Sat Oct 12 2024, 02:27 AM

Urdu Section ( 7 Feb 2022, NewAgeIslam.Com)

No Excuse Would Be Acceptable To Allah If the Holy Prophet (PBUH) Was Harmed Part - 69 اگر نبیؐ کی ذاتِ اقدس کو کوئی گزند پہنچی تو اللہ کے نزدیک تمہارا کوئی عذر قابل قبول نہیں ہوگا

مولانا ندیم الواجدی

4 فروری 2022

حضرت سعد بن الربیعؓ کی شہادت

جب قریش چلے گئے اور میدان خالی ہوگیا تو رسول اللہ صلی اللہ علیہ وسلم نے صحابہؓ سے فرمایا کہ تم میں سے کون ہے جو سعد بن الربیعؓ کی خبر لائے۔ حضرت ابی بن ابی کعبؓ نے عرض کیا: یارسولؐ اللہ! آپؐ کے حکم کی تعمیل کے لئے میں جاتا ہوں۔ آپؐ نے فرمایا: اگر سعدؓ مل جائیں تو ان سے میرا سلام کہنا، اور یہ کہنا کہ رسول اللہ ﷺ نے دریافت فرمایا ہے کہ تم اس وقت اپنے آپ کو کیسا محسوس کررہے ہو۔ حضرت أبی بن کعبؓ انہیں تلاش کرتے ہوئے ایک جگہ پہنچے، سعد بن الربیعؓ زخمی حالت میں پڑے ہوئے تھے، ابھی ان کے جسم میں زندگی کی رمق باقی تھی، اگرچہ پورا بدن زخموں سے چور تھا، أبی بن کعبؓ نے رسول اللہ علیہ وسلم کا سلام اور پیغام پہنچایا۔ جواب میں انہوں نے عرض کیا: رسول اللہ ﷺ پر بھی سلام ہو اور تم پر بھی، اے ابی بن کعبؓ! تم واپس جاکر یہ عرض کردینا کہ یا رسولؐ اللہ! میں اس وقت جنت کی خوشبو سونگھ رہا ہوں، میری قوم سے کہنا کہ اگر تم میں سے کسی کے پاس دیکھنے والی آنکھ سلامت ہو اور رسول اللہ صلی اللہ علیہ وسلم کی ذات اقدس کو کوئی گزند پہنچ جائے تو اللہ کے نزدیک تمہارا کوئی عذر قابل قبول نہیں ہوگا۔ یہ کہہ کر ان کی روح پرواز کر گئی۔ (السیرۃ الحلبیہ: ۲/۵۳۲) حضرت ابی بن کعبؓ کہتے ہیں کہ میں واپس رسول اللہ صلی اللہ علیہ وسلم کی خدمت میں حاضر ہوا، اور جو کچھ سعدؓ کی کیفیت میں نے دیکھی وہ بیان کی، اور انتقال سے پہلے جو پیغام انہوں نے دیا تھا وہ پہنچایا۔ آپؐ نے ارشاد فرمایا! اللہ سعدؓ پر رحم فرمائے، وہ اللہ اور اس کے رسول کے خیر خواہ رہے، زندگی میں بھی اور موت کے وقت بھی۔ (الاستیعاب: ۲/۳۵)

حضرت عبد اللہ بن جحشؓ کی شہادت

حضرت سعد بن أبی وقاصؓ فرماتے ہیں کہ اُحد کے دن عبد اللہ بن جحشؓ نے مجھ سے کہا کہ آؤ کہیں بیٹھ کر دُعا مانگتے ہیں، تم میری دُعا پر آمین کہنا، میں تمہاری دُعا پر آمین کہوں گا، چنانچہ ہم دونوں ایک گوشے میں جاکر بیٹھ گئے، وہاں ہم دونوں کے علاوہ کوئی نہیں تھا، پہلے میں نے دُعا کی: اے اللہ! آج میرا سامنا کسی ایسے دشمن سے ہو جو نہایت بہادر اور طاقتور ہو، اور غضبناک بھی ہو، میں اس کا مقابلہ کروں ، وہ بھی میرا مقابلہ کرے، یہاں تک کہ مجھے اس پر فتح حاصل ہوجائے، میں اس کو موت کے گھاٹ اتار دوں، اور اس کا سامان چھین لوں۔ میری دُعا پر عبد اللہ بن جحشؓ نے آمین کہی۔ اس کے بعد عبد اللہ نے دُعا کی: اے اللہ! آج میرا مقابلہ میرے کسی ایسے دشمن سے ہو جو نہایت دلیر اور شجاع ہو اور جس کا غصہ ساتویں آسمان پر ہو، میں اس سے لڑوں اور وہ مجھ سے لڑے یہاں تک وہ مجھ پر غالب آجائے، مجھے قتل کردے، اور میرے ناک کان کاٹ لے، پھر جب میں تجھ سے ملوں اور تو پوچھے کہ تیری یہ حالت کیسے ہوئی تو میں عرض کروں: اے اللہ! یہ سب کچھ تیری خاطر اور تیرے رسولؐ کی خاطر ہوا، میری یہ بات سن کر تو یہ فرمائے کہ عبد اللہ نے سچ کہا۔سعد بن أبی وقاصؓ کہتے ہیں کہ عبد اللہ بن جحشؓ کی یہ دُعا میری دُعا سے بہتر تھی۔ شام کو میں نے دیکھا کہ وہ ایک جگہ مقتول پڑے ہوئے ہیں، ان کی ناک اور کان کٹے ہوئے ہیں اور ایک دھاگے میں پرو کر ان کو لٹکا دیا گیا ہے۔ (السیرۃ النبویہ ص:۳۹۴)

حضرت سعید بن المسیبؓ فرماتے ہیں کہ اللہ تعالیٰ نے عبد اللہ بن جحشؓ کی دعائے شہادت قبول فرمائی، اور جس طرح کی شہادت وہ چاہتے تھے انہیں ویسے ہی شہادت عطا فرمائی، میں امید کرتا ہوں کہ اللہ تعالیٰ نے ان کی دوسری دُعا بھی قبول فرمائی ہوگی، یعنی جب وہ اپنے رب سے ملے ہوں گے تو ان کے رب نے یہ سوال کیا ہوگا کہ اے عبد اللہ! تمہاری یہ حالت کیسے ہوئی، انہوں نے جواب میں عرض کیا ہوگا: یا اللہ میرا یہ حال تیری راہ میں اور تیرے رسول کے راستے میں ہوا، ان کے رب نے فرمایا ہوگا تم سچ کہتے ہو۔ (المستدرک للحاکم: ۳/۳۰)۔ بعد میں حضرت عبداللہ بن جحشؓ مُجَدَّعٌ في اللّٰہ کے لقب سے مشہور ہوئے۔ اس کے معنی ہیں وہ شخص جس کے کان ناک اللہ کی راہ میں کاٹ دیئے گئے ہوں، یہ قصہ نقل کرنے کے بعد علامہ ابن القیمؒ لکھتے ہیں کہ اس واقعے سے اللہ کے راستے میں جام شہادت نوش کرنے کی دُعا مانگنے کا جواز ملتا ہے، حالانکہ حدیث میں موت کی تمنا کرنے سے منع فرمایا گیا ہے، مگر وہ ممانعت اس تمنا کی ہے جو زندگی کے مصائب سے گھبراکر کی جاتی ہے۔ (زاد المعاد: ۳/۲۱۲)

حضرت مصعب بن عمیرؓ

ان کا ذکر پہلے بھی آچکا ہے۔ رسول اللہ صلی اللہ علیہ وسلم کے ساتھ بے حد مشابہت رکھتے تھے جب میدان کارزار میں شہید کردیئے گئے تو یہ افواہ پھیل گئی کہ رسولؐ اللہ کو شہید کردیا گیاہے۔ حضرت مصعب بن عمیرؓ نہ صرف یہ کہ حسین وجمیل انسان تھے بلکہ خوش لباس بھی تھے، لیکن اسلام کی خاطر سب کچھ چھوڑ چھاڑ کر مدینے آگئے۔ حضرت خباب بن الارتؓ کہتے ہیں کہ ہم نے اللہ کے رسولؐ کے ساتھ اللہ کی راہ میں ہجرت کی تو ہم اللہ کی رضا کے طلب گار تھے، اور اللہ کے ذمے ہمارے اس عمل کا اجر واجب ہوگیا، ادھر ہم میں سے کچھ لوگ اپنی زندگی پوری کرچکے تھے مگر انہوں نے اس دنیا میں اپنے اس اجر (مال غنیمت میں) سے کوئی چیز نہیں کھائی، مصعبؓ انہی لوگوں میں شامل ہیں، وہ یوم احد کو شہید ہوئے تو انہیں کفن دینے کے لئے ایک چادر کے سوا کچھ نہ تھا، ہم اس چادر سے ان کے پاؤں ڈھانپتے تو سر کھل جاتا اور سر ڈھانپتے تو پاؤں کھل جاتے۔ رسول اللہ صلی اللہ علیہ وسلم نے یہ دیکھ کر فرمایا کہ چادر کو ان کے سر کی جانب سے اوپر ڈال دو اور قدموں پر اذخر گھاس ڈال دو۔ (صحیح البخاری : ۲/۷۷، رقم الحدیث: ۱۲۷۶) حضرت ابوہریرہؓ فرماتے ہیں کہ جب رسولؐ اللہ احد سے واپس ہونے لگے تو حضرت مصعب بن عمیرؓ کے جسد خاکی کے پاس سے بھی گزرے، آپ وہاں ٹھہر گئے، ان کیلئے دُعائے مغفرت فرمائی اور یہ آیت تلاوت فرمائی:

’’انہی ایمان والوں میں سے وہ لوگ ہیں جنہوں نے اللہ سے جو عہد کیا تھا اسے سچا کردکھایا، پھر ان میں سے کچھ وہ ہیں جنہوں نے اپنا نذرانہ پورا کردیا اور کچھ وہ ہیں جو ابھی انتظار میں ہیں۔‘‘ (الاحزاب: ۲۳)

اس کے بعد آپؐ نے ارشاد فرمایا: میں اس بات کی گواہ دیتا ہوں کہ قیامت کے دن یہ لوگ اللہ کے نزدیک شہیدوں میں شمار ہوں گے، ان کے پاس آمد ورفت رکھنا، ان کی زیارت کرتے رہنا، اس ذات کی قسم جس کے قبضے میں میری جان ہے قیامت تک یہ لوگ تمہارے سلام کا جواب دیتے رہیں گے۔ (المستدرک للحاکم: ۳/۲۰۰)

حضرت عبد اللہ بن عمرو بن حرامؓ کی شہادت

آپؓ، حضرت جابرؓ کے والد ہیں۔ غزوۂ احد میں شوقِ شہادت دل میں لے کر شریک ہوئے، جاتے ہوئے اپنے بیٹے سے کہا: اے بیٹے! اگر یہ تمہاری بہنیں نہ ہوتیں تو میں چاہتا کہ تم میری آنکھوں کے سامنے دشمنوں کے ہاتھوں مار دیئے جاؤ۔ (صحیح البخاری: ۲/۹۳، رقم الحدیث: ۱۳۵۱) یہ بھی فرمایا: میں خود کو رسول اللہ صلی اللہ علیہ وسلم کے ان اصحاب میں دیکھ رہا ہوں جو سب سے پہلے قتل کئے جائیں گے، میں اپنے بعد رسول اللہ صلی اللہ علیہ وسلم جیسی عزیز از جان شخصیت چھوڑ کر جارہا ہوں، میرے اوپر کچھ قرض ہے اسے ادا کردینا، اور یہ تمہاری بہنیں ہیں ان کے ساتھ حسن سلو ک کرنا۔ (صحیح البخاری: ۲/۹۳، رقم الحدیث: ۱۳۵۱) اس کے بعد غزوے میں شریک ہوئے اور شہید ہوگئے، کافروں نے ان کا مثلہ کیا، حضرت جابرؓ کہتے ہیں احد کے دن جب میرے والد شہید ہوگئے اور ان کی لاش میرے سامنے آئی تو میں نے روتے ہوئے ان کا چہرہ دیکھنا چاہا، صحابہؓ نے مجھے منع کیا، لیکن رسول اللہ صلی اللہ علیہ وسلم نے مجھے دیکھنے کی اجازت دے دی، اس موقع پرمیری پھوپھی فاطمہ بنت عمروؓ رونے لگیں، آپ ﷺ نے ارشاد فرمایا: روتی کیوں ہو، فرشتے اپنے پروں کے سائے میں ان کو اٹھا کر لے گئے ہیں۔ (صحیح البخاری: ۲/۷۲، رقم الحدیث: ۱۲۴۴)

حضرت جابرؓ روایت کرتے ہیں کہ ایک دن رسول اللہ صلی اللہ علیہ وسلم نے مجھے شکستہ دل اور آزردہ خاطر دیکھا تو فرمایا کیا بات ہے اے جابر! میں تمہیں کچھ دل شکستہ اور غم زدہ دیکھ رہا ہوں۔ میں نے عرض کیا: یارسولؐ اللہ! میرے والد شہید ہوگئے ہیں، انہوں نے عیال چھوڑے ہیں جن کی کفالت مجھے کرنی ہے اور قرض بھی چھوڑا ہے جس کی ادائیگی میرے ذمے ہے۔ آپؐ نے فرمایا: کیا میں تمہیں یہ خوشخبری نہ سناؤں کہ اللہ نے تمہارے والد کے ساتھ کیا معاملہ فرمایا: میں نے عرض کیا: یارسولؐ اللہ! ضرور سنائیں، فرمایا: اللہ تعالیٰ کسی سے رو برو گفتگو نہیں کرتا، مگر اللہ نے تمہارے باپ کو زندہ کیا، پھر ان سے پوچھا! اے میرے بندے۱ بتا تیری تمنا کیا ہے، میں اسے پورا کروں گا۔ تمہارے والد نے کہا! میری صرف یہ تمنا ہے کہ تو مجھے زندہ کردے، اور میں تیرے راستے میں دوبارہ قتل کیا جاؤں۔ اللہ رب العزت نے ارشاد فرمایا: یہ نہیں ہوسکتا، کیوں کہ یہ طے ہوچکا ہے کہ مرنے کے بعد کسی کو زندہ واپس نہیں بھیجا جائے گا۔ (صحیح ابن ماجہ: ۱/۶۸، رقم الحدیث: ۱۹۰، سنن الترمذی کتاب التفسیر سورہ آل عمران: ۵/۲۳۰، رقم الحدیث: ۳۰۱۰)

غزوۂ احد سے پہلے حضرت عبد اللہ بن عمرو بن حرامؓ نے ایک خواب دیکھا تھا۔ کہتے ہیں کہ میں نے بشیر بن المنذر کو خواب میں دیکھا کہ وہ کہہ رہے ہیں کہ تم چند دنوں میں ہمارے پاس آنے والے ہو۔ میں نے کہا: تم اس وقت کہاں ہو؟ انہوں نے کہا: میں جنت میں ہوں، ہم لوگ جہاں چاہتے ہیں گھومتے ہیں، پھرتے ہیں اور لطف اندوز ہوتے ہیں۔ میں نے کہا کہ تمہیں تو بدر کی جنگ میں قتل کردیا گیا تھا، انہوں نے کہا: ہاں! لیکن اللہ نے مجھے زندہ کردیا۔ میں نے یہ خواب رسول اللہ صلی اللہ علیہ وسلم کی خدمت میں عرض کیا، آپ نے فرمایا: اے ابو جابرؓ! شہادت اس کی تعبیرہے۔ (زاد المعاد: ۳/۲۰۹)

حضرت خیثمہ ابو سعدؓ کی شہادت

یہ ایک عمر رسیدہ صحابی ؓتھے، فرماتے ہیں کہ میرا بیٹا سعد غزوۂ بدر میں شریک ہوا اور شہید ہوگیا، میرا دل بھی چاہتا تھا کہ میں غزوۂ بدر میں شریک ہوں، بیٹے کی بھی یہی خواہش تھی، ہم دونوں کے درمیان قرعہ اندازی ہوئی، اس کا نام نکل آیا اور وہ رسول اللہ صلی اللہ علیہ وسلم کے ساتھ چلا گیا، اللہ نے اس کی قسمت میں شہادت لکھی تھی، رات میں نے اسے خواب میں دیکھا کہ وہ بہترین حلئے میں ہے اور جنت کے باغوں میں ٹہل ر ہا ہے۔ مجھے دیکھ کر کہنے لگا! ابا جان! آپ بھی ہمارے پاس جنت میں آجائیں، اللہ نے مجھ سے جو وعدے کئے تھے وہ سب پورے ہوچکے ہیں۔ میں نے رسول اللہ صلی اللہ علیہ وسلم کی خدمت میں حاضر ہوکر یہ خواب بیان کیا اور عرض کیا: یارسولؐ اللہ! میرا دل جنت میں اپنے بیٹے کی رفاقت کے لئے بے چین وبے قرار ہے، حالاں کہ میں عمر رسیدہ انسان ہوں، میری ہڈیاں گھل چکی ہیں، آپؐ میرے لئے دُعا فرمادیں کہ مجھے بھی شہادت کی موت اور جنت میں سعد کی رفاقت نصیب ہو۔ رسول اللہ صلی اللہ علیہ وسلم نے دُعا فرمائی، حضرت خیثمہؓ اُحد کی جنگ میں شریک ہوئے اور شہادت سے سرفراز ہوئے۔ (زاد المعاد: ۳/۳۰۸) (جاری)

4 فروری 2022، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے