Thu Apr 24 2025, 03:00 AM

Urdu Section ( 9 Dec 2022, NewAgeIslam.Com)

O People of the Book! Come To a Common Word between Us and You Part-113 اے اہل کتاب! ایسی بات کی طرف آؤ جو ہم میں اور تم میں مشترک ہے

مولانا ندیم الواجدی

9 دسمبر 2022

(گزشتہ سے پیوستہ)

قیصر روم کے نام خط

رومی سلطنت کے بادشاہوں کا لقب قیصر تھا۔ رسول اکرم صلی اللہ علیہ وسلم نے صلح حدیبیہ سے واپس تشریف لا کر قیصر روم کو بھی خط تحریر فرمایا، اور دِحْیہْ بن خُلَیْفہ کلبیؓ کو اپنے نامۂ مبارک کے ساتھ روانہ کیا اور انہیں یہ ہدایت فرمائی کہ پہلے وہ یہ خط لے کر بُصریٰ کے حاکم کے پاس جائیں، اور اس سے کہیں کہ وہ اسے قیصرِ روم تک بھجوادے۔ اس عظیم الشان فتح کی خوشی میں بہ طور شکر گزاری ہرقل اپنے پایۂ تخت قسطنطنیہ سے بیت المقدس کے لئے روانہ ہوا، پہلے وہ حمص پہنچا۔یہ شہر ان دنوں ایشیاء میں رومی سلطنت کا پایۂ تخت تھا، اس کا محل وقوع دمشق اور حلب کے درمیان ہے، ہرقل نے کچھ دن حِمْص میں قیام کیا اور وہاں سے پا پیادہ ایلیا (بیت المقدس) روانہ ہوا۔ حمص سے اس کے ساتھ محافظین اور مصاحبین کے علاوہ بڑی تعداد میں اعیانِ سلطنت بھی تھے۔ جس وقت حضرت دحیہ کلبیؓ آپ کا مکتوب مبارک لے کر بصری پہنچے، انہیں ہرقل کے بارے میں بتلایا گیا کہ وہ حمص سے بیت المقدس جارہا ہے، حضرت دحیہ کلبیؓ حاکم بصری کے توسط سے محرم سات ہجری میں بیت المقدس ہی پہنچ گئے۔

بیت المقدس میں قیام کے دوران ہرقل نے خواب دیکھا کہ کوئی کہنے والا کہہ رہا ہے کہ عن قریب ختنہ کرانے والی قوم کا سردار غالب آجائے گا۔ ہرقل نے بیدار ہوتے ہی اپنے مصاحبین سے دریافت کیا کہ کیا روئے زمین پر کہیں کوئی انقلاب آیا ہے یا کہیں کوئی غیرمعمولی شخصیت پیدا ہوئی ہے؟ مصاحبوں نے چند روز میں ہی یہ پتہ لگا لیا کہ عربوں میں ایک نبی تشریف لائے ہیں، اتنے میں حضرت دحیہ بھی خط لے کر بیت المقدس پہنچ گئے۔ انہوں نے د ربار میں حاضر ہوکر نامۂ مبارک قیصر کے سپرد کیا، قیصر نے مکتوب مبارک احترام کے ساتھ لیا اور سر آنکھوں پر رکھا، خط کھول کر پڑھا اور حضرت دحیہ کلبیؓ سے کہا کہ میں اس کا جواب کل دوں گا۔

حضرت دحیہ کلبیؓ کی تقریر

بعض سیرت نگاروں نے لکھا ہے کہ قیصر روم کے دربار میں پہنچ کر حضرت دحیہ کلبیؓ نے ایک مختصر تقریر بھی کی، جس کو قیصر روم نے دلچسپی اور صبر وتحمل کے ساتھ سنا، حضرت دحیہؓ نے اپنی تقریر کا آغاز یہاں سے کیا (ترجمہ و تلخیص)

اے قیصر روم

جس نے مجھے آپ کی طرف اپنا سفیر بنا کر بھیجا ہے وہ آپ سے کہیں بہتر ہے اور جس ذات نے ان کو اپنا نبی بناکر دنیا میں بھیجا ہے وہ ذات سب سے ارفع واعلیٰ ہے، میں جو کچھ کہوں آپ اسے تواضع وانکساری کے ساتھ سنیں اور خلوصِ دل کے ساتھ اس کا جواب دیں۔ قیصر روم نے کہا: آپ اپنی بات کہیں، میں ہمہ تن گوش ہوں، حضرت دحیہ کلبیؓ نے فرمایا: آپ جانتے ہیں کہ حضرت عیسیٰ علیہ السلام نماز پڑھا کرتے تھے، قیصر نے کہا: ہاں! میں یہ بات جانتا ہوں، حضرت دحیہؓ نے کہا، میں اس ذات وحدہ لاشریک کی طرف آپ کو بلاتا ہوں جس کے حکم سے اور جس کے لئے حضرت عیسیٰ علیہ السلام نمازیں پڑھتے تھے اور جس کے سامنے سر بہ سجود ہوا کرتے تھے، یہ وہ ذات ہے جس نے حضرت عیسیٰ کی تخلیق بلاظاہری سبب کے رحم مادر میں کی، یہ وہ ذات ہے جس نے تمام زمینیں اور تمام آسمان پیدا کئے، پھر میں آپ کو اس نبی ٔ اُمّی کی طرف بلاتا ہوں، جس کی بشارت حضرت موسیٰ اور حضرت عیسیٰ علیہما السلام نے دی ہے۔ آپ یہ بات خوب اچھی طرح جانتے ہیں، اگر آپ میری دعوت قبول کرلیتے ہیں تو آپ کے لیے دنیا کی کامیابی بھی ہے اور آخرت کی فلاح بھی ہے، بہ صورت دیگر آخرت میں آپ کے لیے کچھ نہ ہوگا، اور دنیامیں آپ کے ساتھ دوسرے بھی شریک ہوں گے، یقین کیجئے، آپ کا اور میرا پروردگار اپنے انکار کرنے والوں کو ہلاک کر دیتا ہے اور اپنی نعمتوں کو بدلتا رہتا ہے۔

(الروض الانف: ۴/۳۸۸)

اس تقریر کے بعد حضرت دحیہ کلبیؓ نے حضور صلی اللہ علیہ وسلم کا والا نامہ قیصر روم کے حوالے کیا، قیصر روم کے نام مکتوب مبارک کا مضمون یہ تھا: (ترجمہ)

بسم اللہ الرحمن الرحیم

’’اللہ کے بندے اور اس کے رسول محمدؐ کی طرف سے روم کے بادشاہ ہرقل کے نام، اس شخص پر سلامتی ہو جو ہدایت کی پیروی کرے، اما بعد! میں تمہیں کلمۂ اسلام کی دعوت دیتا ہوں، اسلام لے آؤ، امن وعافیت کے ساتھ رہوگے، اللہ تعالیٰ تمہیں دہرا اجر عطا فرمائے گا، اگر اسلام سے اعراض کروگے تو تمام رعایا کا گناہ تم پر ہوگا، اے اہل کتاب! ایک ایسی بات کی طرف آؤ جو ہمارے اور تمہارے درمیان مشترک ہے، اور وہ یہ ہے کہ ہم اللہ کے سوا کسی کی عبادت نہیں کریں گے، اور کسی کو اس کے ساتھ شریک نہیں ٹھہرائیں گے، اور اللہ کو چھوڑ کر ہم ایک دوسرے کو اپنا معبود نہیں بنائیں گے، اگر وہ اسلام قبول کرنے سے گریز نہ کریں تو آپ کہہ دیں کہ لوگو گواہ رہنا ہم تو مسلمان ہیں۔‘‘ (صحیح البخاری:۱/۸، رقم الحدیث: ۷)

اس خط کا مضمون تقریباً وہی ہے جو مقوقس کو لکھا گیا تھا، البتہ اس میں لفظ الاریسیین کا اضافہ ہے، شارحین حدیث نے اس کے مختلف معنی لکھے ہیں، بعض حضرات نے اس لفظ کا اطلاق کاشت کاروں پر کیا ہے، کیوں کہ اس زمانے میں رعایا کی بڑی تعداد کاشت کاری کے پیشے سے وابستہ تھی، امام ابوجعفر طحاویؒ کہتے ہیں کہ ہر قل کے ملک میں ایک فرقہ اس نام سے موجود تھا جو اللہ کی وحدانیت کا قائل تھا، مگر عبادت حضرت عیسیٰ علیہ السلام کی کرتا تھا۔ ویسے تو یہ دعوت عام تھی اور اس کی مخاطب رومی سلطنت کی کل رعایا تھی، لیکن بہ طور خاص اریسیین کا ذکر اس لئے کیا گیا کہ یہ لوگ بڑی تعداد میں تھے، ایک طرف تو ان کا دعویٰ یہ تھا کہ وہ موحد ہیں، اللہ کو ایک مانتے ہیں، دوسری طرف وہ اپنے نبی کو لائق عبادت سمجھتے تھے، چوتھی صدی ہجری میں آریوس نام کا ایک پادری گزرا ہے، یہ فرقہ اسی کے پیروکاروں کا ہے۔

(شرح النووی علی صحیح مسلم:۱۲/۱۰۹)

مقوقس کے نام خط میں بھی دہرے اجر کا ذکر ہے اور اس خط میں بھی قیصر روم سے فرمایا گیا ہے کہ اگر تم ایمان لے آئے تو تمہیں دہرا ثواب ملے گا، اہل کتاب کے لیے دوہرے اجر کا ذکر قرآن کریم میں ہے: اُوْلٰٓئِکَ یُؤْتَوْنَ أَجْرَہُمْ مَرَّتَیْنِ۔ ایک اجر اہل کتاب کو اس لئے ملنے والا ہے کہ وہ آسمانی شریعت پر ایمان رکھتے ہیں، اور حضرت عیسیٰ علیہ السلام کی پیروی کرتے ہیں، دوسرا اجر رسول اکرم صلی اللہ علیہ وسلم کی رسالت پر ایمان لانے اور آپؐ کی اتباع کرنے سے ملے گا۔

ابوسفیان اور قیصر روم کے درمیان مکالمہ

قیصر روم نے خط پڑھنے کے بعد اپنے آدمیوں سے کہا کہ صاحبِ مکتوب (صلی اللہ علیہ وسلم) کی قوم کے کچھ لوگ اگر ہمارے یہاں آئے ہوئے ہوں تو انہیں میرے پاس بلا کر لاؤ، میں رسول اللہ صلی اللہ علیہ وسلم کے بارے میں ان سے کچھ پوچھنا چاہتا ہوں۔

حضرت عبد اللہ بن عباسؓ کہتے ہیں کہ مجھ سے ابوسفیان بن حرب نے بیان کیا کہ میں اس مصالحت کے بعد جو رسول اللہ صلی اللہ علیہ وسلم کے اور قریش کے مابین (حدیبیہ کے موقع پر) ہوئی تھی قریش کے ایک تجارتی وفد کے ساتھ شام میں تھا، قیصر روم کے ہر کارے ہمیں ڈھونڈتے ہوئے شام کے ایک علاقے میں پہنچ گئے، اور انہوں نے ہمیں پالیا (شام کا یہ علاقہ غزہ تھا، جیسا کہ تاریخ کی کتابوں میں اس کی صراحت ہے، غزہ آج کل فلسطین کا ایک مشہور شہر ہے) یہ لوگ ہمیں لے کر ایلیاء (بیت المقدس) پہنچ گئے، اور ہمیں بادشاہ کے سامنے پیش کردیا، بادشاہ اپنے دربار میں بیٹھا ہوا تھا، اس کے سر پر تاج تھا، اور اس کے چاروں طرف روم کی بڑی بڑی ہستیاں موجود تھیں، بادشاہ نے اپنے مترجم سے کہا کہ ان لوگوں سے یہ معلوم کرو کہ ان میں سے کون اس شخص کے ساتھ نسبی قرابت رکھتا ہے۔ میں نے کہا کہ بہ اعتبار نسب کے میں اُن سے زیادہ قریب ہوں، بادشاہ نے مجھ سے پوچھا کہ رشتے میں تم ان کے کیا لگتے ہو؟ میں نے کہا کہ وہ میرے چچا زاد بھائی ہیں، میرے علاوہ کوئی دوسرا شخص بنی عبد مناف میں سے یہاں نہیں ہے۔ قیصر نے اپنے لوگوں سے کہا کہ اس شخص (ابوسفیان) کو میرے قریب لا کر بٹھاؤ، پھر میرے رفقاء سے کہا کہ وہ میرے پیچھے بیٹھ جائیں، پھر اپنے مترجم سے کہا کہ ان لوگوں سے (ابوسفیان کے ساتھیوں سے)کہہ دو کہ میں اس سے کچھ سوالات کروں گا، اگر یہ جھوٹ بولے تو تم لوگ اس کی تردید کردینا، ابوسفیان کہتے ہیں کہ خدا کی قسم! اگر مجھے اپنے ساتھیوں کے جھٹلانے پر اپنی ندامت اور شرمندگی کا خوف نہ ہوتا تو میں قیصر کے ہر سوال کا جواب جھوٹ سے دیتا، لیکن اس ڈر سے کہ کہیں میرے ساتھی مجھے جھوٹا نہ ٹھہرا دیں، میں نے قیصر کے ہر سوال کا جواب صحیح صحیح دیا، اس کے بعد قیصر روم نے اپنے ترجمان کے ذریعے مجھ سے یہ سوالات کئے

قیصر روم: تم لوگوں میں اس کا نسب کیسا ہے؟

ابوسفیان: وہ ہم میں اعلیٰ نسب کے ہیں۔

قیصر روم: کیا ان سے پہلے بھی تمہارے خاندان میں کسی نے نبوت کا دعوی کیا ہے؟

ابوسفیان :نہیں۔

قیصر روم: اچھا یہ بتلاؤ کہ نبوت کا دعوی کرنے سے قبل تم لوگوں نے انہیں کبھی کسی معاملے میں جھوٹا سمجھا یا وہ کبھی کسی معاملے میں جھوٹ بولے؟

ابوسفیان: نہیں۔

قیصر روم: ان کی پیروی قوم کے سربرآوردہ لوگ کرتے ہیں یا معاشرے کے کمزور اور غریب افراد؟

ابوسفیان: کمزور اور غریب افراد۔

قیصر روم: کیا ان کے متبعین تعدادمیں بڑھ رہے ہیں یا کم ہورہے ہیں؟

ابوسفیان: بڑھتے جارہے ہیں۔

قیصر روم: کیا کوئی شخص ان کے دین میں داخل ہونے کے بعد اس دین کو برا سمجھ کر مرتد بھی ہوا ہے؟

ابوسفیان: نہیں۔

قیصر روم: کیا وہ خلاف عہد بھی کوئی کام کرتے ہیں؟

ابوسفیان: نہیں، اب تک تو کوئی بد عہدی ان کی دیکھنے میں نہیں آئی، لیکن اب صلح ہوئی ہے، اور ہم وقفۂ مصالحت گزار رہے ہیں۔توقع ہے کہ اب وہ معاہدے کی خلاف ورزی کریں گے۔ (ابوسفیان کہتے ہیں کہ بس میں رسول اللہ صلی اللہ علیہ وسلم کی برائی میں یہ لفظ ہی کہہ سکا، اس سلسلے میں مجھے یہ خوف بھی نہ تھا کہ میرے ساتھی اس کی تردید کریں گے۔)

قیصر روم: کیا تم نے ان سے اور انہوں نے تم سے جنگ بھی کی ہے؟

ابوسفیان: ہاں! ہم نے ایک دوسرے کے خلاف جنگیں بھی لڑی ہیں۔

قیصر روم:ان جنگوں کا نتیجہ کیا رہا؟

ابوسفیان: نتیجہ تو برابر سرابر سا ہی رہا، کبھی ہم ان پر غالب آگئے اور کبھی وہ ہم پر غالب آگئے۔

قیصر روم: تمہیں وہ کن باتوں کا حکم دیتے ہیں؟

ابوسفیان: وہ ہمیں یہ حکم دیتے ہیں کہ ہم صرف اللہ کی عبادت کریں، اس کے ساتھ کسی کو شریک نہ ٹھہرائیں، وہ ہمیں ان بتوں کی پوجا کرنے سے روکتے ہیں جن کی پرستش ہمارے آباء واجداد کرتے رہے ہیں، وہ ہمیں نماز کا، صدقہ وخیرات کا، پاک دامنی کا، وفائِ عہدکا، اور اداء ِامانت کا حکم بھی دیتے ہیں۔(جاری)

-----------

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے