Sat Apr 19 2025, 11:13 AM

Urdu Section ( 28 Sept 2022, NewAgeIslam.Com)

In A Dream, the Prophet (Pbuh) Was Doing the Umrah to Makkah While Wearing Ihram Part-102 آپ صلی اللہ علیہ وسلم نے خواب دیکھا کہ عمرہ کے لئے احرام کی حالت میں مکہ تشریف لے گئے ہیں

مولانا ندیم الواجدی

23 ستمبر،2022

صلح حدیبیہ اور فتح مبین کا مُ ژدہ

صلح حدیبیہ کا واقعہ تاریخ اسلام کا عظیم الشان واقعہ ہے۔بعد کے سماجی اور سیاسی حالات پر اس واقعے نے بڑے خوشگوار او ربہترین اثرات مرتب کئے اور مسلمانوں کے لئے مکہ مکرمہ میں باعزت واپسی کی راہیں ہموار کیں۔ معاہدے کے بعد یہ ظاہر ایسا لگ رہا تھا کہ مسلمانوں نے زبردست عسکری قوت و طاقت رکھنے کے باوجود دب کر صلح کرلی ہے، تقریباً سب ہی صحابہؓ اس فیصلے سے شکستہ دل اور آزردہ خاطر نظر آئے لیکن اللہ نے اس وقت کی پسپائی میں مستقبل کے روشن امکانات رکھ دئیے تھے، گویا یہ صلح فتح مبین کی خوش خبری تھی جو پوری ہوکر رہی اور جن لوگوں کو مکہ مکرمہ میں داخل ہوکر عمرہ کرنے سے روکا گیا تھا وہ دو سال کی قلیل مدت کے بعد فاتحانہ شان کے ساتھ مکہ مکرمہ میں داخل ہوگئے۔

حدیبیہ کا محل وقوع:

مکہ مکرمہ سے چھبیس کلو میٹر پہلے حدیبیہ واقع ہے، اب اس علاقے کو شمَیسی کہتے ہیں۔ جدہ سے مکہ جانے والے مسافر اس جگہ سے ہوکر گزرتے ہیں، اس کا وہ حصہ جو مکہ مکرمہ کی طرف ہے حدود حرم سے باہر ہے۔ یہاں ایک پرانا کنواں تھا، جس کو حدیبیہ کہا جاتاتھا، بعد میں پورے علاقے کو حدیبیہ کہا جانے لگا۔ فی الحال یہاں حدیبیہ کے باغات او رایک عظیم الشان مسجد ہے، جو ترکوں نے بیعت رضوان کی یادگار کے طور پر تعمیر کی تھی۔ سعودی حکومت نے اس کو وسعت دے کر ایک عظیم الشان مسجد میں تبدیل کردیا ہے، مسجد کا نام مسجد الرضوان ہے، کیونکہ یہاں رسول اللہ صلی اللہ علیہ وسلم نے مشرکین مکہ سے مصالحت کی تھی اس لئے اس وقعے کو صلح حدیبیہ کہا جاتاہے۔ ابتداء یہ سفر عمرہ کے لئے ہوا تھا اس لئے اس کو عمرۃ الحدیبیہ بھی کہہ دیتے ہیں اور آگے جاکر جنگ کے حالات پیدا ہوئے اس لئے اس کو عزوہ حدیبیہ بھی کہنے لگے۔

صلح حدیبیہ کی تاریخ:

یہ واقعہ یکم ذی القعدہ بروز پیرسن چھ ہجری میں رونما ہوا۔ صحیح قول یہی ہے۔بعض راویوں نے شوال اور رمضان کہا ہے۔ علامہ ابن قیمؒ کے مطابق یہ قول صحیح نہیں ہے۔ حضرت عائشہ، حضرت انسؓ، حضرت براءؓ بن عازبؓ رضوان اللہ علیہم اجمعین او رمحدثین میں سے امام زہری، فتاوہ، موسی بن عقبہ او رمحمد ابن اسحاق رحمہم اللہ نے اپنی کتابوں میں ذی القعدہ کے مہینے کی صراحت کی ہے۔(زاد المعاد:208,207/3) صحیحین میں حضرت انس بن مالکؓ کی روایت ہے کہ رسول اللہ صلی اللہ علیہ وسلم نے چار عمرے کئے اور سب کے سب ذی القعدہ میں کئے، پہلے عمرے کے لئے حدیبیہ میں تشریف لئے یہیں قربانی کی اور یہیں حلق کرایا، دوسرا عمرہ مدینے سے کیا، اور تیسرا عمرہ جعرانہ سے کیا جہاں ٹھہر کر آپ نے غزوہ حُنین میں حاصل ہونے والے اموال غنیمت بھی تقسیم فرمائے، چوتھا عمرہ حجۃ الوداع کے موقع پر کیا، یہ تمام عمرے ذی العقدہ کے مہینے میں فرمائے۔ (صحیح مسلم: 916/2، رقم الحدیث: 1253)

رسول اللہ صلی اللہ علیہ وسلم کا خواب:

صلح حدیبیہ کا قصہ مختصراً یہ ہے کہ جو لوگ مکہ مکرمہ سے ہجرت کرکے اپنی زمین، جائیداد، مال و دولت اور عزیز اقارب، گویا سب کچھ چھوڑ کر رسول اکرم صلی اللہ علیہ وسلم کے ساتھ مدینہ منورہ جاکر بس گئے تھے ان کے دل میں رہ رہ کر یہ خواہش دبی ہوئی چنگاری کی طرح سلگتی رہتی تھی کہ کاش وہ لوگ مکے جائیں، اپنی آنکھوں سے اپنا وطن دیکھیں جسے چھوڑ ے ہوئے چھ طویل سال گزر گئے تھے، اپنے رشتے داروں سے ملیں، اپنے مکانات دیکھیں کہ وہ کس حال میں ہیں، اور سب سے بڑھ کر یہ کہ اللہ کے گھر کا طواف کریں۔

ایک رات رسول اللہ صلی اللہ علیہ وسلم نے خوا ب میں دیکھا کہ وہ اپنے اصحابؓ کے ساتھ عمرہ کرنے کے مقصد سے احرام کی حالت میں مکہ مکرمہ میں تشریف لے گئے ہیں، آپ صلی اللہ علیہ وسلم کے ساتھ قربانی کے جانور بھی ہیں، صبح کو آپ صلی اللہ علیہ وسلم نے اپنا خواب صحابہؓ کو سنایا، سب کے چہرے فرطِ مسرت سے کھل اٹھے، ان کے دلوں میں مکہ جاکر خانہ کعبہ کی زیارت اور طواف کرنے کی امید پیدا ہوگئی۔ رسول اللہ صلی اللہ علیہ وسلم نے مدینہ منورہ کے ساتھ ساتھ دیہی علاقوں میں بھی یہ اعلان کرادیاکہ ہمارا ارادہ عمرہ کے لئے جانے کا ہے، جو شخص ہمارے ساتھ جانا چاہے وہ چل سکتا ہے۔ آپ صلی اللہ علیہ وسلم کی خواہش یہ تھی کہ زیادہ سے زیادہ لوگ اس سفر میں ساتھ رہیں، کیونکہ قریش سے یہ توقع نہیں کی جاسکتی تھی کہ وہ رسول اللہ صلی اللہ علیہ وسلم اور ان کے اصحاب کو آسانی سے مکہ مکرمہ میں داخل ہونے دیں گے۔ ان کی طرف سے رکاوٹ ڈالنے کے پورے امکانات تھے، ایسی صورت میں مزاحمت بھی ضروری ہوگی، جس کے لئے افرادی قوت زیادہ سے زیادہ ہونی چاہئے، لیکن آپ صلی اللہ علیہ وسلم یہ بھی نہیں چاہتے تھے کہ کسی پر عمرہ کے لئے زبردستی کی جائے۔

عازمین سفر کی تعداد:

اس کے باوجود صحابہؓ کی ایک بڑی تعداد ساتھ ہوگئی۔ اس سلسلے میں روایات مختلف ہیں۔ تیرہ سو، چودہ سو اور پندرہ سو تک کی تعداد بیان کی گئی ہے۔ لیکن مشہور قول یہ ہے کہ چودہ سو صحابہ اس سفر میں آپ صلی اللہ علیہ وسلم کے ساتھ روانہ ہوئے۔ اکثر محدثین نے حضرت جابرؓ کے قول (چودہ سو) پر ہی زیادہ اعتماد کیا ہے، براء بن عازب، معقل بن یسار، سلمہ ابن لاکوع، اور مسیب بن الحزن وغیرہ حضرات صحابہؓ نے بھی چودہ سو ہی کی تعداد بتلائی ہے، حضرت سعید بن المسیبؓ سے بھی ایک قول اسی طرح کامروی ہے،(صحیح البخاری: 122/5، رقم الحدیث:41/50، زادالمعاد:209/3)

سفر کے لئے روانگی:

چونکہ یہ سفر محض عمرے کی نیت سے تھا، اس لئے اس کی وضاحت کردی گئی تھی کہ ہم صرف بیت اللہ شریف کی زیارت اور طواف کے مقصد سے جارہے ہیں، تیاری بھی اسی مقصد کو سامنے رکھ کر کی گئی، مسلمانوں نے صرف تلوار یں ساتھ لیں اور وہ بھی نیام میں لپٹی ہوئی۔ذی القعدہ کے مہینے کا انتخاب بھی آپ نے اسی لئے کیا کہ یہ اشہر حرم (حرمت والے چار مہینوں) میں سے ایک ہے۔ آپ صلی اللہ علیہ وسلم نہیں چاہتے تھے کہ اس سفر سے قریش میں خوف وہراس پھیلے او رانہیں یہ کہنے کا موقع ملے کے محمد اپنے ساتھیوں کے ساتھ جنگ کے ارادے سے آرہے ہیں۔ اس طرح کے بہانے بنا کر وہ معتمر ین کو مکہ مکرمہ میں داخل ہونے سے روک بھی سکتے ہیں۔(المغازی للواقدی: 228/1)

ذوالُحُلَیفَہ پر پہنچ کر آپ صلی اللہ علیہ وسلم نے احرام زیب تن فرمایا، تمام صحابہ نے بھی آپ کی اتباع میں احرام پہن لیا، ذوالحلیفہ مدینے سے بہ جانب مکہ تقریباً آٹھ کلومیٹر کے فاصلے پر ہے۔ اس علاقے کو آبار علی بھی کہا جاتا ہے، یہاں سے اہل مدینہ یا مدینے کی جانب سے آنے والے حجاج و معتمرین احرام باندھتے ہیں اور تلبیہ پڑھتے ہیں۔ عمرہ اور حج کی نیت سے جانے والوں کے لئے یہاں سے بغیر احرام باندھے او ر بلا نیت کئے گزرنا جائز نہیں ہے۔ حضرت عبداللہ ابن عباسؓ کی روایت کے مطابق رسول اللہ صلی اللہ علیہ وسلم نے ذوالحلیفہ کو اہل مدینہ کے لئے حجفہ کو اہل شام کے لئے قرن المنازل کو اہل نجد کے لئے اور بلملم کو اہل یمن کے لئے میقات قرار دیا ہے۔ ذوالحلیفہ کے مقام پر سب سے پہلے حضرت عمر و بن عبدالعزیز نے ایک مسجد تعمیر کرادی تھی، بعد کے خلفا ء و امراء اس کی تجدید وتوسیع کرتے رہے، سعو دی حکومت نے اب اس مسجد کو نہایت کشادہ کردیا ہے او رتمام تر سہولتوں سے آراستہ بھی۔ مردانہ اور زنانہ حصے الگ الگ ہیں، یہاں مرد وخواتین آرام کے ساتھ وضو یا غسل کرتے ہیں اور احرام پہنتے ہیں، ذوالحلیفہ سے ہی آپ نے ہَدی یعنی قربانی کے جانوروں کی اشعار و تقلید (مفہوم آگے آئیگا) کی۔

اشعار یہ ہے کہ اونٹ کے کوہان کو دونوں جانب سے تھوڑا تھوڑا شق کردیا جائے اور تقلید یہ ہے کہ جانور کے گلے میں قلادہ وغیرہ ڈال دیا جائے، ان دونوں علامتوں کا مقصد یہ ظاہر کرنا ہوتا ہے کہ یہ جانور قربانی کے لئے مخصوص ہیں۔ قافلے میں کل ستر اونٹ قربانی کی غرض سے لے جائے جارہے تھے، ان میں ابوجہل کا وہ اونٹ بھی شامل تھا جس کی ناک میں چاندی کے نکیل پڑی ہوئی تھی، یہ اونٹ بدر کی جنگ میں مسلمانوں کے ہاتھ لگا تھا او راس وقت رسول اللہ صلی اللہ علیہ وسلم کی ملکیت میں تھا۔ (زادالمعاد:209/3)

جاسوس کی روانگی:

ذوالحلیفہ سے آپ صلی اللہ علیہ وسلم نے بشر بن سفیان الکعبی ؓ کو مکہ مکرمہ کی طرف روانہ کیا تاکہ وہ وہاں جاکر یہ دیکھیں کہ ہمارے اس سفر کا قریش پر کیا ردّ عمل ہوا ہے۔ وہ تیزی کے ساتھ قافلے سے آگے بڑھ گئے اور ضروری معلومات حاصل کرکے واپس آئے۔ انہوں نے عَسفَان میں حاضر ہوکر آپ صلی اللہ علیہ وسلم سے ملاقات کی، اور عرض کیا: یا رسول اللہ صلی اللہ علیہ وسلم! قریش کو آپ صلی اللہ علیہ وسلم کے تشریف لانے کی اطلاع مل چکی ہے، وہ چیتوں کی کھال پہن کر اور جوان اونٹوں پر سوار ہوکر مکے سے نکل کھڑے ہوئے ہیں، اس وقت وہ وادی طُوٰی میں خیمہ زن ہیں۔ انہوں نے یہ عہد کیاہے کہ وہ آپ صلی اللہ علیہ وسلم کو کسی بھی قیمت پر خانہ کعبہ میں داخل نہیں ہونے دیں گے، خالد بن ولید دو سو گھڑ سواروں کے ساتھ ان کے مقدمۃ الجیش کے طور پر کراع الغمیم پہنچ چکے ہیں۔

رسول اللہ صلی اللہ علیہ وسلم نے فرمایا قریش کا برا ہو، انہیں تو جنگ نے برباد کردیا ہے، کیا ہوجاتا اگر وہ میرے اور تمام عرب کے درمیان نہ پڑتے، اگر وہ صحیح ہوتے تو ان کا مقصود حاصل ہوجاتا، او راگر اللہ مجھے غلبہ دیتا تو وہ بھی اسلام میں داخل ہوجاتے، قریش کے لوگ کیا سمجھتے ہیں؟ اس ذات کی قسم جس نے مجھے حق کے ساتھ مبعوث کیا ہے میں اپنی جدوجہد جاری رکھوں گا، یہاں تک کہ اللہ تعالیٰ اس دین کو غالب کردے۔ آپ صلی اللہ علیہ وسلم نے صحابہ کرامؓ سے مشہور کیا، حضرت ابوبکر صدیقؓ نے عرض کیا، یا رسول اللہ صلی اللہ علیہ وسلم! ہم کسی سے مقابلے کیلئے نہیں نکلے ہیں۔ لیکن اگر کوئی شخص ہمارے او ربیت اللہ کے درمیان مزاحم ہوگا تو ہم اس سے جنگ کریں گے۔ (سیرت ابن ہشام: 230/3) (جاری)

23 ستمبر،2022، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے