوں ،مثال کے طور پر یہ بات کہ وہ غیب کی باتوں کی خبر دیتے ہیں ، میں اس معاملے میں مزید غور کروں گا ، اس کے بعد اس نے رسول اکرم صلی اللہ علیہ وسلم کے والا نامہ کاجواب لکھوایا جو اس طرح تھا:

‘‘ محمد ابن عبداللہ کی خدمت میں عظیم قبط مقوقس کی جانب سے ، آپ پر سلامتی ہو، اما بعد!اس میں ذکر فرمایا ہے اور جس کی آپ دعوت دے رہے ہیں اس کو سمجھا ہے، میں یہ بات جانتا ہوں کہ ایک نبی ا بھی باقی ہیں، میرا خیال یہ تھا کہ وہ شام میں مبعوث ہوں گے، میں نے آپ کے قاصد کا اکرام کیا ہے، میں ان کے ذریعے آپ کی خدمت میں دوباندیاں بھیج رہا ہوں ، قبطیوں میں ان دونوں کو بڑا مرتبہ حاصل ہے، کچھ کپڑے بھی بھیج رہا ہوں او رآپ کی سواری کے لئے ایک خچر بھی روانہ کررہا ہوں، آپ پر سلامتی ہو۔’’( عیون الاثر: 332/2)

حضرت حاطبؓ نے اسکندریہ میں صرف پانچ دن قیام فرمایا ۔ چھٹے دن وہ مقوقس کا مکتوب او راس کے تحائف لے کر واپس ہوگئے، مدینے پہنچ کر انہوں نے سفر کی تمام تفصیلات رسول اللہ صلی اللہ علیہ وسلم تک پہنچائیں ۔ آپ صلی اللہ علیہ وسلم نے اس کا خط ملاحظہ فرمایا، او رارشاد فرمایا کہ اس نے اپنے ملک کی وجہ سے اسلام قبول کیا،حالانکہ اس کی سلطنت باقی رہنے والی نہیں ہے۔( البدایہ والنہایہ: 3010/4)

ان دونوں کنیزوں میں جو مقوقس نے بھیجیں تھیں ایک حضرت ماریہ قبطیہؓ تھیں جن کے بطن مبارک سے حضرت ابراہیمؓ کی ولادت ہوئی، اور وہ سولہ مہینے زندہ رہ کر وفات پاگئے، دوسری ان کی ہمشیرہ سیرین تھیں۔ رسول اللہ صلی اللہ علیہ وسلم نے ان کو حضرت حسان بن ثابت کے سپرد فرما دیا تھا۔ مقوقس کا بھیجا ہوا خچر سفید رنگ کا تھا، او ربے حد خوبصورت تھا، اس کا نام دُل دُل تھا، یہ خچر حضرت معاویہؓ کے عہد خلافت تک موجود رہا۔( تاریخ ابن اثیر الجزری : 322/1، المواہب اللدنیہ: 546/1 ، تاریخ الطبری : 37/2)

مغیرہ بن شعبہ کی مقوقس سے ملاقات :

یہاں حضرت مغیرہ بن شعبہ او رمقوقس کی ملاقات او رگفتگو کا ذکر بھی خالی از فائدہ نہیں ہے، یہ اس وقت کی بات ہے جب حضرت مغیرہ بن شعبہ مسلمان نہیں ہوئے تھے ۔ ایک مرتبہ وہ بنومالک کے چند افراد کے ساتھ مقوقس سے ملنے گئے،مقوقس کو حجاز میں ایک نئے نبی کے ظہور کی خبر مل چکی تھی، مغیرہ کے بارے میں جب اسے یہ پتا چلا کہ یہ وہیں سے آئے ہیں جہاں کسی نے نبوت کادعویٰ کیاہے تو اس نے مغیرہ سے کچھ سوالات کئے۔

مقوقس: تم لوگ طائف سے نکل کر یہاں تک کیسے پہنچ گئے،تمہارے او رہمارے درمیان محمد(صلی اللہ علیہ وسلم) او ران کے ساتھی رہتے ہیں( اس کا اشارہ مدینے کی طرف تھا جو طائف سے مصر کے راستے میں واقع ہے)۔

مغیرہ: ہم سمندر کے کنارے کنارے چل کریہاں پہنچے ہیں ، ہمیں محمد ( صلی اللہ علیہ وسلم ) کا ڈر تھا۔

مقوقس: جب محمد ( صلی اللہ علیہ وسلم) تمہارے پاس (طائف میں) اسلام کی دعوت لے کر آئے تھے، تم نے اس وقت کیا موقف اختیار کیاتھا۔

مغیرہ: اہل طائف میں سے کسی نے بھی ان کی دعوت قبول نہیں کی۔

مقوقس: کیوں؟

مغیرہ: اس لئے کہ وہ ہمارے پاس ایسا دین لے کر آئے تھے جس کو نہ ہمارے آباؤ اجداد جانتے ہیں اورنہ ہم جانتے ہیں اورشاید بادشاہ سلامت آپ بھی اس سے واقف نہ ہوں۔

مقوقس: ان کی قوم نے ان کے ساتھ کیا رویہّ اختیار کیا؟

مغیرہ: ان کی قوم کے نوجوانوں نے ان کی دعوت قبول کی ، بوڑھوں نے اعراض کیا، مخالفین کے ساتھ ان کی جنگوں کا سلسلہ چلتا رہتا ہے، کبھی انہیں شکست ہوتی ہے کبھی وہ فتح حاصل کرلیتے ہیں۔

مقوقس: محمد( صلی اللہ علیہ وسلم) کس بات کی دعوت دیتے ہیں، ہوسکے تو کچھ اس کے بارے میں بتاؤ؟

مغیرہ: وہ کہتے ہیں اللہ ایک ہے، اسی کی عبادت کرناچاہئے، اس کے ساتھ کسی کو شریک ٹھہرانا غلط ہے، وہ ہمارے بتوں کو برا کہتے ہیں ، اور ان کی پرستش کرنے سے منع کرتے ہیں حالانکہ ہمارے آباء واجداد صدیوں سے ان کو پوجتے آرہے ہیں، وہ نماز او رزکوٰۃ کاحکم دیتے ہیں ۔

مقوقس: کیا نماز اور زکوٰۃ کیلئے کوئی وقت کوئی عدد یا کوئی مقدار متعین ہے ، نماز کس وقت او رکتنی پڑھی جاتی ہے ، زکوٰۃ کب، کتنے مال پر اور کس قدر ادا کی جاتی ہے؟

مغیرہ: مسلمان دن بھر میں پانچ نمازیں پڑھتے ہیں ، ہر نماز کا وقت متعین ہے، جو مال بیس مثقال تک پہنچ جائے اس میں سے نصف مثقال نکالنے کیلئے کہتے ہیں ، ہر پانچ اونٹ پر ایک بکری زکوٰۃ کی ہے۔( مغیرہ نے تمام اموال میں زکوٰۃ کی مقدار بتلائی ۔)

مقوقس: وہ زکوٰۃ لے کر کیا کرتے ہیں، اس کو کہاں استعمال کرتے ہیں، کس کو دیتے ہیں ؟

مغیرہ: وہ اپنے غریبوں میں زکوٰۃ کامال تقسیم کر دیتے ہیں، محمد( صلی اللہ علیہ وسلم ) صلۂ رحمی پر بہت زیادہ زور دیتے ہیں ، ایفاء عہد کی تلقین کرتے ہیں، زنا، سود اور شراب کو حرام قرار دیتے ہیں، جو جانور اللہ کے نام پر ذبح نہ کیا جائے اس کا گوشت نہیں کھاتے۔

مقوقس: وہ یقینا اللہ کے نبی اور اس کے رسول ہیں، انہیں تمام انسانوں کی ہدایت کے لئے مبعوث کیا گیا ہے، اگر وہ یہاں قبط اورروم میں ہوتے تو ہم سب ان کی اتباع کرتے، حضرت عیسیٰ علیہ السلام کی تعلیمات بھی یہی ہیں، آپ سے پہلے بھی جتنے انبیاء مبعوث ہوئے وہ سب اسی طرح کی تعلیمات لے کر مبعوث ہوئے ہیں، انجام کا ر وہ غالب آجائیں گے ، ان کا دین وہاں تک پھیلے گاجہاں تک پیدل او رسوار جاسکتے ہیں، اورجہاں تک سمندر وں اور دریاؤں کی انتہا ہے۔(جاری)

25 نومبر،2022،بشکریہ: انقلاب، نئی دہلی

------------

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا