Wed Mar 26 2025, 12:24 AM

Urdu Section ( 31 March 2023, NewAgeIslam.Com)

The Prophet PBUH and His Companions Moved Quickly In the First Three Rounds to Show the Disbelievers That the Muslims Had Not Weakened – Part-129 پہلے تین چکروں میں آپؐ اور صحابہؓ تیز چلے تاکہ کفار دیکھ لیں کہ مسلمان کمزور نہیں ہوئے ہیں

مولانا ندیم الواجدی

31 مارچ 2023

حضرت انس بن مالک روایت کرتے ہیں کہ جب رسول اللہ صلی اللہ علیہ وسلم عمرۃالقضا کے لئے تشریف لے گئے تو حضرت عبداللہ بن رواحہؓ اپنی گردن میں تلوار لٹکائے ہوئے اور رسول اللہ صلی اللہ علیہ وسلم کی اونٹنی کی مہار پکڑے ہوئے آگے آگے چل رہے تھے اور ان کی زبان پر یہ اشعار تھے:

خَلُّوْا بَنِی الْکُفَّارِ عَنْ سَبِیْلِہٖ

اَلْیَوْمَ نَضْرِبُکُمْ عَلٰی تَنْزِیْلِہٖ

ضَرْبًا یُزِیْلُ الھَام عَنْ مَقِیْلِہٖ

وَ یُذْھِلُ الْخَلِیْلَ عَنْ خَلِیْلِہٖ

اے کافرزادو، ہٹو، آپ کا راستہ چھوڑ دو، آج رسول اللہ صلی اللہ علیہ وسلم کی تشریف آوری (سے روکنے پر) ہم تمہیں ایسی مار ماریں گے کہ تمہاری کھوپڑیاں تن سے جدا کردیںگے اور تمہیں ایسا کردیں گے کہ دوست دوست کو بھول جائے گا۔

حضرت عمر بن الخطابؓ نے حضرت ابن رواحہؓ کو یہ اشعار پڑھتے ہوئے سنا تو ان سے فرمایا کہ اے ابن رواحہؓ! کیا تم رسول اللہ صلی اللہ علیہ وسلم کی موجودگی میں اور حرم شریف کے اندر شعر پڑھ رہے ہو؟ رسول اللہ صلی اللہ علیہ وسلم نے ارشاد فرمایا: اے عمرؓ! اسے کچھ نہ کہو، آج کے دن یہ شعر کافروں پر اثر کرنے میںتیر سے زیادہ سخت ہیں۔ (الشمائل المحمدیہ للترمذی، ص:۱۷۵)

احرام کے کپڑے کو اس طرح پہننا کہ اس کو داہنی بغل کے نیچے سے لے کر اس کے دونوں کنارے بائیں کندھے پر ڈال لے اس کو اضطباع کہتے ہیں

---------

عمرہ کی ادائیگی

مکہ مکرمہ میں داخل ہونے کے بعد آپؐ سیدھے حرم شریف میں تشریف لے گئے، سب سے پہلے آپؐ نے استلام کیا یعنی حجر اسود کو بوسہ دیا اور طواف کا آغاز فرمایا۔ پہلے تین چکروں میں آپؐ تیز رفتاری کے ساتھ فخریہ انداز میں چلے، تاکہ کفار دیکھ لیں کہ مسلمان کمزور نہیں ہوئے ہیں۔ کفار کے بڑے بڑے سردار مسلمانوں کے طواف کا منظر دارالندوہ سے دیکھ رہے تھے۔ کفار کو رسول اکرم صلی اللہ علیہ وسلم کے طواف کا یہ منظر اس وقت تک نظر آیا جب تک آپؐ بیت اللہ شریف کی دوسری طرف نہیں پہنچ گئے۔آپؐ نے رکن یمانی کو بوسہ دیا، پھر حجر اسود پر تشریف لائے اور اسے بوسہ دیا۔ اس طرح طواف کا ایک چکر پورا فرمایا، آپؐ نے تین چکر اسی طرح کئے، باقی چار چکر معمول کی رفتار سے پورے فرمائے۔ حضرت عبداللہ ابن عباسؓ فرماتے ہیں کہ ہر ولہ یعنی لپک کر تیز رفتاری کے ساتھ چلنا لوگوں کے خیال کے مطابق واجب نہ تھا، کیوں کہ ایسا آپؐ نے قریش کے طعنوں کا جواب دینے کے لئے کیاتھا، مگر حجۃ الوداع میں بھی آپؐ نے یہی عمل فرمایا۔ اس طرح یہ عمل طواف کرنے والوں کے لئے سنت بن گیا۔ (سیرت ابن ہشام، ۴؍۲۸۶)

طواف کے بعد آپؐ صفا پہاڑی پر تشریف لے گئے، وہاں سے مروہ تک گئے۔ آپؐ نے دونوں پہاڑیوں کے درمیان سات چکر کئے، مروہ کے قریب قربانی کے جانور رکھے گئے تھے، سعی سے فارغ ہوکر آپؐ نے اور صحابہؓ نے اسی جگہ قربانی کی اور سر کے بال منڈوائے۔ اس طرح عمرہ کا عمل پایۂ تکمیل کو پہنچا، بعد ازاں کچھ لوگوں کو حکم دیا کہ وہ بطن یاجج چلے جائیں اور جو لوگ وہاں اسلحہ کی حفاظت کر رہے ہیں ان کو مکہ بھیج دیں تاکہ وہ بھی عمرہ کرلیں۔ یہ فرما کر آپؐ خانۂ کعبہ کے اندر تشریف لے گئے اور ظہر تک وہیں رہے۔ ظہر کا وقت آیا تو رسول اللہ صلی اللہ علیہ وسلم کے حکم سے حضرت بلالؓ نے خانہ کعبہ کی چھت پر کھڑے ہو کر اذان دی۔

مسلمانوں کی آمد، ان کا بلند آواز سے تلبیہ پڑھنا، ان کا طواف کرنا اور طواف میں اضطباع اور رمل کے اعمال، کفار کے لئے ناقابل برداشت تھے، اگر ان کا بس چلتا تو وہ مسلمانوں کو مکہ میں داخل ہی نہ ہونے دیتے اور داخل ہوجاتے تو ان کا یہ حال دیکھ کر انہیں واپس کر دیتے۔ مگر کیا کیجئے، حدیبیہ کے موقع پر یہ طے ہوچکا تھا کہ مسلمان ایک سال بعد آکر عمرہ کریں گے، چنانچہ مسلمان شرط کے مطابق آئے تھے اور بظاہر انہوں نے ابھی تک کسی بھی شرط کی خلاف ورزی نہیں کی تھی اس لئے واپس کرنے کیلئے ان کے پاس کوئی جائز وجہ نہیں تھی۔ جب یہ مناظر ان سے برداشت نہ ہوسکے تو وہ دارالندوہ سے نکل کر پہاڑوں میں چلے گئے۔(الطبقات الکبریٰ ۵؍۱۸۲)

حضرت میمونہؓ سے نکاح

عمرہ کرنے کے بعد رسول اللہ صلی اللہ علیہ وسلم نے تین دن تک مکہ مکرمہ میں قیام فرمایا۔ مکہ میں داخل ہونے سے پہلے مقام سرف میں آپؐ نے حضرت میمونہ بنت الحارث سے نکاح کیا تھا۔ حضرت میمونہؓ آپ کے چچا حضرت عباسؓ بن مطلب کی اہلیہ حضرت ام الفضلؓ کی ہمشیرہ تھیں۔ اور حضرت عبداللہ ابن عباسؓ اور حضرت خالد بن ولیدؓ کی خالہ تھیں۔ پہلے ان کی شادی ابورہم بن عبدالعزیٰ سے انجام پائی تھی، کچھ عرصے بعد شوہر وفات پاگئے۔ حضرت میمونہؓ نے اپنی دوسری شادی کا اختیار اپنی بہن ام الفضل کو دے دیا۔ انہوں نے اپنے شوہر حضرت عباس کو دے دیا، حضرت عباسؓ نے اپنے بھتیجے حضرت محمد صلی اللہ علیہ وسلم سے ان کا نکاح کردیا، چار سو درہم مہر قرار پایا۔ اس نکاح سے رسول اللہ صلی اللہ علیہ وسلم کا مقصد اپنے اور قریش کے درمیان مفاہمت کا راستہ ہموار کرنا تھا۔

تین دن گزرنے کے بعد قریش نے سہیل بن عمرو اور حویطب بن عبدالعزی کو اس پیغام کے ساتھ رسول اللہ صلی اللہ علیہ وسلم کی خدمت میں بھیجا کہ تین دن پورے ہوچکے ہیں، معاہدے میں یہ بات طے ہوگئی تھی کہ آپؐ صرف تین دن یہاں رہیں گے، اس لئے اب آپؐ یہاں سے چلے جائیں۔ رسول اللہ صلی اللہ علیہ وسلم نے ارشاد فرمایا کہ اگر تم اجازت دو تو میں کچھ اور وقت یہاں ٹھہر جائوں۔ میں نے میمونہؓ سے نکاح کیا ہے، میں تم لوگوں کے درمیان ان کی رخصتی کرانا چاہتا ہوں اور یہ بھی چاہتا ہوں کہ ہم تمہارے لئے دعوت ولیمہ کا اہتمام کریں۔ ان دونوں نے ترش روئی سے جواب دیا کہ ہمیںآپ کے کھانے کی ضرورت نہیں ہے، بس اب آپؐ یہاں سے تشریف لے جائیں۔

اس گفتگو کے بعد آپ صلی اللہ علیہ وسلم نے حضرات صحابہؓ کو کوچ کرنے کا حکم دیا۔ آپؐ نے اپنے خدمت گار حضرت ابورافعؓ کو مکہ مکرمہ میں چھوڑا تاکہ وہ حضرت میمونہؓ کو لے کر مقام سرف میں آجائیں۔ سرف مکہ مکرمہ سے مدینہ منورہ جاتے ہوئے تنعیم سے پہلے ایک جگہ ہے، مکہ سے اس کا فاصلہ دس کلو میٹر ہے۔ یہ بھی اتفاق ہے کہ حضرت میمونہؓ کا وصال بھی سرف میں ہوا۔ آج بھی آپؓ کی قبر مبارک سڑک کے کنارے ایک چھوٹی سی عمارت میں موجود ہے، زائرین باہر ہی سے اس مقام کی زیارت کرتے ہیں اور برکت حاصل کرتے ہیں۔ (السیرۃ النبویہ ابن ہشام، ۴؍۴۸۷، سیر اعلام النبلاء، ۲؍۲۳۹، ۲۴۵)

ایک بچی کا واقعہ

عمرہ ادا کرنے کے بعد جب آپ صلی اللہ علیہ وسلم اور آ پ کے اصحابؓ مکہ مکرمہ سے رخصت ہونے لگے تو حضرت حمزہؓ کی ایک کم سن بیٹی چچا چچا پکارتی ہوئی آپ ؐ کی طرف آئی ۔ حضرت علیؓ نے آگے بڑھ کر اس کو گود میں اٹھا لیا اور کہنے لگے کہ یہ میرے چچا کی بیٹی ہے، میرا حق اس پر زیادہ ہے اور حضرت فاطمہؓ سے کہا کہ لو اپنے چچا کی بیٹی کو سنبھالو۔ حضرت فاطمہؓ نے اسے اپنے کجاوے میں بٹھا لیا۔

حضرت جعفرؓنے کہا کہ اس بچی پر میرا حق زیادہ ہے، یہ بچی میرے چچا کی بیٹی ہے اور میری بیوی اس کی خالہ ہیں۔ حضرت زید بن حارثہؓ کہنے لگے کہ یہ میری بھتیجی ہے، میرا حق اس پر زیادہ ہے۔ ان تینوں حضرات کے اس جھگڑے کا فیصلہ آپ ﷺنے اس طرح فرمایا کہ بچی کو حضرت جعفرؓ کے حوالے کردیا اور فرمایا کہ جعفر کے گھر میں بچی کی خالہ ہے اور خالہ بہ منزلہ ماں کے ہوتی ہے، حضرت علیؓ کی دل جوئی کے لئے فرمایا کہ تم مجھ سے ہو اور میں تم سے ہوں، حضرت جعفر سے فرمایا کہ تم سیرت اور صورت میں مجھ سے مشابہت رکھتے ہو اور زید سے فرمایا کہ تم میرے بھائی اور میرے مولیٰ (آزاد کردہ) ہواورحمزہ کی بیٹی میری رضاعی بھتیجی ہے، میں اس کا چچا ہوں۔ (صحیح البخاری، رقم الحدیث ۴۰۰۵) (جاری)

31مارچ،2023،بشکریہ: انقلاب، نئی دہلی

-------------------

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا