New Age Islam
Mon Sep 27 2021, 10:16 PM

Urdu Section ( 28 Oct 2020, NewAgeIslam.Com)

Comment | Comment

Jamia Millia Islamia - Journey Of A Century جامعہ ملیہ اسلامیہ کا 100 سالہ سفر

ڈاکٹر محمد نجیب قاسمی سنبھلی ، نیو ایج اسلام

کمزور طبقہ خاص کر مسلمانوں کی تعلیمی پسماندگی دور کرنے میں جامعہ ملیہ اسلامیہ، دہلی کا اہم کردار

29 اکتوبر 1920 کی قائم شدہ ”جامعہ ملیہ اسلامیہ“ کو آج (29 اکتوبر 2020) 100 سال مکمل ہوگئے۔ ہمارے اسلاف کے خلوص اوراُن کی عظیم قربانیوں نے اس ادارہ کو ایسے بلند مقام تک پہنچادیا کہ آج جامعہ ملیہ اسلامیہ نہ صرف ہندوستان بلکہ دنیا کی معیاری یونیورسٹیوں میں سے ایک شمار کی جاتی ہے۔ 9 فیکلٹیوں، ماس کمیونیکیشن جیسے مختلف سینٹروں اور پانچ اسکولوں پر مشتمل اس وقت جامعہ میں مختلف مذاہب کے 25000 طلبہ وطالبات بالخصوص مسلمان بچے تعلیم حاصل کررہے ہیں۔ جامعہ ملیہ اسلامیہ میں اسی ماہ تین اہم نئے شعبہ کھولے گئے ہیں: 1)Foreign Languages۔ 2) Hospital Management۔ 3) Environment Science۔ ان شاء اللہ ترقی کا یہ سلسلہ جاری رہے گا۔ غرضیکہ نرسری سے پی ایچ ڈی تک ہرمرحلہ کی تعلیم جامعہ ملیہ اسلامیہ میں دی جاتی ہے۔ جامعہ میں لاکھوں کتابوں پر مشتمل ڈاکٹر ذاکر حسین لائبریری ہے، جو نئے طرز پر سعودی عرب کے بادشاہ شاہ سلمان بن عبدالعزیز کے 3 ملین ڈالر کے عطیہ سے 2006 میں تیار ہوئی ہے۔

عرصہ دراز سے جامعہ ملیہ اسلامیہ میں ایک میڈیکل کالج کا مطالبہ کیا جارہا ہے، مختلف حکومتوں کی طرف سے وعدے وعود بھی کئے گئے، خاص کر اکھلیش یادو کی سابقہ حکومت نے اس کا مکمل یقین دلایا تھا کہ جامعہ کیمپس سے متصل اترپردیش سرکار کی خالی جگہ میڈیکل کالج اور ہسپتال کے لئے دی جائے گی مگر ابھی تک اس پر کوئی پیش رفت نہ ہوسکی۔ جامعہ ملیہ اسلامیہ کے 100 سال مکمل ہونے کی مناسبت پر ہم موجودہ سرکار سے مطالبہ کرتے ہیں کہ مہاتما گاندھی کی تایید سے شیخ الہند مولانا محمود حسن کی سرپرستی میں مجاہدین آزادی کے ذریعہ قائم کردہ جامعہ ملیہ اسلامیہ میں میڈیکل کالج کے لئے زمین اور درکار رقم کی فراہمی کا انتظام کیا جائے۔

اگست 2020 میں ہندوستان کی مرکزی وزارتِ تعلیم نے ملک کی سینٹرل یونیورسٹیوں کی جو فہرست جاری کی تھی اس میں جامعہ ملیہ اسلامیہ، نئی دہلی کا نام سرفہرست تھا، یعنی 2020 میں جامعہ ملیہ اسلامیہ ہندوستان کی سب سے معیاری یونیورسٹی ہے۔ جامعہ ملیہ اسلامیہ نے 90 فیصد نمبرات حاصل کرکے پہلی پوزیشن حاصل کی جبکہ راجیو گاندھی یونیورسٹی، جواہر لعل نہرو یونیورسٹی اور علی گڑھ مسلم یونیورسٹی نے بالترتیب 83 فیصد، 82 فیصد اور 78 فیصد نمبرات حاصل کئے۔ یہی وہ جامعہ ہے جسے 2019 کے اواخر اور 2020 کی ابتدا میں بعض شر پسند عناصر نے بدنام کرنے کی مذموم کوشش کی تھی۔ مگر قابل مبارک باد ہیں جامعہ کی انتظامیہ، اساتذہ اور طلبہ جنہوں نے ملک مخالف طاقتوں کی گولیوں کا جواب گولی سے نہ دے کر تعلیم کے زیور سے آراستہ ہوکر دیا۔ ملک میں مختلف درپیش مسائل کا مقابلہ ہم تعلیم حاصل کرکے ہی کرسکتے ہیں۔

1920 میں مہاتما گاندھی کی سرپرستی میں شیخ الہند حضرت مولانا محمود حسن کے دست مبارک سے قائم جامعہ ملیہ اسلامیہ آج دنیا کی اہم یونیورسٹیوں میں سے ایک ہے، جس کے قیام اور اس کی آبیاری کے لئے حکیم اجمل خان، ڈاکٹر مختار احمد انصاری، عبدالمجید خواجہ، مولانا محمد علی جوہر، ڈاکٹر ذاکر حسین، پروفیسر محمد مجیب اور دیگر اکابرین کی خدمات کو ہمیشہ یاد رکھا جائے گا۔ جامعہ ملیہ اسلامیہ صرف ایک تعلیمی درسگاہ نہیں بلکہ مختلف علوم وفنون کا ایسا علمی گہوارہ ہے جسے ہمارے اسلاف نے خون جگر سے سینچا اور پروان چڑھایا۔ اِس ادارہ کی یہ خصوصیت ہے کہ اس کے بانیان ہندوستان کی جنگ آزادی میں بھرپور حصہ لینے والے ہیں۔ جامعہ کا قیام اُس وقت اور اُن حالات میں عمل میں آیا جب آزادی کی تحریک اپنے شباب پر تھی۔ جامعہ کے اکابرین آزادی کی تحریک سے براہِ راست جڑے ہوئے تھے۔ غرضیکہ جامعہ ملیہ اسلامیہ کا قیام ہندوستان کی جنگ آزادی کے بطن سے ہوا ہے۔ اسی وجہ سے جامعہ کے خمیر میں سیکولرازم، آزادی، حب الوطنی، روشن خیالی اور رواداری پہلے ہی دن سے موجود ہے۔ جامعہ کے قیام کا مقصد جہاں اقلیتوں میں تعلیمی پسماندگی کو دور کرنا ہے وہیں اردو زبان کا فروغ بھی اہم مقصد ہے، اسی وجہ سے ابتدا ہی سے بڑے بڑے اردو شعراء وادباء جامعہ ملیہ اسلامیہ کی زیارت کیا کرتے تھے۔

اس وقت جامعہ ملیہ اسلامیہ پوری دنیا میں تعلیمی میدان میں خاص شناحت رکھتی ہے۔ جامعہ سے تعلیم حاصل کرکے ہزاروں نہیں بلکہ لاکھوں افراد اندرون و بیرون ملک بڑے بڑے عہدوں پر فائض ہوکر جہاں برسر روزگار ہیں وہیں قوم وملت کی خدمات انجام دے رہے ہیں۔ دنیا کی عظیم شخصیات کو جامعہ نے ڈاکٹریٹ کی اعزازی ڈگری سے بھی نوازا ہے۔ جامعہ کے متعدد شعبوں بالخصوص انجینئرنگ کالج، ٹیچرس ٹریننگ کالج، ماس کمیونیکیشن سینٹر، سوشل ورک ڈیپارٹمنٹ، شعبہ عربی، شعبہ اردو وغیرہ کو پوری دنیا میں ایک خاص مقام حاصل ہے۔ جامعہ کے طلبہ دنیا کے چپہ چپہ پر مختلف میدانوں میں جامعہ ملیہ اسلامیہ کا نام روشن کررہے ہیں۔

جناب سرسید احمد خان نے علی گڑھ میں ایک تعلیمی ادارہ کی بنیاد رکھی تھی، لیکن اس حقیقت کا انکار نہیں کیا جاسکتا ہے کہ سرسید احمد خان کو انگریزوں سے قربت حاصل تھی۔ اس لئے مجاہدین آزادی کو اس پر تشویش تھی، لہٰذا ہندوستان کی جنگ آزادی میں حصہ لینے والوں نے بھی علی گڑھ میں ہی ایک تعلیمی ادارہ ”جامعہ ملیہ اسلامیہ“ کی بنیاد 29 اکتوبر 1920 کو علی گڑھ کالج کی جامع مسجد میں رکھی۔ پانچ سال کے بعد 1925 میں جامعہ دہلی کے قرول باغ کے کرایہ کے مکانوں میں منتقل ہوئی، جہاں جامعہ میں ایک وقت ایسا بھی آیا کہ قریب تھا کہ جامعہ ملیہ اسلامیہ کو بند کردیا جائے مگر منتسبینِ جامعہ کی ایک ٹیم آگے بڑھی اور اپنی خدمات پیش کرکے انہوں نے جامعہ کو نہ صرف مشکل وقت سے باہر نکالا بلکہ ترقی کی راہ پر گامزن کردیا۔ 1935 میں جامعہ اوکھلا میں منتقل ہوئی جہاں محبين جامعہ نے زمینیں خرید خرید کر جامعہ کے لئے وقف کیں۔ 1962 میں جامعہ کو یونیورسٹی اور 26 دسمبر 1988 کو مرکزی یونیورسٹی کا درجہ حاصل ہوا۔ جامعہ کے نام سے اسلامیہ کا لفظ نکالنے کی بھی کوشش ہوئی مگر محبین جامعہ خاص کر مہاتما گاندھی نے اس کی سختی کے ساتھ مخالفت کی۔ غرضیکہ اکابرین ملت نے اپنی جان ومال ووقت کی قربانی سے جامعہ ملیہ اسلامیہ کو سینچا ہے جو آج الحمد للہ روشن چراغ کے مانند پورے ملک کو روشن کررہا ہے۔ علی گڑھ مسلم یونیورسٹی کے بعد جامعہ ملیہ اسلامیہ ہی ایسی عظیم سرکاری یونیورسٹی ہے جس نے ہندوستانی مسلمانوں کو تعلیم کے زیور سے آراستہ کرنے میں اہم کردار ادا کیا ہے۔

جامعہ ملیہ اسلامیہ اب ہندوستان کی مایہ ناز مرکزی یونیورسٹی ہے جہاں نہ صرف مسلمانوں کے مختلف مسلکوں سے وابستہ ہزاروں طلبہ پڑھتے ہیں بلکہ مختلف مذاہب کے ماننے والے بھی اس سیکولر ادارہ میں زیر تعلیم ہیں۔ جامعہ کے قیام کے دوران مختلف افکار ونظریات رکھنے والوں کے ساتھ میل جول کے ذریعہ دوسروں کے ساتھ حسن سلوک، رواداری، خیر سگالی، انسان دوستی، تحمل اور برداشت کرنے جیسی اہم صفات ہمارے اندر پیدا ہوئیں یا اُن میں تقویت حاصل ہوئی۔

جامعہ زندہ آباد

URL: https://www.newageislam.com/urdu-section/jamia-millia-islamia-journey-century/d/123300


New Age IslamIslam OnlineIslamic WebsiteAfrican Muslim NewsArab World NewsSouth Asia NewsIndian Muslim NewsWorld Muslim NewsWomen in IslamIslamic FeminismArab WomenWomen In ArabIslamophobia in AmericaMuslim Women in WestIslam Women and Feminism


Loading..

Loading..